బ్రహ్మోవాచ |
నమస్యే యన్మయం సర్వమేతత్సర్వమయశ్చ యః |
విశ్వమూర్తిః పరం‍జ్యోతిర్యత్తద్ధ్యాయంతి యోగినః || ౧ ||
య ఋఙ్మయో యో యజుషాం నిధానం
సామ్నాం చ యో యోనిరచింత్యశక్తిః |
త్రయీమయః స్థూలతయార్ధమాత్రా
పరస్వరూపో గుణపారయోగ్యః || ౨ ||
త్వాం సర్వహేతుం పరమం చ వేద్య-
-మాద్యం పరం జ్యోతిరవేద్యరూపమ్ |
స్థూలం చ దేవాత్మతయా నమస్యే
భాస్వన్ తమాద్యం పరమం పరేభ్యః || ౩ ||
సృష్టిం కరోమి యదహం తవశక్తిరాద్యా
తత్ప్రేరితో జలమహీపవనాగ్నిరూపామ్ |
తద్దేవతాదివిషయాం ప్రణవాద్యశేషాం
నాత్మేచ్ఛయా స్థితిలయావపి తద్వదేవ || ౪ ||
వహ్నిస్త్వమేవ జలశోషణతః పృథివ్యాః
సృష్టిం కరోషి జగతాం చ తథాద్య పాకమ్ |
వ్యాపీ త్వమేవ భగవన్ గగనస్వరూపం
త్వం పంచధా జగదిదం పరిపాసి విశ్వమ్ || ౫ ||
యజ్ఞైర్యజంతి పరమాత్మవిదో భవంతం
విష్ణుస్వరూపమఖిలేష్టిమయం వివస్వన్ |
ధ్యాయంతి చాపి యతయో నియతాత్మచిత్తాః
సర్వేశ్వరం పరమమాత్మవిముక్తికామా || ౬ ||
నమస్తే దేవరూపాయ యజ్ఞరూపాయ తే నమః |
పరబ్రహ్మస్వరూపాయ చింత్యమానాయ యోగిభిః || ౭ ||
ఉపసంహర తేజో యత్తేజసః సంహతిస్తవ |
సృష్టేర్విధాతాయ విభో సృష్టౌ చాఽహం సముద్యతః || ౮ ||
మార్కండేయ ఉవాచ |
ఇత్యేవం సంస్తుతో భాస్వాన్ బ్రహ్మణా సర్గకర్తృణా |
ఉపసంహృతవాంస్తేజః పరం స్వల్పమధారయత్ || ౯ ||
చకార చ తతః సృష్టిం జగతః పద్మసంభవః |
తథా తేషు మహాభాగః పూర్వకల్పాంతరేషు వై || ౧౦ ||
దేవాసురాదీన్మర్త్యాంశ్చ పశ్వాదీన్వృక్షవీరుధః |
ససర్జ పూర్వవద్బ్రహ్మా నరకాంశ్చ మహామునే || ౧౧ ||
ఇతి శ్రీమార్కండేయపురాణే శతతమోఽధ్యాయే బ్రహ్మ కృత శ్రీ ఆదిత్య స్తవమ్ |