అంగారకః శక్తిధరో లోహితాంగో ధరాసుతః |
కుమారో మంగళో భౌమో మహాకాయో ధనప్రదః || ౧ ||
ఋణహర్తా దృష్టికర్తా రోగకృద్రోగనాశనః |
విద్యుత్ప్రభో వ్రణకరః కామదో ధనహృత్ కుజః || ౨ ||
సామగానప్రియో రక్తవస్త్రో రక్తాయతేక్షణః |
లోహితో రక్తవర్ణశ్చ సర్వకర్మావరోధకః || ౩ ||
రక్తమాల్యధరో హేమకుండలీ గ్రహనాయకః |
నామాన్యేతాని భౌమస్య యః పఠేత్సతతం నరః || ౪ ||
ఋణం తస్య చ దౌర్భాగ్యం దారిద్ర్యం చ వినశ్యతి |
ధనం ప్రాప్నోతి విపులం స్త్రియం చైవ మనోరమామ్ || ౫ ||
వంశోద్యోతకరం పుత్రం లభతే నాత్ర సంశయః |
యోఽర్చయేదహ్ని భౌమస్య మంగళం బహుపుష్పకైః |
సర్వాః నశ్యతి పీడా చ తస్య గ్రహకృతా ధ్రువమ్ || ౬ ||
ఇతి శ్రీస్కాందపురాణే శ్రీ అంగారక స్తోత్రమ్ ||