ಲಿಂಗಮೂರ್ತಿಂ ಶಿವಂ ಸ್ತುತ್ವಾ ಗಾಯತ್ರ್ಯಾ ಯೋಗಮಾಪ್ತವಾನ್ |
ನಿರ್ವಾಣಂ ಪರಮಂ ಬ್ರಹ್ಮ ವಸಿಷ್ಠೋಽನ್ಯಶ್ಚ ಶಂಕರಾತ್ || ೧ ||
ನಮಃ ಕನಕಲಿಂಗಾಯ ವೇದಲಿಂಗಾಯ ವೈ ನಮಃ |
ನಮಃ ಪರಮಲಿಂಗಾಯ ವ್ಯೋಮಲಿಂಗಾಯ ವೈ ನಮಃ || ೨ ||
ನಮಃ ಸಹಸ್ರಲಿಂಗಾಯ ವಹ್ನಿಲಿಂಗಾಯ ವೈ ನಮಃ |
ನಮಃ ಪುರಾಣಲಿಂಗಾಯ ಶ್ರುತಿಲಿಂಗಾಯ ವೈ ನಮಃ || ೩ ||
ನಮಃ ಪಾತಾಳಲಿಂಗಾಯ ಬ್ರಹ್ಮಲಿಂಗಾಯ ವೈ ನಮಃ |
ನಮೋ ರಹಸ್ಯಲಿಂಗಾಯ ಸಪ್ತದ್ವೀಪೋರ್ಧ್ವಲಿಂಗಿನೇ || ೪ ||
ನಮಃ ಸರ್ವಾತ್ಮಲಿಂಗಾಯ ಸರ್ವಲೋಕಾಂಗಲಿಂಗಿನೇ |
ನಮಸ್ತ್ವವ್ಯಕ್ತಲಿಂಗಾಯ ಬುದ್ಧಿಲಿಂಗಾಯ ವೈ ನಮಃ || ೫ ||
ನಮೋಽಹಂಕಾರಲಿಂಗಾಯ ಭೂತಲಿಂಗಾಯ ವೈ ನಮಃ |
ನಮ ಇಂದ್ರಿಯಲಿಂಗಾಯ ನಮಸ್ತನ್ಮಾತ್ರಲಿಂಗಿನೇ || ೬ ||
ನಮಃ ಪುರುಷಲಿಂಗಾಯ ಭಾವಲಿಂಗಾಯ ವೈ ನಮಃ |
ನಮೋ ರಜೋರ್ಧಲಿಂಗಾಯ ಸತ್ತ್ವಲಿಂಗಾಯ ವೈ ನಮಃ || ೭ ||
ನಮಸ್ತೇ ಭವಲಿಂಗಾಯ ನಮಸ್ತ್ರೈಗುಣ್ಯಲಿಂಗಿನೇ |
ನಮೋಽನಾಗತಲಿಂಗಾಯ ತೇಜೋಲಿಂಗಾಯ ವೈ ನಮಃ || ೮ ||
ನಮೋ ವಾಯೂರ್ಧ್ವಲಿಂಗಾಯ ಶ್ರುತಿಲಿಂಗಾಯ ವೈ ನಮಃ |
ನಮಸ್ತೇಽಥರ್ವಲಿಂಗಾಯ ಸಾಮಲಿಂಗಾಯ ವೈ ನಮಃ || ೯ ||
ನಮೋ ಯಜ್ಞಾಂಗಲಿಂಗಾಯ ಯಜ್ಞಲಿಂಗಾಯ ವೈ ನಮಃ |
ನಮಸ್ತೇ ತತ್ತ್ವಲಿಂಗಾಯ ದೇವಾನುಗತಲಿಂಗಿನೇ || ೧೦ ||
ದಿಶ ನಃ ಪರಮಂ ಯೋಗಮಪತ್ಯಂ ಮತ್ಸಮಂ ತಥಾ |
ಬ್ರಹ್ಮ ಚೈವಾಕ್ಷಯಂ ದೇವ ಶಮಂ ಚೈವ ಪರಂ ವಿಭೋ |
ಅಕ್ಷಯತ್ವಂ ಚ ವಂಶಸ್ಯ ಧರ್ಮೇ ಚ ಮತಿಮಕ್ಷಯಾಮ್ || ೧೧ ||
ಅಗ್ನಿರುವಾಚ |
ವಸಿಷ್ಠೇನ ಸ್ತುತಃ ಶಂಭುಸ್ತುಷ್ಟಃ ಶ್ರೀಪರ್ವತೇ ಪುರಾ |
ವಸಿಷ್ಠಾಯ ವರಂ ದತ್ವಾ ತತ್ರೈವಾಂತರಧೀಯತ || ೧೨ ||
ಇತ್ಯಾಗ್ನೇ ಮಹಾಪುರಾಣೇ ಸಪ್ತದಶಾಧಿಕದ್ವಿಶತತಮೋಽಧ್ಯಾಯೇ ವಸಿಷ್ಠಕೃತ ಪರಮೇಶ್ವರ ಸ್ತುತಿಃ ||