vipra uvāca |
śr̥ṇu svāminvacō mē:’dya kaṣṭaṁ mē vinivāraya |
sarvabrahmāṇḍanāthastvamatastē śaraṇaṁ gataḥ || 1 ||
ajamēdhādhvaraṁ kartumārambhaṁ kr̥tavānaham |
sō:’jō gatō gr̥hānmē hi trōṭayitvā svabandhanam || 2 ||
na jānē sa gataḥ kutrā:’nvēṣaṇaṁ tatkr̥taṁ bahu |
na prāptō:’tassa balavān bhaṅgō bhavati mē kratōḥ || 3 ||
tvayi nāthē sati vibhō yajñabhaṅgaḥ kathaṁ bhavēt |
vicāryaivā:’khilēśāna kāma pūrṇaṁ kuruṣva mē || 4 ||
tvāṁ vihāya śaraṇyaṁ kaṁ yāyāṁ śivasuta prabhō |
sarvabrahmāṇḍanāthaṁ hi sarvāmarasusēvitam || 5 ||
dīnabandhurdayāsindhuḥ susēvyā bhaktavatsalaḥ |
haribrahmādidēvaiśca sustutaḥ paramēśvaraḥ || 6 ||
pārvatīnandanaḥ skandaḥ paramēkaḥ parantapaḥ |
paramātmātmadaḥ svāmī satāṁ ca śaraṇārthinām || 7 ||
dīnānātha mahēśa śaṅkarasuta trailōkyanātha prabhō
māyādhīśa samāgatō:’smi śaraṇaṁ māṁ pāhi viprapriya |
tvaṁ sarvaprabhupriyaḥ khilavidabrahmādidēvaistuta-
-stvaṁ māyākr̥tirātmabhaktasukhadō rakṣāparō māyikaḥ || 8 ||
bhaktaprāṇaguṇākarastriguṇatō bhinnō:’si śambhupriyaḥ
śambhuḥ śambhusutaḥ prasannasukhadaḥ saccitsvarūpō mahān |
sarvajñastripuraghnaśaṅkarasutaḥ satprēmavaśyaḥ sadā
ṣaḍvaktraḥ priyasādhurānatapriyaḥ sarvēśvaraḥ śaṅkaraḥ |
sādhudrōhakaraghna śaṅkaragurō brahmāṇḍanāthō prabhuḥ
sarvēṣāmamarādisēvitapadō māṁ pāhi sēvāpriya || 9 ||
vairibhayaṅkara śaṅkara janaśaraṇasya
vandē tava padapadmaṁ sukhakaraṇasya |
vijñaptiṁ mama karṇē skanda nidhēhi
nijabhaktiṁ janacētasi sadā vidhēhi || 10 ||
karōti kiṁ tasya balī vipakṣō
-dakṣō:’pi pakṣōbhayāpārśvaguptaḥ |
kintakṣakōpyāmiṣabhakṣakō vā
tvaṁ rakṣakō yasya sadakṣamānaḥ || 11 ||
vibudhagururapi tvāṁ stōtumīśō na hi syā-
-tkathaya kathamahaṁ syāṁ mandabuddhirvarārcyaḥ |
śuciraśuciranāryō yādr̥śastādr̥śō vā
padakamala parāgaṁ skanda tē prārthayāmi || 12 ||
hē sarvēśvara bhaktavatsala kr̥pāsindhō tvadīyō:’smyahaṁ
bhr̥tyaḥ svasya na sēvakasya gaṇapasyāgaḥ śataṁ satprabhō |
bhaktiṁ kvāpi kr̥tāṁ manāgapi vibhō jānāsi bhr̥tyārtihā
tvattō nāstyaparō:’vitā na bhagavan mattō naraḥ pāmaraḥ || 13 ||
kalyāṇakartā kalikalmaṣaghnaḥ
kubērabandhuḥ karuṇārdracittaḥ |
triṣaṭkanētrō rasavaktraśōbhī
yajñaṁ prapūrṇaṁ kuru mē guha tvam || 14 ||
rakṣakastvaṁ trilōkasya śaraṇāgatavatsalaḥ |
yajñakartā yajñabhartā harasē vighnakāriṇām || 15 ||
vighnavāraṇa sādhūnāṁ sargakāraṇa sarvataḥ |
pūrṇaṁ kuru mamēśāna sutayajña namō:’stu tē || 16 ||
sarvatrātā skanda hi tvaṁ sarvajñātā tvamēva hi |
sarvēśvarastvamīśānō nivēśasakalā:’vanaḥ || 17 ||
saṅgītajñastvamēvāsi vēdavijñaḥ paraḥ prabhuḥ |
sarvasthātā vidhātā tvaṁ dēvadēvaḥ satāṁ gatiḥ || 18 ||
bhavānīnandanaḥ śambhutanayō vayunaḥ svarāṭ |
dhyātā dhyēyaḥ pitr̥̄ṇāṁ hi pitā yōniḥ sadātmanām || 19 ||
iti śrīśivamahāpurāṇē rudrasaṁhitāyāṁ kumārakhaṇḍē ṣaṣṭhō:’dhyāyē śrīkumārastutiḥ |