క్వ ప్రాసూత కదా త్వాం గౌరీ న ప్రామాణ్యం తవ జననే |
విప్రాః ప్రాహురజం గణరాజం యః ప్రాచామపి పూర్వతమః || ౧ ||
నాసి గణపతే శంకరాత్మజో భాసి తద్వదేవాఖిలాత్మకః |
ఈశతా తవానీశతా నృణాం కేశవేరితా సాశయోక్తిభిః || ౨ ||
గజముఖ తావకమంత్ర మహిమ్నా సృజతి జగద్విధిరనుకల్పమ్ |
భజతి హరిస్త్వాం తదవనకృత్యే యజతి హరోఽపి విరామవిధౌ || ౩ ||
సుఖయతి శతమఖముఖసురనికరానఖిలక్రతు విఘ్నఘ్నోఽయమ్ |
నిఖిలజగజ్జీవకజీవనదః స ఖలు యతః పర్జన్యాత్మా || ౪ ||
ప్రారంభే కార్యాణాం హేరంబం యో ధ్యాయేత్ |
పారం యాత్యేవ కృతేరారాదాప్నోతి సుఖమ్ || ౫ ||
గౌరీసూనోః పాదాంభోజే లీనా చేతోవృత్తిర్మే |
ఘోరే సంసారారణ్యే వాసః కైలాసే వాస్తు || ౬ ||
గుహగురు పదయుగమనిశమభయదమ్ |
వహసి మనసి యది శమయసి దురితమ్ || ౭ ||
జయ జయ శంకరవరసూనో భయహర భజతాం గణరాజ |
నయ మమ చేతస్తవ చరణం నియమయ ధర్మేఽంతః కరణమ్ || ౮ ||
చలసి చిత్త కిన్ను విషమవిషయకాననే
కలయ వృత్తిమమృత దాతృకరివరాననే |
తులయ ఖేదమోదయుగళమిదమశాశ్వతం
విలయ భయమలంఘ్యమేవ జన్మని స్మృతమ్ || ౯ ||
సోమశేఖరసూనవే సిందూరసోదరభానవే
యామినీపతిమౌళయే యమిహృదయవిరచితకేళయే |
మూషకాధిపగామినే ముఖ్యాత్మనోఽంతర్యామినే
మంగళం విఘ్నద్విషే మత్తేభవక్త్రజ్యోతిషే || ౧౦ ||
అవధీరితదాడిమసుమ సౌభగమవతు గణేశజ్యోతి-
-ర్మామవతు గణేశజ్యోతిః |
హస్తచతుష్టయధృత వరదాభయ పుస్తకబీజాపూరం
ధృత పుస్తకబీజాపూరమ్ || ౧౧ ||
రజతాచల వప్రక్రీడోత్సుక గజరాజాస్యముదారం
భజ శ్రీగజరాజాస్యముదారమ్ |
ఫణిపరికృత కటివలయాభరణం కృణు రే జనహృదికారణం
తవ కృణు రే జనహృదికారణమ్ || ౧౨ ||
యః ప్రగే గజరాజమనుదినమప్రమేయమనుస్మరేత్ |
స ప్రయాతి పవిత్రితాంగో విప్రగంగాద్యధికతామ్ || ౧౩ ||
సుబ్రహ్మణ్యమనీషివిరచితా త్వబ్రహ్మణ్యమపాకురుతే |
గణపతిగీతా గానసముచితా సమ్యక్పఠతాం సిద్ధాంతః || ౧౪ ||
ఇతి శ్రీసుబ్రహ్మణ్యయోగి విరచిత శ్రీ గణపతి గీతా ||
क्व प्रासूत कदा त्वां गौरी न प्रामाण्यं तव जनने ।
विप्राः प्राहुरजं गणराजं यः प्राचामपि पूर्वतमः ॥ १ ॥
नासि गणपते शङ्करात्मजो भासि तद्वदेवाखिलात्मकः ।
ईशता तवानीशता नृणां केशवेरिता साशयोक्तिभिः ॥ २ ॥
गजमुख तावकमन्त्र महिम्ना सृजति जगद्विधिरनुकल्पम् ।
भजति हरिस्त्वां तदवनकृत्ये यजति हरोऽपि विरामविधौ ॥ ३ ॥
सुखयति शतमखमुखसुरनिकरानखिलक्रतु विघ्नघ्नोऽयम् ।
निखिलजगज्जीवकजीवनदः स खलु यतः पर्जन्यात्मा ॥ ४ ॥
प्रारम्भे कार्याणां हेरम्बं यो ध्यायेत् ।
पारं यात्येव कृतेरारादाप्नोति सुखम् ॥ ५ ॥
गौरीसूनोः पादाम्भोजे लीना चेतोवृत्तिर्मे ।
घोरे संसारारण्ये वासः कैलासे वास्तु ॥ ६ ॥
गुहगुरु पदयुगमनिशमभयदम् ।
वहसि मनसि यदि शमयसि दुरितम् ॥ ७ ॥
जय जय शङ्करवरसूनो भयहर भजतां गणराज ।
नय मम चेतस्तव चरणं नियमय धर्मेऽन्तः करणम् ॥ ८ ॥
चलसि चित्त किन्नु विषमविषयकानने
कलय वृत्तिममृत दातृकरिवरानने ।
तुलय खेदमोदयुगलमिदमशाश्वतं
विलय भयमलङ्घ्यमेव जन्मनि स्मृतम् ॥ ९ ॥
सोमशेखरसूनवे सिन्दूरसोदरभानवे
यामिनीपतिमौलये यमिहृदयविरचितकेलये ।
मूषकाधिपगामिने मुख्यात्मनोऽन्तर्यामिने
मङ्गलं विघ्नद्विषे मत्तेभवक्त्रज्योतिषे ॥ १० ॥
अवधीरितदाडिमसुम सौभगमवतु गणेशज्योति-
-र्मामवतु गणेशज्योतिः ।
हस्तचतुष्टयधृत वरदाभय पुस्तकबीजापूरं
धृत पुस्तकबीजापूरम् ॥ ११ ॥
रजताचल वप्रक्रीडोत्सुक गजराजास्यमुदारं
भज श्रीगजराजास्यमुदारम् ।
फणिपरिकृत कटिवलयाभरणं कृणु रे जनहृदिकारणं
तव कृणु रे जनहृदिकारणम् ॥ १२ ॥
यः प्रगे गजराजमनुदिनमप्रमेयमनुस्मरेत् ।
स प्रयाति पवित्रिताङ्गो विप्रगङ्गाद्यधिकताम् ॥ १३ ॥
सुब्रह्मण्यमनीषिविरचिता त्वब्रह्मण्यमपाकुरुते ।
गणपतिगीता गानसमुचिता सम्यक्पठतां सिद्धान्तः ॥ १४ ॥
इति श्रीसुब्रह्मण्ययोगि विरचित श्री गणपति गीता ॥