#శ్రీగంగాసహస్రనామస్తోత్రం

  

అకారాదిక్షకారాంత నామఘటితం స్కందపురాణాంతర్గతం

అగస్త్య ఉవాచ

వినా స్నానేన గంగాయాం నృణాం జన్మ నిరర్థకం .

ఉపాయాంతరమస్త్యన్యద్ యేన స్నానఫలం లభేత్ .. 1..

అశక్తానాం చ పంగూనామాలస్యోపహతాత్మనాం .

దూరదేశాంతరస్థానాం గంగాస్నానం కథం భవేత్ .. 2..

దానం వాథ వ్రతం వాథ మంత్రః స్తోత్రం జపోఽథవా .

తీర్థాంతరాభిషేకో వా దేవతోపాసనం తు వా .. 3..

యద్యస్తి కించిత్ షడ్వక్త్ర గంగాస్నానఫలప్రదం .

విధానాంతరమాత్రేణ తద్ వద ప్రణతాయ మే .. 4..

త్వత్తో న వేద స్కందాన్యో గంగాగర్భసముద్భవ .

పరం స్వర్గతరంగిణ్యాం మహిమానం మహామతే .. 5..

స్కంద ఉవాచ

సంతి పుణ్యజలానీహ సరాంసి సరితో మునే .

స్థానే స్థానే చ తీర్థాని జితాత్మాధ్యుషితాని చ .. 6..

దృష్టప్రత్యయకారీణి మహామహిమభాంజ్యపి .

పరం స్వర్గతరంగిణ్యాః కోట్యంశోఽపి న తత్ర వై .. 7..

అనేనైవానుమానేన బుద్ధ్యస్వ కలశోద్భవ .

దధ్రే గంగోత్తమాంగేన దేవదేవేన శంభునా .. 8..

స్నానకాలేఽన్యతీర్థేషు జప్యతే జాహ్నవీ జనైః .

వినా విష్ణుపదీం క్వాన్యత్ సమర్థమఘమోచనే .. 9..

గంగాస్నానఫలం బ్రహ్మన్ గంగాయామేవ లభ్యతే .

యథా ద్రాక్షాఫలస్వాదో ద్రాక్షాయామేవ నాన్యతః .. 10..

అస్త్యుపాయ ఇహ త్వేకః స్యాద్ యేనావికలం ఫలం .

స్నానస్య దేవసరితో మహాగుహ్యతమో మునే .. 11..

శివభక్తాయ శాంతాయ విష్ణుభక్తిపరాయ చ .

శ్రద్ధాలవే త్వాస్తికాయ గర్భవాసముముక్షవే .. 12..

కథనీయం న చాన్యస్య కస్యచిత్ కేనచిత్ క్వచిత్ .

ఇదం రహస్యం పరమం మహాపాతకనాశనం .. 13..

మహాశ్రేయస్కరం పుణ్యం మనోరథకరం పరం .

ద్యునదీప్రీతిజనకం శివసంతోషసంతతిః .. 14..

నామ్నాం సహస్రం గంగాయాః స్తవరాజేషు శోభనం .

జప్యానాం పరమం జప్యం వేదోపనిషదాం సమం .. 15..

జపనీయం ప్రయత్నేన మౌనినా వాచకం వినా .

శుచిస్థానేషు శుచినా సుస్పష్టాక్షరమేవ చ .. 16..

ధ్యానం -

శైలేంద్రాదవతారిణీ నిజజలే మజ్జద్జనోత్తారిణీ

పారావారవిహారిణీ భవభయశ్రేణీ సముత్సారిణీ .

శేషాహేరనుకారిణీ హరశిరోవల్లీదలాకారిణీ

కాశీప్రాంతవిహారిణీ విజయతే గంగా మనోహారిణీ ..

ఓం నమో గంగాదేవ్యై  ..

ఓంకారరూపిణ్యజరాఽతులాఽనంతాఽమృతస్రవా .

అత్యుదారాఽభయాఽశోకాఽలకనందాఽమృతాఽమలా .. 17..

అనాథవత్సలాఽమోఘాఽపాంయోనిరమృతప్రదా .

అవ్యక్తలక్షణాఽక్షోభ్యాఽనవచ్ఛిన్నాఽపరాఽజితా .. 18..

అనాథనాథాఽభీష్టార్థసిద్ధిదాఽనంగవర్ధినీ .

అణిమాదిగుణాఽధారాఽగ్రగణ్యాఽలీకహారిణీ .. 19..

అచింత్యశక్తిరనఘాఽద్భుతరూపాఽఘహారిణీ .

అద్రిరాజసుతాఽష్టాంగయోగసిద్ధిప్రదాఽచ్యుతా .. 20..

అక్షుణ్ణశక్తిరసుదాఽనంతతీర్థాఽమృతోదకా .

అనంతమహిమాఽపారాఽనంతసౌఖ్యప్రదాఽన్నదా .. 21..

అశేషదేవతామూర్తిరఘోరాఽమృతరూపిణీ .

అవిద్యాజాలశమనీ హ్యప్రతర్క్యగతిప్రదా .. 22..

అశేషవిఘ్నసంహర్త్రీ త్వశేషగుణగుంఫితా .

అజ్ఞానతిమిరజ్యోతిరనుగ్రహపరాయణా .. 23..

అభిరామాఽనవద్యాంగ్యనంతసారాఽకలంకినీ .

ఆరోగ్యదాఽఽనందవల్లీ త్వాపన్నార్తివినాశినీ .. 24..

ఆశ్చర్యమూర్తిరాయుష్యా హ్యాఢ్యాఽఽద్యాఽఽప్రాఽఽర్యసేవితా .

ఆప్యాయిన్యాప్తవిద్యాఖ్యా త్వానందాఽఽశ్వాసదాయినీ .. 25..

ఆలస్యఘ్న్యాపదాం హంత్రీ హ్యానందామృతవర్షిణీ .

ఇరావతీష్టదాత్రీష్టా త్విష్టాపూర్తఫలప్రదా .. 26..

ఇతిహాసశ్రుతీడ్యార్థా త్విహాముత్రశుభప్రదా .

ఇజ్యాశీలసమిజ్యేష్ఠా త్వింద్రాదిపరివందితా .. 27..

ఇలాలంకారమాలేద్ధా త్విందిరారమ్యమందిరా .

ఇదిందిరాదిసంసేవ్యా త్వీశ్వరీశ్వరవల్లభా .. 28..

ఈతిభీతిహరేడ్యా చ త్వీడనీయచరిత్రభృత్ .

ఉత్కృష్టశక్తిరుత్కృష్టోడుపమండలచారిణీ .. 29..

ఉదితాంబరమార్గోస్రోరగలోకవిహారిణీ .

ఉక్షోర్వరోత్పలోత్కుంభా ఉపేంద్రచరణద్రవా .. 30..

ఉదన్వత్పూర్తిహేతుశ్చోదారోత్సాహప్రవర్ధినీ .

ఉద్వేగఘ్న్యుష్ణశమనీ హ్యుష్ణరశ్మిసుతాప్రియా .. 31..

ఉత్పత్తిస్థితిసంహారకారిణ్యుపరిచారిణీ .

ఊర్జం వహంత్యూర్జధరోర్జావతీ చోర్మిమాలినీ  .. 32..

ఊర్ధ్వరేతఃప్రియోర్ధ్వాధ్వా హ్యూర్మిలోర్ధ్వగతిప్రదా .

ఋషివృందస్తుతర్ద్ధిశ్చ ఋణత్రయవినాశినీ .. 33..

ఋతంభరర్ద్ధిదాత్రీ చ ఋక్స్వరూపా ఋజుప్రియా .

ఋక్షమార్గవహర్క్షార్చిరృజుమార్గప్రదర్శినీ .. 34..

ఏధితాఖిలధర్మార్థా త్వేకైకామృతదాయినీ .

ఏధనీయస్వభావైజ్యా త్వేజితాశేషపాతకా  .. 35..

ఐశ్వర్యదైశ్వర్యరూపా హ్యైతిహ్యం హ్యైందవీద్యుతిః .

ఓజస్విన్యోషధీక్షేత్రమోజోదౌదనదాయినీ .. 36..

ఓష్ఠామృతౌన్నత్యదాత్రీ త్వౌషధం భవరోగిణాం .

ఔదార్యచంచురౌపేంద్రీ త్వౌగ్రీ హ్యౌమేయరూపిణీ .. 37..

అంబరాధ్వవహాంబష్ఠాంబరమాలాంబుజేక్షణా .

అంబికాంబుమహాయోనిరంధోదాంధకహారిణీ .. 38..

అంశుమాలా హ్యంశుమతీ త్వంగీకృతషడాననా .

అంధతామిస్రహంత్ర్యంధురంజనా హ్యంజనావతీ .. 39..

కల్యాణకారిణీ కామ్యా కమలోత్పలగంధినీ .

కుముద్వతీ కమలినీ కాంతిః కల్పితదాయినీ .. 40..

కాంచనాక్షీ కామధేనుః కీర్తికృత్ క్లేశనాశినీ .

క్రతుశ్రేష్ఠా క్రతుఫలా కర్మబంధవిభేదినీ  .. 41..

కమలాక్షీ క్లమహరా కృశానుతపనద్యుతిః .

కరుణార్ద్రా చ కల్యాణీ కలికల్మషనాశినీ .. 42..

కామరూపా క్రియాశక్తిః కమలోత్పలమాలినీ .

కూటస్థా కరుణా కాంతా కూర్మయానా కలావతీ .. 43..

కమలా కల్పలతికా కాలీ కలుషవైరిణీ .

కమనీయజలా కమ్రా కపర్దిసుకపర్దగా .. 44..

కాలకూటప్రశమనీ కదంబకుసుమప్రియా .

కాలిందీ కేలిలలితా కలకల్లోలమాలికా .. 45..

క్రాంతలోకత్రయా కండూః  కండూతనయవత్సలా .

ఖడ్గినీ ఖడ్గధారాభా ఖగా ఖండేందుధారిణీ  .. 46..

ఖేఖేలగామినీ ఖస్థా ఖండేందుతిలకప్రియా .

ఖేచరీ ఖేచరీవంద్యా ఖ్యాతిః ఖ్యాతిప్రదాయినీ .. 47..

ఖండితప్రణతాఘౌఘా ఖలబుద్ధివినాశినీ .

ఖాతైనః కందసందోహా ఖడ్గఖట్వాంగ ఖేటినీ .. 48..

ఖరసంతాపశమనీ ఖనిః పీయూషపాథసాం .

గంగా గంధవతీ గౌరీ గంధర్వనగరప్రియా .. 49..

గంభీరాంగీ గుణమయీ గతాతంకా గతిప్రియా .

గణనాథాంబికా గీతా గద్యపద్యపరిష్టుతా .. 50..

గాంధారీ గర్భశమనీ గతిభ్రష్టగతిప్రదా .

గోమతీ గుహ్యవిద్యా గౌర్గోప్త్రీ గగనగామినీ .. 51..

గోత్రప్రవర్ధినీ గుణ్యా గుణాతీతా గుణాగ్రణీః .

గుహాంబికా గిరిసుతా గోవిందాంఘ్రిసముద్భవా .. 52..

గుణనీయచరిత్రా చ గాయత్రీ గిరిశప్రియా .

గూఢరూపా గుణవతీ గుర్వీ గౌరవవర్ధినీ .. 53..

గ్రహపీడాహరా గుంద్రా గరఘ్నీ గానవత్సలా .

ఘర్మహంత్రీ ఘృతవతీ ఘృతతుష్టిప్రదాయినీ .. 54..

ఘంటారవప్రియా ఘోరాఘౌఘవిధ్వంసకారిణీ .

ఘ్రాణతుష్టికరీ ఘోషా ఘనానందా ఘనప్రియా .. 55..

ఘాతుకా ఘూర్ణితజలా ఘృష్టపాతకసంతతిః .

ఘటకోటిప్రపీతాపా ఘటితాశేషమంగలా .. 56..

ఘృణావతీ ఘృణినిధిర్ఘస్మరా ఘూకనాదినీ .

ఘుసృణాపింజరతనుర్ఘర్ఘరా ఘర్ఘరస్వనా .. 57..

చంద్రికా చంద్రకాంతాంబుశ్చంచదాపా చలద్యుతిః .

చిన్మయీ చితిరూపా చ చంద్రాయుతశతాననా .. 58..

చాంపేయలోచనా చారుశ్చార్వంగీ చారుగామినీ .

చార్యా చారిత్రనిలయా చిత్రకృచ్చిత్రరూపిణీ .. 59..

చంపూశ్చందనశుచ్యంబుశ్చర్చనీయా చిరస్థిరా .

చారుచంపకమాలాఢ్యా చమితాశేషదుష్కృతా .. 60..

చిదాకాశవహా చింత్యా చంచచ్చామరవీజితా .

చోరితాశేషవృజినా చరితాశేషమండలా .. 61..

ఛేదితాఖిలపాపౌఘా ఛద్మఘ్నీ ఛలహారిణీ .

ఛన్నత్రివిష్టపతలా ఛోటితాశేషబంధనా .. 62..

ఛురితామృతధారౌఘా ఛిన్నైనాశ్ఛందగామినీ .

ఛత్రీకృతమరాలౌఘా ఛటీకృతనిజామృతా .. 63..

జాహ్నవీ జ్యా జగన్మాతా జప్యా జంఘాలవీచికా .

జయా జనార్దనప్రీతా జుషణీయా జగద్ధితా .. 64..

జీవనం జీవనప్రాణా జగజ్జ్యేష్ఠా జగన్మయీ .

జీవజీవాతులతికా జన్మిజన్మనిబర్హిణీ .. 65..

జాడ్యవిధ్వంసనకరీ జగద్యోనిర్జలావిలా .

జగదానందజననీ జలజా జలజేక్షణా .. 66..

జనలోచనపీయూషా జటాతటవిహారిణీ .

జయంతీ జంజపూకఘ్నీ జనితజ్ఞానవిగ్రహా .. 67..

ఝల్లరీవాద్యకుశలా ఝలజ్ఝాలజలావృతా .

ఝింటీశవంద్యా ఝంకారకారిణీ ఝర్ఝరావతీ .. 68..

టీకితాశేషపాతాలా టంకికైనోఽద్రిపాటనే .

టంకారనృత్యత్కల్లోలా టీకనీయమహాతటా .. 69..

డంబరప్రవహా డీనరాజహంసకులాకులా .

డమడ్డమరుహస్తా చ డామరోక్తమహాండకా .. 70..

ఢౌకితాశేషనిర్వాణా ఢక్కానాదచలజ్జలా  .

ఢుంఢివిఘ్నేశజననీ ఢణడ్ఢుణితపాతకా .. 71..

తర్పణీ తీర్థతీర్థా చ త్రిపథా త్రిదశేశ్వరీ .

త్రిలోకగోప్త్రీ తోయేశీ త్రైలోక్యపరివందితా .. 72..

తాపత్రితయసంహర్త్రీ తేజోబలవివర్ధినీ .

త్రిలక్ష్యా తారణీ తారా తారాపతికరార్చితా .. 73..

త్రైలోక్యపావనీ పుణ్యా తుష్టిదా తుష్టిరూపిణీ .

తృష్ణాచ్ఛేత్రీ తీర్థమాతా త్రివిక్రమపదోద్భవా .. 74..

తపోమయీ తపోరూపా తపఃస్తోమఫలప్రదా .  var  పదప్రదా

త్రైలోక్యవ్యాపినీ తృప్తిస్తృప్తికృత్తత్త్వరూపిణీ .. 75..

త్రైలోక్యసుందరీ తుర్యా తుర్యాతీతఫలప్రదా .

త్రైలోక్యలక్ష్మీస్త్రిపదీ తథ్యా తిమిరచంద్రికా .. 76..

తేజోగర్భా తపస్సారా త్రిపురారిశిరోగృహా .

త్రయీస్వరూపిణీ తన్వీ తపనాంగజభీతినుత్ .. 77..

తరిస్తరణిజామిత్రం తర్పితాశేషపూర్వజా .

తులావిరహితా తీవ్రపాపతూలతనూనపాత్ .. 78..

దారిద్ర్యదమనీ దక్షా దుష్ప్రేక్షా దివ్యమండనా .

దీక్షావతీ దురావాప్యా ద్రాక్షామధురవారిభృత్ .. 79..

దర్శితానేకకుతుకా దుష్టదుర్జయదుఃఖహృత్ .

దైన్యహృద్దురితఘ్నీ చ దానవారిపదాబ్జజా .. 80..

దందశూకవిషఘ్నీ చ దారితాఘౌఘసంతతిః .

ద్రుతా దేవద్రుమచ్ఛన్నా దుర్వారాఘవిఘాతినీ .. 81..

దమగ్రాహ్యా దేవమాతా దేవలోకప్రదర్శినీ .

దేవదేవప్రియా దేవీ దిక్పాలపదదాయినీ .. 82..

దీర్ఘాయుః కారిణీ దీర్ఘా దోగ్ధ్రీ దూషణవర్జితా .

దుగ్ధాంబువాహినీ దోహ్యా దివ్యా దివ్యగతిప్రదా .. 83..

ద్యునదీ దీనశరణం దేహిదేహనివారిణీ .

ద్రాఘీయసీ దాఘహంత్రీ దితపాతకసంతతిః .. 84..

దూరదేశాంతరచరీ దుర్గమా దేవవల్లభా .

దుర్వృత్తఘ్నీ దుర్విగాహ్యా దయాధారా దయావతీ .. 85..

దురాసదా దానశీలా ద్రావిణీ ద్రుహిణస్తుతా .

దైత్యదానవసంశుద్ధికర్త్రీ దుర్బుద్ధిహారిణీ .. 86..

దానసారా దయాసారా ద్యావాభూమివిగాహినీ .

దృష్టాదృష్టఫలప్రాప్తిర్దేవతావృందవందితా .. 87..

దీర్ఘవ్రతా దీర్ఘదృష్టిర్దీప్తతోయా దురాలభా .

దండయిత్రీ దండనీతిర్దుష్టదండధరార్చితా .. 88..

దురోదరఘ్నీ దావార్చిర్ద్రవద్ద్రవ్యైకశేవధిః .

దీనసంతాపశమనీ దాత్రీ దవథువైరిణీ .. 89..

దరీవిదారణపరా దాంతా దాంతజనప్రియా .

దారితాద్రితటా దుర్గా దుర్గారణ్యప్రచారిణీ .. 90..

ధర్మద్రవా ధర్మధురా ధేనుర్ధీరా ధృతిర్ధ్రువా .

ధేనుదానఫలస్పర్శా ధర్మకామార్థమోక్షదా .. 91..

ధర్మోర్మివాహినీ ధుర్యా ధాత్రీ ధాత్రీవిభూషణం .

ధర్మిణీ ధర్మశీలా చ ధన్వికోటికృతావనా .. 92..

ధ్యాతృపాపహరా ధ్యేయా ధావనీ ధూతకల్మషా .

ధర్మధారా ధర్మసారా ధనదా ధనవర్ధినీ .. 93..

ధర్మాధర్మగుణచ్ఛేత్రీ ధత్తూరకుసుమప్రియా .

ధర్మేశీ ధర్మశాస్త్రజ్ఞా ధనధాన్యసమృద్ధికృత్ .. 94..

ధర్మలభ్యా ధర్మజలా ధర్మప్రసవధర్మిణీ .

ధ్యానగమ్యస్వరూపా చ ధరణీ ధాతృపూజితా .. 95..

ధూర్ధూర్జటిజటాసంస్థా ధన్యా ధీర్ధారణావతీ .

నందా నిర్వాణజననీ నందినీ నున్నపాతకా .. 96..

నిషిద్ధవిఘ్ననిచయా నిజానందప్రకాశినీ .

నభోఽఙ్గణచరీ నూతిర్నమ్యా నారాయణీ నుతా .. 97..

నిర్మలా నిర్మలాఖ్యానా నాశినీ తాపసంపదాం .

నియతా నిత్యసుఖదా నానాశ్చర్యమహానిధిః .. 98..

నదీ నదసరోమాతా నాయికా నాకదీర్ఘికా .

నష్టోద్ధరణధీరా చ నందనా నందదాయినీ .. 99..

నిర్ణిక్తాశేషభువనా నిఃసంగా నిరుపద్రవా .

నిరాలంబా నిష్ప్రపంచా నిర్ణాశితమహామలా .. 100..

నిర్మలజ్ఞానజననీ నిఃశేషప్రాణితాపహృత్ .

నిత్యోత్సవా నిత్యతృప్తా నమస్కార్యా నిరంజనా .. 101..

నిష్ఠావతీ నిరాతంకా నిర్లేపా నిశ్చలాత్మికా .

నిరవద్యా నిరీహా చ నీలలోహితమూర్ధగా .. 102..

నందిభృంగిగణస్తుత్యా నాగా నందా నగాత్మజా .

నిష్ప్రత్యూహా నాకనదీ నిరయార్ణవదీర్ఘనౌః .. 103..

పుణ్యప్రదా పుణ్యగర్భా పుణ్యా పుణ్యతరంగిణీ .

పృథుః పృథుఫలా పూర్ణా ప్రణతార్తిప్రభంజనీ .. 104..

ప్రాణదా ప్రాణిజననీ ప్రాణేశీ ప్రాణరూపిణీ .

పద్మాలయా పరాశక్తిః పురజిత్పరమప్రియా .. 105..

పరా పరఫలప్రాప్తిః పావనీ చ పయస్వినీ .

పరానందా ప్రకృష్టార్థా ప్రతిష్ఠా పాలినీ పరా .. 106..  var  పాలనీ

పురాణపఠితా ప్రీతా ప్రణవాక్షరరూపిణీ .

పార్వతీ ప్రేమసంపన్నా పశుపాశవిమోచనీ .. 107..

పరమాత్మస్వరూపా చ పరబ్రహ్మప్రకాశినీ .

పరమానందనిష్యందా ప్రాయశ్చిత్తస్వరూపిణీ .. 108..  var  నిష్పందా

పానీయరూపనిర్వాణా పరిత్రాణపరాయణా .

పాపేంధనదవజ్వాలా పాపారిః పాపనామనుత్ .. 109..

పరమైశ్వర్యజననీ ప్రజ్ఞా ప్రాజ్ఞా పరాపరా .

ప్రత్యక్షలక్ష్మీః పద్మాక్షీ పరవ్యోమామృతస్రవా .. 110..

ప్రసన్నరూపా ప్రణిధిః పూతా ప్రత్యక్షదేవతా .

పినాకిపరమప్రీతా పరమేష్ఠికమండలుః .. 111..

పద్మనాభపదార్ఘ్యేణ ప్రసూతా పద్మమాలినీ .

పరర్ద్ధిదా పుష్టికరీ పథ్యా పూర్తిః ప్రభావతీ .. 112..

పునానా పీతగర్భఘ్నీ పాపపర్వతనాశినీ .

ఫలినీ ఫలహస్తా చ ఫుల్లాంబుజవిలోచనా .. 113..

ఫాలితైనోమహాక్షేత్రా ఫణిలోకవిభూషణం .

ఫేనచ్ఛలప్రణున్నైనాః ఫుల్లకైరవగంధినీ .. 114..

ఫేనిలాచ్ఛాంబుధారాభా ఫడుచ్చాటితపాతకా .

ఫాణితస్వాదుసలిలా ఫాంటపథ్యజలావిలా .. 115..

విశ్వమాతా చ విశ్వేశీ విశ్వా విశ్వేశ్వరప్రియా .

బ్రహ్మణ్యా బ్రహ్మకృద్ బ్రాహ్మీ బ్రహ్మిష్ఠా విమలోదకా .. 116..

విభావరీ చ విరజా విక్రాంతానేకవిష్టపా .

విశ్వమిత్రం విష్ణుపదీ వైష్ణవీ వైష్ణవప్రియా .. 117..

విరూపాక్షప్రియకరీ విభూతిర్విశ్వతోముఖీ .

విపాశా వైబుధీ వేద్యా వేదాక్షరరసస్రవా .. 118..

విద్యా వేగవతీ వంద్యా బృంహణీ బ్రహ్మవాదినీ .

వరదా విప్రకృష్టా చ వరిష్ఠా చ విశోధనీ .. 119..

విద్యాధరీ విశోకా చ వయోవృందనిషేవితా .

బహూదకా బలవతీ వ్యోమస్థా విబుధప్రియా .. 120..

వాణీ వేదవతీ విత్తా బ్రహ్మవిద్యాతరంగిణీ .

బ్రహ్మాండకోటివ్యాప్తాంబుర్బ్రహ్మహత్యాపహారిణీ .. 121..

బ్రహ్మేశవిష్ణురూపా చ బుద్ధిర్విభవవర్ధినీ .

విలాసిసుఖదా వశ్యా వ్యాపినీ చ వృషారణిః .. 122..

వృషాంకమౌలినిలయా విపన్నార్తిప్రభంజనీ .

వినీతా వినతా బ్రధ్నతనయా వినయాన్వితా .. 123..

విపంచీ వాద్యకుశలా వేణుశ్రుతివిచక్షణా .

వర్చస్కరీ బలకరీ బలోన్మూలితకల్మషా .. 124..

విపాప్మా విగతాతంకా వికల్పపరివర్జితా .

వృష్టికర్త్రీ వృష్టిజలా విధిర్విచ్ఛిన్నబంధనా .. 125..

వ్రతరూపా విత్తరూపా బహువిఘ్నవినాశకృత్ .

వసుధారా వసుమతీ విచిత్రాంగీ విభావసుః .. 126..

విజయా విశ్వబీజం చ వామదేవీ వరప్రదా .

వృషాశ్రితా విషఘ్నీ చ విజ్ఞానోర్మ్యంశుమాలినీ .. 127..

భవ్యా భోగవతీ భద్రా భవానీ భూతభావినీ .

భూతధాత్రీ భయహరా భక్తదారిద్ర్యఘాతినీ .. 128..

భుక్తిముక్తిప్రదా భేశీ భక్తస్వర్గాపవర్గదా .

భాగీరథీ భానుమతీ భాగ్యం భోగవతీ భృతిః .. 129..

భవప్రియా భవద్వేష్ట్రీ భూతిదా భూతిభూషణా .

భాలలోచనభావజ్ఞా భూతభవ్యభవత్ప్రభుః .. 130..

భ్రాంతిజ్ఞానప్రశమనీ భిన్నబ్రహ్మాండమండపా .

భూరిదా భక్తసులభా భాగ్యవద్దృష్టిగోచరీ .. 131..

భంజితోపప్లవకులా భక్ష్యభోజ్యసుఖప్రదా .

భిక్షణీయా భిక్షుమాతా భావా భావస్వరూపిణీ .. 132..

మందాకినీ మహానందా మాతా ముక్తితరంగిణీ .

మహోదయా మధుమతీ మహాపుణ్యా ముదాకరీ .. 133..

మునిస్తుతా మోహహంత్రీ మహాతీర్థా మధుస్రవా .

మాధవీ మానినీ మాన్యా మనోరథపథాతిగా .. 134..

మోక్షదా మతిదా ముఖ్యా మహాభాగ్యజనాశ్రితా .

మహావేగవతీ మేధ్యా మహా మహిమభూషణా .. 135..

మహాప్రభావా మహతీ మీనచంచలలోచనా .

మహాకారుణ్యసంపూర్ణా మహర్ద్ధిశ్చ మహోత్పలా .. 136..

మూర్తిమన్ముక్తిరమణీ మణిమాణిక్యభూషణా .

ముక్తాకలాపనేపథ్యా మనోనయననందినీ .. 137..

మహాపాతకరాశిఘ్నీ మహాదేవార్ధహారిణీ .

మహోర్మిమాలినీ ముక్తా మహాదేవీ మనోన్మనీ .. 138..

మహాపుణ్యోదయప్రాప్యా మాయాతిమిరచంద్రికా .

మహావిద్యా మహామాయా మహామేధా మహౌషధం .. 139..

మాలాధరీ మహోపాయా మహోరగవిభూషణా .

మహామోహప్రశమనీ మహామంగలమంగలం .. 140..

మార్తండమండలచరీ మహాలక్ష్మీర్మదోజ్ఝితా .

యశస్వినీ యశోదా చ యోగ్యా యుక్తాత్మసేవితా .. 141..

యోగసిద్ధిప్రదా యాజ్యా యజ్ఞేశపరిపూరితా .

యజ్ఞేశీ యజ్ఞఫలదా యజనీయా యశస్కరీ .. 142..

యమిసేవ్యా యోగయోనిర్యోగినీ యుక్తబుద్ధిదా .

యోగజ్ఞానప్రదా యుక్తా యమాద్యష్టాంగయోగయుక్ .. 143..

యంత్రితాఘౌఘసంచారా యమలోకనివారిణీ .

యాతాయాతప్రశమనీ యాతనానామకృంతనీ .. 144..

యామినీశహిమాచ్ఛోదా యుగధర్మవివర్జితా .

రేవతీ రతికృద్ రమ్యా రత్నగర్భా రమా రతిః .. 145..

రత్నాకరప్రేమపాత్రం రసజ్ఞా రసరూపిణీ .

రత్నప్రాసాదగర్భా చ రమణీయతరంగిణీ .. 146..

రత్నార్చీ రుద్రరమణీ రాగద్వేషవినాశినీ .

రమా రామా రమ్యరూపా రోగిజీవానురూపిణీ .. 147..

రుచికృద్ రోచనీ రమ్యా రుచిరా రోగహారిణీ .

రాజహంసా రత్నవతీ రాజత్కల్లోలరాజికా .. 148..

రామణీయకరేఖా చ రుజారీ రోగరోషిణీ .  var  రోగశోషిణీ

రాకా రంకార్తిశమనీ రమ్యా రోలంబరావిణీ .. 149..

రాగిణీ రంజితశివా రూపలావణ్యశేవధిః .

లోకప్రసూర్లోకవంద్యా లోలత్కల్లోలమాలినీ .. 150..

లీలావతీ లోకభూమిర్లోకలోచనచంద్రికా .

లేఖస్రవంతీ లటభా లఘువేగా లఘుత్వహృత్ .. 151..

లాస్యత్తరంగహస్తా చ లలితా లయభంగిగా .

లోకబంధుర్లోకధాత్రీ లోకోత్తరగుణోర్జితా .. 152..

లోకత్రయహితా లోకా లక్ష్మీర్లక్షణలక్షితా .

లీలా లక్షితనిర్వాణా లావణ్యామృతవర్షిణీ .. 153..

వైశ్వానరీ వాసవేడ్యా వంధ్యత్వపరిహారిణీ .

వాసుదేవాంఘ్రిరేణుఘ్నీ వజ్రివజ్రనివారిణీ .. 154..

శుభావతీ శుభఫలా శాంతిః శంతనువల్లభా .  var  శాంతను

శూలినీ శైశవవయాః శీతలామృతవాహినీ .. 155..

శోభావతీ శీలవతీ శోషితాశేషకిల్బిషా .

శరణ్యా శివదా శిష్టా శరజన్మప్రసూఃశివా .. 156..

శక్తిః శశాంకవిమలా శమనస్వసృసమ్మతా .

శమా శమనమార్గఘ్నీ శితికంఠమహాప్రియా .. 157..

శుచిః శుచికరీ శేషా శేషశాయిపదోద్భవా .

శ్రీనివాసశ్రుతిః శ్రద్ధా శ్రీమతీ శ్రీః శుభవ్రతా .. 158..

శుద్ధవిద్యా శుభావర్తా శ్రుతానందా శ్రుతిస్తుతిః .

శివేతరఘ్నీ శబరీ శాంబరీరూపధారిణీ .. 159..

శ్మశానశోధనీ శాంతా శశ్వచ్ఛతధృతిస్తుతా .

శాలినీ శాలిశోభాఢ్యా శిఖివాహనగర్భభృత్ .. 160..

శంసనీయచరిత్రా చ శాతితాశేషపాతకా .

షడ్గుణైశ్వర్యసంపన్నా షడంగశ్రుతిరూపిణీ .. 161..

షంఢతాహారిసలిలా స్త్యాయన్నదనదీశతా .

సరిద్వారా చ సురసా సుప్రభా సురదీర్ఘికా .. 162..

స్వః సింధుః సర్వదుఃఖఘ్నీ సర్వవ్యాధిమహౌషధం .

సేవ్యా సిద్ధిః సతీ సూక్తిః స్కందసూశ్చ సరస్వతీ .. 163..

సంపత్తరంగిణీ స్తుత్యా స్థాణుమౌలికృతాలయా .

స్థైర్యదా సుభగా సౌఖ్యా స్త్రీషు సౌభాగ్యదాయినీ .. 164..

స్వర్గనిఃశ్రేణికా సూమా స్వధా స్వాహా సుధాజలా .  var  సూక్ష్మా

సముద్రరూపిణీ స్వర్గ్యా సర్వపాతకవైరిణీ .. 165..

స్మృతాఘహారిణీ సీతా సంసారాబ్ధితరండికా .

సౌభాగ్యసుందరీ సంధ్యా సర్వసారసమన్వితా .. 166..

హరప్రియా హృషీకేశీ హంసరూపా హిరణ్మయీ .

హృతాఘసంఘా హితకృద్ధేలా హేలాఘగర్వహృత్ .. 167..

క్షేమదా క్షాలితాఘౌఘా క్షుద్రవిద్రావిణీ క్షమా .

గంగేతి నామసాహస్రం గంగాయాః కలశోద్భవ .  var  ఇతి నామసహస్రం హి

కీర్తయిత్వా నరః సమ్యగ్గంగాస్నానఫలం లభేత్ .. 168..

సర్వపాపప్రశమనం సర్వవిఘ్నవినాశనం .

సర్వస్తోత్రజపాచ్ఛ్రేష్ఠం సర్వపావనపావనం .. 169..

శ్రద్ధయాభీష్టఫలదం చతుర్వర్గసమృద్ధికృత్ .

సకృజ్జపాదవాప్నోతి హ్యేకక్రతుఫలం మునే .. 170..

సర్వతీర్థేషు యః స్నాతః సర్వయజ్ఞేషు దీక్షితః .

తస్య యత్ఫలముద్దిష్టం త్రికాలపఠనాచ్చ తత్ .. 171..

సర్వవ్రతేషు యత్పుణ్యం సమ్యక్చీర్ణేషు వాడవ .

తత్ఫలం సమవాప్నోతి త్రిసంధ్యం నియతః పఠన్ .. 172..

స్నానకాలే పఠేద్యస్తు యత్ర కుత్ర జలాశయే .

తత్ర సన్నిహితా నూనం గంగా త్రిపథగా మునే .. 173..

శ్రేయోఽర్థీ లభతే శ్రేయో ధనార్థీ లభతే ధనం .

కామీ కామానవాప్నోతి మోక్షార్థీ మోక్షమాప్నుయాత్ .. 174..

వర్షం త్రికాలపఠనాచ్ఛ్రద్ధయా శుచిమానసః .

ఋతుకాలాభిగమనాదపుత్రః  పుత్రవాన్ భవేత్ .. 175..

నాకాలమరణం తస్య నాగ్నిచోరాహిసాధ్వసం .

నామ్నాం సహస్రం గంగాయా యో జపేచ్ఛ్రద్ధయా మునే .. 176..

గంగానామసహస్రం తు జప్త్వా గ్రామాంతరం వ్రజేత్ .

కార్యసిద్ధిమవాప్నోతి నిర్విఘ్నో గేహమావిశేత్ .. 177..

తిథివారర్క్షయోగానాం న దోషః ప్రభవేత్తదా .

యదా జప్త్వా వ్రజేదేతత్ స్తోత్రం గ్రామాంతరం నరః .. 178..

ఆయురారోగ్యజననం సర్వోపద్రవనాశనం .

సర్వసిద్ధికరం పుంసాం గంగానామసహస్రకం .. 179..

జన్మాంతరసహస్రేషు యత్పాపం సమ్యగర్జితం .

గంగానామసహస్రస్య జపనాత్తత్క్షయం వ్రజేత్ .. 180..

బ్రహ్మఘ్నో మద్యపః స్వర్ణస్తేయీ చ గురుతల్పగః .

తత్సంయోగీ భ్రూణహంతా మాతృహా పితృహా మునే .. 181..

విశ్వాసఘాతీ గరదః కృతఘ్నో మిత్రఘాతకః .

అగ్నిదో గోవధకరో గురుద్రవ్యాపహారకః .. 182..

మహాపాతకయుక్తోఽపి సంయుక్తోఽప్యుపపాతకైః .

ముచ్యతే శ్రద్ధయా జప్త్వా గంగానామసహస్రకం .. 183..

ఆధివ్యాధిపరిక్షిప్తో ఘోరతాపపరిప్లుతః .

ముచ్యతే సర్వదుఃఖేభ్యః స్తవస్యాస్యానుకీర్తనాత్ .. 184..

సంవత్సరేణ యుక్తాత్మా పఠన్ భక్తిపరాయణః .

అభీప్సితాం లభేత్సిద్ధిం సర్వైః పాపైః ప్రముచ్యతే .. 185..

సంశయావిష్టచిత్తస్య ధర్మవిద్వేషిణోఽపి చ .

దాంభికస్యాపి హింస్రస్య చేతో ధర్మపరం భవేత్ .. 186..

వర్ణాశ్రమపథీనస్తు కామక్రోధవివర్జితః .

యత్ఫలం లభతే జ్ఞానీ తదాప్నోత్యస్య కీర్తనాత్ .. 187..

గాయత్ర్యయుతజప్యేన యత్ఫలం సముపార్జితం .

సకృత్పఠనతః సమ్యక్తదశేషమవాప్నుయాత్ .. 188..

గాం దత్త్వా వేదవిదుషే యత్ఫలం లభతే కృతీ .

తత్పుణ్యం సమ్యగాఖ్యాతం స్తవరాజసకృజ్జపాత్ .. 189..

గురుశుశ్రూషణం కుర్వన్ యావజ్జీవం నరోత్తమః .

యత్పుణ్యమర్జయేత్తద్భాగ్వర్షం త్రిషవణం జపన్ .. 190..

వేదపారాయణాత్పుణ్యం యదత్ర పరిపఠ్యతే .

తత్షణ్మాసేన లభతే త్రిసంధ్యం పరికీర్తనాత్ .. 191..

గంగాయాః స్తవరాజస్య ప్రత్యహం పరిశీలనాత్ .

శివభక్తిమవాప్నోతి విష్ణుభక్తోఽథవా భవేత్ .. 192..

యః కీర్తయేదనుదినం గంగానామసహస్రకం .

తత్సమీపే సహచరీ గంగాదేవీ సదా భవేత్ .. 193..

సర్వత్ర పూజ్యో భవతి సర్వత్ర విజయీ భవేత్ .

సర్వత్ర సుఖమాప్నోతి జాహ్నవీస్తోత్రపాఠతః .. 194..

సదాచారీ స విజ్ఞేయః స శుచిస్తు సదైవ హి .

కృతసర్వసురార్చః స కీర్తయేద్య ఇమాం స్తుతిం .. 195..

తస్మింస్తృప్తే భవేత్ తృప్తా జాహ్నవీ నాత్ర సంశయః .

తస్మాత్సర్వప్రయత్నేన గంగాభక్తం సమర్చయేత్ .. 196..

స్తవరాజమిమం గాంగం శృణుయాద్యశ్చ వై పఠేత్ .

శ్రావయేదథ తద్భక్తాన్ దంభలోభవివర్జితః .. 197..

ముచ్యతే త్రివిధైః పాపైర్మనోవాక్కాయసంభవైః .

క్షణాన్నిష్పాపతామేతి పితౄణాం చ ప్రియో భవేత్ .. 198..

సర్వదేవప్రియశ్చాపి సర్వర్షిగణసమ్మతః .

అంతే విమానమారుహ్యం దివ్యస్త్రీశతసంవృతః .. 199..

దివ్యాభరణసంపన్నో దివ్యభోగసమన్వితః .

నందనాదివనే స్వైరం దేవవత్స ప్రమోదతే .. 200..

భుజ్యమానేషు విప్రేషు శ్రాద్ధకాలే విశేషతః .

జపన్నిదం మహాస్తోత్రం పితౄణాం తృప్తికారకం .. 201..

యావంతి తత్ర సిక్థాని యావంతోఽమ్బుకణాః స్థితాః .

తావంత్యేవ హి వర్షాణి మోదంతే స్వపితామహాః .. 202..

యథా ప్రీణంతి పితరో ప్రీణంతి గంగాయాం పిండదానతః .

తథైవ తృప్నుయుః శ్రాద్ధే స్తవస్యాస్యానుసంశ్రవాత్  .. 203..

ఏతత్స్తోత్రం గృహే యస్య లిఖితం పరిపూజ్యతే .

తత్ర పాపభయం నాస్తి శుచి తద్భవనం సదా .. 204..

అగస్తే కిం బహూక్తేన శృణు మే నిశ్చితం వచః .

సంశయో నాత్ర కర్తవ్యః సందేగ్ధరి ఫలం నహి .. 205..

యావంతి మర్త్యే స్తోత్రాణి మంత్రజాలాన్యనేకశః .

తావంతి స్తవరాజస్య గాంగేయస్య సమాని న .. 206..

యావజ్జన్మ జపేద్యస్తు నామ్నామేతత్సహస్రకం .

స కీకటేష్వపి మృతో న పునర్గర్భమావిశేత్ .. 207..

నిత్యం నియమవానేతద్యో జపేత్స్తోత్రముత్తమం .

అన్యత్రాపి విపన్నః స గంగాతీరే మృతో భవేత్ .. 208..

ఏతత్స్తోత్రవరం రమ్యం పురా ప్రోక్తం పినాకినా .

విష్ణవే నిజభక్తాయ ముక్తిబీజాక్షరాస్పదం .. 209..

గంగాస్నానప్రతినిధిః స్తోత్రమేతన్మయేరితం .

సిస్నాసుర్జాహ్నవీం తస్మాదేతత్స్తోత్రం జపేత్సుధీః .. 210..

.. ఇతి శ్రీస్కందపురాణే ఏకాశీతిసాహస్ర్యాం

సంహితాయాం చతుర్థైకాశీఖండేపూర్వార్ధే

గంగాసహస్రనామకథనం నామైకోనత్రింశత్తమోఽధ్యాయః ..

సితమకరనిషణ్ణాం శుభ్రవర్ణాం త్రినేత్రాం

    కరధృతకలశోద్యత్సోపలాభీత్యభీష్టాం .

విధిహరిరూపాం సేందుకోటీరజూటాం

    కలితసితదుకూలాం జాహ్నవీ తాం నమామి ..

Encoded and proofread by DPD, Kirk Wortman