మోహతమో మమ నష్టం త్వద్వచనాన్నహి కష్టమ్ |
శిష్టమిదం మయి హృష్టం హృత్పరమాత్మని తుష్టమ్ || ౧ ||
జ్ఞానరవిర్హృది భాతః స్వావరణాఖ్యతమోఽతః |
క్వాపి గతం భవదీక్షాసౌ ఖలు కా మమ దీక్షా || ౨ ||
క్లేశరుజాం హరణేన త్వచ్చరణస్మరణేన |
అస్మి కృతార్థ ఇహేశ శ్రీశ పరేశ మహేశ || ౩ ||
ప్రేమదుఘం తవ పాదం కో న భజేదవివాదమ్ |
దైవవశాద్ధృది మేయం దర్శితవానసి మే యమ్ || ౪ ||
చిత్రమిదం సదమేయః సోఽప్యభవద్ధృది మేయః |
దేవసురర్షిసుగేయః సోఽద్య కథం మమ హేయః || ౫ ||
ఆశ్రితతాపహరం తం పాతకదైన్యహరంతమ్ |
నౌమి శివం భగవంతం పాదమహం తవ సంతమ్ || ౬ ||
యత్ర జగద్భ్రమ ఏషః కల్పిత ఏవ సశేషః |
భ్రాంతిలయేఽద్వయ ఏవావేది మయాద్య స ఏవ || ౭ ||
శాంతిపదం తవ పాదం నౌమి సుసేవ్యమఖేదమ్ |
స్వార్థదమాద్యమనంతం హాపితకామధనం తమ్ || ౮ ||
దేవో భావో రాద్ధః సిద్ధః సత్యో నిత్యో బుద్ధః శుద్ధః |
సర్వోఽపూర్వో హర్తా కర్తాఽభిన్నస్త్వం నః పాతా మాతా || ౯ ||
ఇతి శ్రీమద్దత్తపురాణే చతుర్థాష్టకే తృతీయోఽధ్యాయే కార్తవీర్యార్జున కృత శ్రీ దత్తాత్రేయ స్తోత్రమ్ |