శ్రుత్వా చ బగళాపూజాం స్తోత్రం చాపి మహేశ్వర |
ఇదానీం శ్రోతుమిచ్ఛామి కవచం వద మే ప్రభో || ౧ ||
వైరినాశకరం దివ్యం సర్వాఽశుభవినాశనమ్ |
శుభదం స్మరణాత్ పుణ్యం త్రాహి మాం దుఃఖనాశనమ్ || ౨ ||
శ్రీభైరవ ఉవాచ |
కవచం శృణు వక్ష్యామి భైరవి ప్రాణవల్లభే |
పఠిత్వా ధారయిత్వా తు త్రైలోక్యే విజయీ భవేత్ || ౩ ||
అస్య శ్రీబగళాముఖీకవచస్య నారద ఋషిః అనుష్టుప్ ఛందః శ్రీబగళాముఖీ దేవతా లం బీజం ఈం శక్తిః ఐం కీలకం పురుషార్థచతుష్టయే జపే వినియోగః ||
అథ కవచమ్ |
శిరో మే బగళా పాతు హృదయమేకాక్షరీ పరా |
ఓం హ్రీం ఓం మే లలాటే చ బగళా వైరినాశినీ || ౪ ||
గదాహస్తా సదా పాతు ముఖం మే మోక్షదాయినీ |
వైరిజిహ్వాధరా పాతు కంఠం మే బగళాముఖీ || ౫ ||
ఉదరం నాభిదేశం చ పాతు నిత్యం పరాత్పరా |
పరాత్పరతరా పాతు మమ గుహ్యం సురేశ్వరీ || ౬ ||
హస్తౌ చైవ తథా పాతు పార్వతీ పరిపాతు మే |
వివాదే విషమే ఘోరే సంగ్రామే రిపుసంకటే || ౭ ||
పీతాంబరధరా పాతు సర్వాంగం శివనర్తకీ |
శ్రీవిద్యా సమయం పాతు మాతంగీ పూరితా శివా || ౮ ||
పాతు పుత్రం సుతాం చైవ కళత్రం కాళికా మమ |
పాతు నిత్యం భ్రాతరం మే పితరం శూలినీ సదా || ౯ ||
రదే హి బగళాదేవ్యాః కవచం మన్ముఖోదితమ్ |
న వై దేయమముఖ్యాయ సర్వసిద్ధిప్రదాయకమ్ || ౧౦ ||
పఠనాద్ధారణాదస్య పూజనాద్వాంఛితం లభేత్ |
ఇదం కవచమజ్ఞాత్వా యో జపేద్బగళాముఖీమ్ || ౧౧ ||
పిబంతి శోణితం తస్య యోగిన్యః ప్రాప్య సాదరాః |
వశ్యే చాకర్షణే చైవ మారణే మోహనే తథా || ౧౨ ||
మహాభయే విపత్తౌ చ పఠేద్వా పాఠయేత్ తు యః |
తస్య సర్వార్థసిద్ధిః స్యాద్భక్తియుక్తస్య పార్వతీ || ౧౩ ||
ఇతి శ్రీరుద్రయామలే వైరినాశకర శ్రీ బగళాముఖీ కవచమ్ ||