పల్లవి :
నాగుల చవితి ఓ నాగన్నా - మా పూజలను గైకొనుమన్నా
కోటి కోటి దండాలు స్వామి నాగన్నా
మము చల్లగా కాపాడుమయా స్వామి నాగన్నా
|| కోటి ||
శ్రీహరి పానుపు నీవేనయ్యా - శివయ్య మెడలో భూషణమయ్యా
నీ పూజలను ఘనముగ చేతుము దిగిదిగి రావయ్య నాగన్నా
|| కోటి ||
పిల్లా పాపల తోడనుమేము- నీ పుట్టకును వచ్చితిమయ్యా
భక్తితో నిన్ను మ్రొక్కెదమయ్యా కోరిన కోర్కెలు తీర్చగ రావా
|| కోటి ||
గుమ్మడి తంగేడు పూలను తెచ్చి- చలిమిడి చిమ్మిలి నైవేద్యమిచ్చి
పాలు గుడ్లు నీ కర్పించి ముదముగ నిన్ను కొలిచెదమయ్యా
|| కోటి ||
పొలాల గట్లను తిరిగే రైతుల మేతకు వచ్చే మూగ జీవులను
కాటు వేయక కరుణను చూపి కాపాడుమయా నాగన్నా
|| కోటి ||
కోపము బూనకు కోడెనాగన్నా దయగల తండ్రివి నీవేనన్నా
నాగుల చవితి మా నాగన్నా అప్పన్న దాసుని మొర వినుమన్నా
|| కోటి ||