#க³ங்கா³லஹரீ

ஸம்ருʼத்³த⁴ம்ʼ ஸௌபா⁴க்³யம்ʼ ஸகலவஸுதா⁴யா꞉ கிமபி தன்

மஹைஶ்வர்யம்ʼ லீலாஜனிதஜக³த꞉ க²ண்ட³பரஶோ꞉ .

ஶ்ருதீனாம்ʼ ஸர்வஸ்வம்ʼ ஸுக்ருʼதமத² மூர்தம்ʼ ஸுமனஸாம்ʼ

ஸுதா⁴ஸோத³ர்யம்ʼ தே ஸலிலமஶிவம்ʼ ந꞉ ஶமயது .. 1..

த³ரித்³ராணாம்ʼ தை³ன்யம்ʼ து³ரிதமத² து³ர்வாஸனஹ்ருʼதா³ம்ʼ

த்³ருதம்ʼ தூ³ரீகுர்வன் ஸக்ருʼத³பி க³தோ த்³ருʼஷ்டிஸரணிம் .

அபி த்³ராகா³வித்³யாத்³ருமத³லநதீ³க்ஷாகு³ருரிஹ

ப்ரவாஹஸ்தே வாராம்ʼ ஶ்ரியமயமபாராம்ʼ தி³ஶது ந꞉ .. 2..

உத³ஞ்சன்மார்தண்ட³ஸ்பு²டகபடஹேரம்ப³ஜனனீ-

கடாக்ஷவ்யாக்ஷேபக்ஷணஜனிதஸங்க்ஷோப⁴னிவஹா꞉ .

ப⁴வந்து த்வங்க³ந்தோ ஹரஶிரஸி க³ங்கா³தனுபு⁴வ-

ஸ்தரங்கா³꞉ ப்ரோத்துங்கா³ து³ரிதப⁴யப⁴ங்கா³ய ப⁴வதாம் .. 3..

தவாலம்பா³த³ம்ப³ ஸ்பு²ரத³லகு⁴க³ர்வேண ஸஹஸா

மயா ஸர்வே(அ)வஜ்ஞாஸரணிமத² நீதா꞉ ஸுரக³ணா꞉ .

இதா³னீமௌதா³ஸ்யம்ʼ ப⁴ஜஸி யதி³ பா⁴கீ³ரதி² ததா³

நிராதா⁴ரோ ஹா ரோதி³மி கத²ய கேஷாமிஹ புர꞉ .. 4..

ஸ்ம்ருʼதிம்ʼ யாதா பும்ʼஸாமக்ருʼதஸுக்ருʼதாநாமபி ச யா

ஹரத்யந்தஸ்தந்த்³ராம்ʼ திமிரமிவ சந்த்³ராம்ʼஶுஸரணி꞉ .

இயம்ʼ ஸா தே மூர்தி꞉ ஸகலஸுரஸம்ʼஸேவ்யஸலிலா

மமாந்த꞉ஸந்தாபம்ʼ த்ரிவித⁴மபி பாபம்ʼ ச ஹரதாம் .. 5..

அபி ப்ராஜ்யம்ʼ ராஜ்யம்ʼ த்ருʼணமிவ பரித்யஜ்ய ஸஹஸா

விலோலத்³வாநீரம்ʼ தவ ஜனனி தீரம்ʼ ஶ்ரிதவதாம் .

ஸுதா⁴த꞉ ஸ்வாதீ³யஸ்ஸலிலப⁴ரமாத்ருʼப்தி பிப³தாம்ʼ

ஜனாநாமானந்த³꞉ பரிஹஸதி நிர்வாணபத³வீம் .. 6..

ப்ரபா⁴தே ஸ்னாதீனாம்ʼ ந்ருʼபதிரமணீனாம்ʼ குசதடீ-

க³தோ யாவன்மாதர்மிலதி தவ தோயைர்ம்ருʼக³மத³꞉ .

ம்ருʼகா³ஸ்தாவத்³வைமானிகஶதஸஹஸ்ரை꞉ பரிவ்ருʼதா

விஶந்தி ஸ்வச்ச²ந்த³ம்ʼ விமலவபுஷோ நந்த³னவனம் .. 7..

ஸ்ம்ருʼதம்ʼ ஸத்³ய꞉ ஸ்வாந்தம்ʼ விரசயதி ஶாந்தம்ʼ ஸக்ருʼத³பி

ப்ரகீ³தம்ʼ யத்பாபம்ʼ ஜ²டிதி ப⁴வதாபம்ʼ ச ஹரதி .

இத³ம்ʼ தத்³க³ங்கே³தி ஶ்ரவணரமணீயம்ʼ க²லு பத³ம்ʼ

மம ப்ராணப்ராந்தே வத³னகமலாந்தர்விலஸது .. 8..

யத³ந்த꞉ கே²லந்தோ ப³ஹுலதரஸந்தோஷப⁴ரிதா

ந காகா நாகாதீ⁴ஶ்வரநக³ரஸாகாங்க்ஷமனஸ꞉ .

நிவாஸால்லோகானாம்ʼ ஜனிமரணஶோகாபஹரணம்ʼ

ததே³தத்தே தீரம்ʼ ஶ்ரமஶமனதீ⁴ரம்ʼ ப⁴வது ந꞉ .. 9..

ந யத்ஸாக்ஷாத்³வேதை³ரபி க³லிதபே⁴தை³ரவஸிதம்ʼ

ந யஸ்மின் ஜீவானாம்ʼ ப்ரஸரதி மனோவாக³வஸர꞉ .

நிராகாரம்ʼ நித்யம்ʼ நிஜமஹிமநிர்வாஸிததமோ

விஶுத்³த⁴ம்ʼ யத்தத்த்வம்ʼ ஸுரதடினி தத்த்வம்ʼ ந விஷய꞉ .. 10..

மஹாதா³னைர்த்⁴யானைர்ப³ஹுவித⁴விதானைரபி ச யன்

ந லப்⁴யம்ʼ கோ⁴ராபி⁴꞉ ஸுவிமலதபோராஶிபி⁴ரபி .

அசிந்த்யம்ʼ தத்³விஷ்ணோ꞉ பத³மகி²லஸாதா⁴ரணதயா

த³தா³னா கேனாஸி த்வமிஹ துலனீயா கத²ய ந꞉ .. 11..

ந்ருʼணாமீக்ஷாமாத்ராத³பி பரிஹரந்த்யா ப⁴வப⁴யம்ʼ

ஶிவாயாஸ்தே மூர்தே꞉ க இஹ மஹிமானம்ʼ நிக³த³து .

அமர்ஷம்லானாயா꞉ பரமமனுரோத⁴ம்ʼ கி³ரிபு⁴வோ

விஹாய ஶ்ரீகண்ட²꞉ ஶிரஸி நியதம்ʼ தா⁴ரயதி யாம் .. 12..

வினிந்த்³யான்யுன்மத்தைரபி ச பரிஹார்யாணி பதிதை-

ரவாச்யானி வ்ராத்யை꞉ ஸபுலகமபாஸ்யானி பிஶுனை꞉ .

ஹரந்தீ லோகாநாமனவரதமேனாம்ʼஸி கியதாம்ʼ

கதா³ப்யஶ்ராந்தா த்வம்ʼ ஜக³தி புனரேகா விஜயஸே .. 13..

ஸ்க²லந்தீ ஸ்வர்லோகாத³வனிதலஶோகாபஹ்ருʼதயே

ஜடாஜூடக்³ரந்தௌ² யத³ஸி விநிப³த்³தா⁴ புரபி⁴தா³ .

அயே நிர்லோபா⁴நாமபி மனஸி லோப⁴ம்ʼ ஜனயதாம்ʼ

கு³ணாநாமேவாயம்ʼ தவ ஜனனி தோ³ஷ꞉ பரிணத꞉ .. 14..

ஜடா³னந்தா⁴ன் பங்கூ³ன் ப்ரக்ருʼதிப³தி⁴ரானுக்திவிகலான்

க்³ரஹக்³ரஸ்தானஸ்தாகி²லது³ரிதநிஸ்தாரஸரணீன் .

நிலிம்பைர்நிர்முக்தானபி ச நிரயாந்தர்னிபததோ

நரானம்ப³ த்ராதும்ʼ த்வமிஹ பரமம்ʼ பே⁴ஷஜமஸி .. 15..

ஸ்வபா⁴வஸ்வச்சா²னாம்ʼ ஸஹஜஶிஶிராணாமயமபா-

மபாரஸ்தே மாதர்ஜயதி மஹிமா கோ(அ)பி ஜக³தி .

முதா³யம்ʼ கா³யந்தி த்³யுதலமனவத்³யத்³யுதிப்⁴ருʼத꞉

ஸமாஸாத்³யாத்³யாபி ஸ்பு²டபுலகஸாந்த்³ரா꞉ ஸக³ரஜா꞉ .. 16..

க்ருʼதக்ஷுத்³ரைனஸ்கானத² ஜ²டிதி ஸந்தப்தமனஸ꞉

ஸமுத்³த⁴ர்தும்ʼ ஸந்தி த்ரிபு⁴வனதலே தீர்த²னிவஹா꞉ .

அபி ப்ராயஶ்சித்தப்ரஸரணபதா²தீதசரிதா-

ந்னரானூரீகர்தும்ʼ த்வமிவ ஜனனி த்வம்ʼ விஜயஸே .. 17..

நிதா⁴னம்ʼ த⁴ர்மாணாம்ʼ கிமபி ச விதா⁴னம்ʼ நவமுதா³ம்ʼ

ப்ரதா⁴னம்ʼ தீர்தா²நாமமலபரிதா⁴னம்ʼ த்ரிஜக³த꞉ .

ஸமாதா⁴னம்ʼ பு³த்³தே⁴ரத² க²லு திரோதா⁴னமதி⁴யாம்ʼ

ஶ்ரியாமாதா⁴னம்ʼ ந꞉ பரிஹரது தாபம்ʼ தவ வபு꞉ .. 18..

புரோ தா⁴வம்ʼ தா⁴வம்ʼ த்³ரவிணமதி³ராகூ⁴ர்ணிதத்³ருʼஶாம்ʼ

மஹீபானாம்ʼ நானாதருணதரகே²த³ஸ்ய நியதம் .

மமைவாயம்ʼ மந்து꞉ ஸ்வஹிதஶதஹந்துர்ஜட³தி⁴யோ

வியோக³ஸ்தே மாதர்யதி³ஹ கருணாத꞉ க்ஷணமபி .. 19..

மருல்லீலாலோலல்லஹரிலுலிதாம்போ⁴ஜபடலீ-

ஸ்க²லத்பாம்ʼஸுவ்ராதச்சு²ரணவிஸரத்கௌங்குமருசி .

ஸுரஸ்த்ரீவக்ஷோஜக்ஷரத³க³ருஜம்பா³லஜடிலம்ʼ

ஜலம்ʼ தே ஜம்பா³லம்ʼ மம ஜனனஜாலம்ʼ ஜரயது .. 20..

ஸமுத்பத்தி꞉ பத்³மாரமணபத³பத்³மாமலநகா²-

ந்நிவாஸ꞉ கந்த³ர்பப்ரதிப⁴டஜடாஜூடப⁴வனே .

அதா²(அ)யம்ʼ வ்யாஸங்கோ³ ஹதபதிதநிஸ்தாரணவிதௌ⁴

ந கஸ்மாது³த்கர்ஷஸ்தவ ஜனனி ஜாக³ர்து ஜக³தி .. 21..

நகே³ப்⁴யோ யாந்தீனாம்ʼ கத²ய தடினீனாம்ʼ கதமயா

புராணாம்ʼ ஸம்ʼஹர்து꞉ ஸுரது⁴னி கபர்தோ³(அ)தி⁴ருருஹே .

கயா வா ஶ்ரீப⁴ர்து꞉ பத³கமலமக்ஷாலி ஸலிலை-

ஸ்துலாலேஶோ யஸ்யாம்ʼ தவ ஜனனி தீ³யேத கவிபி⁴꞉ .. 22..

வித⁴த்தாம்ʼ நி꞉ஶங்கம்ʼ நிரவதி⁴ ஸமாதி⁴ம்ʼ விதி⁴ரஹோ

ஸுக²ம்ʼ ஶேஷே ஶேதாம்ʼ ஹரிரவிரதம்ʼ ந்ருʼத்யது ஹர꞉ .

க்ருʼதம்ʼ ப்ராயஶ்சித்தைரலமத² தபோதா³னயஜனை꞉

ஸவித்ரீ காமானாம்ʼ யதி³ ஜக³தி ஜாக³ர்தி ஜனனீ .. 23..

அநாத²꞉ ஸ்னேஹார்த்³ராம்ʼ விக³லிதக³தி꞉ புண்யக³திதா³ம்ʼ

பதன் விஶ்வோத்³த⁴ர்த்ரீம்ʼ க³த³விக³லித꞉ ஸித்³த⁴பி⁴ஷஜம் .

ஸுதா⁴ஸிந்து⁴ம்ʼ த்ருʼஷ்ணாகுலிதஹ்ருʼத³யோ மாதரமயம்ʼ

ஶிஶு꞉ ஸம்ப்ராப்தஸ்த்வாமஹமிஹ வித³த்⁴யா꞉ ஸமுசிதம் .. 24..

விலீனோ வை வைவஸ்வதநக³ரகோலாஹலப⁴ரோ

க³தா தூ³தா தூ³ரம்ʼ க்வசித³பி பரேதான் ம்ருʼக³யிதும் .

விமானானாம்ʼ வ்ராதோ வித³லயதி வீதி²ர்தி³விஷதா³ம்ʼ

கதா² தே கல்யாணீ யத³வதி⁴ மஹீமண்ட³லமகா³த் .. 25..

ஸ்பு²ரத்காமக்ரோத⁴ப்ரப³லதரஸஞ்ஜாதஜடில-

ஜ்வரஜ்வாலாஜாலஜ்வலிதவபுஷாம்ʼ ந꞉ ப்ரதிதி³னம் .

ஹரந்தாம்ʼ ஸந்தாபம்ʼ கமபி மருது³ல்லாஸலஹரி-

ச்ச²டாசஞ்சத்பாத²꞉கணஸரணயோ தி³வ்யஸரித꞉ .. 26..

இத³ம்ʼ ஹி ப்³ரஹ்மாண்ட³ம்ʼ ஸகலபு⁴வநாபோ⁴க³ப⁴வனம்ʼ

தரங்கை³ர்யஸ்யாந்தர்லுட²தி பரிதஸ்திந்து³கமிவ .

ஸ ஏஷ ஶ்ரீகண்ட²ப்ரவிததஜடாஜூடஜடிலோ

ஜலானாம்ʼ ஸங்கா⁴தஸ்தவ ஜனனி தாபம்ʼ ஹரது ந꞉ .. 27..

த்ரபந்தே தீர்தா²னி த்வரிதமிஹ யஸ்யோத்³த்⁴ருʼதிவிதௌ⁴

கரம்ʼ கர்ணே குர்வந்த்யபி கில கபாலிப்ரப்⁴ருʼதய꞉ .

இமம்ʼ த்வம்ʼ மாமம்ப³ த்வமியமனுகம்பார்த்³ரஹ்ருʼத³யே

புனானா ஸர்வேஷாமக⁴மத²னத³ர்பம்ʼ த³லயஸி .. 28..

ஶ்வபாகானாம்ʼ வ்ராதைரமிதவிசிகித்ஸாவிசலிதை-

ர்விமுக்தாநாமேகம்ʼ கில ஸத³னமேன꞉பரிஷதா³ம் .

அஹோ மாமுத்³த⁴ர்தும்ʼ ஜனனி க⁴டயந்த்யா꞉ பரிகரம்ʼ

தவ ஶ்லாகா⁴ம்ʼ கர்தும்ʼ கத²மிவ ஸமர்தோ² நரபஶு꞉ .. 29..

ந கோ(அ)ப்யேதாவந்தம்ʼ க²லு ஸமயமாரப்⁴ய மிலிதோ

யது³த்³தா⁴ராதா³ராத்³ப⁴வதி ஜக³தோ விஸ்மயப⁴ர꞉ .

இதீமாமீஹாம்ʼ தே மனஸி சிரகாலம்ʼ ஸ்தி²தவதீ-

மயம்ʼ ஸம்ப்ராப்தோ(அ)ஹம்ʼ ஸப²லயிதுமம்ப³ ப்ரணய ந꞉ .. 30..

ஶ்வவ்ருʼத்திவ்யாஸங்கோ³ நியதமத² மித்²யாப்ரலபனம்ʼ

குதர்கேஶ்வப்⁴யாஸ꞉ ஸததபரபைஶுன்யமனனம் .

அபி ஶ்ராவம்ʼ ஶ்ராவம்ʼ மம து புனரேவம்ʼ கு³ணக³ணா-

ந்ருʼதே த்வத்கோ நாம க்ஷணமபி நிரீக்ஷேத வத³னம் .. 31..

விஶாலாப்⁴யாமாப்⁴யாம்ʼ கிமிஹ நயநாப்⁴யாம்ʼ க²லு ப²லம்ʼ

ந யாப்⁴யாமாலீடா⁴ பரமரமணீயா தவ தனு꞉ .

அயம்ʼ ஹி ந்யக்காரோ ஜனனி மனுஜஸ்ய ஶ்ரவணயோ-

ர்யயோர்னாந்தர்யாதஸ்தவ லஹரிலீலாகலகல꞉ .. 32..

விமானை꞉ ஸ்வச்ச²ந்த³ம்ʼ ஸுரபுரமயந்தே ஸுக்ருʼதின꞉

பதந்தி த்³ராக் பாபா ஜனனி நரகாந்த꞉ பரவஶா꞉ .

விபா⁴கோ³(அ)யம்ʼ தஸ்மின்னஶுப⁴மயமூர்தௌ ஜனபதே³

ந யத்ர த்வம்ʼ லீலாத³லிதமனுஜாஶேஷகலுஷா .. 33..

அபி க்⁴னந்தோ விப்ரானவிரதமுஶந்தோ கு³ருஸதீ꞉

பிப³ந்தோ மைரேயம்ʼ புனரபி ஹரந்தஶ்ச கனகம் .

விஹாய த்வய்யந்தே தனுமதனுதா³னாத்⁴வரஜுஷா-

முபர்யம்ப³ க்ரீட³ந்த்யகி²லஸுரஸம்பா⁴விதபதா³꞉ .. 34..

அலப்⁴யம்ʼ ஸௌரப்⁴யம்ʼ ஹரதி ஸததம்ʼ ய꞉ ஸுமனஸாம்ʼ

க்ஷணாதே³வ ப்ராணானபி விரஹஶஸ்த்ரக்ஷதஹ்ருʼதா³ம் .

த்வதீ³யானாம்ʼ லீலாசலிதலஹரீணாம்ʼ வ்யதிகராத்

புனீதே ஸோ(அ)பி த்³ராக³ஹஹ பவமானஸ்த்ரிபு⁴வனம் .. 35..

கியந்த꞉ ஸந்த்யேகே நியதமிஹலோகார்த²க⁴டகா꞉

பரே பூதாத்மான꞉ கதி ச பரலோகப்ரணயின꞉ .

ஸுக²ம்ʼ ஶேதே மாதஸ்தவ க²லு க்ருʼபாத꞉ புனரயம்ʼ

ஜக³ந்நாத²꞉ ஶஶ்வத்த்வயி நிஹிதலோகத்³வயப⁴ர꞉ .. 36..

ப⁴வத்யா ஹி வ்ராத்யாத⁴மபதிதபாக²ண்ட³பரிஷத்

பரித்ராணஸ்னேஹ꞉ ஶ்லத²யிதுமஶக்ய꞉ க²லு யதா² .

மமாப்யேவம்ʼ ப்ரேமா து³ரிதனிவஹேஷ்வம்ப³ ஜக³தி

ஸ்வபா⁴வோ(அ)யம்ʼ ஸர்வைரபி க²லு யதோ து³ஷ்பரிஹர꞉ .. 37..

ப்ரதோ³ஷாந்தர்ந்ருʼத்யத்புரமத²னலீலோத்³த்⁴ருʼதஜடா-

தடாபோ⁴க³ப்ரேங்க²ல்லஹரிபு⁴ஜஸந்தானவிது⁴தி꞉ .

பி³லக்ரோட³க்ரீட³ஜ்ஜலட³மருடங்காரஸுப⁴க³-

ஸ்திரோத⁴த்தாம்ʼ தாபம்ʼ த்ரித³ஶதடினீதாண்ட³வவிதி⁴꞉ .. 38..

ஸதை³வ த்வய்யேவார்பிதகுஶலசிந்தாப⁴ரமிமம்ʼ

யதி³ த்வம்ʼ மாமம்ப³ த்யஜஸி ஸமயே(அ)ஸ்மின்ஸுவிஷமே .

ததா³ விஶ்வாஸோ(அ)யம்ʼ த்ரிபு⁴வனதலாத³ஸ்தமயதே

நிராதா⁴ரா சேயம்ʼ ப⁴வதி க²லு நிர்வ்யாஜகருணா .. 39..

கபர்தா³து³ல்லஸ்ய ப்ரணயமிலத³ர்தா⁴ங்க³யுவதே꞉

புராரே꞉ ப்ரேங்க²ந்த்யோ ம்ருʼது³லதரஸீமந்தஸரணௌ .

ப⁴வான்யா ஸாபத்ன்யஸ்பு²ரிதநயனம்ʼ கோமலருசா

கரேணாக்ஷிப்தாஸ்தே ஜனனி விஜயந்தாம்ʼ லஹரய꞉ .. 40..

ப்ரபத்³யந்தே லோகா꞉ கதி ந ப⁴வதீமத்ரப⁴வதீ-

முபாதி⁴ஸ்தத்ராயம்ʼ ஸ்பு²ரதி யத³பீ⁴ஷ்டம்ʼ விதரஸி .

ஶபே துப்⁴யம்ʼ மாதர்மம து புனராத்மா ஸுரது⁴னி

ஸ்வபா⁴வாதே³வ த்வய்யமிதமனுராக³ம்ʼ வித்⁴ருʼதவான் .. 41..

லலாடே யா லோகைரிஹ க²லு ஸலீலம்ʼ திலகிதா

தமோ ஹந்தும்ʼ த⁴த்தே தருணதரமார்தண்ட³துலனாம் .

விலும்பந்தீ ஸத்³யோ விதி⁴லிகி²தது³ர்வர்ணஸரணிம்ʼ

த்வதீ³யா ஸா ம்ருʼத்ஸ்னா மம ஹரது க்ருʼத்ஸ்நாமபி ஶுசம் .. 42..

நரான் மூடா⁴ம்ʼஸ்தத்தஜ்ஜனபத³ஸமாஸக்தமனஸோ

ஹஸந்த꞉ ஸோல்லாஸம்ʼ விகசகுஸுமவ்ராதமிஷத꞉ .

புனானா꞉ ஸௌரப்⁴யை꞉ ஸததமலினோ நித்யமலினான்

ஸகா²யோ ந꞉ ஸந்து த்ரித³ஶதடினீதீரதரவ꞉ .. 43..

யஜந்த்யேகே தே³வான் கடி²னதரஸேவாம்ʼஸ்தத³பரே

விதாநவ்யாஸக்தா யமநியமரக்தா꞉ கதிபயே .

அஹம்ʼ து த்வந்நாமஸ்மரணக்ருʼதகாமஸ்த்ரிபத²கே³

ஜக³ஜ்ஜாலம்ʼ ஜானே ஜனனி த்ருʼணஜாலேன ஸத்³ருʼஶம் .. 44..

அவிஶ்ராந்தம்ʼ ஜன்மாவதி⁴ ஸுக்ருʼதஜன்மார்ஜனக்ருʼதாம்ʼ

ஸதாம்ʼ ஶ்ரேய꞉ கர்தும்ʼ கதி ந க்ருʼதின꞉ ஸந்தி விபு³தா⁴꞉ .

நிரஸ்தாலம்பா³நாமக்ருʼதஸுக்ருʼதானாம்ʼ து ப⁴வதீம்ʼ

வினா(அ)முஷ்மிம்ʼல்லோகே ந பரமவலோகே ஹிதகரம் .. 45..

பய꞉ பீத்வா மாதஸ்தவ ஸபதி³ யாத꞉ ஸஹசரை-

ர்விமூடை⁴꞉ ஸம்ʼரந்தும்ʼ க்வசித³பி ந விஶ்ராந்திமக³மம் .

இதா³னீமுத்ஸங்கே³ ம்ருʼது³பவனஸஞ்சாரஶிஶிரே

சிராது³ந்நித்³ரம்ʼ மாம்ʼ ஸத³யஹ்ருʼத³யே ஶாயய சிரம் .. 46..

ப³தா⁴ன த்³ராகே³வ த்³ரடி⁴மரமணீயம்ʼ பரிகரம்ʼ

கிரீடே பா³லேந்து³ம்ʼ நியமய புன꞉ பன்னக³க³ணை꞉ .

ந குர்யாஸ்த்வம்ʼ ஹேலாமிதரஜனஸாதா⁴ரணதயா

ஜக³ந்நாத²ஸ்யாயம்ʼ ஸுரது⁴னி ஸமுத்³தா⁴ரஸமய꞉ .. 47..

ஶரச்சந்த்³ரஶ்வேதாம்ʼ ஶஶிஶகலஶ்வேதாலமுகுடாம்ʼ

கரை꞉ கும்பா⁴ம்போ⁴ஜே வரப⁴யநிராஸௌ ச த³த⁴தீம் .

ஸுதா⁴தா⁴ராகாராப⁴ரணவஸனாம்ʼ ஶுப்⁴ரமகர-

ஸ்தி²தாம்ʼ த்வாம்ʼ யே த்⁴யாயந்த்யுத³யதி ந தேஷாம்ʼ பரிப⁴வ꞉ .. 48..

த³ரஸ்மிதஸமுல்லஸத்³வத³னகாந்திபூராம்ருʼதை-

ர்ப⁴வஜ்வலனப⁴ர்ஜிதானநிஶமூர்ஜயந்தீ நரான் .

சிதே³கமயசந்த்³ரிகாசயசமத்க்ருʼதிம்ʼ தன்வதீ

தனோது மம ஶந்தனோ꞉ ஸபதி³ ஶந்தனோரங்க³னா .. 49..

மந்த்ரைர்மீலிதமௌஷதை⁴ர்முகுலிதம்ʼ த்ரஸ்தம்ʼ ஸுராணாம்ʼ க³ணை꞉

ஸ்ரஸ்தம்ʼ ஸாந்த்³ரஸுதா⁴ரஸைர்வித³லிதம்ʼ கா³ருத்மதைர்க்³ராவபி⁴꞉ .

வீசிக்ஷாலிதகாலியாஹிதபதே³ ஸ்வர்லோககல்லோலினி

த்வம்ʼ தாபம்ʼ திரயாது⁴னா மம ப⁴வஜ்வாலாவலீடா⁴த்மன꞉ .. 50..

த்³யூதே நாகே³ந்த்³ரக்ருʼத்திப்ரமத²க³ணமணிஶ்ரேணினந்தீ³ந்து³முக்²யம்ʼ

ஸர்வஸ்வம்ʼ ஹாரயித்வா ஸ்வமத² புரபி⁴தி³ த்³ராக் பணீகர்துகாமே .

ஸாகூதம்ʼ ஹைமவத்யா ம்ருʼது³லஹஸிதயா வீக்ஷிதாயாஸ்தவாம்ப³

வ்யாலோலோல்லாஸிவல்க³ல்லஹரினடக⁴டீதாண்ட³வம்ʼ ந꞉ புனாது .. 51..

விபூ⁴ஷிதானங்க³ரிபூத்தமாங்கா³ ஸத்³ய꞉க்ருʼதானேகஜனார்திப⁴ங்கா³ .

மனோஹரோத்துங்க³சலத்தரங்கா³ க³ங்கா³ மமாங்கா³ன்யமலீகரோது .. 52..

இமாம்ʼ பீயூஷலஹரீம்ʼ ஜக³ந்நாதே²ன நிர்மிதாம் .

ய꞉ படே²த்தஸ்ய ஸர்வத்ர ஜாயந்தே ஸுக²ஸம்பத³꞉ .. 53..

Encoded and proofread by Arvind Kolhatkar akolhatkar at rogers.com

Proofread by Sunder Hattangadi