ଅକାରାଦିକ୍ଷକାରାନ୍ତ ନାମଘଟିତଂ ସ୍କନ୍ଦପୁରାଣାନ୍ତର୍ଗତଂ
ଅଗସ୍ତ୍ୟ ଉବାଚ
ବିନା ସ୍ନାନେନ ଗଙ୍ଗାୟାଂ ନୃଣାଂ ଜନ୍ମ ନିରର୍ଥକମ୍ ।
ଉପାୟାନ୍ତରମସ୍ତ୍ୟନ୍ୟଦ୍ ଯେନ ସ୍ନାନଫଲଂ ଲଭେତ୍ ॥ ୧॥
ଅଶକ୍ତାନାଂ ଚ ପଙ୍ଗୂନାମାଲସ୍ୟୋପହତାତ୍ମନାମ୍ ।
ଦୂରଦେଶାନ୍ତରସ୍ଥାନାଂ ଗଙ୍ଗାସ୍ନାନଂ କଥଂ ଭବେତ୍ ॥ ୨॥
ଦାନଂ ବାଥ ବ୍ରତଂ ବାଥ ମନ୍ତ୍ରଃ ସ୍ତୋତ୍ରଂ ଜପୋଽଥବା ।
ତୀର୍ଥାନ୍ତରାଭିଷେକୋ ବା ଦେବତୋପାସନଂ ତୁ ବା ॥ ୩॥
ଯଦ୍ୟସ୍ତି କିଞ୍ଚିତ୍ ଷଡ୍ୱକ୍ତ୍ର ଗଙ୍ଗାସ୍ନାନଫଲପ୍ରଦମ୍ ।
ବିଧାନାନ୍ତରମାତ୍ରେଣ ତଦ୍ ବଦ ପ୍ରଣତାୟ ମେ ॥ ୪॥
ତ୍ୱତ୍ତୋ ନ ବେଦ ସ୍କନ୍ଦାନ୍ୟୋ ଗଙ୍ଗାଗର୍ଭସମୁଦ୍ଭବ ।
ପରଂ ସ୍ୱର୍ଗତରଙ୍ଗିଣ୍ୟାଂ ମହିମାନଂ ମହାମତେ ॥ ୫॥
ସ୍କନ୍ଦ ଉବାଚ
ସନ୍ତି ପୁଣ୍ୟଜଲାନୀହ ସରାଂସି ସରିତୋ ମୁନେ ।
ସ୍ଥାନେ ସ୍ଥାନେ ଚ ତୀର୍ଥାନି ଜିତାତ୍ମାଧ୍ୟୁଷିତାନି ଚ ॥ ୬॥
ଦୃଷ୍ଟପ୍ରତ୍ୟଯକାରୀଣି ମହାମହିମଭାଞ୍ଜ୍ୟପି ।
ପରଂ ସ୍ୱର୍ଗତରଙ୍ଗିଣ୍ୟାଃ କୋଟ୍ୟଂଶୋଽପି ନ ତତ୍ର ବୈ ॥ ୭॥
ଅନେନୈବାନୁମାନେନ ବୁଦ୍ଧ୍ୟସ୍ୱ କଲଶୋଦ୍ଭବ ।
ଦଧ୍ରେ ଗଙ୍ଗୋତ୍ତମାଙ୍ଗେନ ଦେବଦେବେନ ଶମ୍ଭୁନା ॥ ୮॥
ସ୍ନାନକାଲେଽନ୍ୟତୀର୍ଥେଷୁ ଜପ୍ୟତେ ଜାହ୍ନବୀ ଜନୈଃ ।
ବିନା ବିଷ୍ଣୁପଦୀଂ କ୍ୱାନ୍ୟତ୍ ସମର୍ଥମଘମୋଚନେ ॥ ୯॥
ଗଙ୍ଗାସ୍ନାନଫଲଂ ବ୍ରହ୍ମନ୍ ଗଙ୍ଗାୟାମେବ ଲଭ୍ୟତେ ।
ଯଥା ଦ୍ରାକ୍ଷାଫଲସ୍ୱାଦୋ ଦ୍ରାକ୍ଷାୟାମେବ ନାନ୍ୟତଃ ॥ ୧୦॥
ଅସ୍ତ୍ୟୁପାୟ ଇହ ତ୍ୱେକଃ ସ୍ୟାଦ୍ ଯେନାବିକଲଂ ଫଲମ୍ ।
ସ୍ନାନସ୍ୟ ଦେବସରିତୋ ମହାଗୁହ୍ୟତମୋ ମୁନେ ॥ ୧୧॥
ଶିବଭକ୍ତାୟ ଶାନ୍ତାୟ ବିଷ୍ଣୁଭକ୍ତିପରାୟ ଚ ।
ଶ୍ରଦ୍ଧାଲବେ ତ୍ୱାସ୍ତିକାୟ ଗର୍ଭବାସମୁମୁକ୍ଷବେ ॥ ୧୨॥
କଥନୀୟଂ ନ ଚାନ୍ୟସ୍ୟ କସ୍ୟଚିତ୍ କେନଚିତ୍ କ୍ୱଚିତ୍ ।
ଇଦଂ ରହସ୍ୟଂ ପରମଂ ମହାପାତକନାଶନମ୍ ॥ ୧୩॥
ମହାଶ୍ରେୟସ୍କରଂ ପୁଣ୍ୟଂ ମନୋରଥକରଂ ପରମ୍ ।
ଦ୍ୟୁନଦୀପ୍ରୀତିଜନକଂ ଶିବସନ୍ତୋଷସନ୍ତତିଃ ॥ ୧୪॥
ନାମ୍ନାଂ ସହସ୍ରଂ ଗଙ୍ଗାୟାଃ ସ୍ତବରାଜେଷୁ ଶୋଭନମ୍ ।
ଜପ୍ୟାନାଂ ପରମଂ ଜପ୍ୟଂ ବେଦୋପନିଷଦାଂ ସମମ୍ ॥ ୧୫॥
ଜପନୀୟଂ ପ୍ରୟତ୍ନେନ ମୌନିନା ବାଚକଂ ବିନା ।
ଶୁଚିସ୍ଥାନେଷୁ ଶୁଚିନା ସୁସ୍ପଷ୍ଟାକ୍ଷରମେବ ଚ ॥ ୧୬॥
ଧ୍ୟାନମ୍ -
ଶୈଲେନ୍ଦ୍ରାଦବତାରିଣୀ ନିଜଜଲେ ମଜ୍ଜଦ୍ଜନୋତ୍ତାରିଣୀ
ପାରାବାରବିହାରିଣୀ ଭବଭୟଶ୍ରେଣୀ ସମୁତ୍ସାରିଣୀ ।
ଶେଷାହେରନୁକାରିଣୀ ହରଶିରୋବଲ୍ଲୀଦଲାକାରିଣୀ
କାଶୀପ୍ରାନ୍ତବିହାରିଣୀ ବିଜୟତେ ଗଙ୍ଗା ମନୋହାରିଣୀ ॥
ଓଁ ନମୋ ଗଙ୍ଗାଦେବ୍ୟୈ ॥
ଓଙ୍କାରରୂପିଣ୍ୟଜରାଽତୁଲାଽନନ୍ତାଽମୃତସ୍ରବା ।
ଅତ୍ୟୁଦାରାଽଭୟାଽଶୋକାଽଲକନନ୍ଦାଽମୃତାଽମଲା ॥ ୧୭॥
ଅନାଥବତ୍ସଲାଽମୋଘାଽପାଂୟୋନିରମୃତପ୍ରଦା ।
ଅବ୍ୟକ୍ତଲକ୍ଷଣାଽକ୍ଷୋଭ୍ୟାଽନବଚ୍ଛିନ୍ନାଽପରାଽଜିତା ॥ ୧୮॥
ଅନାଥନାଥାଽଭୀଷ୍ଟାର୍ଥସିଦ୍ଧିଦାଽନଙ୍ଗବର୍ଧିନୀ ।
ଅଣିମାଦିଗୁଣାଽଧାରାଽଗ୍ରଗଣ୍ୟାଽଲୀକହାରିଣୀ ॥ ୧୯॥
ଅଚିନ୍ତ୍ୟଶକ୍ତିରନଘାଽଦ୍ଭୁତରୂପାଽଘହାରିଣୀ ।
ଅଦ୍ରିରାଜସୁତାଽଷ୍ଟାଙ୍ଗୟୋଗସିଦ୍ଧିପ୍ରଦାଽଚ୍ୟୁତା ॥ ୨୦॥
ଅକ୍ଷୁଣ୍ଣଶକ୍ତିରସୁଦାଽନନ୍ତତୀର୍ଥାଽମୃତୋଦକା ।
ଅନନ୍ତମହିମାଽପାରାଽନନ୍ତସୌଖ୍ୟପ୍ରଦାଽନ୍ନଦା ॥ ୨୧॥
ଅଶେଷଦେବତାମୂର୍ତିରଘୋରାଽମୃତରୂପିଣୀ ।
ଅବିଦ୍ୟାଜାଲଶମନୀ ହ୍ୟପ୍ରତର୍କ୍ୟଗତିପ୍ରଦା ॥ ୨୨॥
ଅଶେଷବିଘ୍ନସଂହର୍ତ୍ରୀ ତ୍ୱଶେଷଗୁଣଗୁମ୍ଫିତା ।
ଅଜ୍ଞାନତିମିରଜ୍ୟୋତିରନୁଗ୍ରହପରାୟଣା ॥ ୨୩॥
ଅଭିରାମାଽନବଦ୍ୟାଙ୍ଗ୍ୟନନ୍ତସାରାଽକଲଙ୍କିନୀ ।
ଆରୋଗ୍ୟଦାଽଽନନ୍ଦବଲ୍ଲୀ ତ୍ୱାପନ୍ନାର୍ତିବିନାଶିନୀ ॥ ୨୪॥
ଆଶ୍ଚର୍ୟମୂର୍ତିରାୟୁଷ୍ୟା ହ୍ୟାଢ୍ୟାଽଽଦ୍ୟାଽଽପ୍ରାଽଽର୍ୟସେବିତା ।
ଆପ୍ୟାୟିନ୍ୟାପ୍ତବିଦ୍ୟାଖ୍ୟା ତ୍ୱାନନ୍ଦାଽଽଶ୍ୱାସଦାୟିନୀ ॥ ୨୫॥
ଆଲସ୍ୟଘ୍ନ୍ୟାପଦାଂ ହନ୍ତ୍ରୀ ହ୍ୟାନନ୍ଦାମୃତବର୍ଷିଣୀ ।
ଇରାବତୀଷ୍ଟଦାତ୍ରୀଷ୍ଟା ତ୍ୱିଷ୍ଟାପୂର୍ତଫଲପ୍ରଦା ॥ ୨୬॥
ଇତିହାସଶ୍ରୁତୀଡ୍ୟାର୍ଥା ତ୍ୱିହାମୁତ୍ରଶୁଭପ୍ରଦା ।
ଇଜ୍ୟାଶୀଲସମିଜ୍ୟେଷ୍ଠା ତ୍ୱିନ୍ଦ୍ରାଦିପରିବନ୍ଦିତା ॥ ୨୭॥
ଇଲାଲଙ୍କାରମାଲେଦ୍ଧା ତ୍ୱିନ୍ଦିରାରମ୍ୟମନ୍ଦିରା ।
ଇଦିନ୍ଦିରାଦିସଂସେବ୍ୟା ତ୍ୱୀଶ୍ୱରୀଶ୍ୱରବଲ୍ଲଭା ॥ ୨୮॥
ଈତିଭୀତିହରେଡ୍ୟା ଚ ତ୍ୱୀଡନୀୟଚରିତ୍ରଭୃତ୍ ।
ଉତ୍କୃଷ୍ଟଶକ୍ତିରୁତ୍କୃଷ୍ଟୋଡୁପମଣ୍ଡଲଚାରିଣୀ ॥ ୨୯॥
ଉଦିତାମ୍ବରମାର୍ଗୋସ୍ରୋରଗଲୋକବିହାରିଣୀ ।
ଉକ୍ଷୋର୍ୱରୋତ୍ପଲୋତ୍କୁମ୍ଭା ଉପେନ୍ଦ୍ରଚରଣଦ୍ରବା ॥ ୩୦॥
ଉଦନ୍ୱତ୍ପୂର୍ତିହେତୁଶ୍ଚୋଦାରୋତ୍ସାହପ୍ରବର୍ଧିନୀ ।
ଉଦ୍ୱେଗଘ୍ନ୍ୟୁଷ୍ଣଶମନୀ ହ୍ୟୁଷ୍ଣରଶ୍ମିସୁତାପ୍ରିୟା ॥ ୩୧॥
ଉତ୍ପତ୍ତିସ୍ଥିତିସଂହାରକାରିଣ୍ୟୁପରିଚାରିଣୀ ।
ଊର୍ଜଂ ବହନ୍ତ୍ୟୂର୍ଜଧରୋର୍ଜାବତୀ ଚୋର୍ମିମାଲିନୀ ॥ ୩୨॥
ଊର୍ଧ୍ୱରେତଃପ୍ରିୟୋର୍ଧ୍ୱାଧ୍ୱା ହ୍ୟୂର୍ମିଲୋର୍ଧ୍ୱଗତିପ୍ରଦା ।
ଋଷିବୃନ୍ଦସ୍ତୁତର୍ଦ୍ଧିଶ୍ଚ ଋଣତ୍ରୟବିନାଶିନୀ ॥ ୩୩॥
ଋତମ୍ଭରର୍ଦ୍ଧିଦାତ୍ରୀ ଚ ଋକ୍ସ୍ୱରୂପା ଋଜୁପ୍ରିୟା ।
ଋକ୍ଷମାର୍ଗବହର୍କ୍ଷାର୍ଚିରୃଜୁମାର୍ଗପ୍ରଦର୍ଶିନୀ ॥ ୩୪॥
ଏଧିତାଖିଲଧର୍ମାର୍ଥା ତ୍ୱେକୈକାମୃତଦାୟିନୀ ।
ଏଧନୀୟସ୍ୱଭାବୈଜ୍ୟା ତ୍ୱେଜିତାଶେଷପାତକା ॥ ୩୫॥
ଐଶ୍ୱର୍ୟଦୈଶ୍ୱର୍ୟରୂପା ହ୍ୟୈତିହ୍ୟଂ ହ୍ୟୈନ୍ଦବୀଦ୍ୟୁତିଃ ।
ଓଜସ୍ୱିନ୍ୟୋଷଧୀକ୍ଷେତ୍ରମୋଜୋଦୌଦନଦାୟିନୀ ॥ ୩୬॥
ଓଷ୍ଠାମୃତୌନ୍ନତ୍ୟଦାତ୍ରୀ ତ୍ୱୌଷଧଂ ଭବରୋଗିଣାମ୍ ।
ଔଦାର୍ୟଚଞ୍ଚୁରୌପେନ୍ଦ୍ରୀ ତ୍ୱୌଗ୍ରୀ ହ୍ୟୌମେୟରୂପିଣୀ ॥ ୩୭॥
ଅମ୍ବରାଧ୍ୱବହାମ୍ବଷ୍ଠାମ୍ବରମାଲାମ୍ବୁଜେକ୍ଷଣା ।
ଅମ୍ବିକାମ୍ବୁମହାୟୋନିରନ୍ଧୋଦାନ୍ଧକହାରିଣୀ ॥ ୩୮॥
ଅଂଶୁମାଲା ହ୍ୟଂଶୁମତୀ ତ୍ୱଙ୍ଗୀକୃତଷଡାନନା ।
ଅନ୍ଧତାମିସ୍ରହନ୍ତ୍ର୍ୟନ୍ଧୁରଞ୍ଜନା ହ୍ୟଞ୍ଜନାବତୀ ॥ ୩୯॥
କଲ୍ୟାଣକାରିଣୀ କାମ୍ୟା କମଲୋତ୍ପଲଗନ୍ଧିନୀ ।
କୁମୁଦ୍ୱତୀ କମଲିନୀ କାନ୍ତିଃ କଲ୍ପିତଦାୟିନୀ ॥ ୪୦॥
କାଞ୍ଚନାକ୍ଷୀ କାମଧେନୁଃ କୀର୍ତିକୃତ୍ କ୍ଲେଶନାଶିନୀ ।
କ୍ରତୁଶ୍ରେଷ୍ଠା କ୍ରତୁଫଲା କର୍ମବନ୍ଧବିଭେଦିନୀ ॥ ୪୧॥
କମଲାକ୍ଷୀ କ୍ଲମହରା କୃଶାନୁତପନଦ୍ୟୁତିଃ ।
କରୁଣାର୍ଦ୍ରା ଚ କଲ୍ୟାଣୀ କଲିକଲ୍ମଷନାଶିନୀ ॥ ୪୨॥
କାମରୂପା କ୍ରିୟାଶକ୍ତିଃ କମଲୋତ୍ପଲମାଲିନୀ ।
କୂଟସ୍ଥା କରୁଣା କାନ୍ତା କୂର୍ମୟାନା କଲାବତୀ ॥ ୪୩॥
କମଲା କଲ୍ପଲତିକା କାଲୀ କଲୁଷବୈରିଣୀ ।
କମନୀୟଜଲା କମ୍ରା କପର୍ଦିସୁକପର୍ଦଗା ॥ ୪୪॥
କାଲକୂଟପ୍ରଶମନୀ କଦମ୍ବକୁସୁମପ୍ରିୟା ।
କାଲିନ୍ଦୀ କେଲିଲଲିତା କଲକଲ୍ଲୋଲମାଲିକା ॥ ୪୫॥
କ୍ରାନ୍ତଲୋକତ୍ରୟା କଣ୍ଡୂଃ କଣ୍ଡୂତନୟବତ୍ସଲା ।
ଖଡ୍ଗିନୀ ଖଡ୍ଗଧାରାଭା ଖଗା ଖଣ୍ଡେନ୍ଦୁଧାରିଣୀ ॥ ୪୬॥
ଖେଖେଲଗାମିନୀ ଖସ୍ଥା ଖଣ୍ଡେନ୍ଦୁତିଲକପ୍ରିୟା ।
ଖେଚରୀ ଖେଚରୀବନ୍ଦ୍ୟା ଖ୍ୟାତିଃ ଖ୍ୟାତିପ୍ରଦାୟିନୀ ॥ ୪୭॥
ଖଣ୍ଡିତପ୍ରଣତାଘୌଘା ଖଲବୁଦ୍ଧିବିନାଶିନୀ ।
ଖାତୈନଃ କନ୍ଦସନ୍ଦୋହା ଖଡ୍ଗଖଟ୍ୱାଙ୍ଗ ଖେଟିନୀ ॥ ୪୮॥
ଖରସନ୍ତାପଶମନୀ ଖନିଃ ପୀୟୂଷପାଥସାମ୍ ।
ଗଙ୍ଗା ଗନ୍ଧବତୀ ଗୌରୀ ଗନ୍ଧର୍ୱନଗରପ୍ରିୟା ॥ ୪୯॥
ଗମ୍ଭୀରାଙ୍ଗୀ ଗୁଣମୟୀ ଗତାତଙ୍କା ଗତିପ୍ରିୟା ।
ଗଣନାଥାମ୍ବିକା ଗୀତା ଗଦ୍ୟପଦ୍ୟପରିଷ୍ଟୁତା ॥ ୫୦॥
ଗାନ୍ଧାରୀ ଗର୍ଭଶମନୀ ଗତିଭ୍ରଷ୍ଟଗତିପ୍ରଦା ।
ଗୋମତୀ ଗୁହ୍ୟବିଦ୍ୟା ଗୌର୍ଗୋପ୍ତ୍ରୀ ଗଗନଗାମିନୀ ॥ ୫୧॥
ଗୋତ୍ରପ୍ରବର୍ଧିନୀ ଗୁଣ୍ୟା ଗୁଣାତୀତା ଗୁଣାଗ୍ରଣୀଃ ।
ଗୁହାମ୍ବିକା ଗିରିସୁତା ଗୋବିନ୍ଦାଙ୍ଘ୍ରିସମୁଦ୍ଭବା ॥ ୫୨॥
ଗୁଣନୀୟଚରିତ୍ରା ଚ ଗାୟତ୍ରୀ ଗିରିଶପ୍ରିୟା ।
ଗୂଢରୂପା ଗୁଣବତୀ ଗୁର୍ୱୀ ଗୌରବବର୍ଧିନୀ ॥ ୫୩॥
ଗ୍ରହପୀଡାହରା ଗୁନ୍ଦ୍ରା ଗରଘ୍ନୀ ଗାନବତ୍ସଲା ।
ଘର୍ମହନ୍ତ୍ରୀ ଘୃତବତୀ ଘୃତତୁଷ୍ଟିପ୍ରଦାୟିନୀ ॥ ୫୪॥
ଘଣ୍ଟାରବପ୍ରିୟା ଘୋରାଘୌଘବିଧ୍ୱଂସକାରିଣୀ ।
ଘ୍ରାଣତୁଷ୍ଟିକରୀ ଘୋଷା ଘନାନନ୍ଦା ଘନପ୍ରିୟା ॥ ୫୫॥
ଘାତୁକା ଘୂର୍ଣିତଜଲା ଘୃଷ୍ଟପାତକସନ୍ତତିଃ ।
ଘଟକୋଟିପ୍ରପୀତାପା ଘଟିତାଶେଷମଙ୍ଗଲା ॥ ୫୬॥
ଘୃଣାବତୀ ଘୃଣିନିଧିର୍ଘସ୍ମରା ଘୂକନାଦିନୀ ।
ଘୁସୃଣାପିଞ୍ଜରତନୁର୍ଘର୍ଘରା ଘର୍ଘରସ୍ୱନା ॥ ୫୭॥
ଚନ୍ଦ୍ରିକା ଚନ୍ଦ୍ରକାନ୍ତାମ୍ବୁଶ୍ଚଞ୍ଚଦାପା ଚଲଦ୍ୟୁତିଃ ।
ଚିନ୍ମୟୀ ଚିତିରୂପା ଚ ଚନ୍ଦ୍ରାୟୁତଶତାନନା ॥ ୫୮॥
ଚାମ୍ପେୟଲୋଚନା ଚାରୁଶ୍ଚାର୍ୱଙ୍ଗୀ ଚାରୁଗାମିନୀ ।
ଚାର୍ୟା ଚାରିତ୍ରନିଲୟା ଚିତ୍ରକୃଚ୍ଚିତ୍ରରୂପିଣୀ ॥ ୫୯॥
ଚମ୍ପୂଶ୍ଚନ୍ଦନଶୁଚ୍ୟମ୍ବୁଶ୍ଚର୍ଚନୀୟା ଚିରସ୍ଥିରା ।
ଚାରୁଚମ୍ପକମାଲାଢ୍ୟା ଚମିତାଶେଷଦୁଷ୍କୃତା ॥ ୬୦॥
ଚିଦାକାଶବହା ଚିନ୍ତ୍ୟା ଚଞ୍ଚଚ୍ଚାମରବୀଜିତା ।
ଚୋରିତାଶେଷବୃଜିନା ଚରିତାଶେଷମଣ୍ଡଲା ॥ ୬୧॥
ଛେଦିତାଖିଲପାପୌଘା ଛଦ୍ମଘ୍ନୀ ଛଲହାରିଣୀ ।
ଛନ୍ନତ୍ରିବିଷ୍ଟପତଲା ଛୋଟିତାଶେଷବନ୍ଧନା ॥ ୬୨॥
ଛୁରିତାମୃତଧାରୌଘା ଛିନ୍ନୈନାଶ୍ଛନ୍ଦଗାମିନୀ ।
ଛତ୍ରୀକୃତମରାଲୌଘା ଛଟୀକୃତନିଜାମୃତା ॥ ୬୩॥
ଜାହ୍ନବୀ ଜ୍ୟା ଜଗନ୍ମାତା ଜପ୍ୟା ଜଙ୍ଘାଲବୀଚିକା ।
ଜୟା ଜନାର୍ଦନପ୍ରୀତା ଜୁଷଣୀୟା ଜଗଦ୍ଧିତା ॥ ୬୪॥
ଜୀବନଂ ଜୀବନପ୍ରାଣା ଜଗଜ୍ଜ୍ୟେଷ୍ଠା ଜଗନ୍ମୟୀ ।
ଜୀବଜୀବାତୁଲତିକା ଜନ୍ମିଜନ୍ମନିବର୍ହିଣୀ ॥ ୬୫॥
ଜାଡ୍ୟବିଧ୍ୱଂସନକରୀ ଜଗଦ୍ୟୋନିର୍ଜଲାବିଲା ।
ଜଗଦାନନ୍ଦଜନନୀ ଜଲଜା ଜଲଜେକ୍ଷଣା ॥ ୬୬॥
ଜନଲୋଚନପୀୟୂଷା ଜଟାତଟବିହାରିଣୀ ।
ଜୟନ୍ତୀ ଜଞ୍ଜପୂକଘ୍ନୀ ଜନିତଜ୍ଞାନବିଗ୍ରହା ॥ ୬୭॥
ଝଲ୍ଲରୀବାଦ୍ୟକୁଶଲା ଝଲଜ୍ଝାଲଜଲାବୃତା ।
ଝିଣ୍ଟୀଶବନ୍ଦ୍ୟା ଝଙ୍କାରକାରିଣୀ ଝର୍ଝରାବତୀ ॥ ୬୮॥
ଟୀକିତାଶେଷପାତାଲା ଟଙ୍କିକୈନୋଽଦ୍ରିପାଟନେ ।
ଟଙ୍କାରନୃତ୍ୟତ୍କଲ୍ଲୋଲା ଟୀକନୀୟମହାତଟା ॥ ୬୯॥
ଡମ୍ବରପ୍ରବହା ଡୀନରାଜହଂସକୁଲାକୁଲା ।
ଡମଡ୍ଡମରୁହସ୍ତା ଚ ଡାମରୋକ୍ତମହାଣ୍ଡକା ॥ ୭୦॥
ଢୌକିତାଶେଷନିର୍ୱାଣା ଢକ୍କାନାଦଚଲଜ୍ଜଲା ।
ଢୁଣ୍ଢିବିଘ୍ନେଶଜନନୀ ଢଣଡ୍ଢୁଣିତପାତକା ॥ ୭୧॥
ତର୍ପଣୀ ତୀର୍ଥତୀର୍ଥା ଚ ତ୍ରିପଥା ତ୍ରିଦଶେଶ୍ୱରୀ ।
ତ୍ରିଲୋକଗୋପ୍ତ୍ରୀ ତୋୟେଶୀ ତ୍ରୈଲୋକ୍ୟପରିବନ୍ଦିତା ॥ ୭୨॥
ତାପତ୍ରିତୟସଂହର୍ତ୍ରୀ ତେଜୋବଲବିବର୍ଧିନୀ ।
ତ୍ରିଲକ୍ଷ୍ୟା ତାରଣୀ ତାରା ତାରାପତିକରାର୍ଚିତା ॥ ୭୩॥
ତ୍ରୈଲୋକ୍ୟପାବନୀ ପୁଣ୍ୟା ତୁଷ୍ଟିଦା ତୁଷ୍ଟିରୂପିଣୀ ।
ତୃଷ୍ଣାଚ୍ଛେତ୍ରୀ ତୀର୍ଥମାତା ତ୍ରିବିକ୍ରମପଦୋଦ୍ଭବା ॥ ୭୪॥
ତପୋମୟୀ ତପୋରୂପା ତପଃସ୍ତୋମଫଲପ୍ରଦା । var ପଦପ୍ରଦା
ତ୍ରୈଲୋକ୍ୟବ୍ୟାପିନୀ ତୃପ୍ତିସ୍ତୃପ୍ତିକୃତ୍ତତ୍ତ୍ୱରୂପିଣୀ ॥ ୭୫॥
ତ୍ରୈଲୋକ୍ୟସୁନ୍ଦରୀ ତୁର୍ୟା ତୁର୍ୟାତୀତଫଲପ୍ରଦା ।
ତ୍ରୈଲୋକ୍ୟଲକ୍ଷ୍ମୀସ୍ତ୍ରିପଦୀ ତଥ୍ୟା ତିମିରଚନ୍ଦ୍ରିକା ॥ ୭୬॥
ତେଜୋଗର୍ଭା ତପସ୍ସାରା ତ୍ରିପୁରାରିଶିରୋଗୃହା ।
ତ୍ରୟୀସ୍ୱରୂପିଣୀ ତନ୍ୱୀ ତପନାଙ୍ଗଜଭୀତିନୁତ୍ ॥ ୭୭॥
ତରିସ୍ତରଣିଜାମିତ୍ରଂ ତର୍ପିତାଶେଷପୂର୍ୱଜା ।
ତୁଲାବିରହିତା ତୀବ୍ରପାପତୂଲତନୂନପାତ୍ ॥ ୭୮॥
ଦାରିଦ୍ର୍ୟଦମନୀ ଦକ୍ଷା ଦୁଷ୍ପ୍ରେକ୍ଷା ଦିବ୍ୟମଣ୍ଡନା ।
ଦୀକ୍ଷାବତୀ ଦୁରାବାପ୍ୟା ଦ୍ରାକ୍ଷାମଧୁରବାରିଭୃତ୍ ॥ ୭୯॥
ଦର୍ଶିତାନେକକୁତୁକା ଦୁଷ୍ଟଦୁର୍ଜୟଦୁଃଖହୃତ୍ ।
ଦୈନ୍ୟହୃଦ୍ଦୁରିତଘ୍ନୀ ଚ ଦାନବାରିପଦାବ୍ଜଜା ॥ ୮୦॥
ଦନ୍ଦଶୂକବିଷଘ୍ନୀ ଚ ଦାରିତାଘୌଘସନ୍ତତିଃ ।
ଦ୍ରୁତା ଦେବଦ୍ରୁମଚ୍ଛନ୍ନା ଦୁର୍ୱାରାଘବିଘାତିନୀ ॥ ୮୧॥
ଦମଗ୍ରାହ୍ୟା ଦେବମାତା ଦେବଲୋକପ୍ରଦର୍ଶିନୀ ।
ଦେବଦେବପ୍ରିୟା ଦେବୀ ଦିକ୍ପାଲପଦଦାୟିନୀ ॥ ୮୨॥
ଦୀର୍ଘାୟୁଃ କାରିଣୀ ଦୀର୍ଘା ଦୋଗ୍ଧ୍ରୀ ଦୂଷଣବର୍ଜିତା ।
ଦୁଗ୍ଧାମ୍ବୁବାହିନୀ ଦୋହ୍ୟା ଦିବ୍ୟା ଦିବ୍ୟଗତିପ୍ରଦା ॥ ୮୩॥
ଦ୍ୟୁନଦୀ ଦୀନଶରଣଂ ଦେହିଦେହନିବାରିଣୀ ।
ଦ୍ରାଘୀୟସୀ ଦାଘହନ୍ତ୍ରୀ ଦିତପାତକସନ୍ତତିଃ ॥ ୮୪॥
ଦୂରଦେଶାନ୍ତରଚରୀ ଦୁର୍ଗମା ଦେବବଲ୍ଲଭା ।
ଦୁର୍ୱୃତ୍ତଘ୍ନୀ ଦୁର୍ୱିଗାହ୍ୟା ଦୟାଧାରା ଦୟାବତୀ ॥ ୮୫॥
ଦୁରାସଦା ଦାନଶୀଲା ଦ୍ରାବିଣୀ ଦ୍ରୁହିଣସ୍ତୁତା ।
ଦୈତ୍ୟଦାନବସଂଶୁଦ୍ଧିକର୍ତ୍ରୀ ଦୁର୍ବୁଦ୍ଧିହାରିଣୀ ॥ ୮୬॥
ଦାନସାରା ଦୟାସାରା ଦ୍ୟାବାଭୂମିବିଗାହିନୀ ।
ଦୃଷ୍ଟାଦୃଷ୍ଟଫଲପ୍ରାପ୍ତିର୍ଦେବତାବୃନ୍ଦବନ୍ଦିତା ॥ ୮୭॥
ଦୀର୍ଘବ୍ରତା ଦୀର୍ଘଦୃଷ୍ଟିର୍ଦୀପ୍ତତୋୟା ଦୁରାଲଭା ।
ଦଣ୍ଡୟିତ୍ରୀ ଦଣ୍ଡନୀତିର୍ଦୁଷ୍ଟଦଣ୍ଡଧରାର୍ଚିତା ॥ ୮୮॥
ଦୁରୋଦରଘ୍ନୀ ଦାବାର୍ଚିର୍ଦ୍ରବଦ୍ଦ୍ରବ୍ୟୈକଶେବଧିଃ ।
ଦୀନସନ୍ତାପଶମନୀ ଦାତ୍ରୀ ଦବଥୁବୈରିଣୀ ॥ ୮୯॥
ଦରୀବିଦାରଣପରା ଦାନ୍ତା ଦାନ୍ତଜନପ୍ରିୟା ।
ଦାରିତାଦ୍ରିତଟା ଦୁର୍ଗା ଦୁର୍ଗାରଣ୍ୟପ୍ରଚାରିଣୀ ॥ ୯୦॥
ଧର୍ମଦ୍ରବା ଧର୍ମଧୁରା ଧେନୁର୍ଧୀରା ଧୃତିର୍ଧ୍ରୁବା ।
ଧେନୁଦାନଫଲସ୍ପର୍ଶା ଧର୍ମକାମାର୍ଥମୋକ୍ଷଦା ॥ ୯୧॥
ଧର୍ମୋର୍ମିବାହିନୀ ଧୁର୍ୟା ଧାତ୍ରୀ ଧାତ୍ରୀବିଭୂଷଣମ୍ ।
ଧର୍ମିଣୀ ଧର୍ମଶୀଲା ଚ ଧନ୍ୱିକୋଟିକୃତାବନା ॥ ୯୨॥
ଧ୍ୟାତୃପାପହରା ଧ୍ୟେୟା ଧାବନୀ ଧୂତକଲ୍ମଷା ।
ଧର୍ମଧାରା ଧର୍ମସାରା ଧନଦା ଧନବର୍ଧିନୀ ॥ ୯୩॥
ଧର୍ମାଧର୍ମଗୁଣଚ୍ଛେତ୍ରୀ ଧତ୍ତୂରକୁସୁମପ୍ରିୟା ।
ଧର୍ମେଶୀ ଧର୍ମଶାସ୍ତ୍ରଜ୍ଞା ଧନଧାନ୍ୟସମୃଦ୍ଧିକୃତ୍ ॥ ୯୪॥
ଧର୍ମଲଭ୍ୟା ଧର୍ମଜଲା ଧର୍ମପ୍ରସବଧର୍ମିଣୀ ।
ଧ୍ୟାନଗମ୍ୟସ୍ୱରୂପା ଚ ଧରଣୀ ଧାତୃପୂଜିତା ॥ ୯୫॥
ଧୂର୍ଧୂର୍ଜଟିଜଟାସଂସ୍ଥା ଧନ୍ୟା ଧୀର୍ଧାରଣାବତୀ ।
ନନ୍ଦା ନିର୍ୱାଣଜନନୀ ନନ୍ଦିନୀ ନୁନ୍ନପାତକା ॥ ୯୬॥
ନିଷିଦ୍ଧବିଘ୍ନନିଚୟା ନିଜାନନ୍ଦପ୍ରକାଶିନୀ ।
ନଭୋଽଙ୍ଗଣଚରୀ ନୂତିର୍ନମ୍ୟା ନାରାୟଣୀ ନୁତା ॥ ୯୭॥
ନିର୍ମଲା ନିର୍ମଲାଖ୍ୟାନା ନାଶିନୀ ତାପସମ୍ପଦାମ୍ ।
ନିୟତା ନିତ୍ୟସୁଖଦା ନାନାଶ୍ଚର୍ୟମହାନିଧିଃ ॥ ୯୮॥
ନଦୀ ନଦସରୋମାତା ନାୟିକା ନାକଦୀର୍ଘିକା ।
ନଷ୍ଟୋଦ୍ଧରଣଧୀରା ଚ ନନ୍ଦନା ନନ୍ଦଦାୟିନୀ ॥ ୯୯॥
ନିର୍ଣିକ୍ତାଶେଷଭୁବନା ନିଃସଙ୍ଗା ନିରୁପଦ୍ରବା ।
ନିରାଲମ୍ବା ନିଷ୍ପ୍ରପଞ୍ଚା ନିର୍ଣାଶିତମହାମଲା ॥ ୧୦୦॥
ନିର୍ମଲଜ୍ଞାନଜନନୀ ନିଃଶେଷପ୍ରାଣିତାପହୃତ୍ ।
ନିତ୍ୟୋତ୍ସବା ନିତ୍ୟତୃପ୍ତା ନମସ୍କାର୍ୟା ନିରଞ୍ଜନା ॥ ୧୦୧॥
ନିଷ୍ଠାବତୀ ନିରାତଙ୍କା ନିର୍ଲେପା ନିଶ୍ଚଲାତ୍ମିକା ।
ନିରବଦ୍ୟା ନିରୀହା ଚ ନୀଲଲୋହିତମୂର୍ଧଗା ॥ ୧୦୨॥
ନନ୍ଦିଭୃଙ୍ଗିଗଣସ୍ତୁତ୍ୟା ନାଗା ନନ୍ଦା ନଗାତ୍ମଜା ।
ନିଷ୍ପ୍ରତ୍ୟୂହା ନାକନଦୀ ନିରୟାର୍ଣବଦୀର୍ଘନୌଃ ॥ ୧୦୩॥
ପୁଣ୍ୟପ୍ରଦା ପୁଣ୍ୟଗର୍ଭା ପୁଣ୍ୟା ପୁଣ୍ୟତରଙ୍ଗିଣୀ ।
ପୃଥୁଃ ପୃଥୁଫଲା ପୂର୍ଣା ପ୍ରଣତାର୍ତିପ୍ରଭଞ୍ଜନୀ ॥ ୧୦୪॥
ପ୍ରାଣଦା ପ୍ରାଣିଜନନୀ ପ୍ରାଣେଶୀ ପ୍ରାଣରୂପିଣୀ ।
ପଦ୍ମାଲୟା ପରାଶକ୍ତିଃ ପୁରଜିତ୍ପରମପ୍ରିୟା ॥ ୧୦୫॥
ପରା ପରଫଲପ୍ରାପ୍ତିଃ ପାବନୀ ଚ ପୟସ୍ୱିନୀ ।
ପରାନନ୍ଦା ପ୍ରକୃଷ୍ଟାର୍ଥା ପ୍ରତିଷ୍ଠା ପାଲିନୀ ପରା ॥ ୧୦୬॥ var ପାଲନୀ
ପୁରାଣପଠିତା ପ୍ରୀତା ପ୍ରଣବାକ୍ଷରରୂପିଣୀ ।
ପାର୍ୱତୀ ପ୍ରେମସମ୍ପନ୍ନା ପଶୁପାଶବିମୋଚନୀ ॥ ୧୦୭॥
ପରମାତ୍ମସ୍ୱରୂପା ଚ ପରବ୍ରହ୍ମପ୍ରକାଶିନୀ ।
ପରମାନନ୍ଦନିଷ୍ୟନ୍ଦା ପ୍ରାୟଶ୍ଚିତ୍ତସ୍ୱରୂପିଣୀ ॥ ୧୦୮॥ var ନିଷ୍ପନ୍ଦା
ପାନୀୟରୂପନିର୍ୱାଣା ପରିତ୍ରାଣପରାୟଣା ।
ପାପେନ୍ଧନଦବଜ୍ୱାଲା ପାପାରିଃ ପାପନାମନୁତ୍ ॥ ୧୦୯॥
ପରମୈଶ୍ୱର୍ୟଜନନୀ ପ୍ରଜ୍ଞା ପ୍ରାଜ୍ଞା ପରାପରା ।
ପ୍ରତ୍ୟକ୍ଷଲକ୍ଷ୍ମୀଃ ପଦ୍ମାକ୍ଷୀ ପରବ୍ୟୋମାମୃତସ୍ରବା ॥ ୧୧୦॥
ପ୍ରସନ୍ନରୂପା ପ୍ରଣିଧିଃ ପୂତା ପ୍ରତ୍ୟକ୍ଷଦେବତା ।
ପିନାକିପରମପ୍ରୀତା ପରମେଷ୍ଠିକମଣ୍ଡଲୁଃ ॥ ୧୧୧॥
ପଦ୍ମନାଭପଦାର୍ଘ୍ୟେଣ ପ୍ରସୂତା ପଦ୍ମମାଲିନୀ ।
ପରର୍ଦ୍ଧିଦା ପୁଷ୍ଟିକରୀ ପଥ୍ୟା ପୂର୍ତିଃ ପ୍ରଭାବତୀ ॥ ୧୧୨॥
ପୁନାନା ପୀତଗର୍ଭଘ୍ନୀ ପାପପର୍ୱତନାଶିନୀ ।
ଫଲିନୀ ଫଲହସ୍ତା ଚ ଫୁଲ୍ଲାମ୍ବୁଜବିଲୋଚନା ॥ ୧୧୩॥
ଫାଲିତୈନୋମହାକ୍ଷେତ୍ରା ଫଣିଲୋକବିଭୂଷଣମ୍ ।
ଫେନଚ୍ଛଲପ୍ରଣୁନ୍ନୈନାଃ ଫୁଲ୍ଲକୈରବଗନ୍ଧିନୀ ॥ ୧୧୪॥
ଫେନିଲାଚ୍ଛାମ୍ବୁଧାରାଭା ଫଡୁଚ୍ଚାଟିତପାତକା ।
ଫାଣିତସ୍ୱାଦୁସଲିଲା ଫାଣ୍ଟପଥ୍ୟଜଲାବିଲା ॥ ୧୧୫॥
ବିଶ୍ୱମାତା ଚ ବିଶ୍ୱେଶୀ ବିଶ୍ୱା ବିଶ୍ୱେଶ୍ୱରପ୍ରିୟା ।
ବ୍ରହ୍ମଣ୍ୟା ବ୍ରହ୍ମକୃଦ୍ ବ୍ରାହ୍ମୀ ବ୍ରହ୍ମିଷ୍ଠା ବିମଲୋଦକା ॥ ୧୧୬॥
ବିଭାବରୀ ଚ ବିରଜା ବିକ୍ରାନ୍ତାନେକବିଷ୍ଟପା ।
ବିଶ୍ୱମିତ୍ରଂ ବିଷ୍ଣୁପଦୀ ବୈଷ୍ଣବୀ ବୈଷ୍ଣବପ୍ରିୟା ॥ ୧୧୭॥
ବିରୂପାକ୍ଷପ୍ରିୟକରୀ ବିଭୂତିର୍ୱିଶ୍ୱତୋମୁଖୀ ।
ବିପାଶା ବୈବୁଧୀ ବେଦ୍ୟା ବେଦାକ୍ଷରରସସ୍ରବା ॥ ୧୧୮॥
ବିଦ୍ୟା ବେଗବତୀ ବନ୍ଦ୍ୟା ବୃଂହଣୀ ବ୍ରହ୍ମବାଦିନୀ ।
ବରଦା ବିପ୍ରକୃଷ୍ଟା ଚ ବରିଷ୍ଠା ଚ ବିଶୋଧନୀ ॥ ୧୧୯॥
ବିଦ୍ୟାଧରୀ ବିଶୋକା ଚ ବୟୋବୃନ୍ଦନିଷେବିତା ।
ବହୂଦକା ବଲବତୀ ବ୍ୟୋମସ୍ଥା ବିବୁଧପ୍ରିୟା ॥ ୧୨୦॥
ବାଣୀ ବେଦବତୀ ବିତ୍ତା ବ୍ରହ୍ମବିଦ୍ୟାତରଙ୍ଗିଣୀ ।
ବ୍ରହ୍ମାଣ୍ଡକୋଟିବ୍ୟାପ୍ତାମ୍ବୁର୍ବ୍ରହ୍ମହତ୍ୟାପହାରିଣୀ ॥ ୧୨୧॥
ବ୍ରହ୍ମେଶବିଷ୍ଣୁରୂପା ଚ ବୁଦ୍ଧିର୍ୱିଭବବର୍ଧିନୀ ।
ବିଲାସିସୁଖଦା ବଶ୍ୟା ବ୍ୟାପିନୀ ଚ ବୃଷାରଣିଃ ॥ ୧୨୨॥
ବୃଷାଙ୍କମୌଲିନିଲୟା ବିପନ୍ନାର୍ତିପ୍ରଭଞ୍ଜନୀ ।
ବିନୀତା ବିନତା ବ୍ରଧ୍ନତନୟା ବିନୟାନ୍ୱିତା ॥ ୧୨୩॥
ବିପଞ୍ଚୀ ବାଦ୍ୟକୁଶଲା ବେଣୁଶ୍ରୁତିବିଚକ୍ଷଣା ।
ବର୍ଚସ୍କରୀ ବଲକରୀ ବଲୋନ୍ମୂଲିତକଲ୍ମଷା ॥ ୧୨୪॥
ବିପାପ୍ମା ବିଗତାତଙ୍କା ବିକଲ୍ପପରିବର୍ଜିତା ।
ବୃଷ୍ଟିକର୍ତ୍ରୀ ବୃଷ୍ଟିଜଲା ବିଧିର୍ୱିଚ୍ଛିନ୍ନବନ୍ଧନା ॥ ୧୨୫॥
ବ୍ରତରୂପା ବିତ୍ତରୂପା ବହୁବିଘ୍ନବିନାଶକୃତ୍ ।
ବସୁଧାରା ବସୁମତୀ ବିଚିତ୍ରାଙ୍ଗୀ ବିଭାବସୁଃ ॥ ୧୨୬॥
ବିଜୟା ବିଶ୍ୱବୀଜଂ ଚ ବାମଦେବୀ ବରପ୍ରଦା ।
ବୃଷାଶ୍ରିତା ବିଷଘ୍ନୀ ଚ ବିଜ୍ଞାନୋର୍ମ୍ୟଂଶୁମାଲିନୀ ॥ ୧୨୭॥
ଭବ୍ୟା ଭୋଗବତୀ ଭଦ୍ରା ଭବାନୀ ଭୂତଭାବିନୀ ।
ଭୂତଧାତ୍ରୀ ଭୟହରା ଭକ୍ତଦାରିଦ୍ର୍ୟଘାତିନୀ ॥ ୧୨୮॥
ଭୁକ୍ତିମୁକ୍ତିପ୍ରଦା ଭେଶୀ ଭକ୍ତସ୍ୱର୍ଗାପବର୍ଗଦା ।
ଭାଗୀରଥୀ ଭାନୁମତୀ ଭାଗ୍ୟଂ ଭୋଗବତୀ ଭୃତିଃ ॥ ୧୨୯॥
ଭବପ୍ରିୟା ଭବଦ୍ୱେଷ୍ଟ୍ରୀ ଭୂତିଦା ଭୂତିଭୂଷଣା ।
ଭାଲଲୋଚନଭାବଜ୍ଞା ଭୂତଭବ୍ୟଭବତ୍ପ୍ରଭୁଃ ॥ ୧୩୦॥
ଭ୍ରାନ୍ତିଜ୍ଞାନପ୍ରଶମନୀ ଭିନ୍ନବ୍ରହ୍ମାଣ୍ଡମଣ୍ଡପା ।
ଭୂରିଦା ଭକ୍ତସୁଲଭା ଭାଗ୍ୟବଦ୍ଦୃଷ୍ଟିଗୋଚରୀ ॥ ୧୩୧॥
ଭଞ୍ଜିତୋପପ୍ଲବକୁଲା ଭକ୍ଷ୍ୟଭୋଜ୍ୟସୁଖପ୍ରଦା ।
ଭିକ୍ଷଣୀୟା ଭିକ୍ଷୁମାତା ଭାବା ଭାବସ୍ୱରୂପିଣୀ ॥ ୧୩୨॥
ମନ୍ଦାକିନୀ ମହାନନ୍ଦା ମାତା ମୁକ୍ତିତରଙ୍ଗିଣୀ ।
ମହୋଦୟା ମଧୁମତୀ ମହାପୁଣ୍ୟା ମୁଦାକରୀ ॥ ୧୩୩॥
ମୁନିସ୍ତୁତା ମୋହହନ୍ତ୍ରୀ ମହାତୀର୍ଥା ମଧୁସ୍ରବା ।
ମାଧବୀ ମାନିନୀ ମାନ୍ୟା ମନୋରଥପଥାତିଗା ॥ ୧୩୪॥
ମୋକ୍ଷଦା ମତିଦା ମୁଖ୍ୟା ମହାଭାଗ୍ୟଜନାଶ୍ରିତା ।
ମହାବେଗବତୀ ମେଧ୍ୟା ମହା ମହିମଭୂଷଣା ॥ ୧୩୫॥
ମହାପ୍ରଭାବା ମହତୀ ମୀନଚଞ୍ଚଲଲୋଚନା ।
ମହାକାରୁଣ୍ୟସମ୍ପୂର୍ଣା ମହର୍ଦ୍ଧିଶ୍ଚ ମହୋତ୍ପଲା ॥ ୧୩୬॥
ମୂର୍ତିମନ୍ମୁକ୍ତିରମଣୀ ମଣିମାଣିକ୍ୟଭୂଷଣା ।
ମୁକ୍ତାକଲାପନେପଥ୍ୟା ମନୋନୟନନନ୍ଦିନୀ ॥ ୧୩୭॥
ମହାପାତକରାଶିଘ୍ନୀ ମହାଦେବାର୍ଧହାରିଣୀ ।
ମହୋର୍ମିମାଲିନୀ ମୁକ୍ତା ମହାଦେବୀ ମନୋନ୍ମନୀ ॥ ୧୩୮॥
ମହାପୁଣ୍ୟୋଦୟପ୍ରାପ୍ୟା ମାୟାତିମିରଚନ୍ଦ୍ରିକା ।
ମହାବିଦ୍ୟା ମହାମାୟା ମହାମେଧା ମହୌଷଧମ୍ ॥ ୧୩୯॥
ମାଲାଧରୀ ମହୋପାୟା ମହୋରଗବିଭୂଷଣା ।
ମହାମୋହପ୍ରଶମନୀ ମହାମଙ୍ଗଲମଙ୍ଗଲମ୍ ॥ ୧୪୦॥
ମାର୍ତଣ୍ଡମଣ୍ଡଲଚରୀ ମହାଲକ୍ଷ୍ମୀର୍ମଦୋଜ୍ଝିତା ।
ଯଶସ୍ୱିନୀ ଯଶୋଦା ଚ ଯୋଗ୍ୟା ଯୁକ୍ତାତ୍ମସେବିତା ॥ ୧୪୧॥
ଯୋଗସିଦ୍ଧିପ୍ରଦା ଯାଜ୍ୟା ଯଜ୍ଞେଶପରିପୂରିତା ।
ଯଜ୍ଞେଶୀ ଯଜ୍ଞଫଲଦା ଯଜନୀୟା ଯଶସ୍କରୀ ॥ ୧୪୨॥
ଯମିସେବ୍ୟା ଯୋଗୟୋନିର୍ୟୋଗିନୀ ଯୁକ୍ତବୁଦ୍ଧିଦା ।
ଯୋଗଜ୍ଞାନପ୍ରଦା ଯୁକ୍ତା ଯମାଦ୍ୟଷ୍ଟାଙ୍ଗୟୋଗୟୁକ୍ ॥ ୧୪୩॥
ଯନ୍ତ୍ରିତାଘୌଘସଞ୍ଚାରା ଯମଲୋକନିବାରିଣୀ ।
ଯାତାୟାତପ୍ରଶମନୀ ଯାତନାନାମକୃନ୍ତନୀ ॥ ୧୪୪॥
ଯାମିନୀଶହିମାଚ୍ଛୋଦା ଯୁଗଧର୍ମବିବର୍ଜିତା ।
ରେବତୀ ରତିକୃଦ୍ ରମ୍ୟା ରତ୍ନଗର୍ଭା ରମା ରତିଃ ॥ ୧୪୫॥
ରତ୍ନାକରପ୍ରେମପାତ୍ରଂ ରସଜ୍ଞା ରସରୂପିଣୀ ।
ରତ୍ନପ୍ରାସାଦଗର୍ଭା ଚ ରମଣୀୟତରଙ୍ଗିଣୀ ॥ ୧୪୬॥
ରତ୍ନାର୍ଚୀ ରୁଦ୍ରରମଣୀ ରାଗଦ୍ୱେଷବିନାଶିନୀ ।
ରମା ରାମା ରମ୍ୟରୂପା ରୋଗିଜୀବାନୁରୂପିଣୀ ॥ ୧୪୭॥
ରୁଚିକୃଦ୍ ରୋଚନୀ ରମ୍ୟା ରୁଚିରା ରୋଗହାରିଣୀ ।
ରାଜହଂସା ରତ୍ନବତୀ ରାଜତ୍କଲ୍ଲୋଲରାଜିକା ॥ ୧୪୮॥
ରାମଣୀୟକରେଖା ଚ ରୁଜାରୀ ରୋଗରୋଷିଣୀ । var ରୋଗଶୋଷିଣୀ
ରାକା ରଙ୍କାର୍ତିଶମନୀ ରମ୍ୟା ରୋଲମ୍ବରାବିଣୀ ॥ ୧୪୯॥
ରାଗିଣୀ ରଞ୍ଜିତଶିବା ରୂପଲାବଣ୍ୟଶେବଧିଃ ।
ଲୋକପ୍ରସୂର୍ଲୋକବନ୍ଦ୍ୟା ଲୋଲତ୍କଲ୍ଲୋଲମାଲିନୀ ॥ ୧୫୦॥
ଲୀଲାବତୀ ଲୋକଭୂମିର୍ଲୋକଲୋଚନଚନ୍ଦ୍ରିକା ।
ଲେଖସ୍ରବନ୍ତୀ ଲଟଭା ଲଘୁବେଗା ଲଘୁତ୍ୱହୃତ୍ ॥ ୧୫୧॥
ଲାସ୍ୟତ୍ତରଙ୍ଗହସ୍ତା ଚ ଲଲିତା ଲୟଭଙ୍ଗିଗା ।
ଲୋକବନ୍ଧୁର୍ଲୋକଧାତ୍ରୀ ଲୋକୋତ୍ତରଗୁଣୋର୍ଜିତା ॥ ୧୫୨॥
ଲୋକତ୍ରୟହିତା ଲୋକା ଲକ୍ଷ୍ମୀର୍ଲକ୍ଷଣଲକ୍ଷିତା ।
ଲୀଲା ଲକ୍ଷିତନିର୍ୱାଣା ଲାବଣ୍ୟାମୃତବର୍ଷିଣୀ ॥ ୧୫୩॥
ବୈଶ୍ୱାନରୀ ବାସବେଡ୍ୟା ବନ୍ଧ୍ୟତ୍ୱପରିହାରିଣୀ ।
ବାସୁଦେବାଙ୍ଘ୍ରିରେଣୁଘ୍ନୀ ବଜ୍ରିବଜ୍ରନିବାରିଣୀ ॥ ୧୫୪॥
ଶୁଭାବତୀ ଶୁଭଫଲା ଶାନ୍ତିଃ ଶନ୍ତନୁବଲ୍ଲଭା । var ଶାନ୍ତନୁ
ଶୂଲିନୀ ଶୈଶବବୟାଃ ଶୀତଲାମୃତବାହିନୀ ॥ ୧୫୫॥
ଶୋଭାବତୀ ଶୀଲବତୀ ଶୋଷିତାଶେଷକିଲ୍ବିଷା ।
ଶରଣ୍ୟା ଶିବଦା ଶିଷ୍ଟା ଶରଜନ୍ମପ୍ରସୂଃଶିବା ॥ ୧୫୬॥
ଶକ୍ତିଃ ଶଶାଙ୍କବିମଲା ଶମନସ୍ୱସୃସମ୍ମତା ।
ଶମା ଶମନମାର୍ଗଘ୍ନୀ ଶିତିକଣ୍ଠମହାପ୍ରିୟା ॥ ୧୫୭॥
ଶୁଚିଃ ଶୁଚିକରୀ ଶେଷା ଶେଷଶାୟିପଦୋଦ୍ଭବା ।
ଶ୍ରୀନିବାସଶ୍ରୁତିଃ ଶ୍ରଦ୍ଧା ଶ୍ରୀମତୀ ଶ୍ରୀଃ ଶୁଭବ୍ରତା ॥ ୧୫୮॥
ଶୁଦ୍ଧବିଦ୍ୟା ଶୁଭାବର୍ତା ଶ୍ରୁତାନନ୍ଦା ଶ୍ରୁତିସ୍ତୁତିଃ ।
ଶିବେତରଘ୍ନୀ ଶବରୀ ଶାମ୍ବରୀରୂପଧାରିଣୀ ॥ ୧୫୯॥
ଶ୍ମଶାନଶୋଧନୀ ଶାନ୍ତା ଶଶ୍ୱଚ୍ଛତଧୃତିସ୍ତୁତା ।
ଶାଲିନୀ ଶାଲିଶୋଭାଢ୍ୟା ଶିଖିବାହନଗର୍ଭଭୃତ୍ ॥ ୧୬୦॥
ଶଂସନୀୟଚରିତ୍ରା ଚ ଶାତିତାଶେଷପାତକା ।
ଷଡ୍ଗୁଣୈଶ୍ୱର୍ୟସମ୍ପନ୍ନା ଷଡଙ୍ଗଶ୍ରୁତିରୂପିଣୀ ॥ ୧୬୧॥
ଷଣ୍ଢତାହାରିସଲିଲା ସ୍ତ୍ୟାୟନ୍ନଦନଦୀଶତା ।
ସରିଦ୍ୱାରା ଚ ସୁରସା ସୁପ୍ରଭା ସୁରଦୀର୍ଘିକା ॥ ୧୬୨॥
ସ୍ୱଃ ସିନ୍ଧୁଃ ସର୍ୱଦୁଃଖଘ୍ନୀ ସର୍ୱବ୍ୟାଧିମହୌଷଧମ୍ ।
ସେବ୍ୟା ସିଦ୍ଧିଃ ସତୀ ସୂକ୍ତିଃ ସ୍କନ୍ଦସୂଶ୍ଚ ସରସ୍ୱତୀ ॥ ୧୬୩॥
ସମ୍ପତ୍ତରଙ୍ଗିଣୀ ସ୍ତୁତ୍ୟା ସ୍ଥାଣୁମୌଲିକୃତାଲୟା ।
ସ୍ଥୈର୍ୟଦା ସୁଭଗା ସୌଖ୍ୟା ସ୍ତ୍ରୀଷୁ ସୌଭାଗ୍ୟଦାୟିନୀ ॥ ୧୬୪॥
ସ୍ୱର୍ଗନିଃଶ୍ରେଣିକା ସୂମା ସ୍ୱଧା ସ୍ୱାହା ସୁଧାଜଲା । var ସୂକ୍ଷ୍ମା
ସମୁଦ୍ରରୂପିଣୀ ସ୍ୱର୍ଗ୍ୟା ସର୍ୱପାତକବୈରିଣୀ ॥ ୧୬୫॥
ସ୍ମୃତାଘହାରିଣୀ ସୀତା ସଂସାରାବ୍ଧିତରଣ୍ଡିକା ।
ସୌଭାଗ୍ୟସୁନ୍ଦରୀ ସନ୍ଧ୍ୟା ସର୍ୱସାରସମନ୍ୱିତା ॥ ୧୬୬॥
ହରପ୍ରିୟା ହୃଷୀକେଶୀ ହଂସରୂପା ହିରଣ୍ମୟୀ ।
ହୃତାଘସଙ୍ଘା ହିତକୃଦ୍ଧେଲା ହେଲାଘଗର୍ୱହୃତ୍ ॥ ୧୬୭॥
କ୍ଷେମଦା କ୍ଷାଲିତାଘୌଘା କ୍ଷୁଦ୍ରବିଦ୍ରାବିଣୀ କ୍ଷମା ।
ଗଙ୍ଗେତି ନାମସାହସ୍ରଂ ଗଙ୍ଗାୟାଃ କଲଶୋଦ୍ଭବ । var ଇତି ନାମସହସ୍ରଂ ହି
କୀର୍ତୟିତ୍ୱା ନରଃ ସମ୍ୟଗ୍ଗଙ୍ଗାସ୍ନାନଫଲଂ ଲଭେତ୍ ॥ ୧୬୮॥
ସର୍ୱପାପପ୍ରଶମନଂ ସର୍ୱବିଘ୍ନବିନାଶନମ୍ ।
ସର୍ୱସ୍ତୋତ୍ରଜପାଚ୍ଛ୍ରେଷ୍ଠଂ ସର୍ୱପାବନପାବନମ୍ ॥ ୧୬୯॥
ଶ୍ରଦ୍ଧୟାଭୀଷ୍ଟଫଲଦଂ ଚତୁର୍ୱର୍ଗସମୃଦ୍ଧିକୃତ୍ ।
ସକୃଜ୍ଜପାଦବାପ୍ନୋତି ହ୍ୟେକକ୍ରତୁଫଲଂ ମୁନେ ॥ ୧୭୦॥
ସର୍ୱତୀର୍ଥେଷୁ ଯଃ ସ୍ନାତଃ ସର୍ୱୟଜ୍ଞେଷୁ ଦୀକ୍ଷିତଃ ।
ତସ୍ୟ ଯତ୍ଫଲମୁଦ୍ଦିଷ୍ଟଂ ତ୍ରିକାଲପଠନାଚ୍ଚ ତତ୍ ॥ ୧୭୧॥
ସର୍ୱବ୍ରତେଷୁ ଯତ୍ପୁଣ୍ୟଂ ସମ୍ୟକ୍ଚୀର୍ଣେଷୁ ବାଡବ ।
ତତ୍ଫଲଂ ସମବାପ୍ନୋତି ତ୍ରିସନ୍ଧ୍ୟଂ ନିୟତଃ ପଠନ୍ ॥ ୧୭୨॥
ସ୍ନାନକାଲେ ପଠେଦ୍ୟସ୍ତୁ ଯତ୍ର କୁତ୍ର ଜଲାଶୟେ ।
ତତ୍ର ସନ୍ନିହିତା ନୂନଂ ଗଙ୍ଗା ତ୍ରିପଥଗା ମୁନେ ॥ ୧୭୩॥
ଶ୍ରେୟୋଽର୍ଥୀ ଲଭତେ ଶ୍ରେୟୋ ଧନାର୍ଥୀ ଲଭତେ ଧନମ୍ ।
କାମୀ କାମାନବାପ୍ନୋତି ମୋକ୍ଷାର୍ଥୀ ମୋକ୍ଷମାପ୍ନୁୟାତ୍ ॥ ୧୭୪॥
ବର୍ଷଂ ତ୍ରିକାଲପଠନାଚ୍ଛ୍ରଦ୍ଧୟା ଶୁଚିମାନସଃ ।
ଋତୁକାଲାଭିଗମନାଦପୁତ୍ରଃ ପୁତ୍ରବାନ୍ ଭବେତ୍ ॥ ୧୭୫॥
ନାକାଲମରଣଂ ତସ୍ୟ ନାଗ୍ନିଚୋରାହିସାଧ୍ୱସମ୍ ।
ନାମ୍ନାଂ ସହସ୍ରଂ ଗଙ୍ଗାୟା ଯୋ ଜପେଚ୍ଛ୍ରଦ୍ଧୟା ମୁନେ ॥ ୧୭୬॥
ଗଙ୍ଗାନାମସହସ୍ରଂ ତୁ ଜପ୍ତ୍ୱା ଗ୍ରାମାନ୍ତରଂ ବ୍ରଜେତ୍ ।
କାର୍ୟସିଦ୍ଧିମବାପ୍ନୋତି ନିର୍ୱିଘ୍ନୋ ଗେହମାବିଶେତ୍ ॥ ୧୭୭॥
ତିଥିବାରର୍କ୍ଷୟୋଗାନାଂ ନ ଦୋଷଃ ପ୍ରଭବେତ୍ତଦା ।
ଯଦା ଜପ୍ତ୍ୱା ବ୍ରଜେଦେତତ୍ ସ୍ତୋତ୍ରଂ ଗ୍ରାମାନ୍ତରଂ ନରଃ ॥ ୧୭୮॥
ଆୟୁରାରୋଗ୍ୟଜନନଂ ସର୍ୱୋପଦ୍ରବନାଶନମ୍ ।
ସର୍ୱସିଦ୍ଧିକରଂ ପୁଂସାଂ ଗଙ୍ଗାନାମସହସ୍ରକମ୍ ॥ ୧୭୯॥
ଜନ୍ମାନ୍ତରସହସ୍ରେଷୁ ଯତ୍ପାପଂ ସମ୍ୟଗର୍ଜିତମ୍ ।
ଗଙ୍ଗାନାମସହସ୍ରସ୍ୟ ଜପନାତ୍ତତ୍କ୍ଷୟଂ ବ୍ରଜେତ୍ ॥ ୧୮୦॥
ବ୍ରହ୍ମଘ୍ନୋ ମଦ୍ୟପଃ ସ୍ୱର୍ଣସ୍ତେୟୀ ଚ ଗୁରୁତଲ୍ପଗଃ ।
ତତ୍ସଂୟୋଗୀ ଭ୍ରୂଣହନ୍ତା ମାତୃହା ପିତୃହା ମୁନେ ॥ ୧୮୧॥
ବିଶ୍ୱାସଘାତୀ ଗରଦଃ କୃତଘ୍ନୋ ମିତ୍ରଘାତକଃ ।
ଅଗ୍ନିଦୋ ଗୋବଧକରୋ ଗୁରୁଦ୍ରବ୍ୟାପହାରକଃ ॥ ୧୮୨॥
ମହାପାତକୟୁକ୍ତୋଽପି ସଂୟୁକ୍ତୋଽପ୍ୟୁପପାତକୈଃ ।
ମୁଚ୍ୟତେ ଶ୍ରଦ୍ଧୟା ଜପ୍ତ୍ୱା ଗଙ୍ଗାନାମସହସ୍ରକମ୍ ॥ ୧୮୩॥
ଆଧିବ୍ୟାଧିପରିକ୍ଷିପ୍ତୋ ଘୋରତାପପରିପ୍ଲୁତଃ ।
ମୁଚ୍ୟତେ ସର୍ୱଦୁଃଖେଭ୍ୟଃ ସ୍ତବସ୍ୟାସ୍ୟାନୁକୀର୍ତନାତ୍ ॥ ୧୮୪॥
ସମ୍ବତ୍ସରେଣ ଯୁକ୍ତାତ୍ମା ପଠନ୍ ଭକ୍ତିପରାୟଣଃ ।
ଅଭୀପ୍ସିତାଂ ଲଭେତ୍ସିଦ୍ଧିଂ ସର୍ୱୈଃ ପାପୈଃ ପ୍ରମୁଚ୍ୟତେ ॥ ୧୮୫॥
ସଂଶୟାବିଷ୍ଟଚିତ୍ତସ୍ୟ ଧର୍ମବିଦ୍ୱେଷିଣୋଽପି ଚ ।
ଦାମ୍ଭିକସ୍ୟାପି ହିଂସ୍ରସ୍ୟ ଚେତୋ ଧର୍ମପରଂ ଭବେତ୍ ॥ ୧୮୬॥
ବର୍ଣାଶ୍ରମପଥୀନସ୍ତୁ କାମକ୍ରୋଧବିବର୍ଜିତଃ ।
ଯତ୍ଫଲଂ ଲଭତେ ଜ୍ଞାନୀ ତଦାପ୍ନୋତ୍ୟସ୍ୟ କୀର୍ତନାତ୍ ॥ ୧୮୭॥
ଗାୟତ୍ର୍ୟଯୁତଜପ୍ୟେନ ଯତ୍ଫଲଂ ସମୁପାର୍ଜିତମ୍ ।
ସକୃତ୍ପଠନତଃ ସମ୍ୟକ୍ତଦଶେଷମବାପ୍ନୁୟାତ୍ ॥ ୧୮୮॥
ଗାଂ ଦତ୍ତ୍ୱା ବେଦବିଦୁଷେ ଯତ୍ଫଲଂ ଲଭତେ କୃତୀ ।
ତତ୍ପୁଣ୍ୟଂ ସମ୍ୟଗାଖ୍ୟାତଂ ସ୍ତବରାଜସକୃଜ୍ଜପାତ୍ ॥ ୧୮୯॥
ଗୁରୁଶୁଶ୍ରୂଷଣଂ କୁର୍ୱନ୍ ଯାବଜ୍ଜୀବଂ ନରୋତ୍ତମଃ ।
ଯତ୍ପୁଣ୍ୟମର୍ଜୟେତ୍ତଦ୍ଭାଗ୍ୱର୍ଷଂ ତ୍ରିଷବଣଂ ଜପନ୍ ॥ ୧୯୦॥
ବେଦପାରାୟଣାତ୍ପୁଣ୍ୟଂ ଯଦତ୍ର ପରିପଠ୍ୟତେ ।
ତତ୍ଷଣ୍ମାସେନ ଲଭତେ ତ୍ରିସନ୍ଧ୍ୟଂ ପରିକୀର୍ତନାତ୍ ॥ ୧୯୧॥
ଗଙ୍ଗାୟାଃ ସ୍ତବରାଜସ୍ୟ ପ୍ରତ୍ୟହଂ ପରିଶୀଲନାତ୍ ।
ଶିବଭକ୍ତିମବାପ୍ନୋତି ବିଷ୍ଣୁଭକ୍ତୋଽଥବା ଭବେତ୍ ॥ ୧୯୨॥
ଯଃ କୀର୍ତୟେଦନୁଦିନଂ ଗଙ୍ଗାନାମସହସ୍ରକମ୍ ।
ତତ୍ସମୀପେ ସହଚରୀ ଗଙ୍ଗାଦେବୀ ସଦା ଭବେତ୍ ॥ ୧୯୩॥
ସର୍ୱତ୍ର ପୂଜ୍ୟୋ ଭବତି ସର୍ୱତ୍ର ବିଜୟୀ ଭବେତ୍ ।
ସର୍ୱତ୍ର ସୁଖମାପ୍ନୋତି ଜାହ୍ନବୀସ୍ତୋତ୍ରପାଠତଃ ॥ ୧୯୪॥
ସଦାଚାରୀ ସ ବିଜ୍ଞେୟଃ ସ ଶୁଚିସ୍ତୁ ସଦୈବ ହି ।
କୃତସର୍ୱସୁରାର୍ଚଃ ସ କୀର୍ତୟେଦ୍ୟ ଇମାଂ ସ୍ତୁତିମ୍ ॥ ୧୯୫॥
ତସ୍ମିଂସ୍ତୃପ୍ତେ ଭବେତ୍ ତୃପ୍ତା ଜାହ୍ନବୀ ନାତ୍ର ସଂଶୟଃ ।
ତସ୍ମାତ୍ସର୍ୱପ୍ରୟତ୍ନେନ ଗଙ୍ଗାଭକ୍ତଂ ସମର୍ଚୟେତ୍ ॥ ୧୯୬॥
ସ୍ତବରାଜମିମଂ ଗାଙ୍ଗଂ ଶୃଣୁୟାଦ୍ୟଶ୍ଚ ବୈ ପଠେତ୍ ।
ଶ୍ରାବୟେଦଥ ତଦ୍ଭକ୍ତାନ୍ ଦମ୍ଭଲୋଭବିବର୍ଜିତଃ ॥ ୧୯୭॥
ମୁଚ୍ୟତେ ତ୍ରିବିଧୈଃ ପାପୈର୍ମନୋବାକ୍କାୟସମ୍ଭବୈଃ ।
କ୍ଷଣାନ୍ନିଷ୍ପାପତାମେତି ପିତୄଣାଂ ଚ ପ୍ରିୟୋ ଭବେତ୍ ॥ ୧୯୮॥
ସର୍ୱଦେବପ୍ରିୟଶ୍ଚାପି ସର୍ୱର୍ଷିଗଣସମ୍ମତଃ ।
ଅନ୍ତେ ବିମାନମାରୁହ୍ୟଂ ଦିବ୍ୟସ୍ତ୍ରୀଶତସମ୍ବୃତଃ ॥ ୧୯୯॥
ଦିବ୍ୟାଭରଣସମ୍ପନ୍ନୋ ଦିବ୍ୟଭୋଗସମନ୍ୱିତଃ ।
ନନ୍ଦନାଦିବନେ ସ୍ୱୈରଂ ଦେବବତ୍ସ ପ୍ରମୋଦତେ ॥ ୨୦୦॥
ଭୁଜ୍ୟମାନେଷୁ ବିପ୍ରେଷୁ ଶ୍ରାଦ୍ଧକାଲେ ବିଶେଷତଃ ।
ଜପନ୍ନିଦଂ ମହାସ୍ତୋତ୍ରଂ ପିତୄଣାଂ ତୃପ୍ତିକାରକମ୍ ॥ ୨୦୧॥
ଯାବନ୍ତି ତତ୍ର ସିକ୍ଥାନି ଯାବନ୍ତୋଽମ୍ବୁକଣାଃ ସ୍ଥିତାଃ ।
ତାବନ୍ତ୍ୟେବ ହି ବର୍ଷାଣି ମୋଦନ୍ତେ ସ୍ୱପିତାମହାଃ ॥ ୨୦୨॥
ଯଥା ପ୍ରୀଣନ୍ତି ପିତରୋ ପ୍ରୀଣନ୍ତି ଗଙ୍ଗାୟାଂ ପିଣ୍ଡଦାନତଃ ।
ତଥୈବ ତୃପ୍ନୁୟୁଃ ଶ୍ରାଦ୍ଧେ ସ୍ତବସ୍ୟାସ୍ୟାନୁସଂଶ୍ରବାତ୍ ॥ ୨୦୩॥
ଏତତ୍ସ୍ତୋତ୍ରଂ ଗୃହେ ଯସ୍ୟ ଲିଖିତଂ ପରିପୂଜ୍ୟତେ ।
ତତ୍ର ପାପଭୟଂ ନାସ୍ତି ଶୁଚି ତଦ୍ଭବନଂ ସଦା ॥ ୨୦୪॥
ଅଗସ୍ତେ କିଂ ବହୂକ୍ତେନ ଶୃଣୁ ମେ ନିଶ୍ଚିତଂ ବଚଃ ।
ସଂଶୟୋ ନାତ୍ର କର୍ତବ୍ୟଃ ସନ୍ଦେଗ୍ଧରି ଫଲଂ ନହି ॥ ୨୦୫॥
ଯାବନ୍ତି ମର୍ତ୍ୟେ ସ୍ତୋତ୍ରାଣି ମନ୍ତ୍ରଜାଲାନ୍ୟନେକଶଃ ।
ତାବନ୍ତି ସ୍ତବରାଜସ୍ୟ ଗାଙ୍ଗେୟସ୍ୟ ସମାନି ନ ॥ ୨୦୬॥
ଯାବଜ୍ଜନ୍ମ ଜପେଦ୍ୟସ୍ତୁ ନାମ୍ନାମେତତ୍ସହସ୍ରକମ୍ ।
ସ କୀକଟେଷ୍ୱପି ମୃତୋ ନ ପୁନର୍ଗର୍ଭମାବିଶେତ୍ ॥ ୨୦୭॥
ନିତ୍ୟଂ ନିୟମବାନେତଦ୍ୟୋ ଜପେତ୍ସ୍ତୋତ୍ରମୁତ୍ତମମ୍ ।
ଅନ୍ୟତ୍ରାପି ବିପନ୍ନଃ ସ ଗଙ୍ଗାତୀରେ ମୃତୋ ଭବେତ୍ ॥ ୨୦୮॥
ଏତତ୍ସ୍ତୋତ୍ରବରଂ ରମ୍ୟଂ ପୁରା ପ୍ରୋକ୍ତଂ ପିନାକିନା ।
ବିଷ୍ଣବେ ନିଜଭକ୍ତାୟ ମୁକ୍ତିବୀଜାକ୍ଷରାସ୍ପଦମ୍ ॥ ୨୦୯॥
ଗଙ୍ଗାସ୍ନାନପ୍ରତିନିଧିଃ ସ୍ତୋତ୍ରମେତନ୍ମୟେରିତମ୍ ।
ସିସ୍ନାସୁର୍ଜାହ୍ନବୀଂ ତସ୍ମାଦେତତ୍ସ୍ତୋତ୍ରଂ ଜପେତ୍ସୁଧୀଃ ॥ ୨୧୦॥
॥ ଇତି ଶ୍ରୀସ୍କନ୍ଦପୁରାଣେ ଏକାଶୀତିସାହସ୍ର୍ୟାଂ
ସଂହିତାୟାଂ ଚତୁର୍ଥୈକାଶୀଖଣ୍ଡେପୂର୍ୱାର୍ଧେ
ଗଙ୍ଗାସହସ୍ରନାମକଥନଂ ନାମୈକୋନତ୍ରିଂଶତ୍ତମୋଽଧ୍ୟାୟଃ ॥
ସିତମକରନିଷଣ୍ଣାଂ ଶୁଭ୍ରବର୍ଣାଂ ତ୍ରିନେତ୍ରାଂ
କରଧୃତକଲଶୋଦ୍ୟତ୍ସୋପଲାଭୀତ୍ୟଭୀଷ୍ଟାମ୍ ।
ବିଧିହରିରୂପାଂ ସେନ୍ଦୁକୋଟୀରଜୂଟାଂ
କଲିତସିତଦୁକୂଲାଂ ଜାହ୍ନବୀ ତାଂ ନମାମି ॥
Encoded and proofread by DPD, Kirk Wortman