(తై.సం.౧.౪.౬.౨)
య ఇ॒మా విశ్వా॒ భువ॑నాని॒ జుహ్వ॒దృషి॒ర్హోతా॑ నిష॒సాదా॑ పి॒తా న॑: |
స ఆ॒శిషా॒ ద్రవి॑ణమి॒చ్ఛమా॑నః పరమ॒చ్ఛదో॒ వర॒ ఆ వి॑వేశ || ౧
వి॒శ్వక॑ర్మా॒ మన॑సా॒ యద్విహా॑యా ధా॒తా వి॑ధా॒తా ప॑ర॒మోత స॒న్దృక్ |
తేషా॑మి॒ష్టాని॒ సమి॒షా మ॑దన్తి॒ యత్ర॑ సప్త॒ర్షీన్ప॒ర ఏక॑మా॒హుః || ౨
యో న॑: పి॒తా జ॑ని॒తా యో వి॑ధా॒తా యో న॑: స॒తో అ॒భ్యా సజ్జ॒జాన॑ |
యో దే॒వానా॑o నామ॒ధా ఏక॑ ఏ॒వ తగ్ం స॑మ్ప్ర॒శ్నమ్భువ॑నా యన్త్య॒న్యా || ౩
త ఆయ॑జన్త॒ ద్రవి॑ణ॒గ్ం సమ॑స్మా॒ ఋష॑య॒: పూర్వే॑ జరి॒తారో॒ న భూ॒నా |
అ॒సూర్తా॒ సూర్తా॒ రజ॑సో వి॒మానే॒ యే భూ॒తాని॑ స॒మకృ॑ణ్వన్ని॒మాని॑ || ౪
న తం వి॑దాథ॒ య ఇ॒దం జ॒జానా॒న్యద్యు॒ష్మాక॒మన్త॑రమ్భవాతి |
నీ॒హా॒రేణ॒ ప్రావృ॑తా జల్ప్యా॑ చాసు॒తృప॑ ఉక్థ॒శాస॑శ్చరన్తి || ౫
ప॒రో ది॒వా ప॒ర ఏ॒నా పృ॑థి॒వ్యా ప॒రో దే॒వేభి॒రసు॑రై॒ర్గుహా॒ యత్ |
కగ్ం స్వి॒ద్గర్భ॑o ప్రథ॒మం ద॑ధ్ర॒ ఆపో॒ యత్ర॑ దే॒వాః స॒మగ॑చ్ఛన్త॒ విశ్వే || ౬
తమిద్గర్భ॑మ్ప్రథ॒మం ద॑ధ్ర॒ ఆపో॒ యత్ర॑ దే॒వాః స॒మగ॑చ్ఛన్త॒ విశ్వే॑ |
అ॒జస్య॒ నాభా॒వధ్యేక॒మర్పి॑త॒o యస్మి॑న్ని॒దం విశ్వ॒మ్భువన॒మధి॑ శ్రి॒తమ్ || ౭
వి॒శ్వక॑ర్మా॒ హ్యజ॑నిష్ట దే॒వ ఆదిద్గ॑న్ధ॒ర్వో అ॑భవద్ద్వి॒తీయ॑: |
తృ॒తీయ॑: పి॒తా జ॑ని॒తౌష॑ధీనామ॒పాం గర్భ॒o వ్య॑దధాత్పురు॒త్రా || ౮
చక్షు॑షః పి॒తా మన॑సా॒ హి ధీరో॑ ఘృ॒తమే॑నే అజన॒న్నన్న॑మానే |
య॒దేదన్తా॒ అద॑దృగ్ంహన్త॒ పూర్వ॒ ఆదిద్ద్యావా॑పృథి॒వీ అ॑ప్రథేతామ్ || ౯
వి॒శ్వత॑శ్చక్షురు॒త వి॒శ్వతో॑ముఖో వి॒శ్వతో॑హస్త ఉ॒త వి॒శ్వత॑స్పాత్ |
సమ్బా॒హుభ్యా॒o నమ॑తి॒ సమ్పత॑త్రై॒ర్ద్యావా॑పృథి॒వీ జ॒నయ॑న్దే॒వ ఏక॑: || ౧౦
కిగ్ం స్వి॑దాసీదధి॒ష్ఠాన॑మా॒రమ్భ॑ణం కత॒మత్స్వి॒త్కిమా॑సీత్ |
యదీ॒ భూమి॑o జ॒నయ॑న్వి॒శ్వక॑ర్మా॒ వి ద్యామౌర్ణో॑న్మహి॒నా వి॒శ్వచ॑క్షాః || ౧౧
కిగ్ం స్వి॒ద్వన॒o క ఉ॒ స వృ॒క్ష ఆ॑సీ॒ద్యతో॒ ద్యావా॑పృథి॒వీ ని॑ష్టత॒క్షుః |
మనీ॑షిణో॒ మన॑సా పృ॒చ్ఛతేదు॒ తద్యద॒ధ్యతి॑ష్ఠ॒ద్భువ॑నాని ధా॒రయన్॑ || ౧౨
యా తే॒ ధామా॑ని పర॒మాణి॒ యావ॒మా యా మ॑ధ్య॒మా వి॑శ్వకర్మన్ను॒తేమా |
శిక్షా॒ సఖి॑భ్యో హ॒విషి॑ స్వధావః స్వ॒యం య॑జస్వ త॒నువ॑o జుషా॒ణః || ౧౩
వా॒చస్పతి॑o వి॒శ్వక॑ర్మాణమూ॒తయే॑ మనో॒యుజ॒o వాజే॑ అ॒ద్యా హు॑వేమ |
స నో॒ నేది॑ష్ఠా॒ హవ॑నాని జోషతే వి॒శ్వశ॑మ్భూ॒రవ॑సే సా॒ధుక॑ర్మా || ౧౪
విశ్వ॑కర్మన్హ॒విషా॑ వావృధా॒నః స్వ॒యం య॑జస్వ త॒నువ॑o జుషా॒ణః |
ముహ్య॑న్త్వ॒న్యే అ॒భిత॑: స॒పత్నా॑ ఇ॒హాస్మాక॑మ్మ॒ఘవా॑ సూ॒రిర॑స్తు || ౧౫
విశ్వ॑కర్మన్హ॒విషా వర్ధ॑నేన త్రా॒తార॒మిన్ద్ర॑మకృణోరవ॒ధ్యమ్ |
తస్మై॒ విశ॒: సమ॑నమన్త పూ॒ర్వీర॒యము॒గ్రో వి॑హ॒వ్యో॑ యథాస॑త్ || ౧౬
స॒ము॒ద్రాయ॑ వ॒యునా॑య॒ సిన్ధూ॑నా॒మ్పత॑యే॒ నమ॑: |
న॒దీనా॒గ్ం సర్వా॑సామ్పి॒త్రే జు॑హు॒తా
వి॒శ్వక॑ర్మణే॒ విశ్వాహామ॑ర్త్యగ్ం హ॒విః |