kāmaśāsanamāśritārtinivāraṇaikadhurandharaṁ
pākaśāsanapūrvalēkhagaṇaiḥ samarcitapādukam |
vyāghrapādaphaṇīśvarādimunīśasaṅghaniṣēvitaṁ
citsabhēśamaharniśaṁ hr̥di bhāvayāmi kr̥pākaram || 1 ||
yakṣarākṣasadānavōragakinnarādibhiranvahaṁ
bhaktipūrvakamatyudārasugītavaibhavaśālinam |
caṇḍikāmukhapadmavārijabāndhavaṁ vibhumavyayaṁ
citsabhēśamaharniśaṁ hr̥di bhāvayāmi kr̥pākaram || 2 ||
kālapāśanipīḍitaṁ munibālakaṁ svapadārcakaṁ
hyagragaṇyamaśēṣabhaktajanaughakasya sadīḍitam |
rakṣituṁ sahasāvatīrya jaghāna yacchamanaṁ ca taṁ
citsabhēśamaharniśaṁ hr̥di bhāvayāmi kr̥pākaram || 3 ||
bhīkarōdakapūrakairbhuvamarṇavīkaraṇōdyatāṁ
svardhunīmabhimāninīmatiduścarēṇa samādhinā |
tōṣitastu bhagīrathēna dadhāra yō śirasā ca taṁ
citsabhēśamaharniśaṁ hr̥di bhāvayāmi kr̥pākaram || 4 ||
yōginaḥ sanakādayō munipuṅgavā vimalāśayāḥ
dakṣiṇābhimukhaṁ guruṁ samupāsya yaṁ śivamādarāt |
siddhimāpuranūpamāṁ tamananyabhāvayutastvahaṁ
citsabhēśamaharniśaṁ hr̥di bhāvayāmi kr̥pākaram || 5 ||
kṣīrasāgaramanthanōdbhavakālakūṭamahāviṣaṁ
nigrahītumaśakyamanyasurāsurairapi yō:’rthitaḥ |
rakṣati sma jagattrayaṁ savilāsamēva nipīya taṁ
citsabhēśamaharniśaṁ hr̥di bhāvayāmi kr̥pākaram || 6 ||
sarvadēvamayaṁ yamēva bhajanti vaidikasattamāḥ
jñānakarmavibōdhakāḥ sakalāgamāḥ śrutipūrvakāḥ |
āhurēva yamīśamādarataśca taṁ sakalēśvaraṁ
citsabhēśamaharniśaṁ hr̥di bhāvayāmi kr̥pākaram || 7 ||
iti śrī naṭarāja hr̥dayabhāvanā saptakam ||
See more śrī śiva stotras for chanting. See more śrī naṭarāja stōtrāṇi for chanting.