ಸ್ವರ್ಣಾಕರ್ಷಣಭೈರವೋ ಹರಿಹರಬ್ರಹ್ಮಾತ್ಮಕೋ ದೇವತಾ |
ಹ್ರೀಂ ಬೀಜಂ ಭೃಗುಶಕ್ತಿರಿತ್ಯಭಿಹಿತಂ ತಸ್ಯೈವ ಸೂತ್ರಾತ್ಮನಃ
ಸ್ತೋತ್ರಂ ಧ್ಯಾನ ಪುರಃಸರಂ ಮನುಮಯಂ ಬ್ರೂಮೋ ವಯಂ ಪ್ರತ್ಯಹಮ್ || ೧ ||
ಮಂದಾರದ್ರುಮಮೂಲಪೂಜಿತಮಹಾಮಾಣಿಕ್ಯಸಿಂಹಾಸನೇ
ಸಂವಿಷ್ಟೋ ದರಭಿನ್ನ ಚಂಪಕರುಚಾ ದೇವ್ಯಾ ಸಮಾಲಿಂಗಿತಃ |
ಭಕ್ತೇಭ್ಯೋ ವರರತ್ನ ಪಾತ್ರ ಭರಿತಂ ಸ್ವರ್ಣಂ ದದಾನೋಽನಿಶಂ
ಸ್ವರ್ಣಾಕರ್ಷಣಭೈರವೋ ವಿಜಯತೇ ಸ್ವರ್ಗಾಪವರ್ಗಪ್ರದಃ || ೨ ||
ಓಂ ಐಂ ಕ್ಲಾಂ ಕ್ಲೀಂ ಕ್ಲೂಮಿತಿ ವ್ಯಾಹರನ್
ಯೋ ಭಕ್ತಃ ಸ್ವರ್ಣಾಕರ್ಷಣಮ್ |
ಕಾರುಣ್ಯಾಬ್ಧಿಃ ಕಲ್ಪಮೂಲಾಧಿವಾಸಃ
ಸ್ವರ್ಣಾಕರ್ಷೋ ಭೈರವೋ ಮೇಽಸ್ತು ಭೂತ್ಯೈ || ೩ ||
ಹ್ರಾಂ ಹ್ರೀಂ ಹೂಂ ಸಃ ಸಂತತಂ ಜಾಪಕಾನಾಂ
ವರ್ಷಂತಂ ತಂ ಸ್ವರ್ಣವೃಷ್ಟಿಂ ಸಮಗ್ರಾಮ್ |
ಅಂತಃ ಸ್ವಾಂತಂ ಸೂರ್ಯಕೋಟಿಪ್ರಕಾಶಂ
ಸ್ವರ್ಣಾಕರ್ಷಂ ಭೈರವಂ ಭಾವಯಾಮಿ || ೪ ||
ಮರಕತಮಣಿಪಾತ್ರೇ ಸಂಭೃತಂ ಸ್ವರ್ಣಪೂರ್ಣಂ
ಕೃಪಣತರಜನೇಭ್ಯಸ್ತಾರತಃ ಸಂಪ್ರದಾತುಃ |
ಕುರು ಹೃದಯ ಸಪರ್ಯಾಂ ಸೇವಮಾನಾಯ ನಿತ್ಯಂ
ಸುರವರಮನುಜೇಂದ್ರಸ್ಯಾಪದುದ್ಧಾರಣಾಯ || ೫ ||
ನಮೋಽಜಾಮಲಬದ್ಧಾಯ ಬ್ರಹ್ಮಸೂತ್ರಾಧಿವಾಸಸೇ |
ಸ್ವರ್ಣಾಕರ್ಷಣಶೀಲಾಯ ಸಾಧಕಾನಾಂ ಕೃತಾತ್ಮನೇ || ೬ ||
ಲೋಕೇಶ್ವರಾದ್ಯರ್ಚಿತಪಾದುಕಾಯ
ದಾರಿದ್ರ್ಯನಿರ್ಮೂಲನಕಾರಣಾಯ |
ಸ್ವರ್ಣಾದಿ ದಾನಕರಣೋದ್ಯತ ಭೈರವಾಯ
ಕಾರುಣ್ಯವಾರಾನ್ನಿಧಯೇ ನಮಸ್ತೇ || ೭ ||
ದೀನಾನಾಥ ವಿಪನ್ನರಕ್ಷಣಪರೈ ರಾಜ್ಯಪ್ರತೀಕ್ಷಾಪರೈಃ
ಸಿದ್ಧೈಃ ಸಾಧ್ಯಗಣೈಃ ಸುರಾಸುರಗಣೈರ್ಭುಕ್ತಿಪ್ರಯುಕ್ತಾತ್ಮಭಿಃ |
ಮೂಲೇ ಕಲ್ಪತರೋರ್ಮಹಾಮಣಿಮಯೇ ಮಾರ್ತಂಡತೇಜೋಜುಷೇ
ಸ್ವರ್ಣಾಕರ್ಷಣಭೈರವಾಯ ಸತತಂ ಕುರ್ಮೋ ನಮಸ್ಯಾಂ ವಯಮ್ || ೮ ||
ಸ್ವರ್ಣಾಕರ್ಷಿಸ್ವರ್ಣದೇವ್ಯಾಶ್ರಿತಾಯ
ಸ್ವರ್ಣಾರೂಢೋದಾರಸಿಂಹಾಸನಾಯ |
ಕುರ್ಮೋ ನಿತ್ಯಂ ಸ್ವರ್ಣದಾತ್ರೇ ನಮಸ್ಯಾಂ
ದಾರಿದ್ರ್ಯದ್ವೇಷಿ ಶ್ರೀಮತೇ ಭೈರವಾಯ || ೯ ||
ಸ್ವರ್ಣಪ್ರದಾನಾಧ್ವರದೀಕ್ಷಿತಾಯ
ಸ್ವತೇಜಸಾಕ್ರಾಂತಜಗತ್ತ್ರಯಾಯ |
ಔದಾರ್ಯಸಂಪತ್ಸದನಾಯ ನಿತ್ಯಂ
ಓಂ ಶ್ರೀಮಹಾಭೈರವ ತೇ ನಮೋಽಸ್ತು || ೧೦ ||
ಚಿಂತಾಮಣಿಸ್ಥಿತಮಹಾನಿಧಿಕಾಮಧೇನು-
-ಮಂದಾರಮೂಲಮಣಿಮಂಡಪಮಧ್ಯಗಾಯ |
ಸ್ವರ್ಣಪ್ರದಾನನಿರತಾಯ ಸದಾ ಸಪರ್ಯಾಂ
ಕುರ್ಮೋ ವಯಂ ತ್ರಿಕರಣೈಃ ಪರಭೈರವಾಯ || ೧೧ ||
ಮೂಲೇ ಕಲ್ಪತರೋಃ ಪ್ರಭಾಪರಿಮಲೇ ಭದ್ರಾಸನೇ ಸಂಸ್ಥಿತೋ
ಹಸ್ತಾಂಭೋರುಹರತ್ನಪಾತ್ರಭರಿತೈಃ ಕಾರ್ತಸ್ವರೈರ್ಭಾಸ್ವರೈಃ |
ನಿರ್ಮೂಲೀಕೃತದುರ್ಗತೋ ವಿರಚಯನ್ ವಿದ್ಯುದ್ದಿನೇಶದ್ಯುತಿಃ
ಸ್ವರ್ಣಾಕರ್ಷಣಭೈರವೋ ಭವತು ನೋ ದಾರಿದ್ರ್ಯವಿದ್ವೇಷಣಃ || ೧೨ ||
ದುಗ್ಧಾದ್ಯಾರಾಧ್ಯ ಸ್ವರ್ಣಾಕೃತಿ ಕನಕಮಯೇ ದ್ವೀಪವರ್ಯೇ ಸುಧಾಬ್ಧೌ
ಕಾಪಿತ್ಥೇ ತತ್ರ ರಮ್ಯೇ ಮಣಿಮಯವಿಲಸದ್ಭಿತ್ತಿಪಾಶ್ಚಾತ್ಯಭಾಗೇ |
ಯದ್ವತ್ತಂ ಸರ್ವವಾಂಛಾಧಿಕವಸುನಿಚಯಂ ಮಂತ್ರಿಣಾಂ ಸಂಸರಂತಂ
ಧ್ಯಾಯೇಚ್ಛ್ರೀಭೈರವಂ ತಂ ಸಕಲಸುವಸುದಂ ದುಃಖದಾರಿದ್ರ್ಯ ಶತ್ರುಮ್ || ೧೩ ||
ಸುವರ್ಣಮಂಡಪೇ ಧ್ಯಾಯೇತ್ ಸುವರ್ಣರುಚಿಭಿರ್ಯುತಮ್ |
ಮಹಾತ್ಮಾನಂ ಸುಖಾಸೀನಂ ಪ್ರಸನ್ನವರದಾಯಕಮ್ || ೧೪ ||
ಸರ್ವರತ್ನವಿಭೂಷಾಢ್ಯಂ ಸುರಾಸುರನಮಸ್ಕೃತಮ್ |
ಮಣಿಹಾರಕಸಂಪೂರ್ತಿಂ ದದತಂ ಸ್ವಕರೈಃ ಸದಾ || ೧೫ ||
ಸುವರ್ಣವೃಷ್ಟಿರೂಪೈಶ್ಚ ಧನಸಾರೈರ್ನಿರಂತರಮ್ |
ದಾರಿದ್ರ್ಯನಾಮಸಂಹಾರಂ ಕುಂಡಲೋಲ್ಲಾಸಸಂಯುತಮ್ || ೧೬ ||
ಏವಂ ಧ್ಯಾತ್ವಾ ಮಹಾತ್ಮಾನಂ ಮಹಾದಾರಿದ್ರ್ಯನಾಶನಮ್ |
ಸ್ತೌಮಿ ಮಂದಾರಮೂಲಸ್ಥಂ ಬ್ರಹ್ಮಸೂತ್ರಾಧಿವಾಸನಮ್ || ೧೭ ||
ಸ್ವರ್ಣಸಿದ್ಧಿಂ ಕರೈರೇವ ದದಾನಂ ಸ್ವರ್ಣಭೈರವಮ್ |
ಋಣಂ ನ ಜಾಯತೇ ತಸ್ಯ ಧನಂ ಶೀಘ್ರಮವಾಪ್ನುಯಾತ್ || ೧೮ ||
ಸ್ವರ್ಣಾದಿಮಧ್ಯಮಣಿಮಂಡಪ ಕಲ್ಪವೃಕ್ಷೇ
ಪೀತಾರುಣಾಂಬುಜನಿವಿಷ್ಟಸುವರ್ಣವರ್ಣಮ್ |
ಮಾಣಿಕ್ಯಪಾತ್ರಮಭಯಂ ದಧತಂ ಚ ದೋರ್ಭ್ಯಾಂ
ಸ್ವರ್ಣಾದಿಕರ್ಷಣವಿನೋದನಿಧಿಂ ನಮಾಮಿ || ೧೯ ||
ಸುವರ್ಣಕರ್ಷಕಂ ನಿತ್ಯಂ ಋಣಹರ್ತಾರಮೀಶ್ವರಮ್ |
ಭಜತೋ ನ ಋಣಂ ತಸ್ಯ ಧನಂ ಶೀಘ್ರಂ ಪ್ರಜಾಯತೇ || ೨೦ ||
ಪೀತವರ್ಣಂ ಚತುರ್ಬಾಹುಂ ತ್ರಿನೇತ್ರಂ ಪೀತವಾಸಸಮ್ |
ಅಕ್ಷದ್ವಯಂ ಸ್ವರ್ಣಮಯಂ ತಡಿತ್ಪೂರಿತಪಾತ್ರಕಮ್ || ೨೧ ||
ಅತಿತೀಕ್ಷ್ಣಮಹಾಶೂಲಂ ತೋಮರಂ ಚಾಮರದ್ವಯಮ್ |
ಸತತಂ ಚಿಂತಯೇದ್ಯಸ್ತು ಭೈರವಂ ಸ್ವರ್ಣಸಿದ್ಧಿದಮ್ || ೨೨ ||
ಸ್ವರ್ಣಾಕರ್ಷಣಭೈರವಮಂತ್ರಾಢ್ಯಂ ಸ್ತೋತ್ರಮುತ್ತಮಮ್ |
ಪಠತಾಂ ನಿಧಿಸಿದ್ಧಿಶ್ಚ ಸ್ವರ್ಣಸಿದ್ಧಿಶ್ಚ ಜಾಯತೇ || ೨೩ ||
ಅನೇನ ಸ್ತವರಾಜೇನ ನಿತ್ಯಂ ಬ್ರಹ್ಮಹರೀಶ್ವರಾಃ |
ಸ್ವರ್ಣಾಕರ್ಷಣನಾಮಾನಿ ಸ್ತುವಂತಿ ಜಗದೀಶ್ವರಾಃ || ೨೪ ||
ಫಲಶ್ರುತಿಃ –
ಯಃ ಪಠೇತ್ ಪರಮಂ ಸ್ತೋತ್ರಮಿದಂ ನಿತ್ಯಂ ನರೋತ್ತಮಃ |
ಸ ಮರ್ತ್ಯೋ ಮಂದಭಾಗ್ಯೋಽಪಿ ಭೈರವಸ್ಯ ಪ್ರಸಾದತಃ || ೨೫ ||
ಇಚ್ಛತೋಽಪ್ಯಧಿಕಾಂ ಲಕ್ಷ್ಮೀಂ ಲಭತೇ ನಾತ್ರ ಸಂಶಯಃ |
ರಸಸಿದ್ಧಿರ್ಭವೇಚ್ಛೀಘ್ರಂ ನಿಧೀನಾಮಧಿಪೋ ಭವೇತ್ || ೨೬ ||
ಸರ್ವಾನ್ ಕಾಮಾನವಾಪ್ನೋತಿ ದೈವತೈರಪಿ ದುರ್ಲಭಮ್ |
ಏತಜ್ಜಪೈರ್ಮಹಾಲಕ್ಷ್ಮೀಶ್ಚಂಚಲಾಪ್ಯಚಲಾ ಭವೇತ್ || ೨೭ ||
ರತ್ನಾನ್ಯಶ್ವಾನ್ ಗಜಾನ್ ಭೂತೀರ್ಲಭತೇ ಶೀಘ್ರಮೇವ ಹಿ |
ಸ್ವರ್ಣರಾಶಿಮವಾಪ್ನೋತಿ ಚಾಕ್ಷಯಾಂ ನಾತ್ರ ಸಂಶಯಃ || ೨೮ ||
ಧೇನುಂ ಚಿಂತಾಮಣಿಂ ಕಲ್ಪದ್ರುಮಂ ಶೀಘ್ರಮವಾಪ್ನುಯಾತ್ |
ನಿತ್ಯಮಷ್ಟೋತ್ತರಶತಂ ಯೋ ಜಪೇತ್ ಸ್ತೋತ್ರಮುತ್ತಮಮ್ || ೨೯ ||
ಮಂಡಲಾರ್ಧಾಚ್ಚ ಪ್ರಾಗೇವ ಸ್ವರ್ಣರಾಶಿಮನುತ್ತಮಮ್ |
ಸತತಂ ಧ್ಯಾಯತೇ ತಸ್ಮೈ ದರ್ಶಯತ್ಯೇವ ನಿಶ್ಚಯಃ || ೩೦ ||
ನಿತ್ಯಂ ಚ ತ್ರಿಪುರಾಭಕ್ತೈಃ ಸ್ವರ್ಣಾಕರ್ಷಣಭೈರವಃ |
ಯತ್ನೇನ ಸರ್ವದೋಪಾಸ್ಯಃ ಸರ್ವಕಾಮಪ್ರದಾಯಕಃ || ೩೧ ||
ಇತಿ ಶ್ರೀರುದ್ರಯಾಮಲೇ ಶ್ರೀತ್ರಿಪುರಾಸಿದ್ಧಾಂತೇ ದಕ್ಷಿಣಾಮೂರ್ತಿ ಪ್ರೋಕ್ತಂ ಶ್ರೀ ಸ್ವರ್ಣಾಕರ್ಷಣ ಭೈರವ ಸ್ತೋತ್ರಮ್ ||