ఓం అథ హైనాం బ్రహ్మరంధ్రే సుభగాం బ్రహ్మాస్త్రస్వరూపిణీమాప్నోతి బ్రహ్మాస్త్రాం మహావిద్యాం శాంభవీం సర్వస్తంభకరీం సిద్ధాం చతుర్భుజాం దక్షాభ్యాం కరాభ్యాం ముద్గరపాశౌ వామాభ్యాం శత్రుజిహ్వావజ్రే దధానాం పీతవాససం పీతాలంకారసంపన్నాం దృఢీభూతపీనోన్నతపయోధరయుగ్మాఢ్యాం తప్తకార్తస్వరకుండలద్వయవిరాజితముఖాంభోజాం లలాటపట్టోల్లసత్పీతచంద్రార్ధమనుబిభ్రతీముద్యద్దివాకరోద్యోతాం స్వర్ణసింహాసనమధ్యకమలసంస్థాం ధియా సంచింత్య తదుపరి త్రికోణషట్కోణవసుపత్రవృత్తాంతః షోడశదళకమలోపరి భూబింబత్రయమనుసంధాయ తత్రాద్యయోన్యంతరే దేవీమాహూయ ధ్యాయేత్ | యోనిం జగద్యోనిం సమాయముచ్చార్య శివాంతే భూమాగ్రబిందుమిందుఖండమగ్నిబీజం తతో వరుణాంకగుణార్ణమత్రియుతం స్థిరాముఖి ఇతి సంబోధ్య సర్వదుష్టానామిదం చాభాష్య వాచమితి ముఖమితి పదమితి స్తంభయేతి వోచ్చార్య జిహ్వాం వైశారదీం కీలయేతి బుద్ధిం వినాశయేతి ప్రోచ్చార్య భూమాయాం వేదాద్యం తతో యజ్ఞభూగుహాయాం యోజయేత్ | స మహాస్తంభేశ్వరః సర్వేశ్వరః | స సేనాస్తంభం కరోతి | కిం బహునా వివస్వద్ధృతిస్తంభకర్తా సర్వవాతస్తంభకర్తేతి | కిం దివాకర్షయతి | స సర్వవిద్యేశ్వరః సర్వమంత్రేశ్వరో భూత్వా పూజాయా ఆవర్తనం త్రైలోక్యస్తంభిన్యాః కుర్యాత్ | అంగమాద్యం ద్వారతో గణేశం వటుకం యోగినీం క్షేత్రాధీశం చ పూర్వాదికమభ్యర్చ్య గురుపంక్తిమీశాసురాంతమంతః ప్రాచ్యాదౌ క్రమానుగతా బగళా స్తంభినీ జృంభిణీ మోహినీ వశ్యా అచలా చలా దుర్ధరా అకల్మషా ఆధారా కల్పనా కాలకర్షిణీ భ్రమరికా మదగమనా భోగా యోగికా ఏతా హ్యష్టదళానుగతాః పూజ్యాః | బ్రాహ్మీ మాహేశ్వరీ కౌమారీ వైష్ణవీ వారాహీ నారసింహీ చాముండా మహాలక్ష్మీశ్చ | షడ్యోనిగర్భాంతా డాకినీ రాకినీ లాకినీ కాకినీ శాకినీ హాకినీ వేద్యాద్యస్థిరమాయాద్యాః సమభ్యర్చ్య శక్రాగ్నియమనిరృతివరుణవాయవ్యధనదేశానప్రజాపతినాగేశాః పరివారాభిమతాః స్థిరాదివేదాద్యాః సవాహనాః సదస్త్రకా బాహ్యతోఽభ్యర్చ్య తాం యోనిం రతిప్రీతిమనోభవా ఏతాః సర్వాః సమాః పీతాంశుకా ధ్యేయాః | తదంతమూలాయాం బలాదిషోడశానుగతాః పూజ్యాః నీరాజనైః | స హైశ్వర్యయుక్తో భవతి | య ఏనాం ధ్యాయతి స వాగ్మీ భవతి | సోఽమృతమశ్నుతే | సర్వసిద్ధికర్తా భవతి | సృష్టిస్థితిసంహారకర్తా భవతి | స సర్వేశ్వరో భవతి | స తు ఋద్ధీశ్వరో భవతి | స శాక్తః స వైష్ణవః స గణపః స శైవః | స జీవన్ముక్తో భవతి | స సన్న్యాసీ భవతి | న్యసనం న్యాసః | సమ్యఙ్న్యాసః సన్న్యాసః | న తు ముండితముండః | షట్త్రింశదస్త్రేశ్వరో భవేత్ సౌభాగ్యార్చనేనేతి ప్రోతం వేద | ఓం శివమ్ ||
ఇతి శ్రీ పీతాంబరోపనిషత్ ||
