ಸಕಲಸದ್ಗುಣಸಂತತಿದಾಯಿನಿ |
ಸಕಲಮಂಜುಲಸೌಖ್ಯವಿಕಾಶಿನಿ
ಹರತು ಮೇ ದುರಿತಾನಿ ಸರಸ್ವತಿ || ೧ ||
ಅಮರದಾನವಮಾನವಸೇವಿತಾ
ಜಗತಿ ಜಾಡ್ಯಹರಾ ಶ್ರುತದೇವತಾ |
ವಿಶದಪಕ್ಷವಿಹಂಗವಿಹಾರಿಣಿ
ಹರತು ಮೇ ದುರಿತಾನಿ ಸರಸ್ವತಿ || ೨ ||
ಪ್ರವರಪಂಡಿತಪುರುಷಪೂಜಿತಾ
ಪ್ರವರಕಾಂತಿವಿಭೂಷಣರಾಜಿತಾ |
ಪ್ರವರದೇಹವಿಭಾಭರಮಂಡಿತಾ
ಹರತು ಮೇ ದುರಿತಾನಿ ಸರಸ್ವತಿ || ೩ ||
ಸಕಲಶೀತಮರೀಚಿಸಮಾನನಾ
ವಿಹಿತಸೇವಕಬುದ್ಧಿವಿಕಾಶನಾ |
ಧೃತಕಮಂಡಲುಪುಸ್ತಕಮಾಲಿಕಾ
ಹರತು ಮೇ ದುರಿತಾನಿ ಸರಸ್ವತೀ || ೪ ||
ಸಕಲಮಾನಸಸಂಶಯಹಾರಿಣಿ
ಭವಭವೋರ್ಜಿತಪಾಪನಿವಾರಿಣಿ |
ಸಕಲಸದ್ಗುಣಸಂತತಿಧಾರಿಣಿ
ಹರತು ಮೇ ದುರಿತಾನಿ ಸರಸ್ವತಿ || ೫ ||
ಪ್ರಬಲವೈರಿಸಮೂಹವಿಮರ್ದಿನಿ
ನೃಪಸಭಾದಿಷುಮಾನವಿವರ್ಧಿನಿ |
ನತಜನೋದತಸಂಕಟಭೇದಿನಿ
ಹರತು ಮೇ ದುರಿತಾನಿ ಸರಸ್ವತಿ || ೬ ||
ಸಕಲಸದ್ಗುಣಭೂಷಿತವಿಗ್ರಹಾ
ನಿಜತನುದ್ಯುತಿತರ್ಜಿತವಿಗ್ರಹಾ |
ವಿಶದವಸ್ತ್ರಧರಾವಿಶದದ್ಯುತಿ
ಹರತು ಮೇ ದುರಿತಾನಿ ಸರಸ್ವತಿ || ೭ ||
ಭವದವಾನಲಶಾಂತಿತನೂನಪಾ-
-ದ್ಧಿತಕರೈಂಕೃತಿಮಂತ್ರಕೃತಕೃಪಾ |
ಭವಿಕಚಿತ್ತವಿಶುದ್ಧವಿಧಾಯಿನಿ
ಹರತು ಮೇ ದುರಿತಾನಿ ಸರಸ್ವತಿ || ೮ ||
ತನುಭೃತಾಂ ಜಡತಾಮಪಹೃತ್ಯ ಯಾ
ವಿಬುಧತಾಂ ದದತೇ ಮುದಿತಾಽರ್ಚಯಾ |
ಮತಿಮತಾಂ ಜನನೀತಿ ಮತಾಽತ್ರಸಾ
ಹರತು ಮೇ ದುರಿತಾನಿ ಸರಸ್ವತಿ || ೯ ||
ಸಕಲಶಾಸ್ತ್ರಪಯೋನಿಧಿನೌಃಪರಾ
ವಿಶದಕೀರ್ತಿಧರಾಽಂಗಿತಮೋಹರಾ |
ಜಿನವರಾನನಪದ್ಮನಿವಾಸಿನಿ
ಹರತು ಮೇ ದುರಿತಾನಿ ಸರಸ್ವತಿ || ೧೦ ||
ಇತ್ಥಂ ಶ್ರೀಶ್ರುತದೇವತಾಭಗವತೀ ವಿದ್ವಜ್ಜನಾನಾಂ ಪ್ರಸೂಃ
ಸಮ್ಯಗ್ಜ್ಞಾನವರಪ್ರದಾ ಘನತಮೋನಿರ್ನಾಶಿನೀ ದೇಹಿನಾಮ್ |
ಶ್ರೇಯಃ ಶ್ರೀವರದಾಯಿನೀ ಸುವಿಧಿನಾ ಸಂಪೂಜಿತಾ ಸಂಸ್ತುತಾ
ದುಷ್ಕರ್ಮಾಣ್ಯಪಹೃತ್ಯ ಮೇ ವಿದಧತಾಂ ಸಮ್ಯಕ್ ಶ್ರುತಂ ಸರ್ವದಾ || ೧೧ ||
ಇತಿ ಚಿರಂತನಾಚಾರ್ಯ ವಿರಚಿತಂ ಶ್ರೀ ಸರಸ್ವತೀ ಸರಸಶಾಂತಿ ಸುಧಾರಸ ಸ್ತೋತ್ರಮ್ ||