ಶ್ರೀವತ್ಸಾಂಕಸುತಃ ಶ್ರೀಮಾನ್ ಶ್ರೇಯಸೇ ಮೇಽಸ್ತು ಭೂಯಸೇ ||
ಶ್ರಿಯೈ ಸಮಸ್ತಚಿದಚಿದ್ವಿಧಾನವ್ಯಸನಂ ಹರೇಃ |
ಅಂಗೀಕಾರಿಭಿರಾಲೋಕೈಃ ಸಾರ್ಥಯಂತ್ಯೈ ಕೃತೋಽಂಜಲಿಃ || ೧ ||
ಉಲ್ಲಾಸಪಲ್ಲವಿತಪಾಲಿತಸಪ್ತಲೋಕೀ-
-ನಿರ್ವಾಹಕೋರಕಿತನೇಮಕಟಾಕ್ಷಲೀಲಾಮ್ |
ಶ್ರೀರಂಗಹರ್ಮ್ಯತಲಮಂಗಳದೀಪರೇಖಾಂ
ಶ್ರೀರಂಗರಾಜಮಹಿಷೀಂ ಶ್ರಿಯಮಾಶ್ರಯಾಮಃ || ೨ ||
ಅನುಕಲತನುಕಾಂಡಾಲಿಂಗನಾರಂಭಶುಂಭತ್
ಪ್ರತಿದಿಶಭುಜಶಾಖಶ್ರೀಸಖಾನೋಕಹರ್ಧಿಃ |
ಸ್ತನನಯನಗುಲುಚ್ಛಸ್ಫಾರಪುಷ್ಪದ್ವಿರೇಫಾ
ರಚಯತು ಮಯಿ ಲಕ್ಷ್ಮೀಕಲ್ಪವಲ್ಲೀ ಕಟಾಕ್ಷಾನ್ || ೩ ||
ಯದ್ಭ್ರೂಭಂಗಾಃ ಪ್ರಮಾಣಂ ಸ್ಥಿರಚರರಚನಾತಾರತಮ್ಯೇ ಮುರಾರೇಃ
ವೇದಾಂತಾಸ್ತತ್ತ್ವಚಿಂತಾಂ ಮುರಭಿದುರಸಿ ಯತ್ಪಾದಚಿಹ್ನೈಸ್ತರಂತಿ |
ಭೋಗೋಪೋದ್ಘಾತಕೇಲೀಚುಲಕಿತಭಗವದ್ವೈಶ್ವರೂಪ್ಯಾನುಭಾವಾ
ಸಾ ನಃ ಶ್ರೀರಾಸ್ತೃಣೀತಾಮಮೃತಲಹರಿಧೀಲಂಘನೀಯೈರಪಾಂಗೈಃ || ೪ ||
ಯದ್ಯಾವತ್ತವ ವೈಭವಂ ತದುಚಿತಸ್ತೋತ್ರಾಯ ದೂರೇ ಸ್ಪೃಹಾ
ಸ್ತೋತುಂ ಕೇ ವಯಮಿತ್ಯದಶ್ಚ ಜಗೃಹುಃ ಪ್ರಾಂಚೋ ವಿರಿಂಚಾದಯಃ |
ಅಪ್ಯೇವಂ ತವ ದೇವಿ ವಾಙ್ಮನಸಯೋರ್ಭಾಷಾನಭಿಜ್ಞಂ ಪದಂ
ಕಾವಾಚಃ ಪ್ರಯತಾಮಹೇ ಕವಯಿತುಂ ಸ್ವಸ್ತಿ ಪ್ರಶಸ್ತ್ಯೈ ಗಿರಾಮ್ || ೫ ||
ಸ್ತೋತಾರಂ ತಮುಶಂತಿ ದೇವಿ ಕವಯೋ ಯೋ ವಿಸ್ತೃಣೀತೇ ಗುಣಾನ್
ಸ್ತೋತವ್ಯಸ್ಯ ತತಶ್ಚ ತೇ ಸ್ತುತಿಧುರಾ ಮಯ್ಯೇವ ವಿಶ್ರಾಮ್ಯತಿ |
ಯಸ್ಮಾದಸ್ಮದಮರ್ಷಣೀಯಫಣಿತಿಸ್ವೀಕಾರತಸ್ತೇ ಗುಣಾಃ
ಕ್ಷಾಂತ್ಯೌದಾರ್ಯದಯಾದಯೋ ಭಗವತಿ ಸ್ವಾಂ ಪ್ರಸ್ನುವೀರನ್ ಪ್ರಥಾಮ್ || ೬ ||
ಸೂಕ್ತಿಂ ಸಮಗ್ರಯತು ನಃ ಸ್ವಯಮೇವ ಲಕ್ಷ್ಮೀಃ
ಶ್ರೀರಂಗರಾಜಮಹಿಷೀ ಮಧುರೈಃ ಕಟಾಕ್ಷೈಃ |
ವೈದಗ್ಧ್ಯವರ್ಣಗುಣಗುಂಭನಗೌರವೈರ್ಯಾಂ
ಕಂಡೂಲಕರ್ಣಕುಹರಾಃ ಕವಯೋ ಧಯಂತಿ || ೭ ||
ಅನಾಘ್ರಾತಾವದ್ಯಂ ಬಹುಗುಣಪರೀಣಾಹಿ ಮನಸೋ
ದುಹಾನಂ ಸೌಹಾರ್ದಂ ಪರಿಚಿತಮಿವಾಥಾಪಿ ಗಹನಮ್ |
ಪದಾನಾಂ ಸೌಭ್ರಾತ್ರಾದನಿಮಿಷನಿಷೇವ್ಯಂ ಶ್ರವಣಯೋಃ
ತ್ವಮೇವ ಶ್ರೀರ್ಮಹ್ಯಂ ಬಹುಮುಖಯ ವಾಣೀವಿಲಸಿತಮ್ || ೮ ||
ಶ್ರಿಯಃ ಶ್ರೀಃ ಶ್ರೀರಂಗೇಶಯ ತವ ಚ ಹೃದ್ಯಾಂ ಭಗವತೀಂ
ಶ್ರಿಯಂ ತ್ವತ್ತೋಽಪ್ಯುಚ್ಚೈರ್ವಯಮಿಹ ಫಣಾಮಃ ಶೃಣುತರಾಮ್ |
ದೃಶೌ ತೇ ಭೂಯಾಸ್ತಾಂ ಸುಖತರಲತಾರೇ ಶ್ರವಣತಃ
ಪುನರ್ಹರ್ಷೋತ್ಕರ್ಷಾತ್ ಸ್ಫುಟತು ಭುಜಯೋಃ ಕಂಚುಕಶತಮ್ || ೯ ||
ದೇವಿ ಶ್ರುತಿಂ ಭಗವತೀಂ ಪ್ರಥಮೇ ಪುಮಾಂಸಃ
ತ್ವತ್ಸದ್ಗುಣೌಘಮಣಿಕೋಶಗೃಹಂ ಗೃಣಂತಿ |
ತದ್ದ್ವಾರಪಾಟನಪಟೂನಿ ಚ ಸೇತಿಹಾಸ-
-ಸಂತರ್ಕಣಸ್ಮೃತಿಪುರಾಣಪುರಸ್ಸರಾಣಿ || ೧೦ ||
ಆಹುರ್ವೇದಾನಮಾನಂ ಕತಿಚನ ಕತಿಚಾರಾಜಕಂ ವಿಶ್ವಮೇತತ್
ರಾಜನ್ವತ್ಕೇಚಿದೀಶಂ ಗುಣಿನಮಪಿ ಗುಣೈಸ್ತಂ ದರಿದ್ರಾಣಮನ್ಯೇ |
ಭಿಕ್ಷಾವನ್ಯೇ ಸುರಾಜಂಭವಮಿತಿ ಚ ಜಡಾಸ್ತೇ ತಲಾತಲ್ಯಕಾರ್ಷುಃ
ಯೇ ತೇ ಶ್ರೀರಂಗಹರ್ಮ್ಯಾಂಗಣಕನಕಲತೇ ನ ಕ್ಷಣಂ ಲಕ್ಷ್ಯಮಾಸನ್ || ೧೧ ||
ಮನಸಿ ವಿಲಸತಾಽಕ್ಷ್ಣಾ ಭಕ್ತಿಸಿದ್ಧಾಂಜನೇನ
ಶ್ರುತಿಶಿರಸಿ ನಿಗೂಢಂ ಲಕ್ಷ್ಮಿ ತೇ ವೀಕ್ಷಮಾಣಾಃ |
ನಿಧಿಮಿವ ಮಹಿಮಾನಂ ಭುಂಜತೇ ಯೇಽಪಿ ಧನ್ಯಾಃ
ನನು ಭಗವತಿ ದೈವೀಂ ಸಂಪದಂ ತೇಽಭಿಜಾತಾಃ || ೧೨ ||
ಅಸ್ಯೇಶಾನಾ ಜಗತ ಇತಿ ತೇಽಧೀಮಹೇ ಯಾಂ ಸಮೃದ್ಧಿಂ
ಶ್ರೀಃ ಶ್ರೀಸೂಕ್ತಂ ಬಹುಮುಖಯತೇ ತಾಂ ಚ ಶಾಖಾನುಶಾಖಮ್ |
ಈಷ್ಟೇ ಕಶ್ಚಿಜ್ಜಗತ ಇತಿ ಯಃ ಪೌರುಷೇ ಸೂಕ್ತ ಉಕ್ತಃ
ತಂ ಚ ತ್ವತ್ಕಂ ಪತಿಮಧಿಜಗಾವುತ್ತರಶ್ಚಾನುವಾಕಃ || ೧೩ ||
ಉದ್ಬಾಹುಸ್ತ್ವಾಮುಪನಿಷದಸಾವಾಹ ನೈಕಾ ನಿಯಂತ್ರೀಂ
ಶ್ರೀಮದ್ರಾಮಾಯಣಮಪಿ ಪರಂ ಪ್ರಾಣಿತಿ ತ್ವಚ್ಚರಿತ್ರೇ |
ಸ್ಮರ್ತಾರೋಽಸ್ಮಜ್ಜನನಿ ಯತಮೇ ಸೇತಿಹಾಸೈಃ ಪುರಾಣೈಃ
ನಿತ್ಯುರ್ವೇದಾನಪಿ ಚ ತತಮೇ ತ್ವನ್ಮಹಿಮ್ನಿ ಪ್ರಮಾಣಮ್ || ೧೪ ||
ಆಕುಗ್ರಾಮನಿಯಾಮಕಾದಪಿ ವಿಭೋರಾಸರ್ವನಿರ್ವಾಹಕಾತ್
ಐಶ್ವರ್ಯಂ ಯದಿಹೋತ್ತರೋತ್ತರಗುಣಂ ಶ್ರೀರಂಗಭರ್ತುಃ ಪ್ರಿಯೇ |
ತುಂಗಂ ಮಂಗಳಮುಜ್ಜ್ವಲಂ ಗರಿಮವತ್ ಪುಣ್ಯಂ ಪುನಃ ಪಾವನಂ
ಧನ್ಯಂ ಯತ್ತದದಶ್ಚ ವೀಕ್ಷಣಭುವಸ್ತೇ ಪಂಚಷಾಃ ವಿಪ್ರುಷಃ || ೧೫ ||
ಏಕೋ ಮುಕ್ತಾತಪತ್ರಪ್ರಚಲಮಣಿಘಣಾತ್ಕಾರಿಮೌಳಿರ್ಮನುಷ್ಯೋ
ದೃಪ್ಯದ್ದಂತಾವಳಸ್ಥೋ ನ ಗಣಯತಿ ನತಾನ್ ಯತ್ಕ್ಷಣಂ ಕ್ಷೋಣಿಪಾಲಾನ್ |
ಯತ್ತಸ್ಮೈ ತಿಷ್ಠತೇಽನ್ಯಃ ಕೃಪಣಮಶರಣೋ ದರ್ಶಯನ್ ದಂತಪಂಕ್ತೀ
ತತ್ತೇ ಶ್ರೀರಂಗರಾಜಪ್ರಣಯಿನಿ ನಯನೋದಂಚಿತಾನ್ಯಂಚಿತಾಭ್ಯಾಮ್ || ೧೬ ||
ರತಿರ್ಮತಿಸರಸ್ವತೀ ಧೃತಿಸಮೃದ್ಧಿಸಿದ್ಧಿಶ್ರಿಯಃ
ಸುಧಾಸಖಿ ಯತೋಮುಖಂ ಚಿಚಲಿಷೇತ್ತವ ಭ್ರೂಲತಾ |
ತತೋಮುಖಮಥೇಂದಿರೇ ಬಹುಮುಖೀಮಹಂಪೂರ್ವಿಕಾಂ
ವಿಗಾಹ್ಯ ಚ ವಶಂವದಾಃ ಪರಿವಹಂತಿ ಕೂಲಂಕಷಾಃ || ೧೭ ||
ಸಹ ಸ್ಥಿರಪರಿತ್ರಸವ್ರಜವಿರಿಂಚನಾಕಿಂಚನೈಃ
ಅನೋಕಹಬೃಹಸ್ಪತಿಪ್ರಬಲವಿಕ್ಲಬಪ್ರಕ್ರಿಯಮ್ |
ಇದಂ ಸದಸದಾತ್ಮನಾ ನಿಖಿಲಮೇವ ನಿಮ್ನೋನ್ನತಂ
ಕಟಾಕ್ಷತದುಪೇಕ್ಷಯೋಸ್ತವ ಹಿ ಲಕ್ಷ್ಮಿ ತತ್ತಾಂಡವಮ್ || ೧೮ ||
ಕಾಲೇ ಶಂಸತಿ ಯೋಗ್ಯತಾಂ ಚಿದಚಿತೋರನ್ಯೋನ್ಯಮಾಲಿಂಗತೋಃ
ಭೂತಾಹಂಕೃತಿಬುದ್ಧಿಪಂಚಕರಣೀಸ್ವಾಂತಪ್ರವೃತ್ತೀಂದ್ರಿಯೈಃ |
ಅಂಡಾನಾವರಣೈಃ ಸಹಸ್ರಮಕರೋತ್ತಾನ್ಭೂರ್ಭುವಃ ಸರ್ವತಃ
ಶ್ರೀರಂಗೇಶ್ವರದೇವಿ ತೇ ವಿಹೃತಯೇ ಸಂಕಲ್ಪಮಾನಃ ಪ್ರಿಯಃ || ೧೯ ||
ಶಬ್ದಾದೀನ್ ವಿಷಯಾನ್ ಪ್ರದರ್ಶ್ಯ ವಿಭವಂ ವಿಸ್ಮಾರ್ಯ ದಾಸ್ಯಾತ್ಮಕಂ
ವೈಷ್ಣವ್ಯಾ ಗುಣಮಾಯಯಾಽಽತ್ಮನಿವಹಾನ್ ವಿಪ್ಲಾವ್ಯ ಪೂರ್ವಃ ಪುಮಾನ್ |
ಪುಂಸಾ ಪಣ್ಯವಧೂವಿಡಂಬಿವಪುಷಾ ಧೂರ್ತಾನಿವಾಯಾಸಯನ್
ಶ್ರೀರಂಗೇಶ್ವರಿ ಕಲ್ಪತೇ ತವ ಪರೀಹಾಸಾತ್ಮನೇ ಕೇಲಯೇ || ೨೦ ||
ಯದ್ದೂರೇ ಮನಸೋ ಯದೇವ ತಮಸಃ ಪಾರೇ ಯದತ್ಯದ್ಭುತಂ
ಯತ್ಕಾಲಾದಪಚೇಲಿಮಂ ಸುರಪುರೀ ಯದ್ಗಚ್ಛತೋ ದುರ್ಗತಿಃ |
ಸಾಯುಜ್ಯಸ್ಯ ಯದೇವ ಸೂತಿರಥವಾ ಯದ್ದುರ್ಗ್ರಹಂ ಮದ್ಗಿರಾಂ
ತದ್ವಿಷ್ಣೋಃ ಪರಮಂ ಪದಂ ತವ ಕೃತೇ ಮಾತಃ ಸಮಾಮ್ನಾಸಿಷುಃ || ೨೧ ||
ಹೇಲಾಯಾಮಖಿಲಂ ಚರಾಚರಮಿದಂ ಭೋಗೇ ವಿಭೂತಿಃ ಪರಾ
ಪುಣ್ಯಾಸ್ತೇ ಪರಿಚಾರಕರ್ಮಣಿ ಸದಾ ಪಶ್ಯಂತಿ ಯೇ ಸೂರಯಃ |
ಶ್ರೀರಂಗೇಶ್ವರದೇವಿ ಕೇವಲಕೃಪಾನಿರ್ವಾಹ್ಯವರ್ಗೇ ವಯಂ
ಶೇಷಿತ್ವೇ ಪರಮಃ ಪುಮಾನ್ ಪರಿಕರಾ ಹ್ಯೇತೇ ತವ ಸ್ಫಾರಣೇ || ೨೨ ||
ಆಜ್ಞಾನುಗ್ರಹಭೀಮಕೋಮಲಪುರೀಪಾಲಾ ಫಲಂ ಭೇಜುಷಾಂ
ಯಾಽಯೋಧ್ಯೇತ್ಯಪರಾಜಿತೇತಿ ವಿದಿತಾ ನಾಕಂ ಪರೇಣ ಸ್ಥಿತಾ |
ಭಾವೈರದ್ಭುತಭೋಗಭೂಮಗಹನೈಃ ಸಾಂದ್ರಾ ಸುಧಾಸ್ಯಂದಿಭಿಃ
ಶ್ರೀರಂಗೇಶ್ವರಗೇಹಲಕ್ಷ್ಮಿ ಯುವಯೋಸ್ತಾಂ ರಾಜಧಾನೀಂ ವಿದುಃ || ೨೩ ||
ತಸ್ಯಾಂ ಚ ತ್ವತ್ಕೃಪಾವನ್ನಿರವಧಿಜನತಾವಿಶ್ರಮಾರ್ಹಾವಕಾಶಂ
ಸಂಕೀರ್ಣಂ ದಾಸ್ಯತೃಷ್ಣಾಕಲಿತಪರಿಕರೈಃ ಪುಂಭಿರಾನಂದನಿಘ್ನೈಃ |
ಸ್ನೇಹಾದಾಸ್ಥಾನರಕ್ಷಾವ್ಯಸನಿಭಿರಭಯಂ ಶಾರ್ಙ್ಗಚಕ್ರಾಸಿಮುಖ್ಯೈ-
-ರಾನಂದೈಕಾರ್ಣವಂ ಶ್ರೀರ್ಭಗವತಿ ಯುವಯೋರಾಹುರಾಸ್ಥಾನರತ್ನಮ್ || ೨೪ ||
ತತ್ರ ಸ್ರಕ್ಸ್ಪರ್ಶಗಂಧಂ ಸ್ಫುರದುಪರಿಫಣಾರತ್ನರೋಚಿರ್ವಿತಾನಂ
ವಿಸ್ತೀರ್ಯಾನಂತಭೋಗಂ ತದುಪರಿ ನಯತಾ ವಿಶ್ವಮೇಕಾತಪತ್ರಮ್ |
ತೈಸ್ತೈಃ ಕಾಂತೇನ ಶಾಂತೋದಿತಗುಣವಿಭವೈರರ್ಹತಾ ತ್ವಾಮಸಂಖ್ಯೈಃ
ಅನ್ಯೋನ್ಯಾದ್ವೈತನಿಷ್ಠಾಘನರಸಗಹನಾನ್ ದೇವಿ ಬಧ್ನಾಸಿ ಭೋಗಾನ್ || ೨೫ ||
ಭೋಗ್ಯಾ ವಾಮಪಿ ನಾಂತರೀಯಕತಯಾ ಪುಷ್ಪಾಂಗರಾಗೈಃ ಸಮಂ
ನಿರ್ವೃತ್ತಪ್ರಣಯಾತಿವಾಹನವಿಧೌ ನೀತಾಃ ಪರೀವಾಹತಾಮ್ |
ದೇವಿ ತ್ವಾಮನು ನೀಲಯಾ ಸಹ ಮಹೀದೇವ್ಯಃ ಸಹಸ್ರಂ ತಥಾ
ಯಾಭಿಸ್ವಂ ಸ್ತನಬಾಹುದೃಷ್ಟಿಭಿರಿವ ಸ್ವಾಭಿಃ ಪ್ರಿಯಂ ಶ್ಲಾಘಸೇ || ೨೬ ||
ತೇ ಸಾಧ್ಯಾಃ ಸಂತಿ ದೇವಾ ಜನನಿ ಗುಣವಪುರ್ವೇಷವೃತ್ತಸ್ವರೂಪೈಃ
ಭೋಗೈರ್ವಾ ನಿರ್ವಿಶೇಷಾಃ ಸವಯಸ ಇವ ಯೇ ನಿತ್ಯನಿರ್ದೋಷಗಂಧಾಃ
ಹೇ ಶ್ರೀಃ ಶ್ರೀರಂಗಭರ್ತುಸ್ತವ ಚ ಪದಪರೀಚಾರವೃತ್ತ್ಯೈ ಸದಾಽಪಿ
ಪ್ರೇಮಪ್ರದ್ರಾಣಭಾವಾವಿಲಹೃದಯಹಠಾತ್ಕಾರಕೈಂಕರ್ಯಭೋಗಾಃ || ೨೭ ||
ಸ್ವರೂಪಂ ಸ್ವಾತಂತ್ರ್ಯಂ ಭಗವತ ಇದಂ ಚಂದ್ರವದನೇ
ತ್ವದಾಶ್ಲೇಷೋತ್ಕರ್ಷಾದ್ಭವತಿ ಖಲು ನಿಷ್ಕರ್ಷಸಮಯೇ |
ತ್ವಮಾಸೀರ್ಮಾತಃ ಶ್ರೀಃ ಕಮಿತುರಿದಮಿತ್ಥಂತ್ವವಿಭವ-
-ಸ್ತದಂತರ್ಭಾವಾತ್ತ್ವಾಂ ನ ಪೃಥಗಭಿಧತ್ತೇ ಶ್ರುತಿರಪಿ || ೨೮ ||
ತವ ಸ್ಪರ್ಶಾದೀಶಂ ಸ್ಪೃಶತಿ ಕಮಲೇ ಮಂಗಳಪದಂ
ತವೇದಂ ನೋಪಾಧೇರುಪನಿಪತಿತಂ ಶ್ರೀರಸಿ ಯತಃ |
ಪ್ರಸೂನಂ ಪುಷ್ಯಂತೀಮಪಿ ಪರಿಮಳರ್ಧಿಂ ಜಿಗದಿಷುಃ
ನ ಚೈವಂ ತ್ವಾದೇವಂ ಸ್ವದತ ಇತಿ ಕಶ್ಚಿತ್ಕವಯತೇ || ೨೯ ||
ಅಪಾಂಗಾ ಭೂಯಾಂಸೋ ಯದುಪರಿ ಪರಂ ಬ್ರಹ್ಮ ತದಭೂ-
-ದಮೀ ಯತ್ರ ದ್ವಿತ್ರಾಃ ಸ ಚ ಶತಮಖಾದಿಸ್ತದಧರಾತ್ |
ಅತಃ ಶ್ರೀರಾಮ್ನಾಯಸ್ತದುಭಯಮುಶಂಸ್ತ್ವಾಂ ಪ್ರಣಿಜಗೌ
ಪ್ರಶಸ್ತಿಃ ಸಾ ರಾಜ್ಞೋ ಯದಪಿ ಚ ಪುರೀಕೋಶಕಥನಮ್ || ೩೦ ||
ಸ್ವತಃ ಶ್ರೀಸ್ತ್ವಂ ವಿಷ್ಣೋಃ ಸ್ವಮಸಿ ತತ ಏವೈಷ ಭಗವಾನ್
ತ್ವದಾಯತ್ತರ್ಧಿತ್ವೇಽಪ್ಯಭವದಪರಾಧೀನವಿಭವಃ |
ಸ್ವಯಾ ದೀಪ್ತ್ಯಾ ರತ್ನಂ ಭವದಪಿ ಮಹಾರ್ಘಂ ನ ವಿಗುಣಂ
ನ ಕುಂಠಸ್ವಾತಂತ್ರ್ಯಂ ಭವತಿ ಚ ನ ಚಾನ್ಯಾಹಿತಗುಣಮ್ || ೩೧ ||
ಪ್ರಶಕನಬಲಜ್ಯೋತಿರ್ಜ್ಞಾನೈಶ್ವರೀವಿಜಯಪ್ರಥಾ-
-ಪ್ರಣತವರಣಪ್ರೇಮಕ್ಷೇಮಂಕರತ್ವಪುರಸ್ಸರಾಃ
ಅಪಿ ಪರಿಮಳಃ ಕಾಂತಿರ್ಲಾವಣ್ಯಮರ್ಚಿರಿತೀಂದಿರೇ
ತವ ಭಗವತಶ್ಚೈತೇ ಸಾಧಾರಣಾಃ ಗುಣರಾಶಯಃ || ೩೨ ||
ಅನ್ಯೇಽಪಿ ಯೌವನಮುಖಾಃ ಯುವಯೋಃ ಸಮಾನಾಃ
ಶ್ರೀರಂಗಮಂಗಳವಿಜೃಂಭಣವೈಜಯಂತಿ
ತಸ್ಮಿಂಸ್ತವ ತ್ವಯಿ ಚ ತಸ್ಯ ಪರಸ್ಪರೇಣ
ಸಂಸ್ತೀರ್ಯ ದರ್ಪಣ ಇವ ಪ್ರಚುರಂ ಸ್ವದಂತೇ || ೩೩ ||
ಯುವತ್ವಾದೌ ತುಲ್ಯೇಽಪ್ಯಪರವಶತಾಶತ್ರುಶಮನ-
-ಸ್ಥಿರತ್ವಾದೀನ್ ಕೃತ್ವಾ ಭಗವತಿ ಗುಣಾನ್ ಪುಂಸ್ತ್ವಸುಲಭಾನ್ |
ತ್ವಯಿ ಸ್ತ್ರೀತ್ವೈಕಾಂತಾನ್ ಮ್ರದಿಮಪತಿಪಾರಾರ್ಥ್ಯಕರುಣಾ-
-ಕ್ಷಮಾದೀನ್ವಾ ಭೋಕ್ತುಂ ಭವತಿ ಯುವಯೋರಾತ್ಮನಿ ಭಿದಾ || ೩೪ ||
ಘನಕನಕದ್ಯುತೀ ಯುವದಶಾಮಪಿ ಮುಗ್ಧದಶಾಂ
ಯುವತರುಣತ್ವಯೋರುಚಿತಮಾಭರಣಾದಿ ಪರಮ್ |
ಧ್ರುವಮಸಮಾನದೇಶವಿನಿವೇಶಿ ವಿಭಜ್ಯ ಹರೌ
ತ್ವಯಿ ಚ ಕುಶೇಶಯೋದರವಿಹಾರಿಣಿ ನಿರ್ವಿಶಸಿ || ೩೫ ||
ಅಂಗಂ ತೇ ಮೃದುಶೀತಮುಗ್ಧಮಧುರೋದಾರೈರ್ಗುಣೈರ್ಗುಂಭತಃ
ಕ್ಷೀರಾಬ್ಧೇಃ ಕಿಮೃಜೀಷತಾಮುಪಗತಾ ಮನ್ಯೇ ಮಹಾರ್ಘಾಸ್ತತಃ |
ಇಂದುಃ ಕಲ್ಪಲತಾ ಸುಧಾಮಧುಮುಖಾ ಇತ್ಯಾವಿಲಾಂ ವರ್ಣನಾಂ
ಶ್ರೀರಂಗೇಶ್ವರಿ ಶಾಂತಕೃತ್ರಿಮಕಥಂ ದಿವ್ಯಂ ವಪುರ್ನಾರ್ಹತಿ || ೩೬ ||
ಪ್ರಣಮದನುವಿಧಿತ್ಸಾವಾಸನಾನಮ್ರಮಗ್ರೇ
ಪ್ರಣಯಿಪರಿಚಿಚೀಷಾಕುಂಚಿತಂ ಪಾರ್ಶ್ವಕೇನ |
ಕನಕನಿಕಷಚಂಚಚ್ಚಂಪಕಸ್ರಕ್ಸಮಾನ-
-ಪ್ರವರಮಿದಮುದಾರಂ ವರ್ಷ್ಮ ವಾಚಾಮಭೂಮಿಃ || ೩೭ ||
ಏಕಂ ನ್ಯಂಚ್ಯ ನತಿಕ್ಷಮಂ ಮಮ ಪರಂ ಚಾಕುಂಚ್ಯ ಪಾದಾಂಬುಜಂ
ಮಧ್ಯೇ ವಿಷ್ಟರಪುಂಡರೀಕಮಭಯಂ ವಿನ್ಯಸ್ಯ ಹಸ್ತಾಂಬುಜಮ್ |
ತ್ವಾಂ ಪಶ್ಯೇಮ ನಿಷೇದುಷೀಂ ಪ್ರತಿಕಲಂ ಕಾರುಣ್ಯಕೂಲಂಕಷ-
-ಸ್ಫಾರಾಪಾಂಗತರಂಗಮಂಬ ಮಧುರಂ ಮುಗ್ಧಂ ಮುಖಂ ಬಿಭ್ರತೀಮ್ || ೩೮ ||
ಸುರಭಿತನಿಗಮಾಂತಂ ವಂದಿಷೀಯೇಂದಿರಾಯಾಃ
ತವ ಕಮಲಪಲಾಶಪ್ರಕ್ರಿಯಂ ಪಾದಯುಗ್ಮಮ್ |
ವಹತಿ ಯದುಪಮರ್ದೈರ್ವೈಜಯಂತೀ ಹಿಮಾಂಭಃ
ಪ್ಲುತಿಭಿರಿವ ನವತ್ವಂ ಕಾಂತಬಾಹಾಂತರಾಳೇ || ೩೯ ||
ತ್ವತ್ಸ್ವೀಕಾರಕಲಾವಲೇಪಕಲುಷಾ ರಾಜ್ಞಾಂ ದೃಶೋ ದುರ್ವಚಾಃ
ನಿತ್ಯಂ ತ್ವನ್ಮಧುಪಾನಮತ್ತಮಧುಪಶ್ರೀನಿರ್ಭರಾಭ್ಯಾಂ ಪತಿಮ್ |
ದೃಗ್ಭ್ಯಾಮೇವ ಹಿ ಪುಂಡರೀಕನಯನಂ ವೇದೋ ವಿದಾಮಾಸ ತೇ
ಸಾಕ್ಷಾಲ್ಲಕ್ಷ್ಮಿ ತವಾವಲೋಕವಿಭವಃ ಕಾಕ್ವಾ ಕಯಾ ವರ್ಣ್ಯತೇ || ೪೦ ||
ಆನಂದಾತ್ಮಭಿರೀಶಮಜ್ಜನಮದಕ್ಷೀಬಾಲಸೈರಾಗಲ-
-ಪ್ರೇಮಾರ್ದ್ರೈರಪಿ ಕೂಲಮುದ್ವಹಕೃಪಾಸಂಪ್ಲಾವಿತಾಸ್ಮಾದೃಶೈಃ |
ಪದ್ಮೇ! ತೇ ಪ್ರತಿಬಿಂದುಬದ್ಧಕಲಿಕಬ್ರಹ್ಮಾದಿವಿಷ್ಕಂಭಕೈಃ
ಐಶ್ವರ್ಯೋದ್ಗಮಗದ್ಗದೈರಶರಣಂ ಮಾಂ ಪಾಲಯಾಲೋಕಿತೈಃ || ೪೧ ||
ಪಾದಾರುಂತುದಮೇವ ಪಂಕಜರಜಶ್ಚೇಟೀಭೃಶಾಲೋಕಿತೈಃ
ಅಂಗಮ್ಲಾನಿರಥಾಂಬ ಸಾಹಸವಿಧೌ ಲೀಲಾರವಿಂದಗ್ರಹಃ
ಡೋಲಾ ತೇ ವನಮಾಲಯಾ ಹರಿಭುಜೇ ಹಾ ಕಷ್ಟಶಬ್ದಾಸ್ಪದಂ
ಕೇನ ಶ್ರೀರತಿಕೋಮಲಾ ತನುರಿಯಂ ವಾಚಾಂ ವಿಮರ್ದಕ್ಷಮಾ || ೪೨ ||
ಆಮರ್ಯಾದಮಕಂಟಕಂ ಸ್ತನಯುಗಂ ನಾದ್ಯಾಪಿ ನಾಲೋಕಿತ-
-ಭ್ರೂಭೇದಸ್ಮಿತವಿಭ್ರಮಾ ಜಹತಿ ವಾ ನೈಸರ್ಗಿಕತ್ವಾಯಶಃ |
ಸೂತೇ ಶೈಶವಯೌವನವ್ಯತಿಕರೋ ಗಾತ್ರೇಷು ತೇ ಸೌರಭಂ
ಭೋಗಸ್ರೋತಸಿ ಕಾಂತದೇಶಿಕಕರಗ್ರಾಹೇಣ ಗಾಹಕ್ಷಮಃ || ೪೩ ||
ಆಮೋದಾದ್ಭುತಶಾಲಿ ಯೌವನದಶಾವ್ಯಾಕೋಚಮಮ್ಲಾನಿಮತ್
ಸೌಂದರ್ಯಾಮೃತಸೇಕಶೀತಲಮಿದಂ ಲಾವಣ್ಯಸೂತ್ರಾರ್ಪಿತಮ್ |
ಶ್ರೀರಂಗೇಶ್ವರಿ ಕೋಮಲಾಂಗಸುಮನಃ ಸಂದರ್ಭಣಂ ದೇವಿ ತೇ
ಕಾಂತೋರಃಪ್ರತಿಯತ್ನಮರ್ಹತಿ ಕವಿಂ ಧಿಙ್ಮಾಮಕಾಂಡಾಕುಲಮ್ || ೪೪ ||
ಮರ್ಮಸ್ಪೃಶೋ ರಸಸಿರಾ ವ್ಯತಿವಿಧ್ಯ ವೃತ್ತೈಃ
ಕಾಂತೋಪಭೋಗಲಲಿತೈರ್ಲುಲಿತಾಂಗಯಷ್ಟಿಃ |
ಪುಷ್ಪಾವಳೀವ ರಸಿಕಭ್ರಮರೋಪಭುಕ್ತಾ
ತ್ವಂ ದೇವಿ ನಿತ್ಯಮಭಿನಂದಯಸೇ ಮುಕುಂದಮ್ || ೪೫ ||
ಕನಕರಶನಾಮುಕ್ತಾತಾಟಂಕಹಾರಲಲಾಟಿಕಾ-
-ಮಣಿಸರತುಲಾಕೋಟಿಪ್ರಾಯೈರ್ಜನಾರ್ದನಜೀವಿಕೇ |
ಪ್ರಕೃತಿಮಧುರಂ ಗಾತ್ರಂ ಜಾಗರ್ತಿ ಮುಗ್ಧವಿಭೂಷಣೈಃ
ವಲಯಶಕಲೈರ್ದುಗ್ಧಂ ಪುಷ್ಪೈಶ್ಚ ಕಲ್ಪಲತಾ ಯಥಾ || ೪೬ ||
ಸಾಮಾನ್ಯಭೋಗ್ಯಮಪಿ ಕೌಸ್ತುಭವೈಜಯಂತೀ-
-ಪಂಚಾಯುಧಾದಿ ರಮಣಃ ಸ್ವಯಮೇವ ಬಿಭ್ರತ್ |
ತದ್ಭಾರಖೇದಮಿವ ತೇ ಪರಿಹರ್ತುಕಾಮಃ
ಶ್ರೀರಂಗಧಾಮಮಣಿಮಂಜರಿ ಗಾಹತೇ ತ್ವಾಮ್ || ೪೭ ||
ಯದಿ ಮನುಜತಿರಶ್ಚಾಂ ಲೀಲಯಾ ತುಲ್ಯವೃತ್ತೇಃ
ಅನುಜನುರನುರೂಪಾ ದೇವಿ ನಾವಾತರಿಷ್ಯಃ |
ಅಸರಸಮಭವಿಷ್ಯನ್ನರ್ಮ ನಾಥಸ್ಯ ಮಾತಃ
ದರದಳದರವಿಂದೋದಂತಕಾಂತಾಯತಾಕ್ಷಿ || ೪೮ ||
ಸ್ಖಲಿತಕಟಕಮಾಲ್ಯೈರ್ದೋರ್ಭಿರಬ್ಧಿಂ ಮುರಾರೇಃ
ಭಗವತಿ ದಧಿಮಾಥಂ ಮಥ್ನತಃ ಶ್ರಾಂತಿಶಾಂತ್ಯೈ |
ಭ್ರಮದಮೃತರಂಗಾವರ್ತತಃ ಪ್ರಾದುರಾಸೀಃ
ಸ್ಮಿತನಯನಸುಧಾಭಿಃ ಸಿಂಚತೀ ಚಂದ್ರಿಕೇವ || ೪೯ ||
ಮಾತರ್ಮೈಥಿಲಿ ರಾಕ್ಷಸೀಸ್ತ್ವಯಿ ತದೈವಾರ್ದ್ರಾಪರಾಧಾಸ್ತ್ವಯಾ
ರಕ್ಷಂತ್ಯಾ ಪವನಾತ್ಮಜಾಲ್ಲಘುತರಾ ರಾಮಸ್ಯ ಗೋಷ್ಠೀ ಕೃತಾ
ಕಾಕಂ ತಂ ಚ ವಿಭೀಷಣಂ ಶರಣಮಿತ್ಯುಕ್ತಿಕ್ಷಮೌ ರಕ್ಷತಃ
ಸಾ ನಃ ಸಾಂದ್ರಮಹಾಗಸಃ ಸುಖಯತು ಕ್ಷಾಂತಿಸ್ತವಾಽಽಕಸ್ಮಿಕೀ || ೫೦ ||
ಮಾತರ್ಲಕ್ಷ್ಮಿ ಯಥೈವ ಮೈಥಿಲಜನಸ್ತೇನಾಧ್ವನಾ ತೇ ವಯಂ
ತ್ವದ್ದಾಸ್ಯೈಕರಸಾಭಿಮಾನಸುಭಗೈರ್ಭಾವೈರಿಹಾಮುತ್ರ ಚ |
ಜಾಮಾತಾ ದಯಿತಸ್ತವೇತಿ ಭವತೀಸಂಬಂಧದೃಷ್ಟ್ಯಾ ಹರಿಂ
ಪಶ್ಯೇಮ ಪ್ರತಿಯಾಮ ಯಾಮ ಚ ಪರೀಚಾರಾನ್ ಪ್ರಹೃಷ್ಯೇಮ ಚ || ೫೧ ||
ಪಿತೇವ ತ್ವತ್ಪ್ರೇಯಾನ್ ಜನನಿ ಪರಿಪೂರ್ಣಾಗಸಿ ಜನೇ
ಹಿತಸ್ರೋತೋವೃತ್ತ್ಯಾ ಭವತಿ ಚ ಕದಾಚಿತ್ ಕಲುಷಧೀಃ |
ಕಿಮೇತನ್ನಿರ್ದೋಷಃ ಕ ಇಹ ಜಗತೀತಿ ತ್ವಮುಚಿತೈಃ
ಉಪಾಯೈರ್ವಿಸ್ಮಾರ್ಯ ಸ್ವಜನಯಸಿ ಮಾತಾ ತದಸಿ ನಃ || ೫೨ ||
ನೇತುರ್ನಿತ್ಯಸಹಾಯಿನೀ ಜನನಿ ನಸ್ತ್ರಾತುಂ ತ್ವಮತ್ರಾಗತಾ
ಲೋಕೇ ತ್ವನ್ಮಹಿಮಾವಬೋಧಬಧಿರೇ ಪ್ರಾಪ್ತಾ ವಿಮರ್ದಂ ಬಹು |
ಕ್ಲಿಷ್ಟಂ ಗ್ರಾವಸು ಮಾಲತೀಮೃದುಪದಂ ವಿಶ್ಲಿಷ್ಯ ವಾಸೋ ವನೇ
ಜಾತೋ ಧಿಕ್ಕರುಣಾಂ ಧಿಗಸ್ತು ಯುವಯೋಃ ಸ್ವಾತಂತ್ರ್ಯಮತ್ಯಂಕುಶಮ್ || ೫೩ ||
ಅಧಿಶಯಿತವಾನಬ್ಧಿಂ ನಾಥೋ ಮಮಂಥ ಬಬಂಧ ತಂ
ಹರಧನುರಸೌ ವಲ್ಲೀಭಂಜಂ ಬಭಂಜ ಚ ಮೈಥಿಲಿ |
ಅಪಿ ದಶಮುಖೀಂ ಲೂತ್ವಾ ರಕ್ಷಃ ಕಬಂಧಮನರ್ತಯತ್
ಕಿಮಿವ ನ ಪತಿಃ ಕರ್ತಾ ತ್ವಚ್ಚಾಟುಚುಂಚುಮನೋರಥಃ || ೫೪ ||
ದಶಶತಪಾಣಿಪಾದವದನಾಕ್ಷಿಮುಖೈರಖಿಲೈಃ
ಅಪಿ ನಿಜವೈಶ್ವರೂಪ್ಯವಿಭವೈರನುರೂಪಗುಣೈಃ |
ಅವತರಣೈರತೈಶ್ಚ ರಸಯನ್ ಕಮಿತಾ ಕಮಲೇ
ಕ್ವಚನ ಹಿ ವಿಭ್ರಮಭ್ರಮಿಮುಖೇ ವಿನಿಮಜ್ಜತಿ ತೇ || ೫೫ ||
ಜನನಭವನಪ್ರೀತ್ಯಾ ದುಗ್ಧಾರ್ಣವಂ ಬಹುಮನ್ಯಸೇ
ಜನನಿ ದಯಿತಪ್ರೇಮ್ಣಾ ಪುಷ್ಣಾಸಿ ತತ್ಪರಮಂ ಪದಮ್ |
ಉದಧಿಪರಮವ್ಯೋಮ್ನೋರ್ವಿಸ್ಮೃತ್ಯ ಮಾದೃಶರಕ್ಷಣ-
-ಕ್ಷಮಮಿತಿ ಧಿಯಾ ಭೂಯಃ ಶ್ರೀರಂಗಧಾಮನಿ ಮೋದಸೇ || ೫೬ ||
ಔದಾರ್ಯಕಾರುಣಿಕತಾಶ್ರಿತವತ್ಸಲತ್ವ-
-ಪೂರ್ವೇಷು ಸರ್ವಮತಿಶಾಯಿತಮತ್ರ ಮಾತಃ |
ಶ್ರೀರಂಗಧಾಮ್ನಿ ಯದುತಾನ್ಯದುದಾಹರಂತಿ
ಸೀತಾವತಾರಮುಖಮೇತದಮುಷ್ಯ ಯೋಗ್ಯಾ || ೫೭ ||
ಐಶ್ವರ್ಯಮಕ್ಷರಗತಿಂ ಪರಮಂ ಪದಂ ವಾ
ಕಸ್ಮೈಚಿದಂಜಲಿಭರಂ ವಹತೇ ವಿತೀರ್ಯ
ಅಸ್ಮೈ ನ ಕಿಂಚಿದುಚಿತಂ ಕೃತಮಿತ್ಯಥಾಂಬ
ತ್ವಂ ಲಜ್ಜಸೇ ಕಥಯ ಕೋಽಯಮುದಾರಭಾವಃ || ೫೮ ||
ಜ್ಞಾನಕ್ರಿಯಾಭಜನಸಂಪದಕಿಂಚನೋಽಹಂ
ಇಚ್ಛಾಧಿಕಾರಶಕನಾನುಶಯಾನಭಿಜ್ಞಃ |
ಆಗಾಂಸಿ ದೇವಿ ಯುವಯೋರಪಿ ದುಃಸಹಾನಿ
ಬಧ್ನಾಮಿ ಮೂರ್ಖಚರಿತಸ್ತವ ದುರ್ಭರೋಽಸ್ಮಿ || ೫೯ ||
ಇತ್ಯುಕ್ತಿಕೈತವಶತೇನ ವಿಡಂಬಯಾಮಿ
ತಾನಂಬ ಸತ್ಯವಚಸಃ ಪುರುಷಾನ್ ಪುರಾಣಾನ್ |
ಯದ್ವಾ ನ ಮೇ ಭುಜಬಲಂ ತವ ಪಾದಪದ್ಮ-
-ಲಾಭೇ ತ್ವಮೇವ ಶರಣಂ ವಿಧಿತಃ ಕೃತಾಽಸಿ || ೬೦ ||
ಶ್ರೀರಂಗೇ ಶರದಃ ಶತಂ ಸಹ ಸುಹೃದ್ವರ್ಗೇಣ ನಿಷ್ಕಂಟಕಂ
ನಿರ್ದುಃಖಂ ಸುಸುಖಂಚ ದಾಸ್ಯರಸಿಕಾಂ ಭುಕ್ತ್ವಾ ಸಮೃದ್ಧಿಂ ಪರಾಮ್ |
ಯುಷ್ಮತ್ಪಾದಸರೋರುಹಾಂತರರಜಃಸ್ಯಾಮ ತ್ವಮಂಬಾ ಪಿತಾ
ಸರ್ವಂ ಧರ್ಮಮಪಿ ತ್ವಮೇವ ಭವ ನಃ ಸ್ವೀಕುರ್ವಕಸ್ಮಾತ್ಕೃಪಾಮ್ || ೬೧ ||
ಇತಿ ಶ್ರೀಪರಾಶರಭಟ್ಟಾರ್ಯೈರನುಗೃಹೀತಃ ಶ್ರೀಗುಣರತ್ನಕೋಶಃ |