భక్తాభిలాషాచరితానుసారీ దుగ్ధాదిచౌర్యేణ యశోవిసారీ |
కుమారతానందితఘోషనారీ మమ ప్రభుః శ్రీగిరిరాజధారీ || ౧ ||
వ్రజాంగనాబృందసదావిహారీ అంగైర్గుహాంగారతమోఽపహారీ |
క్రీడారసావేషతమోఽభిసారీ మమ ప్రభుః శ్రీగిరిరాజధారీ || ౨ ||
వేణుస్వనానందితపన్నగారీ రసాతలానృత్యపదప్రచారీ |
క్రీడన్వయస్యాకృతిదైత్యమారీ మమ ప్రభుః శ్రీగిరిరాజధారీ || ౩ ||
పుళిందదారాహితశంబరారీ రమాసమోదారదయాప్రకారీ |
గోవర్ధనే కందఫలోపహారీ మమ ప్రభుః శ్రీగిరిరాజధారీ || ౪ ||
కళిందజాకూలదుకూలహారీ కుమారికాకామకలావతారీ |
బృందావనే గోధనబృందచారీ మమ ప్రభుః శ్రీగిరిరాజధారీ || ౫ ||
వ్రజేంద్రసర్వాధికశర్మకారీ మహేంద్రగర్వాధికగర్వహారీ |
బృందావనే కందఫలోపహారీ మమ ప్రభుః శ్రీగిరిరాజధారీ || ౬ ||
మనఃకలానాథ తమోవిదారీ వంశీరవాకారితతత్కుమారీ |
రాసోత్సవోద్వేలరసాబ్ధిసారీ మమ ప్రభుః శ్రీగిరిరాజధారీ || ౭ ||
మత్తద్విపోద్దామగతానుకారీ లుంఠత్ప్రసూనాప్రపదీనహారీ |
రామారసస్పర్శకరప్రసారీ మమ ప్రభుః శ్రీగిరిరాజధారీ || ౮ ||
ఇతి శ్రీమద్వల్లభాచార్యవిరచితం శ్రీగిరిరాజధార్యష్టకం సంపూర్ణమ్ |