🍃🌷అష్టాదశాధ్యాయము - ఆశాదశమీ వ్రత కథనం:
(శ్రీమదష్టాదశ మహాపురాణాలలో ఒకటైన శ్రీ స్కాంద పురాణాంతర్గతం)
నారాయణం నమస్కృత్య నరం చైవనరోత్తమం l
దేవీం సరస్వతీం వ్యాసం తతోజయ ముదీరయేత్ ll
🌻సనత్కుమార ఉవాచ:
పార్వతీదేవికి పెనిమిటియు, భక్తులను అనగ్రహించువాడవు, దయాసముద్రుడవు అగు ఓ భగవంతుడా! దశమి తిధి యొక్క మహిమను చెప్పవలయునని సనత్కుమారుడు సాంబమూర్తిని అనడిగెను.
🌻ఈశ్వర ఉవాచ:
సాంబమూర్తి చెప్పుచున్నాడు...
ఓ మునీశ్వరా! ఈ దశమీ వ్రతము శ్రావణ శుద్ధ దశమి యందు ప్రారంభించి పండ్రెండు మాసములలోను ప్రతి శుక్ల దశమి యందును చేయుచు, తిరిగి శ్రావణము రాగానే శుక్ల దశమి యందు శ్రేష్ఠంబగు ఈ వ్రతమునకు ఉద్యాపనము చేయవలెను.
క్షత్రియుడు రాజ్యాపేక్ష చేతను, వ్యవసాయదారుడు వ్యవసాయము నిమిత్తము, వైశ్యుడు వర్తకనిమిత్తం, గర్భిణీ స్త్రీ పుత్రుల నిమిత్తం, సర్వజనులు ధర్మార్ధకామముల కొరకును, పెండ్లి కాని చిన్నది మంచి వరుడు సంభవించుట కొఱకును, బ్రాహ్మణుడు యజ్ఞము చేయుటకొఱకును, రోగవంతుడు ఆరోగ్యము కొఱకును, పెనిమిటి దూరదేశము వెళ్లి బహుకాలము వరకు రాకుండిన యెడల శీఘ్రముగా వచ్చు నిమిత్తం వాని భార్యయు, యీ ప్రకారం ఎవరెవరు ఎట్టికోరిక గలవారైయుందురో వారివారి కోరికల సఫలము కొఱకు ఈ దశమీ వ్రతమును సమస్తమైనవారును ముఖ్యంగా చేయవలయును.
ఎవనికి ఎట్టి పీడ కలుగునో, అట్టి పీడలు తొలగుట కొఱకు చేయవలయును, శ్రావణ శుక్ల దశమి యందు స్నానము చేసి, పరిశుద్ధుడై, శుభ్ర వస్త్రములను ధరించి ఆయాదిక్కుల అధిదేవతలకు పూజ చేయునిమిత్తం, రాత్రి వరకు ఉపవాసము చేసి, వాకిలి ముందు బియ్యపుపిండి, బుక్కాయి మొదలగువానితో అష్ట దిక్కులకు అధిదేవతలను శస్త్రములు వాహనములు మొదలగు వానితో గూడికొని యున్నవారినిగా స్త్రీ విగ్రహములను లిఖియించి, వేరువేరుగా దీపములను వెలిగించి, నేతితో మిశ్రితమగు అన్నము మొదలగు వానిని వేరువేరుగా నివేదవం చేయవలెను.
ఆయా కాలములయందు సంభవించిన ఫలములను నివేదన చేయవలెను. దిక్కులన్నియు శోభస్కరములుగా ఉండుగాక, నా యొక్క కోరికలు సఫలములగు గాక, ఓ దేవతలారా! మీ అనుగ్రహము వలన ఎల్లప్పుడు మాకు శుభము కలుగుచుండు గాక! అని ప్రార్ధించి, దిక్కులకు అధిదేవతలను యధావిధిగా పూజించి, బ్రాహ్మణులకు భోజనము పెట్టి దక్షిణతాంబూలాదులను ఇయ్యవలయును. ఈ ప్రకారము సంవత్సరము వఱకు ప్రతి మాసమునందును చేయుచు, ఓ మునీశ్వరా! పిమ్మట ఉద్యాపనమును యధావిధిగా చేయవలయును.
దిక్కుల యొక్క అధిదేవతల ప్రతిమలను బంగారముతోగాని, వెండితో గాని జేయించవలయును. శక్తిలేని పక్షమున బుక్కాయితోనైన వేయవలయును.
అనంతరము స్నానము చేసి, పరిశుద్ధుడై సర్వాభరణములచే అలంకరింపబడి, వాకిలి ముందర భాగమున దశదేవతలను ఆవాహనము చేసి, భక్తితో కూడిన మనస్సుగలవాడై, క్రమముగా దశదేవతలను ముందుచెప్పబోయెడి మంత్రములచే ఆవానహము చేసి పూజింపవలయును.
ఓ తూర్పుదిక్కా! దేవతలచేతను, రాక్షసుల చేతను నమస్కరింపబడునట్టియు, మూడులోకములకు ప్రభువగు దేవేంద్రుడు నీ దిక్కునందు ఎల్లప్పుడు నివసించియుండును. అట్టి తూర్పుదిక్కునకు నమస్కారము.
ఓ ఆగ్నేయ దిక్కా! నీవు అగ్నిహోత్రునిచే పరిగ్రహరింపబడితివి కాఁబట్టి, ఆగ్నేయమని చెప్పబడితివి, అందువలన తేజోరూపిణివై, పరాశక్తివైతివి కాఁబట్టి, నేను కోరిన వరములనిత్తువు గాక.
ఓ దక్షిణదిక్కా! యమధర్మరాజు నీ దిక్కుయందుండి, లోకములను శిక్షించుచున్నాడు కాఁబట్టి, సంయమనీ అనే పేరుగల దానివైతివి, నా యొక్క కోరికలనిత్తువు గాక.
ఓ నిర్ఋతి దిక్కా! హస్తము నందు ఖడ్గము కలవాడై పరాక్రమించుచు నిర్ ఋతియను రాక్షనునిచే అధిష్టింపబడితివి కాబట్టి, నీవు నిర్ఋతీయనీ చెప్పబడితివి. అటువంటి నీవు నా మనస్సుననుండు సమస్త కోరికలను సఫలము చేయుదువు గాక.
ఓ పశ్చిమ దిక్కా! నీవు భువనములకు ఆధారమైనదానవు, జలజంతువులకు, అధిదేవతయగు వరుణదేవుడు నీవదిక్కునందు ఉండెను, కాఁబట్టి, అట్టి నీవు నా యొక్క ధర్మము కొఱకు, కార్యసిద్ధి కొఱకు అనుకూలమైనదానవు అగుదువు గాక!
ఓ వాయవ్య దిక్కా! జగదాధారుడైన వాయువుచే అధిష్ఠింపబడితివి కావున, నీవు నిత్యము నా గృహమునందు నివసించి శుభములను ఒసగుగుచుండుము.
ఓ ఉత్తర దిక్కా! నీవు కుబేరునిచే అధిష్ఠింపబడి ప్రసిద్ధికెక్కితివి కావున, నీవు నా యొక్క కోరికలనొసగి, మమ్ములను మఱియొక కోరిక లేని వాళ్లనుగా చేయవలయును.
ఓ ఈశాన్య దిక్కా! జగత్ప్రభువగు సాంబమూర్తిచే అధిష్ఠింపబడితివి, శుభములనొనగునట్టి ఓ దేవీ ! నీకు నమస్కారము చేసెదను నాకు కోరికలనునొసగుము.
ఓ ఊర్ధ్వ దిక్కా! ఎల్లప్పుడు శుభములనొసగు దానవును, సనకాది మునీశ్వరులతో కూడియుండు దానవునైతివి, ఎల్లప్పుడు నన్ను రక్షింపుచుండుము, నీ యందు నివసించునటువటి ఆశ్వని మొదలగు ఇరువది యేడు నక్షత్రములును సూర్యుఁడు మొదలగు నవగ్రహములును యితరములగు నక్షత్ర సంఘములును ఆ నక్షత్రములకు తల్లులును మఱియు భూతములు ప్రేతలు పిశాచములు వినాయకులు మొదలగు జ్యోతిర్గణములనన్నియు భక్తితో గూడిన మనస్సుగలవాడనై పూజించుచుంటిని, కావున, అవియన్నియు ఎల్లప్పుడు, నాయొక్క ఇష్టసిద్ధి కొఱకు సన్నద్ధులై యండుగాక!
భూతలము మొదలు పాతాళమువరకు నుండు ఓ అధోదిశా! నీవు సర్ప కులముచే సేవింపబడుచుంటివి, నీవు సంతోషమైన మనస్సు గలదానవై సర్ప స్త్రీలతోగూడిన దానవగుచు నా యొక్కకోరికల నొసగుము.
ఈ ప్రకారము అర్ధమునిచ్చు మంత్రములచే పది దిక్కులను, పుష్పములును, ధూపం మొదలగువానిచే పూజించి, అనంతరం అలంకారములు వస్త్రములు ఫలములు మొదలగుదానిని ఆ దేవతలకు సమర్పించవలయును.
అనంతరము వాద్యములు మొదలగు వానియొక్క ధ్వనులచేతను, సంగీతము, నాట్యము మొదలగు మంగళధ్వనుల చేతను, నాట్యమునందు నేర్పుగల మనోహరులగుబవేశ్యల నాట్యము చేతను, ఆ రాత్రియంతయు జాగరణముచే గడపవలెను.
సంతోషయుక్తమైన మనస్సు గలవారలై, కుంకుమ అక్షతలు తాంబూలములు మొదలగువానిని ఇచ్చుట, మొదలగు సత్కారములచే ఆ రాత్రినంతయు వెళ్లబుచ్చి, తెల్లవారిన పిమ్మట ఆ ప్రతిమలను తిరిగి పూజించి, బ్రాహ్మణునకు దానమియ్యవలయును. ఈ ప్రకారము వ్రతమాచరించి, అక్కడనుండు పెద్దలకు నమస్కారముచేసి, క్షమార్పణ గోరి, పిమ్మట స్నేహితులు బంధువులు పెద్దలు మొదలగువారితో గూడి భుజింపవలయును.
ఓ చిన్నవాడా! ఈ ప్రకారము దశమీ వ్రతమును శ్రద్ధతో చేసినవాడు తన మనస్సున కోరిన సమస్తకోరికలను పొందును. పురాతనమగు ఈ దశమీ వ్రతమును స్త్రీలు ముఖ్యముగా చేయవలయును.
స్త్రీలు ముఖ్యముగా చేయుటకు హేతువేమనగా సమస్త ప్రాణిసమూహముల యందు థర్మాతి కార్యముల జేయుటయందు స్త్రీలు మిక్కిలి శ్రద్ధ గలవారలై యుందురు. అందువలన, స్త్రీలు తప్పకజేయవలెను.
ఓ మునీశ్వరా! ఐశ్వర్యమునొసగునదియు, కీర్తినిచ్చునదియు, ఆయుస్సును ఇచ్చునదియు, సమస్త కోరికలనొనుగునదియు కాబట్టి, ఈ దశమీ వ్రతమును నీకు జెప్పితిని మూడులోకములయందును దీనితో సమానమగు వ్రతము మఱియొకటిలేదు.
బ్రహ్మ మానసపుత్రులలో శ్రేష్ఠుఁడవగు, ఓ సనత్కుమారా! ఈ వ్రతము యిట్టిది, అట్టిది అని విశేషముగా చెప్పనవనరములేదు. ఎవరైనను కోరికలనపేక్షించి, ప్రతి శుక్ల దశమి యందును, పది దిక్కులను పూజింతురో వారి యొక్క హృదయమందుండెడి సమస్య కోరికలను దిక్కులు సంతసించి యిచ్చును.
ఓ మునీశ్వరా! ఈ వ్రతము మోక్షమునొసగు విషయములో సులభముగా ఒసగును, ఈ విషయములో విచారణ యెంతమాత్రము చేయనక్కరలేదు, దీనితో సమానమగు వ్రతము యిదివరకు ఎక్కడను జరిగియుండలేదు, యిక మందు ఎక్కడను జరుగదు.
అని, ఈ ప్రకారముగా సాంబమూర్తి, సనత్కుమార మునీశ్వరునితో చెప్పెను.
♦️ఇతి శ్రీ స్కాందపురాణే శ్రావణమాస మాహాత్మ్యే ఈశ్వర సనత్కుమార సంవాదే - "ఆశాదశమీ వ్రత కథనం నామ” అష్టాదశోధ్యాయస్సమాప్తః.
ఓం ఐం హ్రీం శ్రీo శ్రీ మాత్రే నమః..🙏🙏
🌿🌷🌿🌷🌿🌷🌿🌷🌿🌷🌿