അകാരാദിക്ഷകാരാന്ത നാമഘടിതം സ്കന്ദപുരാണാന്തർഗതം
അഗസ്ത്യ ഉവാച
വിനാ സ്നാനേന ഗംഗായാം നൃണാം ജന്മ നിരർഥകം .
ഉപായാന്തരമസ്ത്യന്യദ് യേന സ്നാനഫലം ലഭേത് .. 1..
അശക്താനാം ച പംഗൂനാമാലസ്യോപഹതാത്മനാം .
ദൂരദേശാന്തരസ്ഥാനാം ഗംഗാസ്നാനം കഥം ഭവേത് .. 2..
ദാനം വാഥ വ്രതം വാഥ മന്ത്രഃ സ്തോത്രം ജപോഽഥവാ .
തീർഥാന്തരാഭിഷേകോ വാ ദേവതോപാസനം തു വാ .. 3..
യദ്യസ്തി കിഞ്ചിത് ഷഡ്വക്ത്ര ഗംഗാസ്നാനഫലപ്രദം .
വിധാനാന്തരമാത്രേണ തദ് വദ പ്രണതായ മേ .. 4..
ത്വത്തോ ന വേദ സ്കന്ദാന്യോ ഗംഗാഗർഭസമുദ്ഭവ .
പരം സ്വർഗതരംഗിണ്യാം മഹിമാനം മഹാമതേ .. 5..
സ്കന്ദ ഉവാച
സന്തി പുണ്യജലാനീഹ സരാംസി സരിതോ മുനേ .
സ്ഥാനേ സ്ഥാനേ ച തീർഥാനി ജിതാത്മാധ്യുഷിതാനി ച .. 6..
ദൃഷ്ടപ്രത്യയകാരീണി മഹാമഹിമഭാഞ്ജ്യപി .
പരം സ്വർഗതരംഗിണ്യാഃ കോട്യംശോഽപി ന തത്ര വൈ .. 7..
അനേനൈവാനുമാനേന ബുദ്ധ്യസ്വ കലശോദ്ഭവ .
ദധ്രേ ഗംഗോത്തമാംഗേന ദേവദേവേന ശംഭുനാ .. 8..
സ്നാനകാലേഽന്യതീർഥേഷു ജപ്യതേ ജാഹ്നവീ ജനൈഃ .
വിനാ വിഷ്ണുപദീം ക്വാന്യത് സമർഥമഘമോചനേ .. 9..
ഗംഗാസ്നാനഫലം ബ്രഹ്മൻ ഗംഗായാമേവ ലഭ്യതേ .
യഥാ ദ്രാക്ഷാഫലസ്വാദോ ദ്രാക്ഷായാമേവ നാന്യതഃ .. 10..
അസ്ത്യുപായ ഇഹ ത്വേകഃ സ്യാദ് യേനാവികലം ഫലം .
സ്നാനസ്യ ദേവസരിതോ മഹാഗുഹ്യതമോ മുനേ .. 11..
ശിവഭക്തായ ശാന്തായ വിഷ്ണുഭക്തിപരായ ച .
ശ്രദ്ധാലവേ ത്വാസ്തികായ ഗർഭവാസമുമുക്ഷവേ .. 12..
കഥനീയം ന ചാന്യസ്യ കസ്യചിത് കേനചിത് ക്വചിത് .
ഇദം രഹസ്യം പരമം മഹാപാതകനാശനം .. 13..
മഹാശ്രേയസ്കരം പുണ്യം മനോരഥകരം പരം .
ദ്യുനദീപ്രീതിജനകം ശിവസന്തോഷസന്തതിഃ .. 14..
നാമ്നാം സഹസ്രം ഗംഗായാഃ സ്തവരാജേഷു ശോഭനം .
ജപ്യാനാം പരമം ജപ്യം വേദോപനിഷദാം സമം .. 15..
ജപനീയം പ്രയത്നേന മൗനിനാ വാചകം വിനാ .
ശുചിസ്ഥാനേഷു ശുചിനാ സുസ്പഷ്ടാക്ഷരമേവ ച .. 16..
ധ്യാനം -
ശൈലേന്ദ്രാദവതാരിണീ നിജജലേ മജ്ജദ്ജനോത്താരിണീ
പാരാവാരവിഹാരിണീ ഭവഭയശ്രേണീ സമുത്സാരിണീ .
ശേഷാഹേരനുകാരിണീ ഹരശിരോവല്ലീദലാകാരിണീ
കാശീപ്രാന്തവിഹാരിണീ വിജയതേ ഗംഗാ മനോഹാരിണീ ..
ഓം നമോ ഗംഗാദേവ്യൈ ..
ഓങ്കാരരൂപിണ്യജരാഽതുലാഽനന്താഽമൃതസ്രവാ .
അത്യുദാരാഽഭയാഽശോകാഽലകനന്ദാഽമൃതാഽമലാ .. 17..
അനാഥവത്സലാഽമോഘാഽപാംയോനിരമൃതപ്രദാ .
അവ്യക്തലക്ഷണാഽക്ഷോഭ്യാഽനവച്ഛിന്നാഽപരാഽജിതാ .. 18..
അനാഥനാഥാഽഭീഷ്ടാർഥസിദ്ധിദാഽനംഗവർധിനീ .
അണിമാദിഗുണാഽധാരാഽഗ്രഗണ്യാഽലീകഹാരിണീ .. 19..
അചിന്ത്യശക്തിരനഘാഽദ്ഭുതരൂപാഽഘഹാരിണീ .
അദ്രിരാജസുതാഽഷ്ടാംഗയോഗസിദ്ധിപ്രദാഽച്യുതാ .. 20..
അക്ഷുണ്ണശക്തിരസുദാഽനന്തതീർഥാഽമൃതോദകാ .
അനന്തമഹിമാഽപാരാഽനന്തസൗഖ്യപ്രദാഽന്നദാ .. 21..
അശേഷദേവതാമൂർതിരഘോരാഽമൃതരൂപിണീ .
അവിദ്യാജാലശമനീ ഹ്യപ്രതർക്യഗതിപ്രദാ .. 22..
അശേഷവിഘ്നസംഹർത്രീ ത്വശേഷഗുണഗുംഫിതാ .
അജ്ഞാനതിമിരജ്യോതിരനുഗ്രഹപരായണാ .. 23..
അഭിരാമാഽനവദ്യാംഗ്യനന്തസാരാഽകലങ്കിനീ .
ആരോഗ്യദാഽഽനന്ദവല്ലീ ത്വാപന്നാർതിവിനാശിനീ .. 24..
ആശ്ചര്യമൂർതിരായുഷ്യാ ഹ്യാഢ്യാഽഽദ്യാഽഽപ്രാഽഽര്യസേവിതാ .
ആപ്യായിന്യാപ്തവിദ്യാഖ്യാ ത്വാനന്ദാഽഽശ്വാസദായിനീ .. 25..
ആലസ്യഘ്ന്യാപദാം ഹന്ത്രീ ഹ്യാനന്ദാമൃതവർഷിണീ .
ഇരാവതീഷ്ടദാത്രീഷ്ടാ ത്വിഷ്ടാപൂർതഫലപ്രദാ .. 26..
ഇതിഹാസശ്രുതീഡ്യാർഥാ ത്വിഹാമുത്രശുഭപ്രദാ .
ഇജ്യാശീലസമിജ്യേഷ്ഠാ ത്വിന്ദ്രാദിപരിവന്ദിതാ .. 27..
ഇലാലങ്കാരമാലേദ്ധാ ത്വിന്ദിരാരമ്യമന്ദിരാ .
ഇദിന്ദിരാദിസംസേവ്യാ ത്വീശ്വരീശ്വരവല്ലഭാ .. 28..
ഈതിഭീതിഹരേഡ്യാ ച ത്വീഡനീയചരിത്രഭൃത് .
ഉത്കൃഷ്ടശക്തിരുത്കൃഷ്ടോഡുപമണ്ഡലചാരിണീ .. 29..
ഉദിതാംബരമാർഗോസ്രോരഗലോകവിഹാരിണീ .
ഉക്ഷോർവരോത്പലോത്കുംഭാ ഉപേന്ദ്രചരണദ്രവാ .. 30..
ഉദന്വത്പൂർതിഹേതുശ്ചോദാരോത്സാഹപ്രവർധിനീ .
ഉദ്വേഗഘ്ന്യുഷ്ണശമനീ ഹ്യുഷ്ണരശ്മിസുതാപ്രിയാ .. 31..
ഉത്പത്തിസ്ഥിതിസംഹാരകാരിണ്യുപരിചാരിണീ .
ഊർജം വഹന്ത്യൂർജധരോർജാവതീ ചോർമിമാലിനീ .. 32..
ഊർധ്വരേതഃപ്രിയോർധ്വാധ്വാ ഹ്യൂർമിലോർധ്വഗതിപ്രദാ .
ഋഷിവൃന്ദസ്തുതർദ്ധിശ്ച ഋണത്രയവിനാശിനീ .. 33..
ഋതംഭരർദ്ധിദാത്രീ ച ഋക്സ്വരൂപാ ഋജുപ്രിയാ .
ഋക്ഷമാർഗവഹർക്ഷാർചിരൃജുമാർഗപ്രദർശിനീ .. 34..
ഏധിതാഖിലധർമാർഥാ ത്വേകൈകാമൃതദായിനീ .
ഏധനീയസ്വഭാവൈജ്യാ ത്വേജിതാശേഷപാതകാ .. 35..
ഐശ്വര്യദൈശ്വര്യരൂപാ ഹ്യൈതിഹ്യം ഹ്യൈന്ദവീദ്യുതിഃ .
ഓജസ്വിന്യോഷധീക്ഷേത്രമോജോദൗദനദായിനീ .. 36..
ഓഷ്ഠാമൃതൗന്നത്യദാത്രീ ത്വൗഷധം ഭവരോഗിണാം .
ഔദാര്യചഞ്ചുരൗപേന്ദ്രീ ത്വൗഗ്രീ ഹ്യൗമേയരൂപിണീ .. 37..
അംബരാധ്വവഹാംബഷ്ഠാംബരമാലാംബുജേക്ഷണാ .
അംബികാംബുമഹായോനിരന്ധോദാന്ധകഹാരിണീ .. 38..
അംശുമാലാ ഹ്യംശുമതീ ത്വംഗീകൃതഷഡാനനാ .
അന്ധതാമിസ്രഹന്ത്ര്യന്ധുരഞ്ജനാ ഹ്യഞ്ജനാവതീ .. 39..
കല്യാണകാരിണീ കാമ്യാ കമലോത്പലഗന്ധിനീ .
കുമുദ്വതീ കമലിനീ കാന്തിഃ കല്പിതദായിനീ .. 40..
കാഞ്ചനാക്ഷീ കാമധേനുഃ കീർതികൃത് ക്ലേശനാശിനീ .
ക്രതുശ്രേഷ്ഠാ ക്രതുഫലാ കർമബന്ധവിഭേദിനീ .. 41..
കമലാക്ഷീ ക്ലമഹരാ കൃശാനുതപനദ്യുതിഃ .
കരുണാർദ്രാ ച കല്യാണീ കലികല്മഷനാശിനീ .. 42..
കാമരൂപാ ക്രിയാശക്തിഃ കമലോത്പലമാലിനീ .
കൂടസ്ഥാ കരുണാ കാന്താ കൂർമയാനാ കലാവതീ .. 43..
കമലാ കല്പലതികാ കാലീ കലുഷവൈരിണീ .
കമനീയജലാ കമ്രാ കപർദിസുകപർദഗാ .. 44..
കാലകൂടപ്രശമനീ കദംബകുസുമപ്രിയാ .
കാലിന്ദീ കേലിലലിതാ കലകല്ലോലമാലികാ .. 45..
ക്രാന്തലോകത്രയാ കണ്ഡൂഃ കണ്ഡൂതനയവത്സലാ .
ഖഡ്ഗിനീ ഖഡ്ഗധാരാഭാ ഖഗാ ഖണ്ഡേന്ദുധാരിണീ .. 46..
ഖേഖേലഗാമിനീ ഖസ്ഥാ ഖണ്ഡേന്ദുതിലകപ്രിയാ .
ഖേചരീ ഖേചരീവന്ദ്യാ ഖ്യാതിഃ ഖ്യാതിപ്രദായിനീ .. 47..
ഖണ്ഡിതപ്രണതാഘൗഘാ ഖലബുദ്ധിവിനാശിനീ .
ഖാതൈനഃ കന്ദസന്ദോഹാ ഖഡ്ഗഖട്വാംഗ ഖേടിനീ .. 48..
ഖരസന്താപശമനീ ഖനിഃ പീയൂഷപാഥസാം .
ഗംഗാ ഗന്ധവതീ ഗൗരീ ഗന്ധർവനഗരപ്രിയാ .. 49..
ഗംഭീരാംഗീ ഗുണമയീ ഗതാതങ്കാ ഗതിപ്രിയാ .
ഗണനാഥാംബികാ ഗീതാ ഗദ്യപദ്യപരിഷ്ടുതാ .. 50..
ഗാന്ധാരീ ഗർഭശമനീ ഗതിഭ്രഷ്ടഗതിപ്രദാ .
ഗോമതീ ഗുഹ്യവിദ്യാ ഗൗർഗോപ്ത്രീ ഗഗനഗാമിനീ .. 51..
ഗോത്രപ്രവർധിനീ ഗുണ്യാ ഗുണാതീതാ ഗുണാഗ്രണീഃ .
ഗുഹാംബികാ ഗിരിസുതാ ഗോവിന്ദാംഘ്രിസമുദ്ഭവാ .. 52..
ഗുണനീയചരിത്രാ ച ഗായത്രീ ഗിരിശപ്രിയാ .
ഗൂഢരൂപാ ഗുണവതീ ഗുർവീ ഗൗരവവർധിനീ .. 53..
ഗ്രഹപീഡാഹരാ ഗുന്ദ്രാ ഗരഘ്നീ ഗാനവത്സലാ .
ഘർമഹന്ത്രീ ഘൃതവതീ ഘൃതതുഷ്ടിപ്രദായിനീ .. 54..
ഘണ്ടാരവപ്രിയാ ഘോരാഘൗഘവിധ്വംസകാരിണീ .
ഘ്രാണതുഷ്ടികരീ ഘോഷാ ഘനാനന്ദാ ഘനപ്രിയാ .. 55..
ഘാതുകാ ഘൂർണിതജലാ ഘൃഷ്ടപാതകസന്തതിഃ .
ഘടകോടിപ്രപീതാപാ ഘടിതാശേഷമംഗലാ .. 56..
ഘൃണാവതീ ഘൃണിനിധിർഘസ്മരാ ഘൂകനാദിനീ .
ഘുസൃണാപിഞ്ജരതനുർഘർഘരാ ഘർഘരസ്വനാ .. 57..
ചന്ദ്രികാ ചന്ദ്രകാന്താംബുശ്ചഞ്ചദാപാ ചലദ്യുതിഃ .
ചിന്മയീ ചിതിരൂപാ ച ചന്ദ്രായുതശതാനനാ .. 58..
ചാമ്പേയലോചനാ ചാരുശ്ചാർവംഗീ ചാരുഗാമിനീ .
ചാര്യാ ചാരിത്രനിലയാ ചിത്രകൃച്ചിത്രരൂപിണീ .. 59..
ചമ്പൂശ്ചന്ദനശുച്യംബുശ്ചർചനീയാ ചിരസ്ഥിരാ .
ചാരുചമ്പകമാലാഢ്യാ ചമിതാശേഷദുഷ്കൃതാ .. 60..
ചിദാകാശവഹാ ചിന്ത്യാ ചഞ്ചച്ചാമരവീജിതാ .
ചോരിതാശേഷവൃജിനാ ചരിതാശേഷമണ്ഡലാ .. 61..
ഛേദിതാഖിലപാപൗഘാ ഛദ്മഘ്നീ ഛലഹാരിണീ .
ഛന്നത്രിവിഷ്ടപതലാ ഛോടിതാശേഷബന്ധനാ .. 62..
ഛുരിതാമൃതധാരൗഘാ ഛിന്നൈനാശ്ഛന്ദഗാമിനീ .
ഛത്രീകൃതമരാലൗഘാ ഛടീകൃതനിജാമൃതാ .. 63..
ജാഹ്നവീ ജ്യാ ജഗന്മാതാ ജപ്യാ ജംഘാലവീചികാ .
ജയാ ജനാർദനപ്രീതാ ജുഷണീയാ ജഗദ്ധിതാ .. 64..
ജീവനം ജീവനപ്രാണാ ജഗജ്ജ്യേഷ്ഠാ ജഗന്മയീ .
ജീവജീവാതുലതികാ ജന്മിജന്മനിബർഹിണീ .. 65..
ജാഡ്യവിധ്വംസനകരീ ജഗദ്യോനിർജലാവിലാ .
ജഗദാനന്ദജനനീ ജലജാ ജലജേക്ഷണാ .. 66..
ജനലോചനപീയൂഷാ ജടാതടവിഹാരിണീ .
ജയന്തീ ജഞ്ജപൂകഘ്നീ ജനിതജ്ഞാനവിഗ്രഹാ .. 67..
ഝല്ലരീവാദ്യകുശലാ ഝലജ്ഝാലജലാവൃതാ .
ഝിണ്ടീശവന്ദ്യാ ഝങ്കാരകാരിണീ ഝർഝരാവതീ .. 68..
ടീകിതാശേഷപാതാലാ ടങ്കികൈനോഽദ്രിപാടനേ .
ടങ്കാരനൃത്യത്കല്ലോലാ ടീകനീയമഹാതടാ .. 69..
ഡംബരപ്രവഹാ ഡീനരാജഹംസകുലാകുലാ .
ഡമഡ്ഡമരുഹസ്താ ച ഡാമരോക്തമഹാണ്ഡകാ .. 70..
ഢൗകിതാശേഷനിർവാണാ ഢക്കാനാദചലജ്ജലാ .
ഢുണ്ഢിവിഘ്നേശജനനീ ഢണഡ്ഢുണിതപാതകാ .. 71..
തർപണീ തീർഥതീർഥാ ച ത്രിപഥാ ത്രിദശേശ്വരീ .
ത്രിലോകഗോപ്ത്രീ തോയേശീ ത്രൈലോക്യപരിവന്ദിതാ .. 72..
താപത്രിതയസംഹർത്രീ തേജോബലവിവർധിനീ .
ത്രിലക്ഷ്യാ താരണീ താരാ താരാപതികരാർചിതാ .. 73..
ത്രൈലോക്യപാവനീ പുണ്യാ തുഷ്ടിദാ തുഷ്ടിരൂപിണീ .
തൃഷ്ണാച്ഛേത്രീ തീർഥമാതാ ത്രിവിക്രമപദോദ്ഭവാ .. 74..
തപോമയീ തപോരൂപാ തപഃസ്തോമഫലപ്രദാ . var പദപ്രദാ
ത്രൈലോക്യവ്യാപിനീ തൃപ്തിസ്തൃപ്തികൃത്തത്ത്വരൂപിണീ .. 75..
ത്രൈലോക്യസുന്ദരീ തുര്യാ തുര്യാതീതഫലപ്രദാ .
ത്രൈലോക്യലക്ഷ്മീസ്ത്രിപദീ തഥ്യാ തിമിരചന്ദ്രികാ .. 76..
തേജോഗർഭാ തപസ്സാരാ ത്രിപുരാരിശിരോഗൃഹാ .
ത്രയീസ്വരൂപിണീ തന്വീ തപനാംഗജഭീതിനുത് .. 77..
തരിസ്തരണിജാമിത്രം തർപിതാശേഷപൂർവജാ .
തുലാവിരഹിതാ തീവ്രപാപതൂലതനൂനപാത് .. 78..
ദാരിദ്ര്യദമനീ ദക്ഷാ ദുഷ്പ്രേക്ഷാ ദിവ്യമണ്ഡനാ .
ദീക്ഷാവതീ ദുരാവാപ്യാ ദ്രാക്ഷാമധുരവാരിഭൃത് .. 79..
ദർശിതാനേകകുതുകാ ദുഷ്ടദുർജയദുഃഖഹൃത് .
ദൈന്യഹൃദ്ദുരിതഘ്നീ ച ദാനവാരിപദാബ്ജജാ .. 80..
ദന്ദശൂകവിഷഘ്നീ ച ദാരിതാഘൗഘസന്തതിഃ .
ദ്രുതാ ദേവദ്രുമച്ഛന്നാ ദുർവാരാഘവിഘാതിനീ .. 81..
ദമഗ്രാഹ്യാ ദേവമാതാ ദേവലോകപ്രദർശിനീ .
ദേവദേവപ്രിയാ ദേവീ ദിക്പാലപദദായിനീ .. 82..
ദീർഘായുഃ കാരിണീ ദീർഘാ ദോഗ്ധ്രീ ദൂഷണവർജിതാ .
ദുഗ്ധാംബുവാഹിനീ ദോഹ്യാ ദിവ്യാ ദിവ്യഗതിപ്രദാ .. 83..
ദ്യുനദീ ദീനശരണം ദേഹിദേഹനിവാരിണീ .
ദ്രാഘീയസീ ദാഘഹന്ത്രീ ദിതപാതകസന്തതിഃ .. 84..
ദൂരദേശാന്തരചരീ ദുർഗമാ ദേവവല്ലഭാ .
ദുർവൃത്തഘ്നീ ദുർവിഗാഹ്യാ ദയാധാരാ ദയാവതീ .. 85..
ദുരാസദാ ദാനശീലാ ദ്രാവിണീ ദ്രുഹിണസ്തുതാ .
ദൈത്യദാനവസംശുദ്ധികർത്രീ ദുർബുദ്ധിഹാരിണീ .. 86..
ദാനസാരാ ദയാസാരാ ദ്യാവാഭൂമിവിഗാഹിനീ .
ദൃഷ്ടാദൃഷ്ടഫലപ്രാപ്തിർദേവതാവൃന്ദവന്ദിതാ .. 87..
ദീർഘവ്രതാ ദീർഘദൃഷ്ടിർദീപ്തതോയാ ദുരാലഭാ .
ദണ്ഡയിത്രീ ദണ്ഡനീതിർദുഷ്ടദണ്ഡധരാർചിതാ .. 88..
ദുരോദരഘ്നീ ദാവാർചിർദ്രവദ്ദ്രവ്യൈകശേവധിഃ .
ദീനസന്താപശമനീ ദാത്രീ ദവഥുവൈരിണീ .. 89..
ദരീവിദാരണപരാ ദാന്താ ദാന്തജനപ്രിയാ .
ദാരിതാദ്രിതടാ ദുർഗാ ദുർഗാരണ്യപ്രചാരിണീ .. 90..
ധർമദ്രവാ ധർമധുരാ ധേനുർധീരാ ധൃതിർധ്രുവാ .
ധേനുദാനഫലസ്പർശാ ധർമകാമാർഥമോക്ഷദാ .. 91..
ധർമോർമിവാഹിനീ ധുര്യാ ധാത്രീ ധാത്രീവിഭൂഷണം .
ധർമിണീ ധർമശീലാ ച ധന്വികോടികൃതാവനാ .. 92..
ധ്യാതൃപാപഹരാ ധ്യേയാ ധാവനീ ധൂതകല്മഷാ .
ധർമധാരാ ധർമസാരാ ധനദാ ധനവർധിനീ .. 93..
ധർമാധർമഗുണച്ഛേത്രീ ധത്തൂരകുസുമപ്രിയാ .
ധർമേശീ ധർമശാസ്ത്രജ്ഞാ ധനധാന്യസമൃദ്ധികൃത് .. 94..
ധർമലഭ്യാ ധർമജലാ ധർമപ്രസവധർമിണീ .
ധ്യാനഗമ്യസ്വരൂപാ ച ധരണീ ധാതൃപൂജിതാ .. 95..
ധൂർധൂർജടിജടാസംസ്ഥാ ധന്യാ ധീർധാരണാവതീ .
നന്ദാ നിർവാണജനനീ നന്ദിനീ നുന്നപാതകാ .. 96..
നിഷിദ്ധവിഘ്നനിചയാ നിജാനന്ദപ്രകാശിനീ .
നഭോഽംഗണചരീ നൂതിർനമ്യാ നാരായണീ നുതാ .. 97..
നിർമലാ നിർമലാഖ്യാനാ നാശിനീ താപസമ്പദാം .
നിയതാ നിത്യസുഖദാ നാനാശ്ചര്യമഹാനിധിഃ .. 98..
നദീ നദസരോമാതാ നായികാ നാകദീർഘികാ .
നഷ്ടോദ്ധരണധീരാ ച നന്ദനാ നന്ദദായിനീ .. 99..
നിർണിക്താശേഷഭുവനാ നിഃസംഗാ നിരുപദ്രവാ .
നിരാലംബാ നിഷ്പ്രപഞ്ചാ നിർണാശിതമഹാമലാ .. 100..
നിർമലജ്ഞാനജനനീ നിഃശേഷപ്രാണിതാപഹൃത് .
നിത്യോത്സവാ നിത്യതൃപ്താ നമസ്കാര്യാ നിരഞ്ജനാ .. 101..
നിഷ്ഠാവതീ നിരാതങ്കാ നിർലേപാ നിശ്ചലാത്മികാ .
നിരവദ്യാ നിരീഹാ ച നീലലോഹിതമൂർധഗാ .. 102..
നന്ദിഭൃംഗിഗണസ്തുത്യാ നാഗാ നന്ദാ നഗാത്മജാ .
നിഷ്പ്രത്യൂഹാ നാകനദീ നിരയാർണവദീർഘനൗഃ .. 103..
പുണ്യപ്രദാ പുണ്യഗർഭാ പുണ്യാ പുണ്യതരംഗിണീ .
പൃഥുഃ പൃഥുഫലാ പൂർണാ പ്രണതാർതിപ്രഭഞ്ജനീ .. 104..
പ്രാണദാ പ്രാണിജനനീ പ്രാണേശീ പ്രാണരൂപിണീ .
പദ്മാലയാ പരാശക്തിഃ പുരജിത്പരമപ്രിയാ .. 105..
പരാ പരഫലപ്രാപ്തിഃ പാവനീ ച പയസ്വിനീ .
പരാനന്ദാ പ്രകൃഷ്ടാർഥാ പ്രതിഷ്ഠാ പാലിനീ പരാ .. 106.. var പാലനീ
പുരാണപഠിതാ പ്രീതാ പ്രണവാക്ഷരരൂപിണീ .
പാർവതീ പ്രേമസമ്പന്നാ പശുപാശവിമോചനീ .. 107..
പരമാത്മസ്വരൂപാ ച പരബ്രഹ്മപ്രകാശിനീ .
പരമാനന്ദനിഷ്യന്ദാ പ്രായശ്ചിത്തസ്വരൂപിണീ .. 108.. var നിഷ്പന്ദാ
പാനീയരൂപനിർവാണാ പരിത്രാണപരായണാ .
പാപേന്ധനദവജ്വാലാ പാപാരിഃ പാപനാമനുത് .. 109..
പരമൈശ്വര്യജനനീ പ്രജ്ഞാ പ്രാജ്ഞാ പരാപരാ .
പ്രത്യക്ഷലക്ഷ്മീഃ പദ്മാക്ഷീ പരവ്യോമാമൃതസ്രവാ .. 110..
പ്രസന്നരൂപാ പ്രണിധിഃ പൂതാ പ്രത്യക്ഷദേവതാ .
പിനാകിപരമപ്രീതാ പരമേഷ്ഠികമണ്ഡലുഃ .. 111..
പദ്മനാഭപദാർഘ്യേണ പ്രസൂതാ പദ്മമാലിനീ .
പരർദ്ധിദാ പുഷ്ടികരീ പഥ്യാ പൂർതിഃ പ്രഭാവതീ .. 112..
പുനാനാ പീതഗർഭഘ്നീ പാപപർവതനാശിനീ .
ഫലിനീ ഫലഹസ്താ ച ഫുല്ലാംബുജവിലോചനാ .. 113..
ഫാലിതൈനോമഹാക്ഷേത്രാ ഫണിലോകവിഭൂഷണം .
ഫേനച്ഛലപ്രണുന്നൈനാഃ ഫുല്ലകൈരവഗന്ധിനീ .. 114..
ഫേനിലാച്ഛാംബുധാരാഭാ ഫഡുച്ചാടിതപാതകാ .
ഫാണിതസ്വാദുസലിലാ ഫാണ്ടപഥ്യജലാവിലാ .. 115..
വിശ്വമാതാ ച വിശ്വേശീ വിശ്വാ വിശ്വേശ്വരപ്രിയാ .
ബ്രഹ്മണ്യാ ബ്രഹ്മകൃദ് ബ്രാഹ്മീ ബ്രഹ്മിഷ്ഠാ വിമലോദകാ .. 116..
വിഭാവരീ ച വിരജാ വിക്രാന്താനേകവിഷ്ടപാ .
വിശ്വമിത്രം വിഷ്ണുപദീ വൈഷ്ണവീ വൈഷ്ണവപ്രിയാ .. 117..
വിരൂപാക്ഷപ്രിയകരീ വിഭൂതിർവിശ്വതോമുഖീ .
വിപാശാ വൈബുധീ വേദ്യാ വേദാക്ഷരരസസ്രവാ .. 118..
വിദ്യാ വേഗവതീ വന്ദ്യാ ബൃംഹണീ ബ്രഹ്മവാദിനീ .
വരദാ വിപ്രകൃഷ്ടാ ച വരിഷ്ഠാ ച വിശോധനീ .. 119..
വിദ്യാധരീ വിശോകാ ച വയോവൃന്ദനിഷേവിതാ .
ബഹൂദകാ ബലവതീ വ്യോമസ്ഥാ വിബുധപ്രിയാ .. 120..
വാണീ വേദവതീ വിത്താ ബ്രഹ്മവിദ്യാതരംഗിണീ .
ബ്രഹ്മാണ്ഡകോടിവ്യാപ്താംബുർബ്രഹ്മഹത്യാപഹാരിണീ .. 121..
ബ്രഹ്മേശവിഷ്ണുരൂപാ ച ബുദ്ധിർവിഭവവർധിനീ .
വിലാസിസുഖദാ വശ്യാ വ്യാപിനീ ച വൃഷാരണിഃ .. 122..
വൃഷാങ്കമൗലിനിലയാ വിപന്നാർതിപ്രഭഞ്ജനീ .
വിനീതാ വിനതാ ബ്രധ്നതനയാ വിനയാന്വിതാ .. 123..
വിപഞ്ചീ വാദ്യകുശലാ വേണുശ്രുതിവിചക്ഷണാ .
വർചസ്കരീ ബലകരീ ബലോന്മൂലിതകല്മഷാ .. 124..
വിപാപ്മാ വിഗതാതങ്കാ വികല്പപരിവർജിതാ .
വൃഷ്ടികർത്രീ വൃഷ്ടിജലാ വിധിർവിച്ഛിന്നബന്ധനാ .. 125..
വ്രതരൂപാ വിത്തരൂപാ ബഹുവിഘ്നവിനാശകൃത് .
വസുധാരാ വസുമതീ വിചിത്രാംഗീ വിഭാവസുഃ .. 126..
വിജയാ വിശ്വബീജം ച വാമദേവീ വരപ്രദാ .
വൃഷാശ്രിതാ വിഷഘ്നീ ച വിജ്ഞാനോർമ്യംശുമാലിനീ .. 127..
ഭവ്യാ ഭോഗവതീ ഭദ്രാ ഭവാനീ ഭൂതഭാവിനീ .
ഭൂതധാത്രീ ഭയഹരാ ഭക്തദാരിദ്ര്യഘാതിനീ .. 128..
ഭുക്തിമുക്തിപ്രദാ ഭേശീ ഭക്തസ്വർഗാപവർഗദാ .
ഭാഗീരഥീ ഭാനുമതീ ഭാഗ്യം ഭോഗവതീ ഭൃതിഃ .. 129..
ഭവപ്രിയാ ഭവദ്വേഷ്ട്രീ ഭൂതിദാ ഭൂതിഭൂഷണാ .
ഭാലലോചനഭാവജ്ഞാ ഭൂതഭവ്യഭവത്പ്രഭുഃ .. 130..
ഭ്രാന്തിജ്ഞാനപ്രശമനീ ഭിന്നബ്രഹ്മാണ്ഡമണ്ഡപാ .
ഭൂരിദാ ഭക്തസുലഭാ ഭാഗ്യവദ്ദൃഷ്ടിഗോചരീ .. 131..
ഭഞ്ജിതോപപ്ലവകുലാ ഭക്ഷ്യഭോജ്യസുഖപ്രദാ .
ഭിക്ഷണീയാ ഭിക്ഷുമാതാ ഭാവാ ഭാവസ്വരൂപിണീ .. 132..
മന്ദാകിനീ മഹാനന്ദാ മാതാ മുക്തിതരംഗിണീ .
മഹോദയാ മധുമതീ മഹാപുണ്യാ മുദാകരീ .. 133..
മുനിസ്തുതാ മോഹഹന്ത്രീ മഹാതീർഥാ മധുസ്രവാ .
മാധവീ മാനിനീ മാന്യാ മനോരഥപഥാതിഗാ .. 134..
മോക്ഷദാ മതിദാ മുഖ്യാ മഹാഭാഗ്യജനാശ്രിതാ .
മഹാവേഗവതീ മേധ്യാ മഹാ മഹിമഭൂഷണാ .. 135..
മഹാപ്രഭാവാ മഹതീ മീനചഞ്ചലലോചനാ .
മഹാകാരുണ്യസമ്പൂർണാ മഹർദ്ധിശ്ച മഹോത്പലാ .. 136..
മൂർതിമന്മുക്തിരമണീ മണിമാണിക്യഭൂഷണാ .
മുക്താകലാപനേപഥ്യാ മനോനയനനന്ദിനീ .. 137..
മഹാപാതകരാശിഘ്നീ മഹാദേവാർധഹാരിണീ .
മഹോർമിമാലിനീ മുക്താ മഹാദേവീ മനോന്മനീ .. 138..
മഹാപുണ്യോദയപ്രാപ്യാ മായാതിമിരചന്ദ്രികാ .
മഹാവിദ്യാ മഹാമായാ മഹാമേധാ മഹൗഷധം .. 139..
മാലാധരീ മഹോപായാ മഹോരഗവിഭൂഷണാ .
മഹാമോഹപ്രശമനീ മഹാമംഗലമംഗലം .. 140..
മാർതണ്ഡമണ്ഡലചരീ മഹാലക്ഷ്മീർമദോജ്ഝിതാ .
യശസ്വിനീ യശോദാ ച യോഗ്യാ യുക്താത്മസേവിതാ .. 141..
യോഗസിദ്ധിപ്രദാ യാജ്യാ യജ്ഞേശപരിപൂരിതാ .
യജ്ഞേശീ യജ്ഞഫലദാ യജനീയാ യശസ്കരീ .. 142..
യമിസേവ്യാ യോഗയോനിര്യോഗിനീ യുക്തബുദ്ധിദാ .
യോഗജ്ഞാനപ്രദാ യുക്താ യമാദ്യഷ്ടാംഗയോഗയുക് .. 143..
യന്ത്രിതാഘൗഘസഞ്ചാരാ യമലോകനിവാരിണീ .
യാതായാതപ്രശമനീ യാതനാനാമകൃന്തനീ .. 144..
യാമിനീശഹിമാച്ഛോദാ യുഗധർമവിവർജിതാ .
രേവതീ രതികൃദ് രമ്യാ രത്നഗർഭാ രമാ രതിഃ .. 145..
രത്നാകരപ്രേമപാത്രം രസജ്ഞാ രസരൂപിണീ .
രത്നപ്രാസാദഗർഭാ ച രമണീയതരംഗിണീ .. 146..
രത്നാർചീ രുദ്രരമണീ രാഗദ്വേഷവിനാശിനീ .
രമാ രാമാ രമ്യരൂപാ രോഗിജീവാനുരൂപിണീ .. 147..
രുചികൃദ് രോചനീ രമ്യാ രുചിരാ രോഗഹാരിണീ .
രാജഹംസാ രത്നവതീ രാജത്കല്ലോലരാജികാ .. 148..
രാമണീയകരേഖാ ച രുജാരീ രോഗരോഷിണീ . var രോഗശോഷിണീ
രാകാ രങ്കാർതിശമനീ രമ്യാ രോലംബരാവിണീ .. 149..
രാഗിണീ രഞ്ജിതശിവാ രൂപലാവണ്യശേവധിഃ .
ലോകപ്രസൂർലോകവന്ദ്യാ ലോലത്കല്ലോലമാലിനീ .. 150..
ലീലാവതീ ലോകഭൂമിർലോകലോചനചന്ദ്രികാ .
ലേഖസ്രവന്തീ ലടഭാ ലഘുവേഗാ ലഘുത്വഹൃത് .. 151..
ലാസ്യത്തരംഗഹസ്താ ച ലലിതാ ലയഭംഗിഗാ .
ലോകബന്ധുർലോകധാത്രീ ലോകോത്തരഗുണോർജിതാ .. 152..
ലോകത്രയഹിതാ ലോകാ ലക്ഷ്മീർലക്ഷണലക്ഷിതാ .
ലീലാ ലക്ഷിതനിർവാണാ ലാവണ്യാമൃതവർഷിണീ .. 153..
വൈശ്വാനരീ വാസവേഡ്യാ വന്ധ്യത്വപരിഹാരിണീ .
വാസുദേവാംഘ്രിരേണുഘ്നീ വജ്രിവജ്രനിവാരിണീ .. 154..
ശുഭാവതീ ശുഭഫലാ ശാന്തിഃ ശന്തനുവല്ലഭാ . var ശാന്തനു
ശൂലിനീ ശൈശവവയാഃ ശീതലാമൃതവാഹിനീ .. 155..
ശോഭാവതീ ശീലവതീ ശോഷിതാശേഷകിൽബിഷാ .
ശരണ്യാ ശിവദാ ശിഷ്ടാ ശരജന്മപ്രസൂഃശിവാ .. 156..
ശക്തിഃ ശശാങ്കവിമലാ ശമനസ്വസൃസമ്മതാ .
ശമാ ശമനമാർഗഘ്നീ ശിതികണ്ഠമഹാപ്രിയാ .. 157..
ശുചിഃ ശുചികരീ ശേഷാ ശേഷശായിപദോദ്ഭവാ .
ശ്രീനിവാസശ്രുതിഃ ശ്രദ്ധാ ശ്രീമതീ ശ്രീഃ ശുഭവ്രതാ .. 158..
ശുദ്ധവിദ്യാ ശുഭാവർതാ ശ്രുതാനന്ദാ ശ്രുതിസ്തുതിഃ .
ശിവേതരഘ്നീ ശബരീ ശാംബരീരൂപധാരിണീ .. 159..
ശ്മശാനശോധനീ ശാന്താ ശശ്വച്ഛതധൃതിസ്തുതാ .
ശാലിനീ ശാലിശോഭാഢ്യാ ശിഖിവാഹനഗർഭഭൃത് .. 160..
ശംസനീയചരിത്രാ ച ശാതിതാശേഷപാതകാ .
ഷഡ്ഗുണൈശ്വര്യസമ്പന്നാ ഷഡംഗശ്രുതിരൂപിണീ .. 161..
ഷണ്ഢതാഹാരിസലിലാ സ്ത്യായന്നദനദീശതാ .
സരിദ്വാരാ ച സുരസാ സുപ്രഭാ സുരദീർഘികാ .. 162..
സ്വഃ സിന്ധുഃ സർവദുഃഖഘ്നീ സർവവ്യാധിമഹൗഷധം .
സേവ്യാ സിദ്ധിഃ സതീ സൂക്തിഃ സ്കന്ദസൂശ്ച സരസ്വതീ .. 163..
സമ്പത്തരംഗിണീ സ്തുത്യാ സ്ഥാണുമൗലികൃതാലയാ .
സ്ഥൈര്യദാ സുഭഗാ സൗഖ്യാ സ്ത്രീഷു സൗഭാഗ്യദായിനീ .. 164..
സ്വർഗനിഃശ്രേണികാ സൂമാ സ്വധാ സ്വാഹാ സുധാജലാ . var സൂക്ഷ്മാ
സമുദ്രരൂപിണീ സ്വർഗ്യാ സർവപാതകവൈരിണീ .. 165..
സ്മൃതാഘഹാരിണീ സീതാ സംസാരാബ്ധിതരണ്ഡികാ .
സൗഭാഗ്യസുന്ദരീ സന്ധ്യാ സർവസാരസമന്വിതാ .. 166..
ഹരപ്രിയാ ഹൃഷീകേശീ ഹംസരൂപാ ഹിരണ്മയീ .
ഹൃതാഘസംഘാ ഹിതകൃദ്ധേലാ ഹേലാഘഗർവഹൃത് .. 167..
ക്ഷേമദാ ക്ഷാലിതാഘൗഘാ ക്ഷുദ്രവിദ്രാവിണീ ക്ഷമാ .
ഗംഗേതി നാമസാഹസ്രം ഗംഗായാഃ കലശോദ്ഭവ . var ഇതി നാമസഹസ്രം ഹി
കീർതയിത്വാ നരഃ സമ്യഗ്ഗംഗാസ്നാനഫലം ലഭേത് .. 168..
സർവപാപപ്രശമനം സർവവിഘ്നവിനാശനം .
സർവസ്തോത്രജപാച്ഛ്രേഷ്ഠം സർവപാവനപാവനം .. 169..
ശ്രദ്ധയാഭീഷ്ടഫലദം ചതുർവർഗസമൃദ്ധികൃത് .
സകൃജ്ജപാദവാപ്നോതി ഹ്യേകക്രതുഫലം മുനേ .. 170..
സർവതീർഥേഷു യഃ സ്നാതഃ സർവയജ്ഞേഷു ദീക്ഷിതഃ .
തസ്യ യത്ഫലമുദ്ദിഷ്ടം ത്രികാലപഠനാച്ച തത് .. 171..
സർവവ്രതേഷു യത്പുണ്യം സമ്യക്ചീർണേഷു വാഡവ .
തത്ഫലം സമവാപ്നോതി ത്രിസന്ധ്യം നിയതഃ പഠൻ .. 172..
സ്നാനകാലേ പഠേദ്യസ്തു യത്ര കുത്ര ജലാശയേ .
തത്ര സന്നിഹിതാ നൂനം ഗംഗാ ത്രിപഥഗാ മുനേ .. 173..
ശ്രേയോഽർഥീ ലഭതേ ശ്രേയോ ധനാർഥീ ലഭതേ ധനം .
കാമീ കാമാനവാപ്നോതി മോക്ഷാർഥീ മോക്ഷമാപ്നുയാത് .. 174..
വർഷം ത്രികാലപഠനാച്ഛ്രദ്ധയാ ശുചിമാനസഃ .
ഋതുകാലാഭിഗമനാദപുത്രഃ പുത്രവാൻ ഭവേത് .. 175..
നാകാലമരണം തസ്യ നാഗ്നിചോരാഹിസാധ്വസം .
നാമ്നാം സഹസ്രം ഗംഗായാ യോ ജപേച്ഛ്രദ്ധയാ മുനേ .. 176..
ഗംഗാനാമസഹസ്രം തു ജപ്ത്വാ ഗ്രാമാന്തരം വ്രജേത് .
കാര്യസിദ്ധിമവാപ്നോതി നിർവിഘ്നോ ഗേഹമാവിശേത് .. 177..
തിഥിവാരർക്ഷയോഗാനാം ന ദോഷഃ പ്രഭവേത്തദാ .
യദാ ജപ്ത്വാ വ്രജേദേതത് സ്തോത്രം ഗ്രാമാന്തരം നരഃ .. 178..
ആയുരാരോഗ്യജനനം സർവോപദ്രവനാശനം .
സർവസിദ്ധികരം പുംസാം ഗംഗാനാമസഹസ്രകം .. 179..
ജന്മാന്തരസഹസ്രേഷു യത്പാപം സമ്യഗർജിതം .
ഗംഗാനാമസഹസ്രസ്യ ജപനാത്തത്ക്ഷയം വ്രജേത് .. 180..
ബ്രഹ്മഘ്നോ മദ്യപഃ സ്വർണസ്തേയീ ച ഗുരുതല്പഗഃ .
തത്സംയോഗീ ഭ്രൂണഹന്താ മാതൃഹാ പിതൃഹാ മുനേ .. 181..
വിശ്വാസഘാതീ ഗരദഃ കൃതഘ്നോ മിത്രഘാതകഃ .
അഗ്നിദോ ഗോവധകരോ ഗുരുദ്രവ്യാപഹാരകഃ .. 182..
മഹാപാതകയുക്തോഽപി സംയുക്തോഽപ്യുപപാതകൈഃ .
മുച്യതേ ശ്രദ്ധയാ ജപ്ത്വാ ഗംഗാനാമസഹസ്രകം .. 183..
ആധിവ്യാധിപരിക്ഷിപ്തോ ഘോരതാപപരിപ്ലുതഃ .
മുച്യതേ സർവദുഃഖേഭ്യഃ സ്തവസ്യാസ്യാനുകീർതനാത് .. 184..
സംവത്സരേണ യുക്താത്മാ പഠൻ ഭക്തിപരായണഃ .
അഭീപ്സിതാം ലഭേത്സിദ്ധിം സർവൈഃ പാപൈഃ പ്രമുച്യതേ .. 185..
സംശയാവിഷ്ടചിത്തസ്യ ധർമവിദ്വേഷിണോഽപി ച .
ദാംഭികസ്യാപി ഹിംസ്രസ്യ ചേതോ ധർമപരം ഭവേത് .. 186..
വർണാശ്രമപഥീനസ്തു കാമക്രോധവിവർജിതഃ .
യത്ഫലം ലഭതേ ജ്ഞാനീ തദാപ്നോത്യസ്യ കീർതനാത് .. 187..
ഗായത്ര്യയുതജപ്യേന യത്ഫലം സമുപാർജിതം .
സകൃത്പഠനതഃ സമ്യക്തദശേഷമവാപ്നുയാത് .. 188..
ഗാം ദത്ത്വാ വേദവിദുഷേ യത്ഫലം ലഭതേ കൃതീ .
തത്പുണ്യം സമ്യഗാഖ്യാതം സ്തവരാജസകൃജ്ജപാത് .. 189..
ഗുരുശുശ്രൂഷണം കുർവൻ യാവജ്ജീവം നരോത്തമഃ .
യത്പുണ്യമർജയേത്തദ്ഭാഗ്വർഷം ത്രിഷവണം ജപൻ .. 190..
വേദപാരായണാത്പുണ്യം യദത്ര പരിപഠ്യതേ .
തത്ഷണ്മാസേന ലഭതേ ത്രിസന്ധ്യം പരികീർതനാത് .. 191..
ഗംഗായാഃ സ്തവരാജസ്യ പ്രത്യഹം പരിശീലനാത് .
ശിവഭക്തിമവാപ്നോതി വിഷ്ണുഭക്തോഽഥവാ ഭവേത് .. 192..
യഃ കീർതയേദനുദിനം ഗംഗാനാമസഹസ്രകം .
തത്സമീപേ സഹചരീ ഗംഗാദേവീ സദാ ഭവേത് .. 193..
സർവത്ര പൂജ്യോ ഭവതി സർവത്ര വിജയീ ഭവേത് .
സർവത്ര സുഖമാപ്നോതി ജാഹ്നവീസ്തോത്രപാഠതഃ .. 194..
സദാചാരീ സ വിജ്ഞേയഃ സ ശുചിസ്തു സദൈവ ഹി .
കൃതസർവസുരാർചഃ സ കീർതയേദ്യ ഇമാം സ്തുതിം .. 195..
തസ്മിംസ്തൃപ്തേ ഭവേത് തൃപ്താ ജാഹ്നവീ നാത്ര സംശയഃ .
തസ്മാത്സർവപ്രയത്നേന ഗംഗാഭക്തം സമർചയേത് .. 196..
സ്തവരാജമിമം ഗാംഗം ശൃണുയാദ്യശ്ച വൈ പഠേത് .
ശ്രാവയേദഥ തദ്ഭക്താൻ ദംഭലോഭവിവർജിതഃ .. 197..
മുച്യതേ ത്രിവിധൈഃ പാപൈർമനോവാക്കായസംഭവൈഃ .
ക്ഷണാന്നിഷ്പാപതാമേതി പിതൄണാം ച പ്രിയോ ഭവേത് .. 198..
സർവദേവപ്രിയശ്ചാപി സർവർഷിഗണസമ്മതഃ .
അന്തേ വിമാനമാരുഹ്യം ദിവ്യസ്ത്രീശതസംവൃതഃ .. 199..
ദിവ്യാഭരണസമ്പന്നോ ദിവ്യഭോഗസമന്വിതഃ .
നന്ദനാദിവനേ സ്വൈരം ദേവവത്സ പ്രമോദതേ .. 200..
ഭുജ്യമാനേഷു വിപ്രേഷു ശ്രാദ്ധകാലേ വിശേഷതഃ .
ജപന്നിദം മഹാസ്തോത്രം പിതൄണാം തൃപ്തികാരകം .. 201..
യാവന്തി തത്ര സിക്ഥാനി യാവന്തോഽംബുകണാഃ സ്ഥിതാഃ .
താവന്ത്യേവ ഹി വർഷാണി മോദന്തേ സ്വപിതാമഹാഃ .. 202..
യഥാ പ്രീണന്തി പിതരോ പ്രീണന്തി ഗംഗായാം പിണ്ഡദാനതഃ .
തഥൈവ തൃപ്നുയുഃ ശ്രാദ്ധേ സ്തവസ്യാസ്യാനുസംശ്രവാത് .. 203..
ഏതത്സ്തോത്രം ഗൃഹേ യസ്യ ലിഖിതം പരിപൂജ്യതേ .
തത്ര പാപഭയം നാസ്തി ശുചി തദ്ഭവനം സദാ .. 204..
അഗസ്തേ കിം ബഹൂക്തേന ശൃണു മേ നിശ്ചിതം വചഃ .
സംശയോ നാത്ര കർതവ്യഃ സന്ദേഗ്ധരി ഫലം നഹി .. 205..
യാവന്തി മർത്യേ സ്തോത്രാണി മന്ത്രജാലാന്യനേകശഃ .
താവന്തി സ്തവരാജസ്യ ഗാംഗേയസ്യ സമാനി ന .. 206..
യാവജ്ജന്മ ജപേദ്യസ്തു നാമ്നാമേതത്സഹസ്രകം .
സ കീകടേഷ്വപി മൃതോ ന പുനർഗർഭമാവിശേത് .. 207..
നിത്യം നിയമവാനേതദ്യോ ജപേത്സ്തോത്രമുത്തമം .
അന്യത്രാപി വിപന്നഃ സ ഗംഗാതീരേ മൃതോ ഭവേത് .. 208..
ഏതത്സ്തോത്രവരം രമ്യം പുരാ പ്രോക്തം പിനാകിനാ .
വിഷ്ണവേ നിജഭക്തായ മുക്തിബീജാക്ഷരാസ്പദം .. 209..
ഗംഗാസ്നാനപ്രതിനിധിഃ സ്തോത്രമേതന്മയേരിതം .
സിസ്നാസുർജാഹ്നവീം തസ്മാദേതത്സ്തോത്രം ജപേത്സുധീഃ .. 210..
.. ഇതി ശ്രീസ്കന്ദപുരാണേ ഏകാശീതിസാഹസ്ര്യാം
സംഹിതായാം ചതുർഥൈകാശീഖണ്ഡേപൂർവാർധേ
ഗംഗാസഹസ്രനാമകഥനം നാമൈകോനത്രിംശത്തമോഽധ്യായഃ ..
സിതമകരനിഷണ്ണാം ശുഭ്രവർണാം ത്രിനേത്രാം
കരധൃതകലശോദ്യത്സോപലാഭീത്യഭീഷ്ടാം .
വിധിഹരിരൂപാം സേന്ദുകോടീരജൂടാം
കലിതസിതദുകൂലാം ജാഹ്നവീ താം നമാമി ..
Encoded and proofread by DPD, Kirk Wortman