నమః శివాభ్యాం నవాయౌవనాభ్యాం పరస్పరాశ్లిష్టవపుర్ధరాభ్యామ్ ||
నగేన్ద్రకన్యావృషకేతనాభ్యాం నమో నమః శఙ్కరపార్వతీభ్యామ్||౧||
నమః శివాభ్యాం సరసోత్సవాభ్యాం నమస్కృతాభీష్టవరప్రదాభ్యామ్ |
నారాయణేనార్చితపాదుకాభ్యాం నమో నమః శఙ్కరపార్వతీభ్యామ్ ||౨||
నమః శివాభ్యాం వృషవాహనాభ్యాం విరిఞ్చివిష్ణ్విన్ద్రసుపూజితాభ్యామ్ |
విభూతిపాటీరవిలేపనాభ్యాం నమో నమః శఙ్కరపార్వతీభ్యామ్ ||౩||
నమః శివాభ్యాం జగదీశ్వరాభ్యాం జగత్పతిభ్యాం జయవిగ్రహభ్యామ్ |
జమ్భారిముఖ్యైరభివన్దితాభ్యాం నమో నమః శఙ్కరపార్వతీభ్యామ్ ||౪||
నమః శివాభ్యాం పరమౌషధాభ్యాం పఞ్చాక్షరీపఞ్జరరఞ్జితాభ్యామ్ |
ప్రపఞ్చసృష్టిస్థితిసంహృతిభ్యాం నమో నమః శఙ్కరపార్వతీభ్యామ్ ||౫||
నమః శివాభ్యామతిసున్దరాభ్యామత్యన్తమాసక్తహృదమ్బుజాభ్యామ్ |
అశేషలోకైకహితఙ్కరాభ్యాం నమో నమః శఙ్కరపార్వతీభ్యామ్ ||౬||
నమః శివాభ్యాం కలినాశనాభ్యాం కఙ్కాళకల్యాణవపుర్ధరాభ్యామ్ |
కైలాసశైలస్థితదేవతాభ్యాం నమో నమః శఙ్కరపార్వతీభ్యామ్ ||౭||
నమః శివాభ్యామశుభాపహాభ్యామశేషలోకైకవిశేషితాభ్యామ్ ||
అకుణ్ఠితాభ్యాం స్మృతిసంభృతాభ్యాం నమో నమః శఙ్కరపార్వతీభ్యామ్ ||౮||
నమః శివాభ్యాం రథవాహనాభ్యాం రవీన్దువైశ్వానరలోచనాభ్యామ్ |
రాకాశశాఙ్కాభముఖామ్బుజాభ్యాం నమో నమః శఙ్కరపార్వతీభ్యామ్ ||౯||
నమః శివాభ్యాం జటిలన్ధరాభ్యాం జరామృతిభ్యాం చ వివర్జితాభ్యామ్ |
జనార్దనాబ్జోద్భవపూజితాభ్యాం నమో నమః శఙ్కరపార్వతీభ్యామ్ ||౧౦||
నమః శివాభ్యాం విషమేక్షణాభ్యాం బిల్వచ్ఛదామల్లికదామభృచ్ద్యామ్ |
శోభావతీశాన్తవతీశ్వరాభ్యాం నమో నమః శఙ్కరపార్వతీభ్యామ్ || ౧౧||
నమః శివాభ్యాం పశుపాలకాభ్యాం జగత్రయీరక్షణబద్ధహృద్భ్యామ్ |
సమస్తదేవాసురపూజితాభ్యాం నమో నమః శఙ్కరపార్వతీభ్యామ్ ||౧౨||
స్తోత్రం త్రిసన్ధ్యం శివపార్వతీయం భక్త్యా పఠేద్వాదశకం నరో యః |
స సర్వసౌభాగ్యఫలాని భుఙ్తే శతాయురన్తే శివలోకమేతి ||౧౩||
ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతావుమామహేశ్వరస్తోత్రం సంపూర్ణమ్ ||