natakhēṭaniśāṭakirīṭataṭī
ghaṭitōpalapāṭalapīṭhitalam |
taṭidābhajaṭāpaṭalīmukuṭaṁ
vaṭamūlakuṭīnilayaṁ kalayē || 1 ||
smaraṇaṁ khalu yaccaraṇāmbujayō-
-rbharaṇāya bhavōttaraṇāya bhavēt |
śaraṇaṁ karuṇāvaruṇāvasathaṁ
bhaja bālasudhākiraṇābharaṇam || 2 ||
parikīrṇasuvarṇasavarṇajaṭā-
-bhramadabhrasariccharadabhraruciḥ |
makuṭōkuṭilaṁ chaṭayan śaśinaṁ
niṭilēnaladr̥gjaṭilō jayati || 3 ||
varabhūjakuṭīghaṭitasphaṭikō-
-palakuṭ-ṭimavēditalē vimalē |
smitaphullamukhaṁ cidupāttasukhaṁ
puravairimahaḥ karavai hr̥dayē || 4 ||
akalaṅkaśaśāṅkasahasrasahō-
-daradīdhitidīpitadigvalayam |
nigamāgamanīradhinirmathanō-
-ditamākalayāmyamr̥taṁ kimapi || 5 ||
viṣabhūṣamapākr̥tadōṣacayaṁ
munivēṣaviśēṣamaśēṣagurum |
dhr̥tacinmayamudramahaṁ kalayē
gatanidramamudrasamādhividhau || 6 ||
dr̥ḍhayōgarasānubhavōtkalikaṁ
prasaratpulakaṁ kratubhuktilakam |
bhasitōllasitālikavisphuritā-
-naladr̥ktilakaṁ kalayēnduśikham || 7 ||
vada citta kimāttamabhūdbhavatā
bhramatā bahudhākhiladikṣu mudhā |
nijaśarmakaraṁ kuru karma paraṁ
bhavamēva bhayāpahamākalaya || 8 ||
varapustakahastamapāstatamaḥ
śrutimastakaśastasamastaguṇam |
mama nistulavastu purō:’stu varaṁ
praṇavapravaṇapravarāvagatam || 9 ||
iti śrī dakṣiṇāmūrti stōtram ||