caṇḍapāpaharapādasēvanaṁ
gaṇḍaśōbhivarakuṇḍaladvayam |
daṇḍitākhilasurārimaṇḍalaṁ
daṇḍapāṇimaniśaṁ vibhāvayē || 1 ||
kālakālatanujaṁ kr̥pālayaṁ
bālacandravilasajjaṭādharam |
cēladhūtaśiśuvāsarēśvaraṁ
daṇḍapāṇimaniśaṁ vibhāvayē || 2 ||
tārakēśasadr̥śānanōjjvalaṁ
tārakārimakhilārthadaṁ javāt |
tārakaṁ niravadhērbhavāmbudhē-
-rdaṇḍapāṇimaniśaṁ vibhāvayē || 3 ||
tāpahārinijapādasaṁstutiṁ
kōpakāmamukhavairivārakam |
prāpakaṁ nijapadasya satvaraṁ
daṇḍapāṇimaniśaṁ vibhāvayē || 4 ||
kāmanīyakavinirjitāṅgajaṁ
rāmalakṣmaṇakarāmbujārcitam |
kōmalāṅgamatisundarākr̥tiṁ
daṇḍapāṇimaniśaṁ vibhāvayē || 5 ||
iti śr̥ṅgērijagadguru śrīsaccidānandaśivābhinavanr̥siṁhabhāratī svāmibhiḥ viracitaṁ śrīdaṇḍapāṇi pañcaratnam |