ಓಂ ಅಥ ಹೈನಾಂ ಬ್ರಹ್ಮರಂಧ್ರೇ ಸುಭಗಾಂ ಬ್ರಹ್ಮಾಸ್ತ್ರಸ್ವರೂಪಿಣೀಮಾಪ್ನೋತಿ ಬ್ರಹ್ಮಾಸ್ತ್ರಾಂ ಮಹಾವಿದ್ಯಾಂ ಶಾಂಭವೀಂ ಸರ್ವಸ್ತಂಭಕರೀಂ ಸಿದ್ಧಾಂ ಚತುರ್ಭುಜಾಂ ದಕ್ಷಾಭ್ಯಾಂ ಕರಾಭ್ಯಾಂ ಮುದ್ಗರಪಾಶೌ ವಾಮಾಭ್ಯಾಂ ಶತ್ರುಜಿಹ್ವಾವಜ್ರೇ ದಧಾನಾಂ ಪೀತವಾಸಸಂ ಪೀತಾಲಂಕಾರಸಂಪನ್ನಾಂ ದೃಢೀಭೂತಪೀನೋನ್ನತಪಯೋಧರಯುಗ್ಮಾಢ್ಯಾಂ ತಪ್ತಕಾರ್ತಸ್ವರಕುಂಡಲದ್ವಯವಿರಾಜಿತಮುಖಾಂಭೋಜಾಂ ಲಲಾಟಪಟ್ಟೋಲ್ಲಸತ್ಪೀತಚಂದ್ರಾರ್ಧಮನುಬಿಭ್ರತೀಮುದ್ಯದ್ದಿವಾಕರೋದ್ಯೋತಾಂ ಸ್ವರ್ಣಸಿಂಹಾಸನಮಧ್ಯಕಮಲಸಂಸ್ಥಾಂ ಧಿಯಾ ಸಂಚಿಂತ್ಯ ತದುಪರಿ ತ್ರಿಕೋಣಷಟ್ಕೋಣವಸುಪತ್ರವೃತ್ತಾಂತಃ ಷೋಡಶದಳಕಮಲೋಪರಿ ಭೂಬಿಂಬತ್ರಯಮನುಸಂಧಾಯ ತತ್ರಾದ್ಯಯೋನ್ಯಂತರೇ ದೇವೀಮಾಹೂಯ ಧ್ಯಾಯೇತ್ | ಯೋನಿಂ ಜಗದ್ಯೋನಿಂ ಸಮಾಯಮುಚ್ಚಾರ್ಯ ಶಿವಾಂತೇ ಭೂಮಾಗ್ರಬಿಂದುಮಿಂದುಖಂಡಮಗ್ನಿಬೀಜಂ ತತೋ ವರುಣಾಂಕಗುಣಾರ್ಣಮತ್ರಿಯುತಂ ಸ್ಥಿರಾಮುಖಿ ಇತಿ ಸಂಬೋಧ್ಯ ಸರ್ವದುಷ್ಟಾನಾಮಿದಂ ಚಾಭಾಷ್ಯ ವಾಚಮಿತಿ ಮುಖಮಿತಿ ಪದಮಿತಿ ಸ್ತಂಭಯೇತಿ ವೋಚ್ಚಾರ್ಯ ಜಿಹ್ವಾಂ ವೈಶಾರದೀಂ ಕೀಲಯೇತಿ ಬುದ್ಧಿಂ ವಿನಾಶಯೇತಿ ಪ್ರೋಚ್ಚಾರ್ಯ ಭೂಮಾಯಾಂ ವೇದಾದ್ಯಂ ತತೋ ಯಜ್ಞಭೂಗುಹಾಯಾಂ ಯೋಜಯೇತ್ | ಸ ಮಹಾಸ್ತಂಭೇಶ್ವರಃ ಸರ್ವೇಶ್ವರಃ | ಸ ಸೇನಾಸ್ತಂಭಂ ಕರೋತಿ | ಕಿಂ ಬಹುನಾ ವಿವಸ್ವದ್ಧೃತಿಸ್ತಂಭಕರ್ತಾ ಸರ್ವವಾತಸ್ತಂಭಕರ್ತೇತಿ | ಕಿಂ ದಿವಾಕರ್ಷಯತಿ | ಸ ಸರ್ವವಿದ್ಯೇಶ್ವರಃ ಸರ್ವಮಂತ್ರೇಶ್ವರೋ ಭೂತ್ವಾ ಪೂಜಾಯಾ ಆವರ್ತನಂ ತ್ರೈಲೋಕ್ಯಸ್ತಂಭಿನ್ಯಾಃ ಕುರ್ಯಾತ್ | ಅಂಗಮಾದ್ಯಂ ದ್ವಾರತೋ ಗಣೇಶಂ ವಟುಕಂ ಯೋಗಿನೀಂ ಕ್ಷೇತ್ರಾಧೀಶಂ ಚ ಪೂರ್ವಾದಿಕಮಭ್ಯರ್ಚ್ಯ ಗುರುಪಂಕ್ತಿಮೀಶಾಸುರಾಂತಮಂತಃ ಪ್ರಾಚ್ಯಾದೌ ಕ್ರಮಾನುಗತಾ ಬಗಳಾ ಸ್ತಂಭಿನೀ ಜೃಂಭಿಣೀ ಮೋಹಿನೀ ವಶ್ಯಾ ಅಚಲಾ ಚಲಾ ದುರ್ಧರಾ ಅಕಲ್ಮಷಾ ಆಧಾರಾ ಕಲ್ಪನಾ ಕಾಲಕರ್ಷಿಣೀ ಭ್ರಮರಿಕಾ ಮದಗಮನಾ ಭೋಗಾ ಯೋಗಿಕಾ ಏತಾ ಹ್ಯಷ್ಟದಳಾನುಗತಾಃ ಪೂಜ್ಯಾಃ | ಬ್ರಾಹ್ಮೀ ಮಾಹೇಶ್ವರೀ ಕೌಮಾರೀ ವೈಷ್ಣವೀ ವಾರಾಹೀ ನಾರಸಿಂಹೀ ಚಾಮುಂಡಾ ಮಹಾಲಕ್ಷ್ಮೀಶ್ಚ | ಷಡ್ಯೋನಿಗರ್ಭಾಂತಾ ಡಾಕಿನೀ ರಾಕಿನೀ ಲಾಕಿನೀ ಕಾಕಿನೀ ಶಾಕಿನೀ ಹಾಕಿನೀ ವೇದ್ಯಾದ್ಯಸ್ಥಿರಮಾಯಾದ್ಯಾಃ ಸಮಭ್ಯರ್ಚ್ಯ ಶಕ್ರಾಗ್ನಿಯಮನಿರೃತಿವರುಣವಾಯವ್ಯಧನದೇಶಾನಪ್ರಜಾಪತಿನಾಗೇಶಾಃ ಪರಿವಾರಾಭಿಮತಾಃ ಸ್ಥಿರಾದಿವೇದಾದ್ಯಾಃ ಸವಾಹನಾಃ ಸದಸ್ತ್ರಕಾ ಬಾಹ್ಯತೋಽಭ್ಯರ್ಚ್ಯ ತಾಂ ಯೋನಿಂ ರತಿಪ್ರೀತಿಮನೋಭವಾ ಏತಾಃ ಸರ್ವಾಃ ಸಮಾಃ ಪೀತಾಂಶುಕಾ ಧ್ಯೇಯಾಃ | ತದಂತಮೂಲಾಯಾಂ ಬಲಾದಿಷೋಡಶಾನುಗತಾಃ ಪೂಜ್ಯಾಃ ನೀರಾಜನೈಃ | ಸ ಹೈಶ್ವರ್ಯಯುಕ್ತೋ ಭವತಿ | ಯ ಏನಾಂ ಧ್ಯಾಯತಿ ಸ ವಾಗ್ಮೀ ಭವತಿ | ಸೋಽಮೃತಮಶ್ನುತೇ | ಸರ್ವಸಿದ್ಧಿಕರ್ತಾ ಭವತಿ | ಸೃಷ್ಟಿಸ್ಥಿತಿಸಂಹಾರಕರ್ತಾ ಭವತಿ | ಸ ಸರ್ವೇಶ್ವರೋ ಭವತಿ | ಸ ತು ಋದ್ಧೀಶ್ವರೋ ಭವತಿ | ಸ ಶಾಕ್ತಃ ಸ ವೈಷ್ಣವಃ ಸ ಗಣಪಃ ಸ ಶೈವಃ | ಸ ಜೀವನ್ಮುಕ್ತೋ ಭವತಿ | ಸ ಸನ್ನ್ಯಾಸೀ ಭವತಿ | ನ್ಯಸನಂ ನ್ಯಾಸಃ | ಸಮ್ಯಙ್ನ್ಯಾಸಃ ಸನ್ನ್ಯಾಸಃ | ನ ತು ಮುಂಡಿತಮುಂಡಃ | ಷಟ್ತ್ರಿಂಶದಸ್ತ್ರೇಶ್ವರೋ ಭವೇತ್ ಸೌಭಾಗ್ಯಾರ್ಚನೇನೇತಿ ಪ್ರೋತಂ ವೇದ | ಓಂ ಶಿವಮ್ ||
ಇತಿ ಶ್ರೀ ಪೀತಾಂಬರೋಪನಿಷತ್ ||
