త్వమోంకారోఽస్యంకురాయ ప్రసూతో
విశ్వస్యాత్మానంతభేదస్య పూర్వమ్ |
సంభూతస్యానంతరం సత్త్వమూర్తే
సంహారేచ్ఛోస్తే నమో రుద్రమూర్తే || ౧ ||
వ్యక్తిం నీత్వా త్వం వపుః స్వం మహిమ్నా
తస్మాదండాత్ స్వాభిధానాదచింత్యః |
ద్యావాపృథివ్యోరూర్ధ్వఖండావరాభ్యాం
హ్యండాదస్మాత్త్వం విభాగం కరోషి || ౨ ||
వ్యక్తం మేరౌ యజ్జనాయుస్తవాభూ-
-దేవం విద్మస్త్వత్ప్రణీతశ్చకాస్తి |
వ్యక్తం దేవా జన్మనః శాశ్వతస్య
ద్యౌస్తే మూర్ధా లోచనే చంద్రసూర్యౌ || ౩ ||
వ్యాలాః కేశాః శ్రోత్రరంధ్రా దిశస్తే
పాదౌ భూమిర్నాభిరంధ్రే సముద్రాః |
మాయాకారః కారణం త్వం ప్రసిద్ధో
వేదైః శాంతో జ్యోతిషా త్వం హి యుక్తః || ౪ ||
వేదార్థేషు త్వాం వివృణ్వంతి బుద్ధ్వా
హృత్పద్మాంతః సన్నివిష్టం పురాణమ్ |
త్వామాత్మానం లబ్ధయోగా గృణంతి
సాంఖ్యైర్యాస్తాః సప్త సూక్ష్మాః ప్రణీతాః || ౫ ||
తాసాం హేతుర్యాష్టమీ చాపి గీతా
తస్యాం తస్యాం గీయసే వై త్వమంతమ్ |
దృష్ట్వా మూర్తిం స్థూలసూక్ష్మాం చకార
దేవైర్భావాః కారణైః కైశ్చిదుక్తాః || ౬ ||
సంభూతాస్తే త్వత్త ఏవాదిసర్గే
భూయస్తాం తాం వాసనాం తేఽభ్యుపేయుః |
త్వత్సంకల్పేనాంతమాయావిమూఢః
కాలోఽమేయో ధ్వస్తసంఖ్యావికల్పః || ౭ ||
భావాభావవ్యక్తిసంహారహేతు-
-స్త్వం సోఽనంతస్తస్య కర్తాసి చాత్మన్ |
యేఽన్యే సూక్ష్మాః సంతి తేభ్యోఽభిగీతః
స్థూలా భావాశ్చావృతారశ్చ తేషామ్ || ౮ ||
తేభ్యః స్థూలైస్తైః పురాణైః ప్రతీతో
భూతం భవ్యం చైవముద్భూతిభాజామ్ |
భావే భావే భావితం త్వా యునక్తి
యుక్తం యుక్తం వ్యక్తిభావాన్నిరస్య |
ఇత్థం దేవో భక్తిభాజాం శరణ్య-
-స్త్రాతా గోప్తా నో భవానంతమూర్తిః || ౯ ||
ఇతి శ్రీమత్స్యే మహాపురాణే చతుఃపంచాశదధికశతతమోఽధ్యాయే దేవ కృత శ్రీ బ్రహ్మ స్తుతిః ||