ସମୃଦ୍ଧଂ ସୌଭାଗ୍ୟଂ ସକଲବସୁଧାୟାଃ କିମପି ତନ୍
ମହୈଶ୍ୱର୍ୟଂ ଲୀଲାଜନିତଜଗତଃ ଖଣ୍ଡପରଶୋଃ ।
ଶ୍ରୁତୀନାଂ ସର୍ୱସ୍ୱଂ ସୁକୃତମଥ ମୂର୍ତଂ ସୁମନସାଂ
ସୁଧାସୋଦର୍ୟଂ ତେ ସଲିଲମଶିବଂ ନଃ ଶମୟତୁ ॥ ୧॥
ଦରିଦ୍ରାଣାଂ ଦୈନ୍ୟଂ ଦୁରିତମଥ ଦୁର୍ୱାସନହୃଦାଂ
ଦ୍ରୁତଂ ଦୂରୀକୁର୍ୱନ୍ ସକୃଦପି ଗତୋ ଦୃଷ୍ଟିସରଣିମ୍ ।
ଅପି ଦ୍ରାଗାବିଦ୍ୟାଦ୍ରୁମଦଲନଦୀକ୍ଷାଗୁରୁରିହ
ପ୍ରବାହସ୍ତେ ବାରାଂ ଶ୍ରିୟମୟମପାରାଂ ଦିଶତୁ ନଃ ॥ ୨॥
ଉଦଞ୍ଚନ୍ମାର୍ତଣ୍ଡସ୍ଫୁଟକପଟହେରମ୍ବଜନନୀ-
କଟାକ୍ଷବ୍ୟାକ୍ଷେପକ୍ଷଣଜନିତସଙ୍କ୍ଷୋଭନିବହାଃ ।
ଭବନ୍ତୁ ତ୍ୱଙ୍ଗନ୍ତୋ ହରଶିରସି ଗଙ୍ଗାତନୁଭୁବ-
ସ୍ତରଙ୍ଗାଃ ପ୍ରୋତ୍ତୁଙ୍ଗା ଦୁରିତଭୟଭଙ୍ଗାୟ ଭବତାମ୍ ॥ ୩॥
ତବାଲମ୍ବାଦମ୍ବ ସ୍ଫୁରଦଲଘୁଗର୍ୱେଣ ସହସା
ମୟା ସର୍ୱେଽବଜ୍ଞାସରଣିମଥ ନୀତାଃ ସୁରଗଣାଃ ।
ଇଦାନୀମୌଦାସ୍ୟଂ ଭଜସି ଯଦି ଭାଗୀରଥି ତଦା
ନିରାଧାରୋ ହା ରୋଦିମି କଥୟ କେଷାମିହ ପୁରଃ ॥ ୪॥
ସ୍ମୃତିଂ ଯାତା ପୁଂସାମକୃତସୁକୃତାନାମପି ଚ ଯା
ହରତ୍ୟନ୍ତସ୍ତନ୍ଦ୍ରାଂ ତିମିରମିବ ଚନ୍ଦ୍ରାଂଶୁସରଣିଃ ।
ଇୟଂ ସା ତେ ମୂର୍ତିଃ ସକଲସୁରସଂସେବ୍ୟସଲିଲା
ମମାନ୍ତଃସନ୍ତାପଂ ତ୍ରିବିଧମପି ପାପଂ ଚ ହରତାମ୍ ॥ ୫॥
ଅପି ପ୍ରାଜ୍ୟଂ ରାଜ୍ୟଂ ତୃଣମିବ ପରିତ୍ୟଜ୍ୟ ସହସା
ବିଲୋଲଦ୍ୱାନୀରଂ ତବ ଜନନି ତୀରଂ ଶ୍ରିତବତାମ୍ ।
ସୁଧାତଃ ସ୍ୱାଦୀୟସ୍ସଲିଲଭରମାତୃପ୍ତି ପିବତାଂ
ଜନାନାମାନନ୍ଦଃ ପରିହସତି ନିର୍ୱାଣପଦବୀମ୍ ॥ ୬॥
ପ୍ରଭାତେ ସ୍ନାତୀନାଂ ନୃପତିରମଣୀନାଂ କୁଚତଟୀ-
ଗତୋ ଯାବନ୍ମାତର୍ମିଲତି ତବ ତୋୟୈର୍ମୃଗମଦଃ ।
ମୃଗାସ୍ତାବଦ୍ୱୈମାନିକଶତସହସ୍ରୈଃ ପରିବୃତା
ବିଶନ୍ତି ସ୍ୱଚ୍ଛନ୍ଦଂ ବିମଲବପୁଷୋ ନନ୍ଦନବନମ୍ ॥ ୭॥
ସ୍ମୃତଂ ସଦ୍ୟଃ ସ୍ୱାନ୍ତଂ ବିରଚୟତି ଶାନ୍ତଂ ସକୃଦପି
ପ୍ରଗୀତଂ ଯତ୍ପାପଂ ଝଟିତି ଭବତାପଂ ଚ ହରତି ।
ଇଦଂ ତଦ୍ଗଙ୍ଗେତି ଶ୍ରବଣରମଣୀୟଂ ଖଲୁ ପଦଂ
ମମ ପ୍ରାଣପ୍ରାନ୍ତେ ବଦନକମଲାନ୍ତର୍ୱିଲସତୁ ॥ ୮॥
ଯଦନ୍ତଃ ଖେଲନ୍ତୋ ବହୁଲତରସନ୍ତୋଷଭରିତା
ନ କାକା ନାକାଧୀଶ୍ୱରନଗରସାକାଙ୍କ୍ଷମନସଃ ।
ନିବାସାଲ୍ଲୋକାନାଂ ଜନିମରଣଶୋକାପହରଣଂ
ତଦେତତ୍ତେ ତୀରଂ ଶ୍ରମଶମନଧୀରଂ ଭବତୁ ନଃ ॥ ୯॥
ନ ଯତ୍ସାକ୍ଷାଦ୍ୱେଦୈରପି ଗଲିତଭେଦୈରବସିତଂ
ନ ଯସ୍ମିନ୍ ଜୀବାନାଂ ପ୍ରସରତି ମନୋବାଗବସରଃ ।
ନିରାକାରଂ ନିତ୍ୟଂ ନିଜମହିମନିର୍ୱାସିତତମୋ
ବିଶୁଦ୍ଧଂ ଯତ୍ତତ୍ତ୍ୱଂ ସୁରତଟିନି ତତ୍ତ୍ୱଂ ନ ବିଷୟଃ ॥ ୧୦॥
ମହାଦାନୈର୍ଧ୍ୟାନୈର୍ବହୁବିଧବିତାନୈରପି ଚ ଯନ୍
ନ ଲଭ୍ୟଂ ଘୋରାଭିଃ ସୁବିମଲତପୋରାଶିଭିରପି ।
ଅଚିନ୍ତ୍ୟଂ ତଦ୍ୱିଷ୍ଣୋଃ ପଦମଖିଲସାଧାରଣତୟା
ଦଦାନା କେନାସି ତ୍ୱମିହ ତୁଲନୀୟା କଥୟ ନଃ ॥ ୧୧॥
ନୃଣାମୀକ୍ଷାମାତ୍ରାଦପି ପରିହରନ୍ତ୍ୟା ଭବଭୟଂ
ଶିବାୟାସ୍ତେ ମୂର୍ତେଃ କ ଇହ ମହିମାନଂ ନିଗଦତୁ ।
ଅମର୍ଷମ୍ଲାନାୟାଃ ପରମମନୁରୋଧଂ ଗିରିଭୁବୋ
ବିହାୟ ଶ୍ରୀକଣ୍ଠଃ ଶିରସି ନିୟତଂ ଧାରୟତି ଯାମ୍ ॥ ୧୨॥
ବିନିନ୍ଦ୍ୟାନ୍ୟୁନ୍ମତ୍ତୈରପି ଚ ପରିହାର୍ୟାଣି ପତିତୈ-
ରବାଚ୍ୟାନି ବ୍ରାତ୍ୟୈଃ ସପୁଲକମପାସ୍ୟାନି ପିଶୁନୈଃ ।
ହରନ୍ତୀ ଲୋକାନାମନବରତମେନାଂସି କିୟତାଂ
କଦାପ୍ୟଶ୍ରାନ୍ତା ତ୍ୱଂ ଜଗତି ପୁନରେକା ବିଜୟସେ ॥ ୧୩॥
ସ୍ଖଲନ୍ତୀ ସ୍ୱର୍ଲୋକାଦବନିତଲଶୋକାପହୃତୟେ
ଜଟାଜୂଟଗ୍ରନ୍ଥୌ ଯଦସି ବିନିବଦ୍ଧା ପୁରଭିଦା ।
ଅୟେ ନିର୍ଲୋଭାନାମପି ମନସି ଲୋଭଂ ଜନୟତାଂ
ଗୁଣାନାମେବାୟଂ ତବ ଜନନି ଦୋଷଃ ପରିଣତଃ ॥ ୧୪॥
ଜଡାନନ୍ଧାନ୍ ପଙ୍ଗୂନ୍ ପ୍ରକୃତିବଧିରାନୁକ୍ତିବିକଲାନ୍
ଗ୍ରହଗ୍ରସ୍ତାନସ୍ତାଖିଲଦୁରିତନିସ୍ତାରସରଣୀନ୍ ।
ନିଲିମ୍ପୈର୍ନିର୍ମୁକ୍ତାନପି ଚ ନିରୟାନ୍ତର୍ନିପତତୋ
ନରାନମ୍ବ ତ୍ରାତୁଂ ତ୍ୱମିହ ପରମଂ ଭେଷଜମସି ॥ ୧୫॥
ସ୍ୱଭାବସ୍ୱଚ୍ଛାନାଂ ସହଜଶିଶିରାଣାମୟମପା-
ମପାରସ୍ତେ ମାତର୍ଜୟତି ମହିମା କୋଽପି ଜଗତି ।
ମୁଦାୟଂ ଗାୟନ୍ତି ଦ୍ୟୁତଲମନବଦ୍ୟଦ୍ୟୁତିଭୃତଃ
ସମାସାଦ୍ୟାଦ୍ୟାପି ସ୍ଫୁଟପୁଲକସାନ୍ଦ୍ରାଃ ସଗରଜାଃ ॥ ୧୬॥
କୃତକ୍ଷୁଦ୍ରୈନସ୍କାନଥ ଝଟିତି ସନ୍ତପ୍ତମନସଃ
ସମୁଦ୍ଧର୍ତୁଂ ସନ୍ତି ତ୍ରିଭୁବନତଲେ ତୀର୍ଥନିବହାଃ ।
ଅପି ପ୍ରାୟଶ୍ଚିତ୍ତପ୍ରସରଣପଥାତୀତଚରିତା-
ନ୍ନରାନୂରୀକର୍ତୁଂ ତ୍ୱମିବ ଜନନି ତ୍ୱଂ ବିଜୟସେ ॥ ୧୭॥
ନିଧାନଂ ଧର୍ମାଣାଂ କିମପି ଚ ବିଧାନଂ ନବମୁଦାଂ
ପ୍ରଧାନଂ ତୀର୍ଥାନାମମଲପରିଧାନଂ ତ୍ରିଜଗତଃ ।
ସମାଧାନଂ ବୁଦ୍ଧେରଥ ଖଲୁ ତିରୋଧାନମଧିୟାଂ
ଶ୍ରିୟାମାଧାନଂ ନଃ ପରିହରତୁ ତାପଂ ତବ ବପୁଃ ॥ ୧୮॥
ପୁରୋ ଧାବଂ ଧାବଂ ଦ୍ରବିଣମଦିରାଘୂର୍ଣିତଦୃଶାଂ
ମହୀପାନାଂ ନାନାତରୁଣତରଖେଦସ୍ୟ ନିୟତମ୍ ।
ମମୈବାୟଂ ମନ୍ତୁଃ ସ୍ୱହିତଶତହନ୍ତୁର୍ଜଡଧିୟୋ
ବିୟୋଗସ୍ତେ ମାତର୍ୟଦିହ କରୁଣାତଃ କ୍ଷଣମପି ॥ ୧୯॥
ମରୁଲ୍ଲୀଲାଲୋଲଲ୍ଲହରିଲୁଲିତାମ୍ଭୋଜପଟଲୀ-
ସ୍ଖଲତ୍ପାଂସୁବ୍ରାତଚ୍ଛୁରଣବିସରତ୍କୌଙ୍କୁମରୁଚି ।
ସୁରସ୍ତ୍ରୀବକ୍ଷୋଜକ୍ଷରଦଗରୁଜମ୍ବାଲଜଟିଲଂ
ଜଲଂ ତେ ଜମ୍ବାଲଂ ମମ ଜନନଜାଲଂ ଜରୟତୁ ॥ ୨୦॥
ସମୁତ୍ପତ୍ତିଃ ପଦ୍ମାରମଣପଦପଦ୍ମାମଲନଖା-
ନ୍ନିବାସଃ କନ୍ଦର୍ପପ୍ରତିଭଟଜଟାଜୂଟଭବନେ ।
ଅଥାଽୟଂ ବ୍ୟାସଙ୍ଗୋ ହତପତିତନିସ୍ତାରଣବିଧୌ
ନ କସ୍ମାଦୁତ୍କର୍ଷସ୍ତବ ଜନନି ଜାଗର୍ତୁ ଜଗତି ॥ ୨୧॥
ନଗେଭ୍ୟୋ ଯାନ୍ତୀନାଂ କଥୟ ତଟିନୀନାଂ କତମୟା
ପୁରାଣାଂ ସଂହର୍ତୁଃ ସୁରଧୁନି କପର୍ଦୋଽଧିରୁରୁହେ ।
କୟା ବା ଶ୍ରୀଭର୍ତୁଃ ପଦକମଲମକ୍ଷାଲି ସଲିଲୈ-
ସ୍ତୁଲାଲେଶୋ ଯସ୍ୟାଂ ତବ ଜନନି ଦୀୟେତ କବିଭିଃ ॥ ୨୨॥
ବିଧତ୍ତାଂ ନିଃଶଙ୍କଂ ନିରବଧି ସମାଧିଂ ବିଧିରହୋ
ସୁଖଂ ଶେଷେ ଶେତାଂ ହରିରବିରତଂ ନୃତ୍ୟତୁ ହରଃ ।
କୃତଂ ପ୍ରାୟଶ୍ଚିତ୍ତୈରଲମଥ ତପୋଦାନୟଜନୈଃ
ସବିତ୍ରୀ କାମାନାଂ ଯଦି ଜଗତି ଜାଗର୍ତି ଜନନୀ ॥ ୨୩॥
ଅନାଥଃ ସ୍ନେହାର୍ଦ୍ରାଂ ବିଗଲିତଗତିଃ ପୁଣ୍ୟଗତିଦାଂ
ପତନ୍ ବିଶ୍ୱୋଦ୍ଧର୍ତ୍ରୀଂ ଗଦବିଗଲିତଃ ସିଦ୍ଧଭିଷଜମ୍ ।
ସୁଧାସିନ୍ଧୁଂ ତୃଷ୍ଣାକୁଲିତହୃଦୟୋ ମାତରମୟଂ
ଶିଶୁଃ ସମ୍ପ୍ରାପ୍ତସ୍ତ୍ୱାମହମିହ ବିଦଧ୍ୟାଃ ସମୁଚିତମ୍ ॥ ୨୪॥
ବିଲୀନୋ ବୈ ବୈବସ୍ୱତନଗରକୋଲାହଲଭରୋ
ଗତା ଦୂତା ଦୂରଂ କ୍ୱଚିଦପି ପରେତାନ୍ ମୃଗୟିତୁମ୍ ।
ବିମାନାନାଂ ବ୍ରାତୋ ବିଦଲୟତି ବୀଥିର୍ଦିବିଷଦାଂ
କଥା ତେ କଲ୍ୟାଣୀ ଯଦବଧି ମହୀମଣ୍ଡଲମଗାତ୍ ॥ ୨୫॥
ସ୍ଫୁରତ୍କାମକ୍ରୋଧପ୍ରବଲତରସଞ୍ଜାତଜଟିଲ-
ଜ୍ୱରଜ୍ୱାଲାଜାଲଜ୍ୱଲିତବପୁଷାଂ ନଃ ପ୍ରତିଦିନମ୍ ।
ହରନ୍ତାଂ ସନ୍ତାପଂ କମପି ମରୁଦୁଲ୍ଲାସଲହରି-
ଚ୍ଛଟାଚଞ୍ଚତ୍ପାଥଃକଣସରଣୟୋ ଦିବ୍ୟସରିତଃ ॥ ୨୬॥
ଇଦଂ ହି ବ୍ରହ୍ମାଣ୍ଡଂ ସକଲଭୁବନାଭୋଗଭବନଂ
ତରଙ୍ଗୈର୍ୟସ୍ୟାନ୍ତର୍ଲୁଠତି ପରିତସ୍ତିନ୍ଦୁକମିବ ।
ସ ଏଷ ଶ୍ରୀକଣ୍ଠପ୍ରବିତତଜଟାଜୂଟଜଟିଲୋ
ଜଲାନାଂ ସଙ୍ଘାତସ୍ତବ ଜନନି ତାପଂ ହରତୁ ନଃ ॥ ୨୭॥
ତ୍ରପନ୍ତେ ତୀର୍ଥାନି ତ୍ୱରିତମିହ ଯସ୍ୟୋଦ୍ଧୃତିବିଧୌ
କରଂ କର୍ଣେ କୁର୍ୱନ୍ତ୍ୟପି କିଲ କପାଲିପ୍ରଭୃତୟଃ ।
ଇମଂ ତ୍ୱଂ ମାମମ୍ବ ତ୍ୱମିୟମନୁକମ୍ପାର୍ଦ୍ରହୃଦୟେ
ପୁନାନା ସର୍ୱେଷାମଘମଥନଦର୍ପଂ ଦଲୟସି ॥ ୨୮॥
ଶ୍ୱପାକାନାଂ ବ୍ରାତୈରମିତବିଚିକିତ୍ସାବିଚଲିତୈ-
ର୍ୱିମୁକ୍ତାନାମେକଂ କିଲ ସଦନମେନଃପରିଷଦାମ୍ ।
ଅହୋ ମାମୁଦ୍ଧର୍ତୁଂ ଜନନି ଘଟୟନ୍ତ୍ୟାଃ ପରିକରଂ
ତବ ଶ୍ଲାଘାଂ କର୍ତୁଂ କଥମିବ ସମର୍ଥୋ ନରପଶୁଃ ॥ ୨୯॥
ନ କୋଽପ୍ୟେତାବନ୍ତଂ ଖଲୁ ସମୟମାରଭ୍ୟ ମିଲିତୋ
ଯଦୁଦ୍ଧାରାଦାରାଦ୍ଭବତି ଜଗତୋ ବିସ୍ମୟଭରଃ ।
ଇତୀମାମୀହାଂ ତେ ମନସି ଚିରକାଲଂ ସ୍ଥିତବତୀ-
ମୟଂ ସମ୍ପ୍ରାପ୍ତୋଽହଂ ସଫଲୟିତୁମମ୍ବ ପ୍ରଣୟ ନଃ ॥ ୩୦॥
ଶ୍ୱବୃତ୍ତିବ୍ୟାସଙ୍ଗୋ ନିୟତମଥ ମିଥ୍ୟାପ୍ରଲପନଂ
କୁତର୍କେଶ୍ୱଭ୍ୟାସଃ ସତତପରପୈଶୁନ୍ୟମନନମ୍ ।
ଅପି ଶ୍ରାବଂ ଶ୍ରାବଂ ମମ ତୁ ପୁନରେବଂ ଗୁଣଗଣା-
ନୃତେ ତ୍ୱତ୍କୋ ନାମ କ୍ଷଣମପି ନିରୀକ୍ଷେତ ବଦନମ୍ ॥ ୩୧॥
ବିଶାଲାଭ୍ୟାମାଭ୍ୟାଂ କିମିହ ନୟନାଭ୍ୟାଂ ଖଲୁ ଫଲଂ
ନ ଯାଭ୍ୟାମାଲୀଢା ପରମରମଣୀୟା ତବ ତନୁଃ ।
ଅୟଂ ହି ନ୍ୟକ୍କାରୋ ଜନନି ମନୁଜସ୍ୟ ଶ୍ରବଣୟୋ-
ର୍ୟଯୋର୍ନାନ୍ତର୍ୟାତସ୍ତବ ଲହରିଲୀଲାକଲକଲଃ ॥ ୩୨॥
ବିମାନୈଃ ସ୍ୱଚ୍ଛନ୍ଦଂ ସୁରପୁରମୟନ୍ତେ ସୁକୃତିନଃ
ପତନ୍ତି ଦ୍ରାକ୍ ପାପା ଜନନି ନରକାନ୍ତଃ ପରବଶାଃ ।
ବିଭାଗୋଽୟଂ ତସ୍ମିନ୍ନଶୁଭମୟମୂର୍ତୌ ଜନପଦେ
ନ ଯତ୍ର ତ୍ୱଂ ଲୀଲାଦଲିତମନୁଜାଶେଷକଲୁଷା ॥ ୩୩॥
ଅପି ଘ୍ନନ୍ତୋ ବିପ୍ରାନବିରତମୁଶନ୍ତୋ ଗୁରୁସତୀଃ
ପିବନ୍ତୋ ମୈରେୟଂ ପୁନରପି ହରନ୍ତଶ୍ଚ କନକମ୍ ।
ବିହାୟ ତ୍ୱୟ୍ୟନ୍ତେ ତନୁମତନୁଦାନାଧ୍ୱରଜୁଷା-
ମୁପର୍ୟମ୍ବ କ୍ରୀଡନ୍ତ୍ୟଖିଲସୁରସମ୍ଭାବିତପଦାଃ ॥ ୩୪॥
ଅଲଭ୍ୟଂ ସୌରଭ୍ୟଂ ହରତି ସତତଂ ଯଃ ସୁମନସାଂ
କ୍ଷଣାଦେବ ପ୍ରାଣାନପି ବିରହଶସ୍ତ୍ରକ୍ଷତହୃଦାମ୍ ।
ତ୍ୱଦୀୟାନାଂ ଲୀଲାଚଲିତଲହରୀଣାଂ ବ୍ୟତିକରାତ୍
ପୁନୀତେ ସୋଽପି ଦ୍ରାଗହହ ପବମାନସ୍ତ୍ରିଭୁବନମ୍ ॥ ୩୫॥
କିୟନ୍ତଃ ସନ୍ତ୍ୟେକେ ନିୟତମିହଲୋକାର୍ଥଘଟକାଃ
ପରେ ପୂତାତ୍ମାନଃ କତି ଚ ପରଲୋକପ୍ରଣୟିନଃ ।
ସୁଖଂ ଶେତେ ମାତସ୍ତବ ଖଲୁ କୃପାତଃ ପୁନରୟଂ
ଜଗନ୍ନାଥଃ ଶଶ୍ୱତ୍ତ୍ୱୟି ନିହିତଲୋକଦ୍ୱୟଭରଃ ॥ ୩୬॥
ଭବତ୍ୟା ହି ବ୍ରାତ୍ୟାଧମପତିତପାଖଣ୍ଡପରିଷତ୍
ପରିତ୍ରାଣସ୍ନେହଃ ଶ୍ଲଥୟିତୁମଶକ୍ୟଃ ଖଲୁ ଯଥା ।
ମମାପ୍ୟେବଂ ପ୍ରେମା ଦୁରିତନିବହେଷ୍ୱମ୍ବ ଜଗତି
ସ୍ୱଭାବୋଽୟଂ ସର୍ୱୈରପି ଖଲୁ ଯତୋ ଦୁଷ୍ପରିହରଃ ॥ ୩୭॥
ପ୍ରଦୋଷାନ୍ତର୍ନୃତ୍ୟତ୍ପୁରମଥନଲୀଲୋଦ୍ଧୃତଜଟା-
ତଟାଭୋଗପ୍ରେଙ୍ଖଲ୍ଲହରିଭୁଜସନ୍ତାନବିଧୁତିଃ ।
ବିଲକ୍ରୋଡକ୍ରୀଡଜ୍ଜଲଡମରୁଟଙ୍କାରସୁଭଗ-
ସ୍ତିରୋଧତ୍ତାଂ ତାପଂ ତ୍ରିଦଶତଟିନୀତାଣ୍ଡବବିଧିଃ ॥ ୩୮॥
ସଦୈବ ତ୍ୱୟ୍ୟେବାର୍ପିତକୁଶଲଚିନ୍ତାଭରମିମଂ
ଯଦି ତ୍ୱଂ ମାମମ୍ବ ତ୍ୟଜସି ସମୟେଽସ୍ମିନ୍ସୁବିଷମେ ।
ତଦା ବିଶ୍ୱାସୋଽୟଂ ତ୍ରିଭୁବନତଲାଦସ୍ତମୟତେ
ନିରାଧାରା ଚେୟଂ ଭବତି ଖଲୁ ନିର୍ୱ୍ୟାଜକରୁଣା ॥ ୩୯॥
କପର୍ଦାଦୁଲ୍ଲସ୍ୟ ପ୍ରଣୟମିଲଦର୍ଧାଙ୍ଗୟୁବତେଃ
ପୁରାରେଃ ପ୍ରେଙ୍ଖନ୍ତ୍ୟୋ ମୃଦୁଲତରସୀମନ୍ତସରଣୌ ।
ଭବାନ୍ୟା ସାପତ୍ନ୍ୟସ୍ଫୁରିତନୟନଂ କୋମଲରୁଚା
କରେଣାକ୍ଷିପ୍ତାସ୍ତେ ଜନନି ବିଜୟନ୍ତାଂ ଲହରୟଃ ॥ ୪୦॥
ପ୍ରପଦ୍ୟନ୍ତେ ଲୋକାଃ କତି ନ ଭବତୀମତ୍ରଭବତୀ-
ମୁପାଧିସ୍ତତ୍ରାୟଂ ସ୍ଫୁରତି ଯଦଭୀଷ୍ଟଂ ବିତରସି ।
ଶପେ ତୁଭ୍ୟଂ ମାତର୍ମମ ତୁ ପୁନରାତ୍ମା ସୁରଧୁନି
ସ୍ୱଭାବାଦେବ ତ୍ୱୟ୍ୟମିତମନୁରାଗଂ ବିଧୃତବାନ୍ ॥ ୪୧॥
ଲଲାଟେ ଯା ଲୋକୈରିହ ଖଲୁ ସଲୀଲଂ ତିଲକିତା
ତମୋ ହନ୍ତୁଂ ଧତ୍ତେ ତରୁଣତରମାର୍ତଣ୍ଡତୁଲନାମ୍ ।
ବିଲୁମ୍ପନ୍ତୀ ସଦ୍ୟୋ ବିଧିଲିଖିତଦୁର୍ୱର୍ଣସରଣିଂ
ତ୍ୱଦୀୟା ସା ମୃତ୍ସ୍ନା ମମ ହରତୁ କୃତ୍ସ୍ନାମପି ଶୁଚମ୍ ॥ ୪୨॥
ନରାନ୍ ମୂଢାଂସ୍ତତ୍ତଜ୍ଜନପଦସମାସକ୍ତମନସୋ
ହସନ୍ତଃ ସୋଲ୍ଲାସଂ ବିକଚକୁସୁମବ୍ରାତମିଷତଃ ।
ପୁନାନାଃ ସୌରଭ୍ୟୈଃ ସତତମଲିନୋ ନିତ୍ୟମଲିନାନ୍
ସଖାୟୋ ନଃ ସନ୍ତୁ ତ୍ରିଦଶତଟିନୀତୀରତରବଃ ॥ ୪୩॥
ଯଜନ୍ତ୍ୟେକେ ଦେବାନ୍ କଠିନତରସେବାଂସ୍ତଦପରେ
ବିତାନବ୍ୟାସକ୍ତା ଯମନିୟମରକ୍ତାଃ କତିପୟେ ।
ଅହଂ ତୁ ତ୍ୱନ୍ନାମସ୍ମରଣକୃତକାମସ୍ତ୍ରିପଥଗେ
ଜଗଜ୍ଜାଲଂ ଜାନେ ଜନନି ତୃଣଜାଲେନ ସଦୃଶମ୍ ॥ ୪୪॥
ଅବିଶ୍ରାନ୍ତଂ ଜନ୍ମାବଧି ସୁକୃତଜନ୍ମାର୍ଜନକୃତାଂ
ସତାଂ ଶ୍ରେୟଃ କର୍ତୁଂ କତି ନ କୃତିନଃ ସନ୍ତି ବିବୁଧାଃ ।
ନିରସ୍ତାଲମ୍ବାନାମକୃତସୁକୃତାନାଂ ତୁ ଭବତୀଂ
ବିନାଽମୁଷ୍ମିଂଲ୍ଲୋକେ ନ ପରମବଲୋକେ ହିତକରମ୍ ॥ ୪୫॥
ପୟଃ ପୀତ୍ୱା ମାତସ୍ତବ ସପଦି ଯାତଃ ସହଚରୈ-
ର୍ୱିମୂଢୈଃ ସଂରନ୍ତୁଂ କ୍ୱଚିଦପି ନ ବିଶ୍ରାନ୍ତିମଗମମ୍ ।
ଇଦାନୀମୁତ୍ସଙ୍ଗେ ମୃଦୁପବନସଞ୍ଚାରଶିଶିରେ
ଚିରାଦୁନ୍ନିଦ୍ରଂ ମାଂ ସଦୟହୃଦୟେ ଶାୟଯ ଚିରମ୍ ॥ ୪୬॥
ବଧାନ ଦ୍ରାଗେବ ଦ୍ରଢିମରମଣୀୟଂ ପରିକରଂ
କିରୀଟେ ବାଲେନ୍ଦୁଂ ନିୟମୟ ପୁନଃ ପନ୍ନଗଗଣୈଃ ।
ନ କୁର୍ୟାସ୍ତ୍ୱଂ ହେଲାମିତରଜନସାଧାରଣତୟା
ଜଗନ୍ନାଥସ୍ୟାୟଂ ସୁରଧୁନି ସମୁଦ୍ଧାରସମୟଃ ॥ ୪୭॥
ଶରଚ୍ଚନ୍ଦ୍ରଶ୍ୱେତାଂ ଶଶିଶକଲଶ୍ୱେତାଲମୁକୁଟାଂ
କରୈଃ କୁମ୍ଭାମ୍ଭୋଜେ ବରଭୟନିରାସୌ ଚ ଦଧତୀମ୍ ।
ସୁଧାଧାରାକାରାଭରଣବସନାଂ ଶୁଭ୍ରମକର-
ସ୍ଥିତାଂ ତ୍ୱାଂ ଯେ ଧ୍ୟାୟନ୍ତ୍ୟୁଦୟତି ନ ତେଷାଂ ପରିଭବଃ ॥ ୪୮॥
ଦରସ୍ମିତସମୁଲ୍ଲସଦ୍ୱଦନକାନ୍ତିପୂରାମୃତୈ-
ର୍ଭବଜ୍ୱଲନଭର୍ଜିତାନନିଶମୂର୍ଜୟନ୍ତୀ ନରାନ୍ ।
ଚିଦେକମୟଚନ୍ଦ୍ରିକାଚୟଚମତ୍କୃତିଂ ତନ୍ୱତୀ
ତନୋତୁ ମମ ଶନ୍ତନୋଃ ସପଦି ଶନ୍ତନୋରଙ୍ଗନା ॥ ୪୯॥
ମନ୍ତ୍ରୈର୍ମୀଲିତମୌଷଧୈର୍ମୁକୁଲିତଂ ତ୍ରସ୍ତଂ ସୁରାଣାଂ ଗଣୈଃ
ସ୍ରସ୍ତଂ ସାନ୍ଦ୍ରସୁଧାରସୈର୍ୱିଦଲିତଂ ଗାରୁତ୍ମତୈର୍ଗ୍ରାବଭିଃ ।
ବୀଚିକ୍ଷାଲିତକାଲିୟାହିତପଦେ ସ୍ୱର୍ଲୋକକଲ୍ଲୋଲିନି
ତ୍ୱଂ ତାପଂ ତିରୟାଧୁନା ମମ ଭବଜ୍ୱାଲାବଲୀଢାତ୍ମନଃ ॥ ୫୦॥
ଦ୍ୟୂତେ ନାଗେନ୍ଦ୍ରକୃତ୍ତିପ୍ରମଥଗଣମଣିଶ୍ରେଣିନନ୍ଦୀନ୍ଦୁମୁଖ୍ୟଂ
ସର୍ୱସ୍ୱଂ ହାରୟିତ୍ୱା ସ୍ୱମଥ ପୁରଭିଦି ଦ୍ରାକ୍ ପଣୀକର୍ତୁକାମେ ।
ସାକୂତଂ ହୈମବତ୍ୟା ମୃଦୁଲହସିତୟା ବୀକ୍ଷିତାୟାସ୍ତବାମ୍ବ
ବ୍ୟାଲୋଲୋଲ୍ଲାସିବଲ୍ଗଲ୍ଲହରିନଟଘଟୀତାଣ୍ଡବଂ ନଃ ପୁନାତୁ ॥ ୫୧॥
ବିଭୂଷିତାନଙ୍ଗରିପୂତ୍ତମାଙ୍ଗା ସଦ୍ୟଃକୃତାନେକଜନାର୍ତିଭଙ୍ଗା ।
ମନୋହରୋତ୍ତୁଙ୍ଗଚଲତ୍ତରଙ୍ଗା ଗଙ୍ଗା ମମାଙ୍ଗାନ୍ୟମଲୀକରୋତୁ ॥ ୫୨॥
ଇମାଂ ପୀୟୂଷଲହରୀଂ ଜଗନ୍ନାଥେନ ନିର୍ମିତାମ୍ ।
ଯଃ ପଠେତ୍ତସ୍ୟ ସର୍ୱତ୍ର ଜାୟନ୍ତେ ସୁଖସମ୍ପଦଃ ॥ ୫୩॥
Encoded and proofread by Arvind Kolhatkar akolhatkar at rogers.com
Proofread by Sunder Hattangadi