#ಶ್ರೀನರ್ಮದಾಸಹಸ್ರನಾಮಸ್ತೋತ್ರಂ

 


ಶ್ರೀ ಗುರುಭ್ಯೋ ನಮಃ .
ಓಂ ಶ್ರೀ ಗಣೇಶಾಯ ನಮಃ .
ಶ್ರೀ ನರ್ಮದಾಯೈ ನಮಃ .
ವಿನಿಯೋಗಃ
ಅಸ್ಯ ಶ್ರೀನರ್ಮದಾಸಹಸ್ರನಾಮಸ್ತೋತ್ರಮಾಲಾಮಂತ್ರಸ್ಯ ರುದ್ರ ಋಷಿರ್ವಿರಾಟ್ಛಂದಃ
ಶ್ರೀನರ್ಮದಾದೇವತಾ ಹ್ರೀಂ ಬೀಜಂ ಶ್ರೀಶಕ್ತಿಃ ಸ್ವಾಹಾಕೀಲಕಂ
ಶ್ರೀನರ್ಮದಾಪ್ರಸಾದಸಿದ್ಧ್ಯರ್ಥೇ ಪಠನೇ ಪೂಜನೇ ಸಹಸ್ರಾರ್ಚನೇ ಚ ವಿನಿಯೋಗಃ .

ಋಷ್ಯಾದಿ ನ್ಯಾಸಃ
ರುದ್ರಋಷಯೇ ನಮಃ . ಶಿರಸಿ
ವಿರಾಟ್ಛಂದಸೇ ನಮಃ . ಮುಖೇ
ಶ್ರೀನರ್ಮದಾದೇವತಾಯೈ ನಮಃ . ಹೃದಯೇ
ಹ್ರೀಂ ಬೀಜಾಯೈ ನಮಃ . ಗುಹ್ಯೇ
ಶ್ರೀಂ ಶಕ್ತಯೇ ನಮಃ . ಪಾದಯೋಃ
ಸ್ವಾಹಾ ಕೀಲಕಾಯ ನಮಃ . ನಾಭೌ
ಶ್ರೀನರ್ಮದಾಪ್ರಸಾದಸಿದ್ಧಯರ್ಥೇ ವಿನಿಯೋಗಾಯ ನಮಃ . ಸರ್ವಾಂಗೇ

ಕರಾಂಗನ್ಯಾಸಃ
ಓಂ ಹ್ರೀಂ ಶ್ರೀಂ ನರ್ಮದಾಯೈ ಸ್ವಾಹಾ ಇತಿ ನವಾರ್ಣಮಂತ್ರಣೇ .
ಅಥವಾ
ಓಂ ನಮಃ ಅಂಗುಷ್ಠಾಭ್ಯಾಂ ನಮಃ . ಹೃದಯಾಯ ನಮಃ .
ಹ್ರೀಂ ನಮಃ ತರ್ಜನೀಭ್ಯಾಂ ನಮಃ . ಶಿರಸೇ ಸ್ವಾಹಾ .
ಓಂ ನಮಃ ಮಧ್ಯಮಾಭ್ಯಾಂ ನಮಃ . ಶಿಖಾಯೈ ವಷಟ್ .
ನರ್ಮದಾಯೈ ನಮಃ ಅನಾಮಿಕಾಭ್ಯಾಂ ನಮಃ . ಕವಚಾಯ ಹುಂ .
ಸ್ವಾಹಾ ನಮಃ ಕನಿಷ್ಠಿಕಾಭ್ಯಾಂ ನಮಃ . ನೇತ್ರತ್ರಯಾಯ ವೌಷಟ್ .
ಓಂ ಹ್ರೀಂ ಶ್ರೀಂ ನರ್ಮದಾಯೈ ಸ್ವಾಹಾ
ಕರತಲಕರಪೃಷ್ಠಾಭ್ಯಾಂ ನಮಃ . ಅಸ್ತ್ರಾಯ ಫಟ್ .
ಮೂಲೇನ ತ್ರಿರ್ವ್ಯಾಪಕಂ .

ಧ್ಯಾನಂ
ಧ್ಯಾಯೇ ಶ್ರೀ ಸಿದ್ಧನಾಥಾಂ ಗಣವಹಸರಿತಾಂ ನರ್ಮದಾಂ ಶರ್ಮ್ಮದಾತ್ರೀಂ
ಶ್ಯಾಮಾಂ ಬಾಲೇವ ನೀಲಾಂಬರಮುಖನಯನಾಂಭೋಜಯುಗ್ಮೈಕಮಿಂದುಂ .
ಚೂಡಾಂಚಾಭೀತಿಮಾಲಾಂ ವರಜಲಕರಕಾಂ ಹಸ್ತಯುಗ್ಮೇ ದಧಾನಾಂ
ತೀರ್ಥಸ್ಥಾಂ ಛತ್ರಹಸ್ತಾಂ ಝಷವರನೃಪಗಾಂ ದೇಶಿಕಸ್ಯಾಸನಾಗ್ರೇ .. 1..

ನರ್ಮದೇ ಹರಸಂಭೂತೇ ಹರಲಿಂಗಾರ್ಚನಪ್ರಿಯೇ .
ಹರಲಿಂಗಾಂಚಿತತಟೇ ಜಯಾಘಂ ಹರ ನರ್ಮದೇ .. 2..

ಇತಿ ಧ್ಯಾತ್ವಾ ಯಂತ್ರೇಽಥವಾ ಪ್ರವಾಹೇ ಮಾನಸೋಪಚಾರೈಃ ಸಂಪೂಜ್ಯ
ನಾಮಸ್ತೋತ್ರಪಾಠಂ ಪ್ರತ್ಯೇಕ ನಾಮಮಂತ್ರೇಣ ಪೂಜನಂ
ವಾ ಸಮಾಚರೇತ್, ಯಂತ್ರಸ್ವರೂಪಂ ಯಥಾ
ಶ್ರೀನರ್ಮದಾಯೈ ನಮಃ .

ಅಥ ಸಹಸ್ರನಾಮಸ್ತೋತ್ರಂ .
ನರ್ಮದಾ ನಮನೀಯಾ ಚ ನಗೇಜ್ಯಾ ನಗರೇಶ್ವರೀ .
ನಗಮಾಲಾವೃತತಟಾ ನಗೇಂದ್ರೋದರಸಂಸೃತಾ .. 1..

ನದೀಶಸಂಗತಾ ನಂದಾ ನಂದಿವಾಹನಸನ್ನತಾ .
ನರೇಂದ್ರಮಾಲಿನೀ ನವ್ಯಾ ನಕ್ರಾಸ್ಯಾ ನರ್ಮಭಾಷಿಣೀ .. 2..

ನರಾರ್ತಿಘ್ನಾ ನರೇಶಾನೀ ನರಾಂತಕಭಯಾಪಹಾ .
ನರಕಾಸುರಹಂತ್ರೀ ಚ ನಕ್ರವಾಹನಶೋಭನಾ .. 3..

ನರಪ್ರಿಯಾ ನರೇಂದ್ರಾಣೀ ನರಸೌಖ್ಯವಿವರ್ಧಿನೀ .
ನಮೋರೂಪಾ ಚ ನಕ್ರೇಶೀ ನಗಜಾ ನಟನಪ್ರಿಯಾ .. 4..

ನಂದಿಕೇಶ್ವರಸಮ್ಮಾನ್ಯಾ ನಂದಿಕೇಶಾನಮೋಹಿನೀ .
ನಾರಾಯಣೀ ನಾಗಕನ್ಯಾ ನಾರಾಯಣಪರಾಯಣಾ .. 5..

ನಾಗಸಂಧಾರಿಣೀ ನಾರೀ ನಾಗಾಸ್ಯಾ ನಾಗವಲ್ಲಭಾ .
ನಾಕಿನೀ ನಾಕಗಮನಾ ನಾರಿಕೇಲಫಲಪ್ರಿಯಾ .. 6..

ನಾದೇಯಜಲಸಂವಾಸಾ ನಾವಿಕೈರಭಿಸಂಶ್ರಿತಾ .
ನಿರಾಕಾರಾ ನಿರಾಲಂಬಾ ನಿರೀಹಾ ಚ ನಿರಂಜನಾ .. 7..

ನಿತ್ಯಾನಂದಾ ನಿರ್ವಿಕಾರಾ ನಿಃಶಂಕಾ ನಿಶ್ರಯಾತ್ಮಿಕಾ .
ನಿತ್ಯರೂಪಾ ನಿಃಸ್ಪೃಹಾ ಚ ನಿರ್ಲೋಭಾ ನಿಷ್ಕಲೇಶ್ವರೀ .. 8..

ನಿರ್ಲೇಪಾ ನಿಶ್ಚಲಾ ನಿತ್ಯಾ ನಿರ್ಧೂತಾನನುಮೋದಿನೀ .
ನಿರ್ಮಲಾ ನಿರ್ಮಲಗತಿರ್ನಿರಾಮಯಸುವಾರಿಣೀ .. 9..

ನಿತಂಬಿನೀ ಚ ನಿರ್ದಂಷ್ಟ್ರಾ ನಿರ್ಧನತ್ವನಿವಾರಿಣೀ .
ನಿರ್ವಿಕಾರಾ ನಿಶ್ಚಯಿನೀ ನಿರ್ಭ್ರಮಾ ನಿರ್ಜರಾರ್ಥದಾ .. 10..

ನಿಷ್ಕಲಂಕಾ ನಿರ್ಜರಾ ಚ ನಿರ್ದೋಷಾ ನಿರ್ಝರಾ ನಿಜಾ .
ನಿಶುಂಭಶುಂಭದಮನೀ ನಿಘ್ನನಿಗ್ರಹಕಾರಿಣೀ .. 11..

ನೀಪಪ್ರಿಯಾ ನೀಪರತಾ ನೀಚಾಚರಣನಿರ್ದಯಾ .
ನೀಲಕ್ರಾಂತಾ ನೀರವಾಹಾ ನೀಲಾಲಕವಿಲಾಸಿನೀ .. 12..

ನುತಿಪಾತ್ರಾ ನುತಿಪ್ರಿಯಾ ನುತಪಾಪನಿವಾರಿಣೀ .
ನೂತನಾಲಂಕಾರಸಂಧಾತ್ರೀ ನೂಪುರಾಭರಣಪ್ರಿಯಾ .. 13..

ನೇಪಥ್ಯರಂಜಿತಾ ನೇತ್ರೀ ನೇದೀಯಃಸ್ವರಭಾಜಿನೀ .
ನೈಸರ್ಗಿಕಾನಂದದಾತ್ರೀ ನೈರುಜ್ಯಕಾರಿವಾರಿಣೀ .. 14..

ನಂದವರ್ಧಿನೀ ನಂದಯಿತ್ರೀ ನಂದಕೀ ನಂದರೂಪಿಣೀ .
ಪರಮಾ ಪರಮೇಶಾನಾ ಪರಾಧಾರಾ ಪರಮೇಶ್ವರೀ .. 15..

ಪದ್ಮಾಭಾ ಪದ್ಯನಯನಾ ಪದ್ಮಾ ಪದ್ಮದಲಪ್ರಿಯಾ .
ಪದ್ಮಾಕ್ಷೀ ಪದ್ಮವದನಾ ಪದ್ಮಮಾಲಾವಿಮೂಷಿಣೀ .. 16..

ಪಕ್ಷಾಧಾರಾ ಪಕ್ಷಿಣೀ ಚ ಪಕ್ಷೇಜ್ಯಾ ಪರಮೇಶ್ವರೀ .
ಪಶುಪ್ರಿಯಾ ಪಶುರತಾ ಪಯಃಸಮ್ಮೋಹಕಾರಿಣೀ .. 17..

ಪಥಿಪ್ರಿಯಾ ಪಥಿರತಾ ಪಥಿನೀ ಪಥಿರಕ್ಷಿಣೀ .
ಪಂಕಕರ್ಕರಕೂಲಾ ಚ ಪಂಕಗ್ರಾಹಸುಸಂಯುತಾ .. 18..

ಪ್ರಭಾವತೀ ಪ್ರಗಲ್ಭಾ ಚ ಪ್ರಭಾಜಿತಜಗತ್ತಮಾ .
ಅಕೃತ್ರಿಮಪ್ರಭಾರೂಪಾ ಪರಬ್ರಹ್ಮಸ್ವರೂಪಿಣೀ .. 19..

ಪಾಪಾತ್ಮಾನಾಂ ಪಾವಯಿತ್ರೀ ಪಾಪಜಾಲನಿವಾರಿಣೀ .
ಪಾಕಶಾಸನವಂದ್ಯಾ ಚ ಪಾಪಸಂತಾಪಹಾರಿಣೀ .. 20..

ಪಿಕರೂಪಾ ಪಿಕೇಶೀ ಚ ಪಿಕವಾಕ್ ಪಿಕವಲ್ಲಭಾ .
ಪೀಯೂಷಾಢ್ಯಪ್ರಪಾನೀಯಾ ಪೀತಶ್ವೇತಾದಿವರ್ಣಿನೀ .. 21..

ಪುರಂದರೀ ಪುಂಡ್ರಧಾರೀ ಪುರುಹೂತಾಭಿವಂದಿತಾ .
ಪುಂಡರೀಕವಿಶಾಲಾಕ್ಷೀ ಪುರುಷಾರ್ಥಪ್ರದಾಯಿನೀ .. 22..

ಪೂತಾ ಪೂತೋದಕಾ ಪೂರ್ಣಾ ಪೂರ್ವಗಂಗಾ ಚ ಪೂರಿತಾ .
ಪಂಚಮೀ ಪಂಚಪ್ರೇಮಾ ಚ ಪಂಡಿತಾ ಪಂಕಜೇಶ್ವರೀ .. 23..

ಫಲದಾ ಫಲರೂಪಾ ಚ ಫಲೇಜ್ಯಾ ಫಲವರ್ಧಿನೀ .
ಫಣಿಪಾಲಾ ಫಲೇಶೀ ಚ ಫಲಾವರ್ಜ್ಯಾ ಫಣಿಪ್ರಿಯಾ .. 24..

ಬಲಾ ಬಾಲಾ ಬ್ರಹ್ಮರೂಪಾ ಬ್ರಹ್ಮವಿಷ್ಣುಶಿವಾತ್ಮಿಕಾ .
ಬದರೀಫಲಸಂದೋಹಸಂಸ್ಥಿತಾ ಬದರೀಪ್ರಿಯಾ .. 25..

ಬದರ್ಯಾಶ್ರಮಸಂಸ್ಥಾ ಚ ಬಕದಾಲ್ಭ್ಯಪ್ರಪೂಜಿತಾ .
ಬದರೀಫಲಸಂಸ್ನೇಹಾ ಬದರೀಫಲತೋಷಿಣೀ .. 26..

ಬದರೀಫಲಸಂಪೂಜ್ಯಾ ಬದರೀಫಲಭಾವಿತಾ .
ಬರ್ಹಿಭೀರಂಜಿತಾ ಚೈವ ವಹುಲಾ ವಹುಮಾರ್ಗಗಾ .. 27..

ಬಾಹುದಂಡವಿಲಾಸಿನೀ ಬ್ರಾಹ್ಮೀ ಬುದ್ಧಿವಿವರ್ಧಿನೀ .
ಭವಾನೀ ಭಯಹರ್ತ್ರೀ ಚ ಭವಪಾಶವಿಮೋಚಿನೀ .. 28..

ಭಸ್ಮಚಂದನಸಂಯುಕ್ತಾ ಭಯಶೋಕವಿನಾಶಿನೀ .
ಭಗಾ ಭಗವತೀ ಭವ್ಯಾ ಭಗೇಜ್ಯಾ ಭಗಪೂಜಿತಾ .. 29..

ಭಾವುಕಾ ಭಾಸ್ವತೀ ಭಾಮಾ ಭ್ರಾಮರೀ ಭಾಸಕಾರಿಣೀ .
ಭಾರದ್ವಾಜರ್ಷಿಸಂಪೂಜ್ಯಾ ಭಾಸುರಾ ಭಾನುಪೂಜಿತಾ .. 30..

ಭಾಲಿನೀ ಭಾರ್ಗವೀ ಭಾಸಾ ಭಾಸ್ಕರಾನಂದದಾಯಿನೀ .
ಭಿಕ್ಷುಪ್ರಿಯಾ ಭಿಕ್ಷುಪಾಲಾ ಭಿಕ್ಷುವೃಂದಸುವಂದಿತಾ .. 31..

ಭೀಷಣಾ ಭೀಮಶೌರ್ಯಾ ಚ ಭೀತಿದಾ ಭೀತಿಹಾರಿಣೀ .
ಭುಜಗೇಂದ್ರಶಯಪ್ರೀತಾ ಭುವಿಷ್ಠಾ ಭುವನೇಶ್ವರೀ .. 32..

ಭೂತಾತ್ಮಿಕಾ ಭೂತಪಾಲಾ ಭೂತಿದಾ ಭೂತಲೇಶ್ವರೀ .
ಭೂತಭವ್ಯಾತ್ಮಿಕಾ ಭೂರಿದಾ ಭೂರ್ಭೂರಿವಾರಿಣೀ . 33..

ಭೂಮಿಭೋಗರತಾ ಭುಮಿರ್ಭೂಮಿಸ್ಥಾ ಭೂಧರಾತ್ಮಜಾ .
ಭೂತನಾಥಸದಾಪ್ರೀತಾ ಭೂತನಾಥಸುಪೂಜಿತಾ .. 34..

ಭೂದೇವಾರ್ಚಿತಪಾದಾಬ್ಜಾ ಭೂಧರಾವೃತಸತ್ತಟಾ .
ಭೂತಪ್ರಿಯಾ ಭೂಪಶ್ರೀರ್ಭೂಪರಕ್ಷಿಣೀ ಭೂರಿಭೂಷಣಾ .. 35..

ಭೃಶಪ್ರವಾಹಾ ಭೃತಿದಾ ಭೃತಕಾಶಾಪ್ರಪೂರಿತಾ .
ಭೇದಯಿತ್ರೀ ಭೇದಕರ್ತ್ರೀ ಭೇದಾಭೇದವಿವರ್ಜಿತಾ .. 36..

ಭೈರವಪ್ರೀತಿಪಾತ್ರೀ ಚ ಭೈರವಾನಂದವರ್ಧಿನೀ .
ಭೋಗಿನೀ ಭೋಗದಾತ್ರೀ ಚ ಭೋಗಕೃದ್ಭೋಗವರ್ಧಿನೀ .. 37..

ಭೌಮಪ್ರಾಣಿಹಿತಾಕಾಂಕ್ಷೀ ಭೌಮೌಷಧಿವಿವರ್ಧಿನೀ .
ಮಹಾಮಾಯಾ ಮಹಾದೇವೀ ಮಹಿಲಾ ಚ ಮಹೇಶ್ವರೀ .. 38..

ಮಹಾಮೋಹಾಪಹಂತ್ರೀ ಚ ಮಹಾಯೋಗಪರಾಯಣಾ .
ಮಖಾನುಕೂಲಾ ಮಖಿನೀ ಮಖಭೂಸ್ತರಭೂಷಣಾ .. 39..

ಮನಸ್ವಿನೀ ಮಹಾಪ್ರಜ್ಞಾ ಮನೋಜ್ಞಾ ಮನೋಮೋಹಿನೀ .
ಮನಶ್ಚಾಂಚಲ್ಯಸಂಹರ್ತ್ರೀ ಮನೋಮಲವಿನಾಶಿನೀ .. 40..

ಮದಹಂತ್ರೀ ಮಥುಮತೀ ಮಧುರಾ ಮದಿರೇಕ್ಷಣಾ .
ಮಣಿಪ್ರಿಯಾ ಮನಃಸಂಸ್ಥಾ ಮದನಾಯುಧರೂಪಿಣೀ .. 41.. var  ಮನೀಷಿಣೀ
ಮತ್ಸ್ಯೋದರೀ ಮಹಾಗರ್ತಾ ಮಕರಾವಾಸರೂಪಿಣೀ .
ಮಾನಿನೀ ಮಾನದಾ ಮಾನ್ಯಾ ಮಾನೈಕ್ಯಾ ಮಾನಮಾನಿನೀ .. 42..

ಮಾರ್ಗದಾ ಮಾರ್ಜನರತಾ ಮಾರ್ಗಿಣೀ 200 ಮಾರ್ಗಣಪ್ರಿಯಾ .
ಮಿತಾಮಿತಸ್ವರೂಪಿಣೀ ಮಿಹಿಕಾ ಮಿಹಿರಪ್ರಿಯಾ .. 43..

ಮೀಢುಷ್ಟಮಸ್ತುತಪದಾ ಮೀಢುಷ್ಟಾ ಮೀರಗಾಮಿನೀ .
ಮುಕ್ತಪ್ರವಾಹಾ ಮುಖರಾ ಮುಕ್ತಿದಾ ಮುನಿಸೇಬಿತಾ .. 44..

ಮೂಲ್ಯವದ್ವಸ್ತುಗರ್ಭಾ ಚ ಮೂಲಿಕಾ ಮೂರ್ತರೂಪಿಣೀ .
ಮೃಗದೃಷ್ಟಿರ್ಮೃದುರವಾ ಮೃತಸಂಜೀವವಾರಿಣೀ .. 45..

ಮೇಧಾವಿನೀ ಮೇಘಪುಷ್ಟಿರ್ಮೇಘಮಾನಾತಿಗಾಮಿನೀ .
ಮೋಹಿನೀ ಮೋಹಹಂತ್ರೀ ಚ ಮೋದಿನೀ ಮೋಕ್ಷದಾಯಿನೀ .. 46..

ಮಂತ್ರರೂಪಾ ಮಂತ್ರಗರ್ಭಾ ಮಂತ್ರವಿಜ್ಜನಸೇವಿತಾ .
ಯಕ್ಷಿಣೀ ಯಕ್ಷಪಾಲಾ ಚ ಯಕ್ಷಪ್ರೀತಿವಿವದ್ಧಿನೀ .. 47..

ಯಕ್ಷವಾರಣದಕ್ಷಾ ಚ ಯಕ್ಷಸಮ್ಮೋಹಕಾರಿಣೀ .
ಯಶೋಧರಾ ಯಶೋದಾ ಚ ಯದುನಾಥವಿಮೋಹಿನೀ .. 48..

ಯಜ್ಞಾನುಕೂಲಾ ಯಜ್ಞಾಂಗಾ ಯಜ್ಞೇಜ್ಯಾ ಯಜ್ಞವರ್ಧಿನೀ .
ಯಾಜ್ಯೌಷಧಿಸುಸಂಪನ್ನಾ ಯಾಯಜೂಕಜನೈಃಶ್ರಿತಾ .. 49..

ಯಾತ್ರಾಪ್ರಿಯಾ ಯಾತ್ರಿಕೈಃ ಸಂವ್ಯಾಪ್ತಭೂರ್ಯಾತ್ರಿಕಾರ್ಥದಾ .
ಯುವತೀ ಯುಕ್ತಪದವೀ ಯುವತೀಜನಸನ್ನುತಾ .. 50..

ಯೋಗಮಾಯಾ ಯೋಗಸಿದ್ಧಾ ಯೋಗಿನೀ ಯೋಗವರ್ಧಿನೀ .
ಯೋಗಿಸಂಶ್ರಿತಕೂಲಾ ಚ ಯೋಗಿನಾಂ ಗತಿದಾಯಿನೀ .. 51..

ಯಂತ್ರತಂತ್ರಜ್ಞಸಂಜುಷ್ಟಾ ಯಂತ್ರಿಣೀ ಯಂತ್ರರೂಪಿಣೀ .
ರಮಾರೂಪಾ ಚ ರಮಣೀ ರತಿಗರ್ವವಿಭಂಜಿನೀ .. 52..

ರತಿಪೂಜ್ಯಾ ರಕ್ಷಿಕಾ ಚ ರಕ್ಷೋಗಣವಿಮೋಹಿನೀ .
ರಮಣೀಯವಿಶಾಲಾಂಗಾ ರಂಗಿಣೀ ರಭಸೋಗಮಾ .. 53..

ರಘುರಾಜಾರ್ಚಿತಪದಾ ರಘುವಂಶವಿವರ್ಧಿನೀ .
ರಾಕೇಶವದನಾ ರಾಜ್ಞೀ ರಾಜಭೋಗವಿಲಾಸಿನೀ .. 54..

ರಾಜಕೇಲಿಸಮಾಕ್ರಾಂತಾ ರಾಗಿಣೀ ರಾಜತಪ್ರಮಾ .
ರಸಪ್ರಿಯಾ ರಾಸಕೇಲಿವರ್ಧಿನೀ ರಾಸರಂಜಿನೀ .. 55..

ರಿಕ್ಥರೇಣುಕಣಾಕೀರ್ಣಾ ರಂಜಿನೀ ರತಿಗಾಮಿನೀ .
ರುಚಿರಾಂಗಾ ರುಚ್ಯನೀರಾ ರುಕ್ಮಾಭರಣಮೂಷಿತಾ .. 56..

ರೂಪಾತಿಸುಂದರಾ ರೇವಾ ರೈಃಪ್ರದಾಯಿನೀ ರೈಣವೀ .
ರೋಚಿಷ್ಮತೀ ರೋಗಹರ್ತ್ರೀ ರೋಗಿಣಾಮಮೃತೋಪಮಾ .. 57..

ರೌಕ್ಷ್ಯಹರ್ತ್ರೀ ರೌದ್ರರೂಪಾ ರಂಹಗಾ ರಂಹಣಪ್ರಿಯಾ .
ಲಕ್ಷ್ಮಣಾ ಲಕ್ಷಿಣೀ ಲಕ್ಷ್ಮೀರ್ಲಕ್ಷಣಾ ಲಲಿತಾಂಬಿಕಾ .. 58..

ಲಲಿತಾಲಾಪಸಂಗೀತಾ ಲವಣಾಂಬುಧಿಸಂಗತಾ .
ಲಾಕ್ಷಾರುಣಪದಾ ಲಾಸ್ಯಾ ಲಾವಣ್ಯಪೂರ್ಣರೂಪಿಣೀ .. 59..

ಲಾಲಸಾಧಿಕಚಾರ್ವಂಗೀ ಲಾಲಿತ್ಯಾನ್ವಿತಭಾಷಿಣೀ .
ಲಿಪ್ಸಾಪೂರ್ಣಕರಾ ಲಿಪ್ಸುವರದಾ ಚ ಲಿಪಿಪ್ರಿಯಾ .. 60..

ಲೀಲಾವಪುರ್ಧರಾ ಲೀಲಾ ಲೀಲಾಲಾಸ್ಯವಿಹಾರಿಣೀ .
ಲಲಿತಾದ್ರಿಶಿರಃಪಂಕ್ತಿರ್ಲೂತಾದಿಹಾರಿವಾರಿಣೀ .. 61..

ಲೇಖಾಪ್ರಿಯಾ ಲೇಖನಿಕಾ ಲೇಖ್ಯಚಾರಿತ್ರಮಂಡಿತಾ .
ಲೋಕಮಾತಾ ಲೋಕರಕ್ಷಾ-ಲೋಕಸಂಗ್ರಹಕಾರಿಣೀ .. 62..

ಲೋಲೇಕ್ಷಣಾ ಚ ಲೋಲಾಂಗಾ ಲೋಕಪಾಲಾಭಿಪೂಜಿತಾ .
ಲೋಭನೀಯಸ್ವರೂಪಾ ಚ ಲೋಭಮೋಹನಿವಾರಿಣೀ .. 63.
ಲೋಕೇಶಮುಖ್ಯವಂದ್ಯಾ ಚ ಲೋಕಬಂಧುಪ್ರಹರ್ಷಿಣೀ .
ವಪುಷ್ಮದ್ವರರೂಪಾ ಚ ವತ್ಸಲಾ ವರದಾಯಿನೀ .. 64..

ವರ್ಧಿಷ್ಣುವಾರಿನಿವಹಾ ವಕ್ರಾವಕ್ರಸ್ವರೂಪಿಣೀ .
ವರಂಡಕಸುಪಾತ್ರಾ ಚ ವನೌಷಧಿವಿವರ್ಧಿನೀ .. 65..

ವಜ್ರಗರ್ಮಾ ವಜ್ರಧರಾ ವಶಿಷ್ಠಾದಿಮುನಿಸ್ತುತಾ .
ವಾಮಾ ವಾಚಸ್ಪತಿನುತಾ ವಾಗ್ಮಿನೀ ವಾಗ್ವಿಕಾಸಿನೀ .. 66.. var  ವಾಗ್ದೇವೀ
ವಾದ್ಯಪ್ರಿಯಾ ಚ ವಾರಾಹೀ ವಾಗ್ಯತಪ್ರಿಯಕೂಲಿನೀ .
ವಾದ್ಯವರ್ಧನಪಾನೀಯಾ ವಾಟಿಕಾವರ್ಧಿನೀತಟಾ .. 67..

ವಾನಪ್ರಸ್ಥಜನಾವಾಸಾ ವಾರ್ವಟಶ್ರೇಣಿರಂಜಿತಾ .
ವಿಕ್ರಯಾ ವಿಕಸದ್ವಕ್ತ್ರಾ ವಿಕಟಾ ಚ ವಿಲಕ್ಷಣಾ .. 68..

ವಿದ್ಯಾ ವಿಷ್ಣುಪ್ರಿಯಾ ವಿಶ್ವಂಭರಾ ವಿಶ್ವವಿಮೋಹಿನೀ .
ವಿಶ್ವಾಮಿತ್ರಸಮಾರಾಧ್ಯಾ ವಿಭೀಷಣವರಪ್ರದಾ .. 69..

ವಿಂಧ್ಯಾಚಲೋದ್ಭವಾ ವಿಷ್ಟಿಕರ್ತ್ರೀ ಚ ವಿಬುಧಸ್ತುತಾ .
ವೀಣಾಸ್ಯವರ್ಣಿತಯಶಾ ವೀಚಿಮಾಲಾವಿಲೋಲಿತಾ .. 70..

ವೀರವ್ರತರತಾ ವೀರಾ ವೀತರಾಗಿಜನೈರ್ನುತಾ .
ವೇದಿನೀ ವೇದವಂದ್ಯಾ ಚ ವೇದವಾದಿಜನೈಃ ಸ್ತುತಾ .. 71..

ವೇಣುವೇಲಾಸಮಾಕೀರ್ಣಾ ವೇಣುಸಂವಾದನಪ್ರಿಯಾ .
ವೈಕುಂಠಪತಿಸಂಪ್ರೀತಾ ವೈಕುಂಠಲಗ್ನವಾಮಿಕಾ .. 72..

ವೈಜ್ಞಾನಿಕಧಿಯೋರ್ಲಕ್ಷ್ಯಾ ವೈತೃಷ್ಣ್ಯಕಾರಿವಾರಿಣೀ .
ವೈಧಾತ್ರನುತಪಾದಾಬ್ಜಾ ವೈವಿಧ್ಯಪ್ರಿಯಮಾನಸಾ .. 73..

ಶರ್ವರೀ ಶವರೀಪ್ರೀತಾ ಶಯಾಲುಃ ಶಯನಪ್ರಿಯಾ .
ಶತ್ರುಸಮ್ಮೋಹಿನೀ ಶತ್ರುಬುದ್ಧಿಘ್ನೀ ಶತ್ರುಘಾತಿನೀ .. 74..

ಶಾನ್ಭವೀ ಶ್ಯಾಮಲಾ ಶ್ಯಾಮಾ ಶಾರದಾಂಬಾ ಚ ಶಾರ್ಙ್ಗಿಣೀ .
ಶಿವಾ ಶಿವಪ್ರಿಯಾ ಶಿಷ್ಟಾ ಶಿಷ್ಟಾಚಾರಾನುಮೋದಿನೀ .. 75..

ಶೀಘ್ರಾ ಚ ಶೀತಲಾ ಶೀತಗಂಧಪುಷ್ಪಾದಿಮಂಡಿತಾ .
ಶುಭಾನ್ವಿತಜನೈರ್ಲಭ್ಯಾ ಶುನಾಸೀರಾದಿಸೇವಿತಾ .. 76..

ಶೂಲಿನೀ ಶೂಲಘೃಕ್ಪೂಜ್ಯಾ ಶೂಲಾದಿಹರವಾರಿಣೀ .
ಶೃಂಗಾರರಂಜಿತಾಂಗಾ ಚ ಶೃಂಗಾರಪ್ರಿಯನಿಮ್ನಗಾ .. 77..

ಶೈವಲಿನೀ ಶೇಷರೂಪಾ ಶೇಷಶಾಯ್ಯಭಿಪೂಜಿತಾ .
ಶೋಭನಾ ಶೋಭನಾಂಗಾ ಚ ಶೋಕಮೋಹನಿವಾರಿಣೀ .. 78..

ಶೌಚಪ್ರಿಯಾ ಶೌರಿಮಾಯಾ ಶೌನಕಾದಿಮುನಿಸ್ತುತಾ .
ಶಂಸಾಪ್ರಿಯಾ ಶಂಕರೀ ಶಂಕರಾಚಾರ್ಯಾದಿಸೇವಿತಾ .. 72..

ಶಂವರ್ಧಿನೀ ಷಡಾರಾತಿನಿಹಂತ್ರೀ ಷಟ್ಕರ್ಮಿಸಂಶ್ರಯಾ .
ಸರ್ವದಾ ಸಹಜಾ ಸಂಧ್ಯಾ ಸಗುಣಾ ಸರ್ವಪಾಲಿಕಾ .. 80..

ಸರ್ವಸ್ವರೂಪಾ ಸರ್ವೇಜ್ಯಾ ಸರ್ವಮಾನ್ಯಾ ಸದಾಶಿವಾ .
ಸರ್ವಕರ್ತ್ರೀಂ ಸರ್ವಪಾತ್ರೀ ಸರ್ವಸ್ಥಾ ಸರ್ವಧಾರಿಣೀ .. 81..

ಸರ್ವಧರ್ಮಸುಸಂಧಾತ್ರೀ ಸರ್ವವಂದ್ಯಪದಾಂಬುಜಾ .
ಸರ್ವಕಿಲ್ಬಿಷಹಂತ್ರೀ ಚ ಸರ್ವಭೀತಿನಿವಾರಿಣೀ .. 82..

ಸಾವಿತ್ರೀ ಸಾತ್ತ್ವಿಕಾ ಸಾಧ್ವೀ ಸಾಧುಶೀಲಾ ಚ ಸಾಕ್ಷಿಣೀ .
ಸಿತಾಶ್ಮರಪ್ರತೀರಾ ಚ ಸಿತಕೈರವಮಂಡಿತಾ .. 83..

ಸೀಮಾನ್ವಿತಾ ಸೀಕರಾಂಭಃಸೀತ್ಕಾರಾಶ್ರಯಕೂಲಿನೀ .
ಸುಂದರೀ ಸುಗಮಾ ಸುಸ್ಥಾ ಸುಶೀಲಾ ಚ ಸುಲೋಚನಾ .. 84..

ಸುಕೇಶೀ ಸುಖದಾತ್ರೀ ಚ ಸುಲಭಾ ಸುಸ್ಥಲಾ ಸುಧಾ .
ಸುವಾಚಿನೀ ಸುಮಾಯಾ ಚ ಸುಮುಖಾ ಸುವ್ರತಾ ಸುರಾ .. 85..

ಸುಧಾರ್ಣವಸ್ವರೂಪಾ ಚ ಸುಧಾಪೂರ್ಣಾ ಸುದರ್ಶನಾ .
ಸೂಕ್ಷ್ಮಾಂಬರಧರಾ ಸೂತವರ್ಣಿತಾ ಸೂರಿಪೂಜಿತಾ .. 86..

ಸೃಷ್ಟಿವರ್ಧಿನೀ ಚ ಸೃಷ್ಟಿಕರ್ತೃಭಿಃ ಪರಿಪೂಜಿತಾ .
ಸೇವಾಪ್ರಿಯಾ ಸೇವಧಿನೀ ಸೇತುಬಂಧಾದಿಮಂಡಿತಾ .. 87..

ಸೈಕತಕ್ಷೋಣಿಕೂಲಾ ಚ ಸೈರಿಭಾದಿಸುಖಪ್ರಿಯಾ .
ಸೋಮರೂಪಾ ಸೋಮದಾತ್ರೀ ಸೋಮಶೇಖರಮಾನಿತಾ .. 88..

ಸೌರಸ್ಯಪೂರ್ಣಸಲಿಲಾ ಸೌಮೇಧಿಕಜನಾಶ್ರಯಾ .
ಸೌಶೀಲ್ಯಮಂಡಿತಾ ಸೌಮ್ಯಾ ಸೌರಾಜ್ಯಸುಖದಾಯಿನೀ .. 89..

ಸೌಜನ್ಯಯುಕ್ತಸುಲಭಾ ಸೌಮಂಗಲ್ಯಾದಿವರ್ಧಿನೀ .
ಸೌಭಾಗ್ಯದಾನನಿಪುಣಾ ಸೌಖ್ಯಸಿಂಧುವಿಹಾರಿಣೀ .. 90..

ಸಂವಿಧಾನಪರಾ ಸಂವಿತ್ಸಂಭಾವ್ಯಪದದಾಯಿನೀ .
ಸಂಶ್ಲಿಷ್ಟಾಂಬುಧಿಸರ್ವಾಂಗಾ ಸನ್ನಿಧೇಯಜಲಾಶ್ರಯಾ .. 91..

ಹರಿಪ್ರಿಯಾ ಹಂಸರೂಪಾ ಹರ್ವಸಂವರ್ಧಿನೀ ಹರಾ .
ಹನುಮತ್ಪ್ರೀತಿಮಾಪನ್ನಾ ಹರಿದ್ಭೂಮಿವಿರಾಜಿತಾ .. 92..

ಹಾಟಕಾಲಂಕಾರಭೂಷಾ ಚ ಹಾರ್ಯಸದ್ಗುಣಮಂಡಿತಾ .
ಹಿತಸಂಸ್ಪರ್ಶಸಲಿಲಾ ಹಿಮಾಂಶುಪ್ರತಿಬಿಂಬಿತಾ .. 93..

ಹೀರಕದ್ಯುತಿಯುಕ್ತಾ ಚ ಹೀನಕರ್ಮವಿಗರ್ಹಿತಾ .
ಹುತಿಕರ್ತೃದ್ವಿಜಾಧಾರಾ ಹೂಶ್ಛರ್ದನಕ್ಷಯಕಾರಿಣೀ .. 94..

ಹೃದಯಾಲುಸ್ವಭಾವಾ ಚ ಹೃದ್ಯಸದ್ಗುಣಮಂಡಿತಾ .
ಹೇಮವರ್ಣಾಭವಸನಾ ಹೇಮಕಂಚುಕಿಧಾರಿಣೀ .. 95..

ಹೋತೃಣಾಂ ಪ್ರಿಯಕೂಲಾ ಚ ಹೋಮ್ಯದ್ರವ್ಯಸುಗರ್ಭಿತಾ .
ಹಂಸಾ ಹಂಸಸ್ವರೂಪಾ ಚ ಹಂಸಿಕಾ ಹಂಸಗಾಮಿನೀ .. 96..

ಕ್ಷಮಾರೂಪಾ ಕ್ಷಮಾಪೂಜ್ಯಾ ಕ್ಷಮಾಪೃಷ್ಠಪ್ರವಾಹಿನೀ .
ಕ್ಷಮಾಕರ್ತ್ರೀ ಕ್ಷಮೋದ್ಧರ್ತ್ರೀ ಕ್ಷಮಾದಿಗುಣಮಂಡಿತಾ .. 97..

ಕ್ಷರರೂಪಾ ಕ್ಷರಾ ಚೈವ ಕ್ಷರವಸ್ತ್ವಾಶ್ರಯಾ ತಥಾ .
ಕ್ಷಪಾಕರಕರೋಲ್ಲಾಸಿನೀ ಕ್ಷಪಾಚರಹಾರಿಣೀ .. 98..

ಕ್ಷಾಂತಾ ಕ್ಷಾಂತಿಗುಣೋಪೇತಾ ಕ್ಷಾಮಾದಿಪರಿಹಾರಿಣೀ .
ಕ್ಷಿಪ್ರಗಾ ಕ್ಷಿತ್ಯಲಂಕಾರಾ ಕ್ಷಿತಿಪಾಲಸಮಾಹಿತಾ .. 99..

ಕ್ಷೀಣಾಯುರ್ಜನಪೀಯೂಷಾ ಕ್ಷೀಣಕಿಲ್ಬಿಷಸೇವಿತಾ .
ಕ್ಷೇತ್ರಿಯಾದಿನಿಯಂತ್ರೀ ಚ ಕ್ಷೇಮಕಾರ್ಯಸುತತ್ಪರಾ .. 100..

ಕ್ಷೇತ್ರಸಂವರ್ಧಿನೀ ಚೈವ ಕ್ಷೇತ್ರೈಕಜೀವನಾಶ್ರಯಾ .
ಕ್ಷೋಣೀಭೃದಾವೃತಪದಾ ಕ್ಷೌಮಾಂಬರವಿಭೂಷಿತಾ .. 101..

ಕ್ಷಂತವ್ಯಗುಣಗಂಭೀರಾ ಕ್ಷಂತುಕರ್ಮೈಕತತ್ಪರಾ .
ಜ್ಞಪ್ತಿವರ್ಧನಶೀಲಾ ಚ ಜ್ಞಸ್ವರೂಪಾ ಜ್ಞಮಾತೃಕಾ .. 102..

ಜ್ಞಾನಸ್ವರೂಪವ್ಯಕ್ತಾ ಚ ಜ್ಞಾತೃಸಂವರ್ಧಿನೀ ತಥಾ .
ಅಂಬಾಶೋಕಾಽಞ್ಜನಾ ಚೈವ ಅನಿರುದ್ಧಾಗ್ನಿಸ್ವರೂಪಿಣೀ .. 103..

ಅನೇಕಾತ್ಮಸ್ವರೂಪಾ ಚಾಮರೇಶ್ವರಸುಪೂಜಿತಾ .
ಅವ್ಯಯಾಕ್ಷರರೂಪಾ ಚಾಪಾರಾಽಗಾಧಸ್ವರೂಪಿಣೀ .. 104..

ಅವ್ಯಾಹತಪ್ರವಾಹಾ ಚ ಹ್ಯವಿಶ್ರಾಂತಕ್ರಿಯಾತ್ಮಿಕಾ .
ಆದಿಶಕ್ತಿರಾದಿಮಾಯಾ ಆಕೀರ್ಣನಿಜರೂಪಿಣೀ .. 105..

ಆದೃತಾತ್ಮಸ್ವರೂಪಾ ಚಾಮೋದಪೂರ್ಣವಪುಷ್ಮತೀ .
ಆಸಮಂತಾದಾರ್ಷಪಾದಾ ಹ್ಯಾಮೋದನಸುಪೂರ್ಣಭೂಃ .. 106..

ಆತಂಕದಾರಣಗತಿರಾಲಸ್ಯವಾಹನಸ್ಥಿತಾ .
ಇಷ್ಟದಾನಮಹೋದಾರಾ ಇಷ್ಟಯೋಗ್ಯಸುಭೂಸ್ತುತಾ .. 107..

ಇಂದಿರಾರಮಣಾರಾಧ್ಯಾ ಇಂದುಧೃಕ್ಪೂಜನಾರತಾ .
ಇಂದ್ರಾದ್ಯಮರವಂದ್ಯಾಂಘ್ರಿರಿಂಗಿತಾರ್ಥಪ್ರದಾಯಿನೀ .. 108..

ಈಶ್ವರೀ ಚೇತಿಹಂತ್ರೀ ಚ ಈತಿಭೀತಿನಿವಾರಿಣೀ .
ಈಪ್ಸೂನಾಂ ಕಲ್ಪವಲ್ಲರಿರುಕ್ಥಶೀಲವತೀ ತಥಾ .. 109..

ಉತ್ತಾನಗತಿವಾಹಾ ಚೋಚ್ಚೋಚ್ಚಾವಚಪದಾಪಗಾ .
ಉತ್ಸಾಹಿಜನಸಂಸೇವ್ಯಾ ಚೋತ್ಫುಲ್ಲತರುಕೂಲಿನೀ .. 110..

ಊರ್ಜಸ್ವಿನೀ ಚೋರ್ಜಿತಾ ಚ ಊರ್ಧ್ವಲೋಕಪ್ರದಾಯಿನೀ .
ಋಣಹರ್ತೃಸ್ತೋತ್ರತುಷ್ಟಾ ಋದ್ಧಿತಾರ್ಣನಿವಾರಿಣೀ .. 111..

ಐಷ್ಟವ್ಯಪದಸಂಧಾತ್ರೀ ಐಹಿಕಾಮುಷ್ಮಿಕಾರ್ಥದಾ .
ಓಜಸ್ವಿನೀ ಹ್ಯೋಜೋವತೀ ಹ್ಯೌದಾರ್ಯಗುಣಭಾಜಿನೀ .. 112..

ಕಲ್ಯಾಣೀ ಕಮಲಾ ಕಂಜಧಾರಿಣೀ ಕಮಲಾವತೀ .
ಕಮನೀಯಸ್ವರೂಪಾ ಚ ಕಟಕಾಭರಣಾನ್ಯಿತಾ .. 113..

ಕಾಶೀ ಕಾಂಚೀ ಚ ಕಾವೇರೀ ಕಾಮದಾ ಕಾರ್ಯವರ್ಧಿನೀ .
ಕಾಮಾಕ್ಷೀ ಕಾಮಿನೀ ಕಾಂತಿಃ ಕಾಮಾತಿಸುಂದರಾಂಗಿಕಾ .. 114..

ಕಾರ್ತವೀರ್ಯಕ್ರೀಡಿತಾಂಗಾ ಕಾರ್ತವೀರ್ಯಪ್ರಬೋಧಿನೀ .
ಕಿರೀಟಕುಂಡಲಾಲಂಕಾರಾರ್ಚಿತಾ ಕಿಂಕರಾರ್ಥದಾ .. 115..

ಕೀರ್ತನೀಯಗುಣಾಗಾರಾ ಕೀರ್ತನಪ್ರಿಯಮಾನಸಾ .
ಕುಶಾವರ್ತನಿವಾಸಾ ಚ ಕುಮಾರೀ ಕುಲಪಾಲಿಕಾ .. 116..

ಕುರುಕುಲ್ಲಾ ಕುಂಡಲಿನೀ ಕುಂಭಾ ಕುಂಭೀರವಾಹಿನೀ .
ಕೂಪಿಕಾ ಕೂರ್ದನವತೀ ಕೂಪಾ ಕೂಪಾರಸಂಗತಾ .. 117..

ಕೃತವೀರ್ಯವಿಲಾಸಾಢ್ಯಾ ಕೃಷ್ಣಾ ಕೃಷ್ಣಗತಾಶ್ರಯಾ .
ಕೇದಾರಾವೃತಮೂಭಾಗಾ ಕೇಕೀಶುಕಪಿಕಾಶ್ರಯಾ .. 118..

ಕೈಲಾಸನಾಥಸಂಧಾತ್ರೀ ಕೈವಲ್ಯದಾ ಚ ಕೈಟಭಾ .
ಕೋಶಲಾ ಕೋವಿದನುತಾ ಕೋಮಲಾ ಕೋಕಿಲಸ್ವನಾ .. 119..

ಕೌಶೇಯೀ ಕೌಶಿಕಪ್ರೀತಾ ಕೌಶಿಕಾಗಾರವಾಸಿನೀ .
ಕಂಜಾಕ್ಷೀ ಕಂಜವದನಾ ಕಂಜಪುಷ್ಪಸದಾಪ್ರಿಯಾ .. 120..

ಕಂಜಕಾನನಸಂಚಾರೀ ಕಂಜಮಾಲಾಸುಸಂಧೃತಾ ..

ಖಗಾಸನಪ್ರಿಯಾ ಖಡ್ಗಪಾಣಿನೀ ಖರ್ಪರಾಯುಧಾ .. 121..

ಖಲಹಂತ್ರೀ ಚ ಖಟ್ವಾಂಗಧಾರಿಣೀ ಖಗಗಾಮಿನೀ .
ಖಾದಿಪಂಚಮಹಾಭೂತರೂಪಾ ಖವರ್ಧನಕ್ಷಮಾ .. 122..

ಗಣತೋಷಿಣೀ ಗಂಭೀರಾ ಗಣಮಾನ್ಯಾ ಗಣಾಧಿಪಾ .
ಗಣಸಂರಕ್ಷಣಪರಾ ಗಣಸ್ಥಾ ಗಣಯಂತ್ರಿಣೀ .. 123..

ಗಂಡಕೀ ಗಂಧಸಲಿಲಾ ಗಂಗಾ ಚ ಗರುಡಪ್ರಿಯಾ .
ಗಲಗಂಡಾಪಹರ್ತ್ರೀ ಚ ಗದಹಾರಿಸುವಾರಿಣೀ .. 124..

ಗಾಯತ್ರೀ ಚೈವ ತಸ್ಯಾಗ್ರೇ ಗಾಧೇಯಾರ್ಚಿತಸತ್ಪದಾ .
ಗಾಥಾಪ್ರಿಯಾ ಗಾಢವಹಾ ಗಾರುತ್ಮತತಟಾಕಿನೀ .. 125..

ಗಿರಿಜಾ ಗಿರೀಶತನಯಾ ಗಿರೀಶಪ್ರೇಮವರ್ಧಿನೀ .
ಗೀರ್ವಾಣೀ ಗೀಷ್ಪತಿನುತಾ ಗೀತಿಕಾಪ್ರಿಯಮಾನಸಾ .. 126..

ಗುಡಾಕೇಶಾರ್ಚನಪರಾ ಗುರೂರಹಃಪ್ರವಾಹಿನೀ .
ಗೇಹೀ ಸರ್ವಾರ್ಥದಾತ್ರೀ ಚ ಗೇಯೋತ್ತಮಗುಣಾನ್ಯಿತಾ .. 127..

ಗೋಧನಾ ಗೋಪನಾ ಗೋಪೀ ಗೋಪಾಲಕಸದಾಪ್ರಿಯಾ .
ಗೋತ್ರಪ್ರಿಯಾ ಗೋಪವೃತಾ ಗೋಕುಲಾವೃತಸತ್ತಟಾ .. 128..

ಗೌರೀ ಗೌರಾಂಗಿಣೀ ಗೌರಾ ಗೌತಮೀ ಗೌತಮಪ್ರಿಯಾ .
ಘನಪ್ರಿಯಾ ಘನರವಾ ಘನೌಘಾ ಘನವರ್ಧಿನೀ .. 129..

ಘನಾರ್ತಿಹರ್ತ್ರೀ ಘನರುಕ್ಪರಿಹರ್ತ್ರೀ ಘನದ್ಯುತಿಃ .
ಘನಪಾಪೌಘಸಂಹರ್ತ್ರೀ ಘನಕ್ಲೇಶನಿವಾರಿಣೀ .. 130..

ಘನಸಾರಾರ್ತಿಕಪ್ರೀತಾ ಘನಸಮ್ಮೋಹಹಾರಿಣೀ .
ಘರ್ಮಾಂಬುಪರಿಹರ್ತ್ರೀ ಚ ಘರ್ಮಾಂತಘರ್ಮಹಾರಿಣೀ .. 131..

ಘರ್ಮಾಂತಕಾಲಸಂಕ್ಷೀಣಾ ಘನಾಗಮಸುಹರ್ಷಿಣೀ .
ಘಟ್ಟದ್ವಿಪಾರ್ಶ್ವಾನುಗತಾ ಘಟ್ಟಿನೀ ಘಟ್ಟಭೂಷಿತಾ .. 132..

ಚತುರಾ ಚಂದ್ರವದನಾ ಚಂದ್ರಿಕೋಲ್ಲಾಸಚಂಚಲಾ .
ಚಂಪಕಾದರ್ಶಚಾರ್ವಂಗೀ ಚಪಲಾ ಚಂಪಕಪ್ರಿಯಾ .. 133..

ಚಲತ್ಕುಂಡಲಚಿನ್ಮೌಲಿಚಕ್ಷುಷೀ ಚಂದನಪ್ರಿಯಾ .
ಚಂಡಮುಂಡನಿಹಂತ್ರೀ ಚ ಚಂಡಿಕಾ ಚಂಡವಿಕ್ರಮಾ .. 134..

ಚಾರುರೂಪಾ ಚಾರುಗಾತ್ರೀ ಚಾರುಚಂದ್ರಸಮಾನನಾ .
ಚಾರ್ವೀಕ್ಷಣಾ ಚಾರುನಾಸಾ ಚಾರುಪಟ್ಟಾಂಶುಕಾವೃತಾ .. 135..

ಚಾರುಚಂದನಲಿಪ್ತಾಂಗಾ ಚಾರ್ವಲಂಕಾರಮಂಡಿತಾ .
ಚಾಮೀಕರಸುಶೋಭಾಢ್ಯಾ ಚಾಪಖರ್ಪರಧಾರಿಣೀ .. 136..

ಚಾರುನಕ್ರವರಸ್ಥಾ ಚ ಚಾತುರಾಶ್ರಮ್ಯಜೀವಿನೀ .
ಚಿತ್ರಿತಾಂಬರಸಂಭೂಷಾ ಚಿತ್ರಾ ಚಿತ್ರಕಲಾಪ್ರಿಯಾ .. 137..

ಚೀನಕಾರ್ತಿಕ್ಯಸಂಪ್ರೀತಾ ಚೀರ್ಣಚಾರಿತ್ರಮಂಡನಾ .
ಚುಲುಂಬಕರಣಾಸಕ್ತಾ ಚುಂಬನಾಸ್ವಾದತತ್ಪರಾ .. 138..

ಚೂಡಾಮಣಿಸುಶೋಭಾಢ್ಯಾ ಚೂಡಾಲಂಕೃತಪಾಣಿನೀ .
ಚೂಲಕಾದಿಸುಭಕ್ಷ್ಯಾ ಚ ಚೂಷ್ಯಾಸ್ವಾದನತತ್ಪರಾ .. 139..

ಚೇತೋಹರಸ್ವರೂಪಾ ಚ ಚೇತೋವಿಸ್ಮಯಕಾರಿಣೀ .
ಚೇತಸಾಂ ಮೋದಯಿತ್ರೀ ಚ ಚೇತಸಾಮತಿಪಾರಗಾ .. 140..

ಚೈತನ್ಯಘಟಿತಾಂಗಾ ಚ ಚೈತನ್ಯಲೀನಭಾವಿನೀ .
ಚೋಕ್ಷ್ಯವ್ಯವಹಾರವತೀ ಚೋದ್ಯಪ್ರಕೃತಿರೂಪಿಣೀ .. 141..

ಚೋಕ್ಷ್ಯಸ್ವರೂಪಾ ಚೋಕ್ಷ್ಯಾಂಗೀ ಚೋಕ್ಷ್ಯಾತ್ಮನಾಂ ಸಮೀಪಿನೀ .
ಛತ್ರರೂಪಾ ಛಟಾಕಾರಾ ಛರ್ದಿನೀ ಛತ್ರಕಾನ್ವಿತಾ .. 142..

ಛತ್ರಪ್ರಿಯಾ ಛನ್ನಮುಖೀ ಛಂದೋನುತಯಶಸ್ವಿನೀ .
ಛಾಂದಸಾಶ್ರಿತಸತ್ಕೂಲಾ ಛಾಯಾಗ್ರಾಹ್ಯಾ ಛಿದ್ರಾತ್ಮಿಕಾ .. 143.. var  ಚಿದಾತ್ಮಿಕಾ
ಜನಯಿತ್ರೀ ಚ ಜನನೀ ಜಗನ್ಮಾತಾ ಜನಾರ್ತಿಹಾ .
ಜಯರೂಪಾ ಜಗದದ್ಧಾತ್ರೀ ಜವನಾ ಜನರಂಜನಾ .. 144..

ಜಗಜ್ಜೇತ್ರೀ ಚ ಜಗದಾನಂದಿನೀ ಜಗದಂಬಿಕಾ .
ಜನಶೋಕಹರಾ ಜಂತುಜೀವಿನೀ ಜಲದಾಯಿನೀ .. 145..

ಜಡತಾಘಪ್ರಶಮನೀ ಜಗಚ್ಛಾಂತಿವಿಧಾಯಿನೀ .
ಜನೇಶ್ವರನಿವಾಸಿನೀ ಜಲೇಂಧನಸಮನ್ವಿತಾ .. 146..

ಜಲಕಂಟಕಸಂಯುಕ್ತಾ ಜಲಸಂಕ್ಷೋಭಕಾರಿಣೀ .
ಜಲಶಾಯಿಪ್ರಿಯಾ ಜನ್ಮಪಾವಿನೀ ಜಲಮೂರ್ತಿನೀ .. 147..

ಜಲಾಯುತಪ್ರಪಾತಾ ಚ ಜಗತ್ಪಾಲನತತ್ಪರಾ .
ಜಾನಕೀ ಜಾಹ್ನವೀ ಜಾಡ್ಯಹಂತ್ರೀ ಜಾನಪದಾಶ್ರಯಾ .. 148..

ಜಿಜ್ಞಾಸುಜನಜಿಜ್ಞಾಸ್ಯಾ ಜಿತೇಂದ್ರಿಯಸುಗೋಚರಾ .
ಜೀವಾನಾಂ ಜನ್ಮಹೇತುಶ್ಚ ಜೀವನಾಧಾರರೂಪಿಣೀ .. 149..

ಝಷಸಂಖ್ಯಾಕುಲಾಧಾನೀ ಝಷರಾಜಾಯುತಾಕುಲಾ .
ಝಂಝನಧ್ಯನಿಪ್ರೀತಾ ಚ ಝಂಝಾನಿಲಸಮರ್ದಿತಾ .. 150..

ಟಟ್ಟರಶ್ರವಣಪ್ರೀತಾ ಠಕ್ಕುರಶ್ರವಣಪ್ರಿಯಾ .
ಡಯನಾರೋಹಸಂಚಾರೀ ಡಮರೀವಾದ್ಯಸತ್ಪ್ರಿಯಾ .. 151..

ಡಾಂಕೃತಧ್ವನಿಸಂಪ್ರೀತಾ ಡಿಂಬಿಕಾಗ್ರಹಣೋದ್ಯತಾ .
ಢುಂಢಿರಾಜಪ್ರಿಯಕರಾ ಢುಂಢಿರಾಜಪ್ರಪೂಜಿತಾ .. 152..

ತಂತುವಾದ್ಯಪ್ರಿಯಾ ತಂತ್ರೀ ತಂತ್ರಿಣೀ ತಪಮಾನಿನೀ .
ತರಂಗಿಣೀ ಚ ತಟಿನೀ ತರುಣೀ ಚ ತಪಸ್ವಿನೀ .. 153..

ತಪಿನೀ ಚ ತಮೋಹಂತ್ರೀ ತಪತೀ ತತ್ತ್ವವೇದಿನೀ .
ತತ್ತ್ವಪ್ರಿಯಾ ಚ ತನ್ವಂಗೀ ತಪೋಽರ್ಥೀಯಸುಭೂಮಿಕಾ .. 154..

ತಪಶ್ಚರ್ಯಾವತಾಂ ತ್ರಾತ್ರೀ ತಪಿಷ್ಣುಜನವಾರಿಣೀ .
ತಂದ್ರಾದಿವಿಘ್ನಸಂಹರ್ತ್ರೀ ತಮೋಜಾಲನಿವಾರಿಣೀ .. 155..

ತಾಪತ್ರಿತಯಸಂಹರ್ತ್ರೀ ತಾಪಾಪಹಾರಿವಾರಿಣೀ .
ತಿತಿಕ್ಷುಜನಸಂವಾಸಾ ತಿತಿಕ್ಷಾವೃತ್ತಿವರ್ಧಿನೀ .. 156..

ತೀವ್ರಸ್ಯಂದಾ ತೀವ್ರಗಾ ಚ ತೀರ್ಥಭೂಸ್ತೀರ್ಥಿಕಾಶ್ರಯಾ .
ತುಂಗಕೇಶರಕೂಲಾಢ್ಯಾ ತುರಾಸಾಹಾದಿಭಿರ್ನುತಾ .. 157..

ತುರ್ಯಾರ್ಥದಾನನಿಪುಣಾ ತೂರ್ಣಿನೀ ತೂರ್ಣರಂಹಿಣೀ .
ತೇಜೋಮಯೀ ತೇಜಸೋಽಬ್ಧಿರಿತಿ ನಾಮಸಮರ್ಚಿತಾ .. 158..

ತೈಜಸಾನಾಮಥಿಷ್ಠಾತ್ರೀ ತೈತಿಕ್ಷೂಣಾಂ ಸಹಾಯಿಕಾ .
ತೋಷವಾರ್ಧಿಶ್ಚ ತೋಷೈಕಗುಣಿನೀ ತೋಷಭಾಜಿನೀ .. 159..

ತೋಷಿಕಾನ್ವಿತಭೂಯುಕ್ತಪೃಷ್ಠಿನೀಪದಸಂಯುತಾ .
ದತ್ತಹಸ್ತಾ ದರ್ಪಹರಾ ದಮಯಂತೀ ದಯಾರ್ಣವಾ .. 160..

ದರ್ಶನೀಯಾ ದರ್ಶಯಿತ್ರೀ ದಕ್ಷಿಣೋತ್ತರಕೂಲಿನೀ .
ದಸ್ಯುಹಂತ್ರೀ ದುರ್ಭರಿಣೀ ದಯಾದಕ್ಷಾ ಚ ದರ್ಶಿನೀ .. 161..

ದಾನಪೂಜ್ಯಾ ತಥಾ ಚೈವ ದಾನಮಾನಸುತೋಷಿತಾ .
ದಾರಕೌಘವತೀ ದಾತ್ರೀ ದಾರುಣಾರ್ತಿನಿವಾರಿಣೀ .. 162..

ದಾರಿದ್ರ್ಯದುಃಖಸಂಹರ್ತ್ರೀ ದಾನವಾನೀಕನಾಶಿನೀ .
ದಿಂಡೀರಸ್ವನಸಂತುಷ್ಟಾ ದಿವೌಕಸಸಮರ್ಚಿತಾ .. 163..

ದೀನಾನಾಂ ಧನಸಂದಾತ್ರೀ ದೀನದೈನ್ಯನಿವಾರಿಣೀ .
ದೀಪ್ತದೀಪೋಲ್ಲಾಸವತೀ ದೀಪಾರಾಧನಸತ್ಪ್ರಿಯಾ .. 164..

ದುರಾರಾತಿಹರಾ ದುಃಖಹಂತ್ರೀ ದುರ್ವಾಸಃಸನ್ನುತಾ .
ದುರ್ಲಭಾ ದುರ್ಗತಿಹರಾ ದುಃಖಾರ್ತಿವಿನಿವಾರಿಣೀ .. 165..

ದುರ್ವಾರವಾರಿನಿವಹಾ ದುರ್ಗಾ ದುರ್ಭಿಕ್ಷಹಾರಿಣೀ .
ದುರ್ಗರೂಪಾ ಚ ದುರಂತದೂರಾ ದುಷ್ಕೃತಿಹಾರಿಣೀ .. 166..

ದೂನದುಃಖನಿಹಂತ್ರೀ ಚ ದೂರದರ್ಶಿನಿಷೇವಿತಾ .
ಧನ್ಯಾ ಧನೇಶಮಾನ್ಯಾ ಚ ಧನದಾ ಧನವರ್ಧಿನೀ .. 167..

ಧರಣೀಧರಮಾನ್ಯಾ ಚ ಧರ್ಮಕರ್ಮಸುವರ್ಧಿನೀ .
ಧಾಮಿನೀ ಧಾಮಪೂಜ್ಯಾ ಚ ಧಾರಿಣೀ ಧಾತುಜೀವಿನೀ .. 168..

ಧಾರಾಧರೀ ಧಾವಕಾ ಚ ಧಾರ್ಮಿಕಾ ಧಾತುವರ್ಧಿನೀ .
ಧಾತ್ರೀ ಚ ಧಾರಣಾರೂಪಾ ಧಾವಲ್ಯಪೂರ್ಣವಾರಿಣೀ .. 169..

ಧಿಪ್ಸುಕಾಪಟ್ಯಹಂತ್ರೀ ಚ ಧಿಷಣೇನ ಸುಪೂಜಿತಾ .
ಧಿಷ್ಣ್ಯವತೀ ಧಿಕ್ಕೃತಾಂಹಾ ಧಿಕ್ಕೃತಾತತಕರ್ದಮಾ .. 170..

ಧೀರಾ ಚ ಧೀಮತೀ ಧೀದಾ ಧೀರೋದಾತ್ತಗುಣಾನ್ವಿತಾ .
ಧುತಕಲ್ಮಷಜಾಲಾ ಚ ಧುರೀಣಾ ಧುರ್ವಹಾ ಧುನೀ .. 171..

ಧೂರ್ತಕೈತವಹಾರಿಣೀ ಧೂಲಿವ್ಯೂಹಪ್ರವಾಹಿನೀ .
ಧೂಮ್ರಾಕ್ಷಹಾರಿಣೀ ಧೂಮಾ ಧೃಷ್ಟಗರ್ವಾಪಹಾ ಧೃತಿಃ .. 172..

ಧೃತಾತ್ಮನೀ ಧೃತಿಮತೀ ಧೃತಿಪೂಜ್ಯಶಿವೋದರಾ .
ಧೇನುಸಂಗತಸರ್ವಾಂಗಾ ಧ್ಯೇಯಾ ಧೇನುಕಜೀವಿನೀ .. 173..

ನಾನಾರೂಪವತೀ ನಾನಾಧರ್ಮಕರ್ಮಸ್ವರೂಪಿಣೀ .
ನಾನಾರ್ಥಪೂರ್ಣಾವತಾರಾ ಸರ್ವನಾಮಸ್ವರೂಪಿಣೀ .. 174..

.. ಓಂ ಶ್ರೀನರ್ಮದಾರ್ಪಣಮಸ್ತು ..