ಸರ್ವಮಾಯಾವಿಹೀನಾಯ ಸರ್ವಮಾಯಾಪ್ರಚಾಲಕ |
ಸರ್ವಾಂತರ್ಯಾಮಿಣೇ ನಿತ್ಯಂ ನಗ್ನಭೈರವ ತೇ ನಮಃ || ೧ ||
ಮಯೂರೇಶಪರಾಯೈವ ಮಯೂರಪುರಪಾಲಕ |
ಧರ್ಮಿಷ್ಠಾನಾಂ ಸುಪಾಲಾಯ ನಗ್ನಭೈರವ ತೇ ನಮಃ || ೨ ||
ಅಧರ್ಮನಿರತಾಂಶ್ಚೈವ ಬಹಿಃಕಾರಾಯ ದೇವಪ |
ಸದಾ ಸ್ವಾನಂದನಿಷ್ಠಾಯ ನಗ್ನಭೈರವ ತೇ ನಮಃ || ೩ ||
ಸಂಸ್ಕಾರಯುಕ್ತಭಾವೇನ ಪಾಪಕರ್ಮಪರಾತ್ಮನಾಮ್ |
ಮಯೂರೇ ದಂಡಕರ್ತ್ರೇ ವೈ ನಗ್ನಭೈರವ ತೇ ನಮಃ || ೪ ||
ಮಹಾಬಲಧರಾಯೈವ ಬ್ರಹ್ಮಾದೀನಾಂ ಪ್ರಚಾಲಕ |
ಅಮೇಯಶಕ್ತಯೇ ದೇವ ನಗ್ನಭೈರವ ತೇ ನಮಃ || ೫ ||
ಭುಕ್ತಿಮುಕ್ತಿಪ್ರದಾತ್ರೇ ಚ ಧನಧಾನ್ಯವಿವರ್ಧನ |
ಗಾಣೇಶಾನಾಂ ಪ್ರಪಾಲಾಯ ನಗ್ನಭೈರವ ತೇ ನಮಃ || ೬ ||
ಪ್ರಲಯೇ ಶೂಲಮುದ್ಯಮ್ಯ ಬ್ರಹ್ಮಾಂಡಭಯಕಾರಕ |
ಶೂಲಪ್ರೋತಮಹಾಂಡಾಯ ನಗ್ನಭೈರವ ತೇ ನಮಃ || ೭ ||
ಅಟ್ಟಹಾಸೇನ ದೇವೇಂದ್ರಾಂಸ್ತಥಾ ಸಂತ್ರಾಸ್ಯ ಚಾಸುರಾನ್ |
ನೃತ್ಯಸೇ ಗಣನಾಥಾಗ್ರೇ ನಗ್ನಭೈರವ ತೇ ನಮಃ || ೮ ||
ವಿಶ್ವಂ ತತಂ ಸರ್ವಮಿದಂ ತ್ವಯೇಶ
ಆದ್ಯಂತಮಧ್ಯೇಷು ಮಹಾನುಭಾವ |
ಸಂರಕ್ಷ ದೇವೇಶ ಮಯೂರಸಂಸ್ಥಾ-
-ನಸ್ಮಾನ್ ಕುರುಷ್ವ ತ್ವಮನನ್ಯಭಾವಾನ್ || ೯ ||
ಶೂಲಿನ್ನಮಸ್ತೇಽಖಿಲಕಾರಣಾಯ
ತ್ವದ್ಭೀತಿಭಾವೇನ ಜಗತ್ಪ್ರವೃತ್ತಿಃ |
ವ್ಯಾಪಾರಯುಕ್ತಂ ವಿವಿಧೇಷು ನಿತ್ಯಂ
ಸ್ವಸ್ವಪ್ರಕಾರ್ಯಂ ಪ್ರಕರೋತಿ ಚಾತ್ಮನ್ || ೧೦ ||
ಅತಸ್ತ್ವದಾಧಾರಮಯಂ ಪರೇಶ
ಸುರಕ್ಷ ತೇ ಭಕ್ತಿಯುತಂ ಕುರುಷ್ವ |
ಗಣೇಶಕ್ಷೇತ್ರಂ ತ್ವದಧೀನಗಂ ತುಂ
ಗಣೇಶಸಂಸ್ಥಂ ಕುರು ತೇ ನಮೋ ವೈ || ೧೧ ||
ಇದಂ ಸ್ತೋತ್ರಂ ಮಹೇಶಾನಾ ನಗ್ನಭೈರವಕಸ್ಯ ಚ |
ಯಃ ಪಠೇಚ್ಛೃಣುಯಾದ್ವಾಽಪಿ ಸ ಸರ್ವಂ ಪ್ರಲಭೇಚ್ಛುಭಮ್ || ೧೨ ||
ಧನಧಾನ್ಯಾದಿಕಂ ಸರ್ವಂ ಭುಕ್ತಿಮುಕ್ತಿಸಮನ್ವಿತಮ್ |
ಲಭೇದನೇನ ದೇವೇಶಾಸ್ತುವಿಧ್ವಂ ನಗ್ನಭೈರವಮ್ || ೧೩ ||
ಮಯೂರಕ್ಷೇತ್ರತ್ಯಾಗಶ್ಚ ಕದಾಪಿ ನ ಭವೇನ್ನೃಣಾಮ್ |
ಸ್ತೋತ್ರೇಣ ಸ್ತುವತಾಂ ನಿತ್ಯಂ ನ ಕಿಂಚಿದ್ದುರ್ಲಭಂ ಭವೇತ್ || ೧೪ ||
ಇತಿ ಶ್ರೀಮನ್ಮುದ್ಗಲೇ ಮಹಾಪುರಾಣೇ ಷಷ್ಠೇ ಖಂಡೇ ಅಷ್ಟಾವಿಂಶತಿತಮೋಽಧ್ಯಾಯೇ ಭ್ರೂಶುಂಡಿ ಕೃತ ಶ್ರೀ ನಗ್ನಭೈರವ ಸ್ತುತಿಃ ||