ஹ்ரியா லக்ஷ்ம்யா வல்ல்யா ஸுரப்ருதநயா(ஆ)லிங்கி³ததநு꞉
மயூராரூடோ⁴(அ)யம் ஶிவவத³நபங்கேருஹரவி꞉ ।
ஷடா³ஸ்யோ ப⁴க்தாநாமசலஹ்ருதி³வாஸம் ப்ரதநவை
இதீமம் பு³த்³தி⁴ம் த்³ராக³சலநிலய꞉ ஸஞ்ஜநயதி ॥ 1 ॥
ஸ்மிதந்யக்க்ருதேந்து³ப்ரபா⁴குந்த³புஷ்பம்
ஸிதாப்⁴ராக³ருப்ரஷ்ட²க³ந்தா⁴நுலிப்தம் ।
ஶ்ரிதாஶேஷலோகேஷ்டதா³நாமரத்³ரும்
ஸதா³ ஷண்முக²ம் பா⁴வயே ஹ்ருத்ஸரோஜே ॥ 2 ॥
ஶரீரேந்த்³ரியாதா³வஹம்பா⁴வஜாதான்
ஷடூ³ர்மீர்விகாராம்ஶ்ச ஶத்ரூந்நிஹந்தும் ।
நதாநாம் த³தே⁴ யஸ்தமாஸ்யாப்³ஜஷட்கம்
ஸதா³ ஷண்முக²ம் பா⁴வயே ஹ்ருத்ஸரோஜே ॥ 3 ॥
அபர்ணாக்²யவல்லீஸமாஶ்லேஷயோகா³த்
புரா ஸ்தா²ணுதோ யோ(அ)ஜநிஷ்டாமரார்த²ம் ।
விஶாக²ம் நகே³ வல்லிகா(ஆ)லிங்கி³தம் தம்
ஸதா³ ஷண்முக²ம் பா⁴வயே ஹ்ருத்ஸரோஜே ॥ 4 ॥
கு³காரேண வாச்யம் தமோ பா³ஹ்யமந்த꞉
ஸ்வதே³ஹாப⁴யா ஜ்ஞாநதா³நேந ஹந்தி ।
ய ஏநம் கு³ஹம் வேத³ஶீர்ஷைகமேயம்
ஸதா³ ஷண்முக²ம் பா⁴வயே ஹ்ருத்ஸரோஜே ॥ 5 ॥
யத꞉ கர்மமார்கோ³ பு⁴வி க்²யாபிதஸ்தம்
ஸ்வந்ருத்யே நிமித்தஸ்ய ஹேதும் விதி³த்வா ।
வஹத்யாத³ராந்மேக⁴நாதா³நுலாஸீ
ஸதா³ ஷண்முக²ம் பா⁴வயே ஹ்ருத்ஸரோஜே ॥ 6 ॥
க்ருபாவாரிராஶிர்ந்ருணாமாஸ்திகத்வம்
த்³ருட⁴ம் கர்துமத்³யாபி ய꞉ குக்குடாதீ³ன் ।
ப்⁴ருஶம் பாசிதான் ஜீவயந்ராஜதே தம்
ஸதா³ ஷண்முக²ம் பா⁴வயே ஹ்ருத்ஸரோஜே ॥ 7 ॥
பு⁴ஜங்க³ப்ரயாதேந வ்ருத்தேந க்லுப்தாம்
ஸ்துதிம் ஷண்முக²ஸ்யாத³ராத்³யே பட²ந்தி ।
ஸுபுத்ராயுராரோக்³யஸம்பத்³விஶிஷ்டான்
கரோத்யேவ தான் ஷண்முக²꞉ ஸத்³வித³க்³ர்யான் ॥ 8 ॥
இதி ஶ்ரீஶ்ருங்கே³ரி ஶாரதா³பீட² ஜக³த்³கு³ரு ஶ்ரீசந்த்³ரஶேக²ரபா⁴ரதீ ஸ்வாமிபி⁴꞉ விரசிதம் ஶ்ரீஷண்முக² பு⁴ஜங்க³ ஸ்துதி꞉ ।