pralambitajaṭābaddhaṁ candrarēkhāvataṁsakam |
nīlagrīvaṁ śaraccandracandrikābhirvirājitam || 1 ||
gōkṣīradhavalākāraṁ candrabimbasamānanam |
susmitaṁ suprasannaṁ ca svātmatattvaikasaṁsthitam || 2 ||
gaṅgādharaṁ śivaṁ śāntaṁ lasatkēyūramaṇḍitam |
sarvābharaṇasamyuktaṁ sarvalakṣaṇasamyutam || 3 ||
vīrāsanē samāsīnaṁ vēdayajñōpavītinam |
bhasmadhārābhirāmaṁ taṁ nāgābharaṇabhūṣitam || 4 ||
vyāghracarmāmbaraṁ śuddhaṁ yōgapaṭ-ṭāvr̥taṁ śubham |
sarvēṣāṁ prāṇināmātmajñānāpasmārapr̥ṣṭhataḥ || 5 ||
vinyastacaraṇaṁ samyag jñānamudrādharaṁ haram |
sarvavijñānaratnānāṁ kōśabhūtaṁ supustakam || 6 ||
dadhānaṁ sarvatattvākṣamālikāṁ kuṇḍikāmapi |
svātmabhūtaparānandaparāśaktyardhavigraham || 7 ||
dharmarūpavr̥ṣōpētaṁ dhārmikairvēdapāragaiḥ |
munibhiḥ saṁvr̥taṁ māyāvaṭamūlāśritaṁ śubham || 8 ||
īśānaṁ sarvavidyānāmīśvarēśvaramavyayam |
utpattyādivinirmuktamōṅkārakamalāsanam || 9 ||
svātmavidyāpradānēna sadā saṁsāramōcakam |
rudraṁ paramakāruṇyātsarvaprāṇihitē ratam || 10 ||
upāsakānāṁ sarvēṣāmabhīṣṭasakalapradam |
dakṣiṇāmūrtidēvākhyaṁ jagatsargādikāraṇam || 11 ||
samāgatya mahābhaktyā daṇḍavatpr̥thivītalē |
praṇamya bahuśō dēvaṁ samārādhya yathābalam || 12 ||
rudra yattē mukhaṁ tēna dakṣiṇaṁ pāhi māmiti |
uktvā punaḥ punardēvaṁ pūjayāmāsa bhaktitaḥ || 13 ||
iti śrīskāndapurāṇē sūtasaṁhitāyāṁ muktikhaṇḍē caturthō:’dhyāyē śrī dakṣiṇāmūrti stōtram ||