దేవా ఊచుః |
నమః శ్రియై లోకధాత్ర్యై బ్రహ్మమాత్రే నమో నమః |
నమస్తే పద్మనేత్రాయై పద్మముఖ్యై నమో నమః || ౧ ||
ప్రసన్నముఖపద్మాయై పద్మకాంత్యై నమో నమః |
నమో బిల్వవనస్థాయై విష్ణుపత్న్యై నమో నమః || ౨ ||
విచిత్రక్షౌమధారిణ్యై పృథుశ్రోణ్యై నమో నమః |
పక్వబిల్వఫలాపీనతుంగస్తన్యై నమో నమః || ౩ ||
సురక్తపద్మపత్రాభకరపాదతలే శుభే |
సురత్నాంగదకేయూరకాంచీనూపురశోభితే |
యక్షకర్దమసంలిప్తసర్వాంగే కటకోజ్జ్వలే || ౪ ||
మాంగల్యాభరణైశ్చిత్రైర్ముక్తాహారైర్విభూషితే |
తాటంకైరవతంసైశ్చ శోభమానముఖాంబుజే || ౫ ||
పద్మహస్తే నమస్తుభ్యం ప్రసీద హరివల్లభే |
ఋగ్యజుస్సామరూపాయై విద్యాయై తే నమో నమః || ౬ ||
ప్రసీదాస్మాన్ కృపాదృష్టిపాతైరాలోకయాబ్ధిజే |
యే దృష్టాస్తే త్వయా బ్రహ్మరుద్రేంద్రత్వం సమాప్నుయుః || ౭ ||
ఇతి శ్రీవరాహపురాణే శ్రీవేంకటాచలమాహాత్మ్యే నవమోఽధ్యాయే దేవాదికృత శ్రీలక్ష్మీస్తుతిర్నామ మహాలక్ష్మీచతుర్వింశతినామస్తోత్రమ్ ||