ശ്രീഗണേശായ നമഃ ..
യദവധി തവ നീരം പാതകീ നൈതി ഗംഗേ
തദവധി മലജാലൈർനൈവ മുക്തഃ കലൗ സ്യാത് .
തവ ജലകണികാഽലം പാപിനാം പാപശുദ്ധയൈ
പതിതപരമദീനാംസ്ത്വം ഹി പാസി പ്രപന്നാൻ .. 1..
തവ ശിവജലലേശം വായുനീതം സമേത്യ
സപദി നിരയജാലം ശൂന്യതാമേതി ഗംഗേ .
ശമലഗിരിസമൂഹാഃ പ്രസ്ഫുണ്ടതി പ്രചണ്ഡാസ്ത്വയി
സഖി വിശതാം നഃ പാപശങ്കാ കുതഃ സ്യാത് .. 2..
തവ ശിവജലജാലം നിഃസൃതം യർഹി
ഗംഗേ സകലഭുവനജാലം പൂതപൂതം തദാഽഭൂത് .
യമഭടകലിവാർതാ ദേവി ലുപ്താ യമോഽപി
വ്യധികൃതവരദേഹാഃ പൂർണകാമാഃ സകാമാഃ .. 3..
മധുമധുവനപൂഗൈ രത്നപൂഗൈർനൃപൂഗൈർ-
മധുമധുവനപൂഗൈർദേവപൂഗൈഃ സപൂഗൈഃ .
പുരഹരപരമാംഗേ ഭാസി മായേവ ഗംഗേ ശമയസി
വിഷതാപം ദേവദേവസ്യ വന്ദ്യം .. 4..
ചലിതശശികുലാഭൈരുത്തരംഗൈസ്തരംഗൈർ-
അമിതനദനദീനാമംഗസംഗൈരസംഗൈഃ .
വിഹരസി ജഗദണ്ഡേ ഖണ്ഡംയതീ ഗിരീന്ദ്രാൻ രമയസി
നിജകാന്തം സാഗരം കാന്തകാതേ .. 5..
തവ പരമഹിമാനം ചിത്തവാചാമമാനം
ഹരിഹരവിധിശത്ര്കാ നാപി ഗംഗേ വിദന്തി .
ശ്രുതികുലമഭിധത്തേ ശങ്കിതം തം ഗുണാന്തം
ഗുണഗണസുവിലാപൈർനേതി നേതീതി സത്യം .. 6..
തവ നുതിനതിനാമാന്യപ്യഘം പാവയന്തി ദദതി
പരമശാന്തിം ദിവ്യഭോഗാൻ ജനാനാം .
ഇതി പതിതശരണ്യേ ത്വാം പ്രപന്നോഽസ്മി
മാതർലലിതതരതരംഗേ ചാംഗ ഗവേപ്രസീദ .. 7..
ശുഭതരകൃതയോഗാദ്വിശ്വനാഥ-
പ്രസാദാദ്ഭവഹരവരവിദ്യാം പ്രാപ്യ കാശ്യാം ഹി ഗംഗേ .
ഭഗവതി തവ തീരേ നീരസാരം നിപീയ
മുദിതഹൃദയകഞ്ജേ നന്ദസൂനും ഭജേഽഹം .. 8..
ഗംഗാഷ്ടകമിദം കൃത്വാ ഭുക്തിമുക്തിപ്രദം നൃണാം .
സത്യജ്ഞാനാനന്ദതീർഥയതിനാ സ്വർപിതം ശിവേ .. 9..
തേന പ്രണാതു ഭഗവാൻ ശിവോ ഗംഗാധരോ വിഭുഃ .
കരോതു ശങ്കരഃ കാശ്യാം ജനാനാം സതതം ശിവം .. 10..
ഇതി സത്യജ്ഞാനാനന്ദതീർഥയതിനാ വിരചിതം ഗംഗാഷ്ടകം സമ്പൂർണം ..
Encoded and proofread by Dinesh Agarwal