ஷடா³நநம் த்ரிஷண்ணேத்ரம் வித்³ருமாப⁴ம் த்³விபாத³கம் ।
க²ட்³கா³ப⁴யக³தா³ஶக்திகே²டம் த³க்ஷிணபா³ஹுபி⁴꞉ ॥ 1 ॥
வரபத்³மத⁴நு꞉ஶூலவஜ்ரான் வாமேந தா⁴ரிணம் ।
வஜ்ரப்ரவாளவைடூ³ர்யப்ரத்யுப்தமகுடாந்விதம் ॥ 2 ॥
பீதாம்ப³ரவிபூ⁴ஷாட்⁴யம் தி³வ்யக³ந்தா⁴நுலேபநம் ।
ரத்நாத்³யாப⁴ரணைர்யுக்தம் ப்ரஸந்நவத³நாந்விதம் ॥ 3 ॥
மயூரேஶஸமாஸீநம் ஸர்வாப⁴ரணபூ⁴ஷிதம் ।
கு³ஹம் ஷோட³ஶவேதாநம் ஷண்முக²ம் ச விபா⁴வயேத் ॥ 4 ॥
– பூர்வமுக² த்⁴யாநம் –
வசத்³பு⁴வம் ஶஶாங்காப⁴ம் ஏகவக்த்ரம் த்ரிலோசநம் ।
சதுர்பு⁴ஜஸமாயுக்தம் வராப⁴யஸமந்விதம் ॥
ஸவ்யே சாந்யே த³ண்ட³யுதம் ஊரூஹஸ்தம் ச வாமகே ।
ருத்³ராக்ஷமாலாப⁴ரணம் ப⁴ஸ்மபுண்ட்³ராங்கிதம் க்ரமாத் ॥
புரஶ்சூடா³ஸமாயுக்தம் மௌஞ்ஜீகௌபீநதா⁴ரிணம் ।
அக்ஷமாலாஸமாயுக்தம் பாது³காத்³வயபூ⁴ஷிதம் ॥
காஷாயவஸ்த்ரஸம்யுக்தம் வசத்³பு⁴வம் விபா⁴வயேத் ॥
– த³க்ஷிணமுக² த்⁴யாநம் –
ஜக³த்³பூ⁴தம் ப்⁴ருங்க³வர்ணம் ஏகவக்த்ரம் வராப⁴யம் ।
ஶக்திஶூலஸமாயுக்தம் கரண்ட³மகுடாந்விதம் ।
மயுரேஶஸமாஸீநம் பா⁴வயே ச விஶேஷத꞉ ॥
– நைர்ருதிமுக² த்⁴யாநம் –
விஶ்வபு⁴வம் ச ரக்தாப⁴ம் ஏகவக்த்ரம் த்ரிலோசநம் ।
வராப⁴யகரோபேதம் க²ட்³க³கே²டகஸம்யுதம் ।
மயூரவாஹநாரூட⁴ம் பா⁴வயேத்ஸததம் முதா³ ॥
– பஶ்சிமமுக² த்⁴யாநம் –
ஶுக்லவர்ணம் ப்³ரஹ்மபு⁴வம் ஏகவக்த்ரம் த்ரிலோசநம் ।
வராப⁴யஸமாயுக்தம் க⁴ண்டாநாத³ஸமந்விதம் ।
மயூரேஶஸமாஸீநம் பா⁴வயே ச விஶேஷத꞉ ॥
– உத்தரமுக² த்⁴யாநம் –
ஹேமவர்ணம் சாக்³நிபு⁴வம் த்ரிநேத்ரம் சைகவக்த்ரகம் ।
வராப⁴யஸமாயுக்தம் க³தா³த்⁴வஜஸமந்விதம் ।
மயூரவாஹநாரூட⁴ம் பா⁴வயேத்³வஹ்நிஸம்ப⁴வம் ॥
– ஈஶாநமுக² த்⁴யாநம் –
ப்³ருஹத்³பு⁴வம் ச ஸ்ப²டிகவர்ணாப⁴ம் சைகவக்த்ரகம் ।
வராப⁴யஸமாயுக்தம் த்ரிநேத்ரம் யஜ்ஞஸூத்ரகம் ।
மயூரேஶஸமாஸீநம் ப்³ருஹத்³பு⁴வம் விபா⁴வயேத் ॥
ஓம் நமோ ப⁴க³வதே ஸுப்³ரஹ்மண்யாய ।