śaktisvarūpāya śarōdbhavāya
śakrārcitāyātha śacīstutāya |
śamāya śambhupraṇavārthadāya
śakārarūpāya namō guhāya || 1 ||
raṇanmaṇiprōjjvalamēkhalāya
ramāsanāthapraṇavārthadāya |
ratīśapūjyāya raviprabhāya
rakārarūpāya namō guhāya || 2 ||
varāya varṇāśramarakṣakāya
varatriśūlābhayamaṇḍitāya |
valārikanyāsukr̥tālayāya
vakārarūpāya namō guhāya || 3 ||
nagēndrakanyēśvaratattvadāya
nagādhirūḍhāya nagārcitāya |
nagāsuraghnāya nagālayāya
nakārarūpāya namō guhāya || 4 ||
bhavāya bhargāya bhavātmajāya
bhasmāyamānādbhutavigrahāya |
bhaktēṣṭakāmapradakalpakāya
bhakārarūpāya namō guhāya || 5 ||
vallīvalārātisutārcitāya
varāṅgarāgāñcitavigrahāya |
vallīkarāmbhōruhamarditāya
vakārarūpāya namō guhāya || 6 ||
iti śrīśaravaṇabhavamantrākṣaraṣaṭkam |