ಕಪೋಲಪ್ರಭಾನಿರ್ಜಿತಾದರ್ಶಕಾಯೈ |
ಸ್ವನೇತ್ರಾವಧೂತಾಂಗಜಾತಧ್ವಜಾಯೈ
ಸರೋಜೋತ್ಥಸತ್ಯೈ ನಮಃ ಶಾರದಾಯೈ || ೧ ||
ಭವಾಂಭೋಧಿಪಾರಂ ನಯಂತ್ಯೈ ಸ್ವಭಕ್ತಾ-
-ನ್ವಿನಾಯಾಸಲೇಶಂ ಕೃಪಾನೌಕಯೈವ |
ಭವಾಂಭೋಜನೇತ್ರಾದಿಸಂಸೇವಿತಾಯೈ
ಅಜಸ್ರಂ ಹಿ ಕುರ್ಮೋ ನಮಃ ಶಾರದಾಯೈ || ೨ ||
ಸುಧಾಕುಂಭಮುದ್ರಾವಿರಾಜತ್ಕರಾಯೈ
ವ್ಯಥಾಶೂನ್ಯಚಿತ್ತೈಃ ಸದಾ ಸೇವಿತಾಯೈ |
ಕ್ರುಧಾಕಾಮಲೋಭಾದಿನಿರ್ವಾಪಣಾಯೈ
ವಿಧಾತೃಪ್ರಿಯಾಯೈ ನಮಃ ಶಾರದಾಯೈ || ೩ ||
ನತೇಷ್ಟಪ್ರದಾನಾಯ ಭೂಮಿಂ ಗತಾಯೈ
ಗತೇನಾಚ್ಛಬರ್ಹಾಭಿಮಾನಂ ಹರಂತ್ಯೈ |
ಸ್ಮಿತೇನೇಂದುದರ್ಪಂ ಚ ತೋಷಂ ವ್ರಜಂತ್ಯೈ
ಸುತೇನೇವ ನಮ್ರೈರ್ನಮಃ ಶಾರದಾಯೈ || ೪ ||
ನತಾಲೀಯದಾರಿದ್ರ್ಯದುಃಖಾಪಹಂತ್ರ್ಯೈ
ತಥಾ ಭೀತಿಭೂತಾದಿಬಾಧಾಹರಾಯೈ |
ಫಣೀಂದ್ರಾಭವೇಣ್ಯೈ ಗಿರೀಂದ್ರಸ್ತನಾಯೈ
ವಿಧಾತೃಪ್ರಿಯಾಯೈ ನಮಃ ಶಾರದಾಯೈ || ೫ ||
ಸುಧಾಕುಂಭಮುದ್ರಾಕ್ಷಮಾಲಾವಿರಾಜ-
-ತ್ಕರಾಯೈ ಕರಾಂಭೋಜಸಮ್ಮರ್ದಿತಾಯೈ |
ಸುರಾಣಾಂ ವರಾಣಾಂ ಸದಾ ಮಾನಿನೀನಾಂ
ಮುದಾ ಸರ್ವದಾ ತೇ ನಮಃ ಶಾರದಾಯೈ || ೬ ||
ಸಮಸ್ತೈಶ್ಚ ವೇದೈಃ ಸದಾ ಗೀತಕೀರ್ತ್ಯೈ
ನಿರಾಶಾಂತರಂಗಾಂಬುಜಾತಸ್ಥಿತಾಯೈ |
ಪುರಾರಾತಿಪದ್ಮಾಕ್ಷಪದ್ಮೋದ್ಭವಾದ್ಯೈ-
-ರ್ಮುದಾ ಪೂಜಿತಾಯೈ ನಮಃ ಶಾರದಾಯೈ || ೭ ||
ಅವಿದ್ಯಾಽಽಪದುದ್ಧಾರಬದ್ಧಾದರಾಯೈ
ತಥಾ ಬುದ್ಧಿಸಂಪತ್ಪ್ರದಾನೋತ್ಸುಕಾಯೈ |
ನತೇಭ್ಯಃ ಕದಾಚಿತ್ಸ್ವಪಾದಾಂಬುಜಾತೇ
ವಿಧೇಃ ಪುಣ್ಯತತ್ಯೈ ನಮಃ ಶಾರದಾಯೈ || ೮ ||
ಪದಾಂಭೋಜನಮ್ರಾನ್ಕೃತೇ ಭೀತಭೀತಾನ್
ದ್ರುತಂ ಮೃತ್ಯುಭೀತೇರ್ವಿಮುಕ್ತಾನ್ವಿಧಾತುಮ್ |
ಸುಧಾಪೂರ್ಣಕುಂಭಂ ಕರೇ ಕಿಂ ವಿಧತ್ಸೇ
ದ್ರುತಂ ಪಾಯಯಿತ್ವಾ ಯಥಾತೃಪ್ತಿ ವಾಣಿ || ೯ ||
ಮಹಾಂತೋ ಹಿ ಮಹ್ಯಂ ಹೃದಂಭೋರುಹಾಣಿ
ಪ್ರಮೋದಾತ್ಸಮರ್ಪ್ಯಾಸತೇ ಸೌಖ್ಯಭಾಜಃ |
ಇತಿ ಖ್ಯಾಪನಾಯಾನತಾನಾಂ ಕೃಪಾಬ್ಧೇ
ಸರೋಜಾನ್ಯಸಂಖ್ಯಾನಿ ಧತ್ಸೇ ಕಿಮಂಬ || ೧೦ ||
ಶರಚ್ಚಂದ್ರನೀಕಾಶವಸ್ತ್ರೇಣ ವೀತಾ
ಕನದ್ಭರ್ಮಯಷ್ಟೇರಹಂಕಾರಭೇತ್ತ್ರೀ |
ಕಿರೀಟಂ ಸತಾಟಂಕಮತ್ಯಂತರಮ್ಯಂ
ವಹಂತೀ ಹೃದಬ್ಜೇ ಸ್ಫುರತ್ವಂಬ ಮೂರ್ತಿಃ || ೧೧ ||
ನಿಗೃಹ್ಯಾಕ್ಷವರ್ಗಂ ತಪೋ ವಾಣಿ ಕರ್ತುಂ
ನ ಶಕ್ನೋಮಿ ಯಸ್ಮಾದವಶ್ಯಾಕ್ಷವರ್ಗಃ |
ತತೋ ಮಯ್ಯನಾಥೇ ದಯಾ ಪಾರಶೂನ್ಯಾ
ವಿಧೇಯಾ ವಿಧಾತೃಪ್ರಿಯೇ ಶಾರದಾಂಬ || ೧೨ ||
ಕವಿತ್ವಂ ಪವಿತ್ವಂ ದ್ವಿಷಚ್ಛೈಲಭೇದೇ
ರವಿತ್ವಂ ನತಸ್ವಾಂತಹೃದ್ಧ್ವಾಂತಭೇದೇ |
ಶಿವತ್ವಂ ಚ ತತ್ತ್ವಪ್ರಬೋಧೇ ಮಮಾಂಬ
ತ್ವದಂಘ್ರ್ಯಬ್ಜಸೇವಾಪಟುತ್ವಂ ಚ ದೇಹಿ || ೧೩ ||
ವಿಲೋಕ್ಯಾಪಿ ಲೋಕೋ ನ ತೃಪ್ತಿಂ ಪ್ರಯಾತಿ
ಪ್ರಸನ್ನಂ ಮುಖೇಂದುಂ ಕಲಂಕಾದಿಶೂನ್ಯಮ್ |
ಯದೀಯಂ ಧ್ರುವಂ ಪ್ರತ್ಯಹಂ ತಾಂ ಕೃಪಾಬ್ಧಿಂ
ಭಜೇ ಶಾರದಾಂಬಾಮಜಸ್ರಂ ಮದಂಬಾಮ್ || ೧೪ ||
ಪುರಾ ಚಂದ್ರಚೂಡೋ ಧೃತಾಚಾರ್ಯರೂಪೋ
ಗಿರೌ ಶೃಂಗಪೂರ್ವೇ ಪ್ರತಿಷ್ಠಾಪ್ಯ ಚಕ್ರೇ |
ಸಮಾರಾಧ್ಯ ಮೋದಂ ಯಯೌ ಯಾಮಪಾರಂ
ಭಜೇ ಶಾರದಾಂಬಾಮಜಸ್ರಂ ಮದಂಬಾಮ್ || ೧೫ ||
ಭವಾಂಭೋಧಿಪಾರಂ ನಯಂತ್ಯೈ ಸ್ವಭಕ್ತಾನ್
ಭವಾಂಭೋಜನೇತ್ರಾಜಸಂಪೂಜ್ಯಮಾನಾಮ್ |
ಭವದ್ಭವ್ಯಭೂತಾಘವಿಧ್ವಂಸದಕ್ಷಾಂ
ಭಜೇ ಶಾರದಾಂಬಾಮಜಸ್ರಂ ಮದಂಬಾಮ್ || ೧೬ ||
ವರಾಕ ತ್ವರಾ ಕಾ ತವೇಷ್ಟಪ್ರದಾನೇ
ಕಥಂ ಪುಣ್ಯಹೀನಾಯ ತುಭ್ಯಂ ದದಾನಿ |
ಇತಿ ತ್ವಂ ಗಿರಾಂ ದೇವಿ ಮಾ ಬ್ರೂಹಿ ಯಸ್ಮಾ-
-ದಘಾರಣ್ಯದಾವಾನಲೇತಿ ಪ್ರಸಿದ್ಧಾ || ೧೭ ||
ಇತಿ ಶ್ರೀಸಚ್ಚಿದಾನಂದಶಿವಾಭಿನವನೃಸಿಂಹಭಾರತೀಸ್ವಾಮಿಭಿಃ ವಿರಚಿತಾ ಶ್ರೀ ಶಾರದಾ ಭುಜಂಗ ಪ್ರಯಾತ ಸ್ತುತಿಃ |