౨౦) సాష్టాఙ్గ ప్రణామః
అథ అష్టసాష్టాఙ్గం ప్రణమ్య ||
హి॒ర॒ణ్య॒గ॒ర్భః సమ॑వర్త॒తాగ్రే॑ భూ॒తస్య॑ జా॒తః పతి॒రేక॑ ఆసీత్ |
స దా॑ధార పృథి॒వీం ద్యాము॒తేమాం కస్మై॑ దే॒వాయ॑ హ॒విషా॑ విధేమ ||
ఉరసా నమః || ౧
యః ప్రా॑ణ॒తో ని॑మిష॒తో మ॑హి॒త్వైక॒ ఇద్రాజా॒ జగ॑తో బ॒భూవ॑ |
య ఈశే॑ అ॒స్య ద్వి॒పద॒శ్చతు॑ష్పద॒: కస్మై॑ దే॒వాయ॑ హ॒విషా॑ విధేమ ||
శిరసా నమః || ౨
బ్రహ్మ॑జజ్ఞా॒నం ప్ర॑థ॒మం పు॒రస్తా॒ద్విసీ॑మ॒తః సు॒రుచో॑ వే॒న ఆ॑వః |
స బు॒ధ్నియా॑ ఉప॒మా అ॑స్య వి॒ష్ఠాః స॒తశ్చ॒ యోని॒మస॑తశ్చ॒ వివ॑: ||
దృష్ట్యా నమః || ౩
మ॒హీ ద్యౌః పృ॑థి॒వీ చ॑ న ఇ॒మం య॒జ్ఞం మి॑మిక్షతామ్ |
పి॒పృ॒తాం నో॒ భరీ॑మభిః ||
మనసా నమః || ౪
ఉప॑శ్వాసయ పృథి॒వీము॒త ద్యాం పు॑రు॒త్రా తే॑ మనుతా॒o విష్ఠి॑త॒o జగ॑త్ |
స దు॑న్దుభే స॒జూరిన్ద్రే॑ణ దే॒వైర్దూ॒రాద్దవీ॑యో॒ అప॑సేధ॒ శత్రూన్॑ ||
వచసా నమః || ౫
అగ్నే॒ నయ॑ సు॒పథా॑ రా॒యే అ॒స్మాన్ విశ్వా॑ని దేవ వ॒యునా॑ని వి॒ద్వాన్ |
యు॒యో॒ధ్య॑స్మజ్జు॑హురా॒ణమేనో॒ భూయి॑ష్ఠాం తే॒ నమ॑ ఉక్తిం విధేమ ||
పద్భ్యాం నమః || ౬
యా తే॑ అగ్నే॒ రుద్రి॑యా త॒నూస్తయా॑ నః పాహి॒ తస్యా”స్తే॒ స్వాహా॒ |
యా తే॑ అగ్నేఽయాశ॒యా ర॑జాశ॒యా హ॑రాశ॒యా త॒నూర్వర్షి॑ష్ఠా గహ్వరే॒ష్ఠోగ్రం వచో॒ అపా॑వధీం త్వే॒షం వచో॒ అపా॑వధీ॒గ్॒o స్వాహా” ||
కరాభ్యాం నమః || ౭
ఇ॒మం య॑మప్రస్త॒రమాహి సీదాఙ్గి॑రోభిః పి॒తృభి॑: సంవిదా॒నః |
ఆత్వా॒ మన్త్రా॑: కవిశ॒స్తా వ॑హన్త్వే॒నా రా॑జన్ హ॒విషా॑ మాదయస్వ ||
కర్ణాభ్యాం నమః || ౮
ఉరసా శిరసా దృష్ట్యా మన॑సా వచసా త॒థా |
పద్భ్యాం కరాభ్యాం కర్ణాభ్యాం ప్రణామోఽష్టాఙ్గ॑ ఉచ్యతే ||