గుణత్రయవిభాగాయ పశ్చాద్భేదముపేయుషే || ౧ ||
యదమోఘమపామంతః ఉప్తం బీజమజ త్వయా |
అతశ్చరాచరం విశ్వం ప్రభవస్తస్య గీయసే || ౨ ||
తిసృభిస్త్వమవస్థాభిః మహిమానముదీరయన్ |
ప్రలయస్థితిసర్గాణాం ఏకః కారణతాం గతః || ౩ ||
స్త్రీపుంసావాత్మభాగౌ తే భిన్నమూర్తేః సిసృక్షయా |
ప్రసూతిభాజః సర్గస్య తావేవ పితరౌ స్మృతౌ || ౪ ||
స్వకాలపరిమాణేన వ్యస్తరాత్రిందివస్య తే |
యౌ తు స్వప్నావబోధౌ తౌ భూతానాం ప్రలయోదయౌ || ౫ ||
జగద్యోనిరయోనిస్త్వం జగదంతో నిరంతకః |
జగదాదిరనాదిస్త్వం జగదీశో నిరీశ్వరః || ౬ ||
ఆత్మానమాత్మనా వేత్సి సృజస్యాత్మానమాత్మనా |
ఆత్మనా కృతినా చ త్వమాత్మన్యేవ ప్రలీయసే || ౭ ||
ద్రవఃసంఘాత కఠినః స్థూలః సూక్ష్మో లఘుర్గురుః |
వ్యక్తో వ్యక్తతరశ్చాసి ప్రాకామ్యం తే విభూతిషు || ౮ ||
ఉద్ఘాతః ప్రణవో యాసాం న్యాయైస్త్రిభిరుదీరణమ్ |
కర్మ యజ్ఞః ఫలం స్వర్గః తాసాం త్వం ప్రభవో గిరామ్ || ౯ ||
త్వామామనంతి ప్రకృతిం పురుషార్థప్రవర్తినీమ్ |
తద్దర్శినముదాసీనం త్వామేవ పురుషం విదుః || ౧౦ ||
త్వం పితౄణామపి పితా దేవానామపి దేవతా |
పరతోఽపి పరశ్చాసి విధాతా వేధసామపి || ౧౧ ||
త్వమేవ హవ్యం హోతా చ భోజ్యం భోక్తా చ శాశ్వతః |
వేద్యం చ వేదితా చాసి ధ్యాతా ధ్యేయం చ యత్పరమ్ || ౧౨ ||
ఇతి శ్రీ బ్రహ్మ స్తుతిః ||