ధూమ్రా ద్విబాహవః సర్వే గోదానో వికృతాననాః |
గృధ్రయానాసనస్థాశ్చ పాంతు నః శిఖినందనాః || ౧ ||
శ్రీభైరవ్యువాచ |
ధన్యా చానుగృహీతాస్మి కృతార్థాస్మి జగత్ప్రభో |
యచ్ఛ్రుతం త్వన్ముఖాద్దేవ కేతుస్తోత్రమిదం శుభమ్ || ౨ ||
శ్రీపరమేశ్వర ఉవాచ |
శృణు దేవి ప్రవక్ష్యామి కేతుస్తవమిమం పరమ్ |
సర్వపాపవిశుద్ధాత్మా స రోగైర్ముచ్యతే ధ్రువమ్ || ౩ ||
శ్వేతపీతారుణః కృష్ణః క్వచిచ్చామీకరప్రభః |
శివార్చనరతః కేతుర్గ్రహపీడాం వ్యపోహతు || ౪ ||
నమో ఘోరాయాఘోరాయ మహాఘోరస్వరూపిణే |
ఆనందేశాయ దేవాయ జగదానందదాయినే || ౫ ||
నమో భక్తజనానందదాయినే విశ్వభావినే |
విశ్వేశాయ మహేశాయ కేతురూపాయ వై నమః || ౬ ||
నమో రుద్రాయ సర్వాయ వరదాయ చిదాత్మనే |
త్ర్యక్షాయ త్రినివాసాయ నమః సంకటనాశినే || ౭ ||
త్రిపురేశాయ దేవాయ భైరవాయ మహాత్మనే |
అచింత్యాయ చితిజ్ఞాయ నమశ్చైతన్యరూపిణే || ౮ ||
నమః శర్వాయ చర్చ్యాయ దర్శనీయాయ తే నమః |
ఆపదుద్ధరణాయాపి భైరవాయ నమో నమః || ౯ ||
నమో నమో మహాదేవ వ్యాపినే పరమాత్మనే |
నమో లఘుమతే తుభ్యం గ్రాహిణే సూర్యసోమయోః || ౧౦ ||
నమశ్చాపద్వినాశాయ భూయో భూయో నమో నమః |
నమస్తే రుద్రరూపాయ చోగ్రరూపాయ కేతవే || ౧౧ ||
నమస్తే సౌరరూపాయ శత్రుక్షయకరాయ చ |
మహాతేజాయ వై తుభ్యం పూజాఫలవివర్ధినే || ౧౨ ||
వహ్నిపుత్రాయ తే దివ్యరూపిణే ప్రియకారిణే |
సర్వభక్ష్యాయ సర్వాయ సర్వగ్రహాంతకాయ తే || ౧౩ ||
నమః పుచ్ఛస్వరూపాయ మహామృత్యుకరాయ చ |
నమస్తే సర్వదా క్షోభకారిణే వ్యోమచారిణే || ౧౪ ||
నమస్తే చిత్రరూపాయ మీనదానప్రియాయ చ |
దైత్యదానవగంధర్వవంద్యాయ మహతే నమః || ౧౫ ||
య ఇదం పఠతే నిత్యం ప్రాతరుత్థాయ మానవః |
గ్రహశాంతిర్భవేత్తస్య కేతురాజస్య కీర్తనాత్ || ౧౬ ||
యః పఠేదర్ధరాత్రే తు వశం తస్య జగత్త్రయమ్ |
ఇదం రహస్యమఖిలం కేతుస్తోత్రం తు కీర్తితమ్ || ౧౭ ||
సర్వసిద్ధిప్రదం గుహ్యమాయురారోగ్యవర్ధనమ్ |
గుహ్యం మంత్రం రహస్యం తు తవ భక్త్యా ప్రకాశితమ్ || ౧౮ ||
అభక్తాయ న దాతవ్యమిత్యాజ్ఞా పారమేశ్వరి || ౧౯ ||
శ్రీదేవ్యువాచ |
భగవన్భవతానేన కేతుస్తోత్రస్య మే ప్రభో |
కథనేన మహేశాన సత్యం ప్రీతాస్మ్యహం త్వయా || ౨౦ ||
శ్రీఈశ్వర ఉవాచ |
ఇదం రహస్యం పరమం న దేయం యస్య కస్యచిత్ |
గుహ్యం గోప్యతమం దేయం గోపనీయం స్వయోనివత్ || ౨౧ ||
అగ్నిపుత్రో మహాతేజాః కేతుః సర్వగ్రహాంతకః |
క్షోభయన్యః ప్రజాః సర్వాః స కేతుః ప్రీయతాం మమ || ౨౨ ||
ఇతి కేతు స్తోత్రమ్ |