ଶ୍ରୀଗଣେଶାୟ ନମଃ ॥
ସୂତ ଉବାଚ --
ଶୃଣୁଧ୍ୱଂ ମୁନୟଃ ସର୍ୱେ ଗଙ୍ଗାସ୍ତବମନୁତ୍ତମମ୍ ।
ଶୋକମୋହହରଂ ପୁଂସାମୃଷିଭିଃ ପରିକୀର୍ତିତମ୍ ॥ ୧॥
ଋଷୟ ଊଚୁଃ --
ଇୟଂ ସୁରତରଙ୍ଗିଣୀ ଭବନବାରିଧେସ୍ତାରିଣୀ
ସ୍ତୁତା ହରିପଦାମ୍ବୁଜାଦୁପଗତା ଜଗତ୍ସଂସଦଃ ।
ସୁମେରୁଶିଖରାମରପ୍ରିୟଜଲାମଲକ୍ଷାଲିନୀ
ପ୍ରସନ୍ନବଦନା ଶୁଭା ଭବଭୟସ୍ୟ ବିଦ୍ରାବିଣୀ ॥ ୨॥
ଭଗୀରଥରଥାନୁଗା ସୁରକରୀନ୍ଦ୍ରଦର୍ପାପହା
ମହେଶମୁକୁଟପ୍ରଭା ଗିରିଶିରଃପତାକା ସିତା ।
ସୁରାସୁରନରୋରଗୈରଜଭବାଚ୍ୟୁତୈଃ ସଂସ୍ତୁତା
ବିମୁକ୍ତିଫଲଶାଲିନୀ କଲୁଷନାଶିନୀ ରାଜତେ ॥ ୩॥
ପିତାମହକମଣ୍ଡଲୁପ୍ରଭବମୁକ୍ତିବୀଜା ଲତା
ଶ୍ରୁତିସ୍ମୃତିଗଣସ୍ତୁତଦ୍ୱିଜକୁଲାଲବାଲାବୃତା ।
ସୁମେରୁଶିଖରାଭିଦା ନିପତିତା ତ୍ରିଲୋକାବୃତା
ସୁଧର୍ମଫଲଶାଲିନୀ ସୁଖପଲାଶିନୀ ରାଜତେ ॥ ୪॥
ଚରଦ୍ୱିହଗମାଲିନୀ ସଗରବଂଶମୁକ୍ତିପ୍ରଦା
ମୁନୀନ୍ଦ୍ରବରନନ୍ଦିନୀ ଦିବି ମତା ଚ ମନ୍ଦାକିନୀ ।
ସଦା ଦୁରିତନାଶିନୀ ବିମଲବାରିସନ୍ଦର୍ଶନ-
ପ୍ରଣାମଗୁଣକୀର୍ତନାଦିଷୁ ଜଗତ୍ସୁ ସଂରାଜତେ ॥ ୫॥
ମହାଭିଷସୁତାଙ୍ଗନା ହିମଗିରୀଶକୂଟସ୍ତନା
ସଫେନଜଲହାସିନୀ ସିତମରାଲସଚ୍ଚାରିଣୀ ।
ଚଲଲ୍ଲହରିସତ୍କରା ବରସରୋଜମାଲାଧରା
ରସୋଲ୍ଲସିତଗାମିନୀ ଜଲଧିକାମିନୀ ରାଜତେ ॥ ୬॥
କ୍ୱଚିନ୍ମୁନିଗଣୈଃ ସ୍ତୁତା କ୍ୱଚିଦନନ୍ତସମ୍ପୂଜିତା
କ୍ୱଚିତ୍କଲକଲସ୍ୱନା କ୍ୱଚିଦଧୀରୟାଦୋଗଣା ।
କ୍ୱଚିଦ୍ରବିକରୋଜ୍ଜ୍ୱଲା କ୍ୱଚିଦୁଦଗ୍ରପାତାକୁଲା
କ୍ୱଚିଜ୍ଜନବିଗାହିତା ଜୟତି ଭୀଷ୍ମମାତା ସତୀ ॥ ୭॥
ସ ଏବ କୁଶଲୀ ଜନଃ ପ୍ରଣମତୀହ ଭାଗୀରଥୀଂ
ସ ଏବ ତପସାଂ ନିଧିର୍ଜପତି ଜାହ୍ନବୀମାଦରାତ୍ ।
ସ ଏବ ପୁରୁଷୋତ୍ତମଃ ସ୍ମରତି ସାଧୁ ମନ୍ଦାକିନୀଂ
ସ ଏବ ବିଜୟୀ ପ୍ରଭୁଃ ସୁରତରଙ୍ଗିଣୀଂ ସେବତେ ॥ ୮॥
ତବାମଲଜଲାଚିତଂ ଖଗସୃଗାଲମୀନକ୍ଷତଂ
ଚଲଲ୍ଲହରିଲୋଲିତଂ ରୁଚିରତୀରଜମ୍ବାଲିତମ୍ ।
କଦା ନିଜବପୁର୍ମୁଦା ସୁରନରୋରଗୈଃ ସଂସ୍ତୁତୋଽପ୍ୟହଂ
ତ୍ରିପଥଗାମିନି ପ୍ରିୟମତୀବ ପଶ୍ୟାମ୍ୟହୋ ॥ ୯॥
ତ୍ୱତ୍ତୀରେ ବସତିଂ ତବାମଲଜଲସ୍ନାନଂ ତବ ପ୍ରେକ୍ଷଣଂ
ତ୍ୱନ୍ନାମସ୍ମରଣଂ ତବୋଦୟକଥାସଂଲାପନଂ ପାବନମ୍ ।
ଗଙ୍ଗେ ମେ ତବ ସେବନୈକନିପୁଣୋଽପ୍ୟାନନ୍ଦିତଶ୍ଚାଦୃତଃ
ସ୍ତୁତ୍ୱା ଚୋଦ୍ଗତପାତକୋ ଭୁବି କଦା ଶାନ୍ତଶ୍ଚରିଷ୍ୟାମ୍ୟହମ୍ ॥ ୧୦॥
ଇତ୍ୟେତଦୃଷିଭିଃ ପ୍ରୋକ୍ତଂ ଗଙ୍ଗାସ୍ତବନମୁତ୍ତମମ୍ ।
ସ୍ୱର୍ଗ୍ୟଂ ଯଶ୍ସ୍ୟମାୟୁଷ୍ୟଂ ପଠନାଚ୍ଛ୍ରବଣାଦପି ॥ ୧୧॥
ସର୍ୱପାପହରଂ ପୁଂସାଂ ବଲମାୟୁର୍ୱିବର୍ଧନମ୍ ।
ପ୍ରାତର୍ମଧ୍ୟାହ୍ନସାୟାହ୍ନେ ଗଙ୍ଗାସାନ୍ନିଧ୍ୟତା ଭବେତ୍ ॥ ୧୨॥
ଇତ୍ୟେତଦ୍ଭାର୍ଗବାଖ୍ୟାନଂ ଶୁକଦେବାନ୍ମୟା ଶ୍ରୁତମ୍ ।
ପଠିତଂ ଶ୍ରାବିତଂ ଚାତ୍ର ପୁଣ୍ୟଂ ଧନ୍ୟଂ ଯଶସ୍କରମ୍ ॥ ୧୩॥
ଅବତାରଂ ମହାବିଷ୍ଣୋଃ କଲ୍କେଃ ପରମମଦ୍ଭୁତମ୍ ।
ପଠତାଂ ଶୃଣ୍ୱତାଂ ଭକ୍ତ୍ୟା ସର୍ୱାଶୁଭବିନାଶନମ୍ ॥ ୧୪॥
ଇତି ଶ୍ରୀକଲ୍କିପୁରାଣେଽନୁଭାଗବତେ ଭବିଷ୍ୟେ ତୃତୀୟାଂଶେ
ଋଷିକୃତୋ ଗଙ୍ଗାସ୍ତବଃ ସମ୍ପୂର୍ଣଃ ॥
Encoded and proofread by Dinesh Agarwal dinesh.garghouse at gmail.com
Proofread by PSA EASWARAN psaeaswaran at gmail.com