స్వామినీచింతయా చిత్తఖేదఖిన్న ముఖాంబుజః |
నిమీలన్నేత్రయుగళః శ్రీకృష్ణశ్శరణం మమ || ౧ ||
మనోజభావభరితో భావయన్మనసా రతిమ్ |
మీలనవ్యాకులమనాః శ్రీకృష్ణశ్శరణం మమ || ౨ ||
నిశ్శ్వాసశుష్యద్వదనో మధురాధరపల్లవః |
మురళీనాదనిరతః శ్రీకృష్ణశ్శరణం మమ || ౩ ||
నికుంజమందిరాంతస్థ-స్సుమపల్లవతల్పకృత్ |
ప్రతీక్షమాణస్స్వప్రాప్తిం శ్రీకృష్ణశ్శరణం మమ || ౪ ||
వియోగభావవిహస-ద్వదనాంబుజసుందరః |
ఆకర్ణయన్నళిరుతం శ్రీకృష్ణశ్శరణం మమ || ౫ ||
ముంచన్నశ్రూణి విలుఠన్ గాయన్మత్త ఇవ క్వచిత్ |
నృత్యన్ రసాసక్తమనాః శ్రీకృష్ణశ్శరణం మమ || ౬ ||
శయాన ఏకతస్తల్పే స్వప్నసంబంధసిద్ధయే |
ప్రబోధపశ్చాత్తప్తో యః శ్రీకృష్ణశ్శరణం మమ || ౭ ||
రసాత్మరసరీతిజ్ఞో రసలీలాపరాయణః |
రసాత్మగోపీరసికః శ్రీకృష్ణశ్శరణం మమ || ౮ ||
ఇతి శ్రీహతిరాయాచార్యవిరచితం శ్రీకృష్ణశరణాష్టకమ్ |