mandasmita sphurita mugdhamukhāravindaṁ
kandarpakōṭiśatasundaradivyamūrtim |
ātāmrakōmala jaṭāghaṭitēndulēkha-
-mālōkayē vaṭataṭīnilayaṁ dayalum || 1 ||
kandalita bōdhamudraṁ kaivalyānanda saṁvidunnidram |
kalayē kañcanarudraṁ karuṇārasapūrapūritasamudram || 2 ||
jaya dēva mahādēva jaya kāruṇyavigraha |
jaya bhūmiruhāvāsa jaya vīrāsanasthita || 3 ||
jaya kundēndupāṭīrapāṇḍurāṅgāṅgajāpatē |
jaya vijñānamudrā:’kṣamālāvīṇālasatkara || 4 ||
jayētarakaranyasta pustakāstarajastamaḥ |
jayāpasmāra nikṣipta dakṣapāda sarōruha || 5 ||
jaya śārdūla carmaika paridhāna lasatkaṭē |
jaya mandasmitōdāra mukhēndu sphuritākr̥tē || 6 ||
jayāntēvāsinikarairāvr̥tānandamandhara |
jaya līlājitānaṅga jaya maṅgalavaibhava || 7 ||
jaya tuṅgapr̥thūraska jaya saṅgītalōlupa |
jaya gaṅgādharāsaṅga jaya śr̥ṅgāraśēkhara || 8 ||
jayōtsaṅgānuṣaṅgārya jayōttuṅga nagālaya |
jayāpāṅgaika nirdagdha tripurāmaravallabha || 9 ||
jaya piṅgajaṭājūṭa ghaṭitēndukarāmara |
jaya jātu prapannārti prapāṭana paṭūttama || 10 ||
jaya vidyōtpalōllāsi niśākara parāvara |
jayā:’vidyāndhatamasadhvaṁsanōdbhāsibhāskara || 11 ||
jaya saṁsr̥tikāntārakuṭhārāsurasūdana |
jaya saṁsārasāvitra tāpatāpita pādapa || 12 ||
jaya dōṣaviṣālīḍha mr̥tasañjīvanauṣadha |
jaya kartavyadāvāgni dagdhāntara sudhāmbudhē || 13 ||
jayā:’sūyārṇavāmagnajanatāraṇanāvika |
jayāhatākṣi rōgāṇāmatilōka sukhāñjana || 14 ||
jayāśāviṣavallīnāṁ mūlamālānikr̥ntana |
jayāghatr̥ṇakūṭānāmamanda jvalitānala || 15 ||
jaya māyāmadēbhaśrī vidāraṇa mr̥gōttama |
jaya bhaktajanasvānta candrakāntaikacandramāḥ || 16 ||
jaya santyaktasarvāśa munikōka divākara |
jayā:’calasutācāru mukhacandra cakōraka || 17 ||
jayā:’drikanyakōttuṅga kucācala vihaṅgama |
jaya haimavatī mañju mukhapaṅkaja bambhara || 18 ||
jaya kātyāyanī snigdha cittōtpala sudhākara |
jayā:’khilahr̥dākāśalasaddyumaṇimaṇḍala || 19 ||
jayā:’saṅga sukhōttuṅga saudhakrīḍana bhūmipa |
jaya saṁvitsabhāsīma naṭanōtsuka nartaka || 20 ||
jayā:’navadhi bōdhābdhikēlikautuka bhūpatē |
jaya nirmalacidvyōmni cārudyōtita nīrada || 21 ||
jayā:’nanda sadudyāna līlālōlupa kōkila |
jayā:’gamaśirōraṇyavihāra varakuñjara || 22 ||
jaya praṇava māṇikya pañjarāntaḥśukāgraṇīḥ |
jaya sarvakalāvārdhi tuṣāra karamaṇḍala || 23 ||
jayā:’ṇimādibhūtīnāṁ śaraṇyākhila puṇyabhūḥ |
jaya svabhāvabhāsaiva vibhāsita jagattraya || 24 ||
jaya khādidharitryanta jagajjanmādikāraṇa |
jayā:’śēṣa jagajjāla kalākalanavarjita || 25 ||
jaya muktajanaprāpya satyajñānasukhākr̥tē |
jaya dakṣādhvaradhvaṁsin jaya mōkṣaphalaprada || 26 ||
jaya sūkṣma jagadvyāpin jaya sākṣin cidātmaka |
jaya sarvakulākalpa jayānalpa guṇārṇava || 27 ||
jaya kandarpalāvaṇya darpanirbhēdana prabhō |
jaya karpūragaurāṅga jaya karmaphalāśraya || 28 ||
jaya kañjadalōtsēkabhañjanōdyatalōcana |
jaya pūrṇēndusaundarya garvanirvāpaṇānana || 29 ||
jaya hāsaśriyōdasta śaraccandramahāprabha |
jayādhara vinirbhinna bimbāruṇima vibhrama || 30 ||
jaya kambuvilāsaśrī dhikkāri varakandhara |
jaya mañjulamañjīrarañjita śrīpadāmbuja || 31 ||
jaya vaikuṇṭhasampūjya jayākuṇṭhamatē hara |
jaya śrīkaṇṭha sarvajña jaya sarvakalānidhē || 32 ||
jaya kōśātidūrastha jayākāśa śirōruha |
jaya pāśupatadhyēya jaya pāśavimōcaka || 33 ||
jaya dēśika dēvēśa jaya śambhō jaganmaya |
jaya śarva śivēśāna jaya śaṅkara śāśvata || 34 ||
jayōṅkāraikasaṁsiddha jaya kiṅkaravatsala |
jaya paṅkajajanmādi bhāvitāṅghriyugāmbuja || 35 ||
jaya bharga bhava sthāṇō jaya bhasmāvakuṇṭhana |
jaya sthimita gambhīra jaya nistulavikrama || 36 ||
jayāstamitasarvāśa jayōdastārimaṇḍala |
jaya mārtāṇḍasōmāgni lōcanatrayamaṇḍita || 37 ||
jaya gaṇḍasthalādarśabimbitōdbhāsikuṇḍala |
jaya pāṣaṇḍajanatādaṇḍanaikaparāyaṇa || 38 ||
jayā:’khaṇḍitasaubhāgya jaya caṇḍīśabhāvita |
jayā:’nantānta kāntaika jaya śāntajanēḍita || 39 ||
jaya trayyantasaṁvēdya jayāṅga tritayātiga |
jaya nirbhēdabōdhātman jaya nirbhāvabhāvita || 40 ||
jaya nirdvandva nirdōṣa jayādvaitasukhāmbudhē |
jaya nitya nirādhāra jaya niṣkala nirguṇa || 41 ||
jaya niṣkriya nirmāya jaya nirmala nirbhaya |
jaya niḥśabda niḥsparśa jaya nīrūpa nirmala || 42 ||
jaya nīrasa nirgandha jaya nispr̥ha niścala |
jaya niḥsīma bhūmātman jaya niṣpanda nīradhē || 43 ||
jayā:’cyuta jayā:’tarkya jayā:’nanya jayā:’vyaya |
jayā:’mūrta jayā:’cintya jayā:’grāhya jayā:’dbhuta || 44 ||
iti śrīdēśikēndrasya stōtraṁ paramapāvanam |
putrapautrāyurārōgya sarvasaubhāgyavardhanam || 45 ||
sarvavidyāpradaṁ samyagapavargavidhāyakam |
yaḥ paṭhēt prayatō bhūtvā sasarvaphalamaśnutē || 46 ||
dākṣāyaṇīpati dayārdra nirīkṣaṇēna
sākṣādavaiti paratatvamihaiva dhīraḥ |
na snāna dāna japa hōma surārcanādi-
-dharmairaśēṣa nigamānta nirūpaṇairvā || 47 ||
avacanacinmudrābhyāmadvaitaṁ bōdhamātramātmānam |
brūtē tatra ca mānaṁ pustaka bhujagāgnibhirmahādēvaḥ || 48 ||
kaṭighaṭita karaṭikr̥ttiḥ kāmapi mudrāṁ pradarśayan jaṭilaḥ |
svālōkinaḥ kapālī hanta manōvilayamātanōtyēkaḥ || 49 ||
śrutimukhacandracakōraṁ natajanadaurātmyadurgamakuṭhāram |
munimānasasañcāraṁ manasā praṇatō:’smi dēśikamudāram || 50 ||
iti śrīparamahaṁsa parivrājakācāryavarya śrīsadāśiva brahmēndraviracitaṁ śrī dakṣiṇāmūrti stōtram |