ದೇವದೇವ ಮಹಾಬಾಹೋ ಭಕ್ತಾನಾಂ ಸುಖವರ್ಧನ |
ಕೇನ ಸಿದ್ಧಿಂ ದದಾತ್ಯಾಶು ಕಾಳೀ ತ್ರೈಲೋಕ್ಯಮೋಹನ || ೧ ||
ತನ್ಮೇ ವದ ದಯಾಽಽಧಾರ ಸಾಧಕಾಭೀಷ್ಟಸಿದ್ಧಯೇ |
ಕೃಪಾಂ ಕುರು ಜಗನ್ನಾಥ ವದ ವೇದವಿದಾಂ ವರ || ೨ ||
ಶ್ರೀಭೈರವ ಉವಾಚ |
ಗೋಪನೀಯಂ ಪ್ರಯತ್ನೇನ ತತ್ತ್ವಾತ್ ತತ್ತ್ವಂ ಪರಾತ್ಪರಮ್ |
ಏಷ ಸಿದ್ಧಿಕರಃ ಸಮ್ಯಕ್ ಕಿಮಥೋ ಕಥಯಾಮ್ಯಹಮ್ || ೩ ||
ಮಹಾಕಾಲಮಹಂ ವಂದೇ ಸರ್ವಸಿದ್ಧಿಪ್ರದಾಯಕಮ್ |
ದೇವದಾನವಗಂಧರ್ವಕಿನ್ನರಪರಿಸೇವಿತಮ್ || ೪ ||
ಕವಚಂ ತತ್ತ್ವದೇವಸ್ಯ ಪಠನಾದ್ಘೋರದರ್ಶನೇ |
ಸತ್ಯಂ ಭವತಿ ಸಾನ್ನಿಧ್ಯಂ ಕವಚಸ್ತವನಾಂತರಾತ್ || ೫ ||
ಸಿದ್ಧಿಂ ದದಾತಿ ಸಾ ತುಷ್ಟಾ ಕೃತ್ವಾ ಕವಚಮುತ್ತಮಮ್ |
ಸಾಮ್ರಾಜ್ಯತ್ವಂ ಪ್ರಿಯಂ ದತ್ತ್ವಾ ಪುತ್ರವತ್ ಪರಿಪಾಲಯೇತ್ || ೬ ||
ಕವಚಸ್ಯ ಋಷಿರ್ದೇವೀ ಕಾಳಿಕಾ ದಕ್ಷಿಣಾ ತಥಾ |
ವಿರಾಟ್ಛಂದಃ ಸುವಿಜ್ಞೇಯಂ ಮಹಾಕಾಲಸ್ತು ದೇವತಾ |
ಕಾಳಿಕಾ ಸಾಧನೇ ಚೈವ ವಿನಿಯೋಗಃ ಪ್ರಕೀರ್ತಿತಃ || ೭ ||
ಶ್ಮಶಾನಸ್ಥೋ ಮಹಾರುದ್ರೋ ಮಹಾಕಾಲೋ ದಿಗಂಬರಃ |
ಕಪಾಲಕರ್ತೃಕಾ ವಾಮೇ ಶೂಲಂ ಖಟ್ವಾಂಗಂ ದಕ್ಷಿಣೇ || ೮ ||
ಭುಜಂಗಭೂಷಿತೇ ದೇವಿ ಭಸ್ಮಾಸ್ಥಿಮಣಿಮಂಡಿತಃ |
ಜ್ವಲತ್ಪಾವಕಮಧ್ಯಸ್ಥೋ ಭಸ್ಮಶಯ್ಯಾವ್ಯವಸ್ಥಿತಃ || ೯ ||
ವಿಪರೀತರತಾಂ ತತ್ರ ಕಾಳಿಕಾಂ ಹೃದಯೋಪರಿ |
ಪೇಯಂ ಖಾದ್ಯಂ ಚ ಚೋಷ್ಯಂ ಚ ತೌ ಕೃತ್ವಾ ತು ಪರಸ್ಪರಮ್ |
ಏವಂ ಭಕ್ತ್ಯಾ ಯಜೇದ್ದೇವಂ ಸರ್ವಸಿದ್ಧಿಃ ಪ್ರಜಾಯತೇ || ೧೦ ||
ಪ್ರಣವಂ ಪೂರ್ವಮುಚ್ಚಾರ್ಯ ಮಹಾಕಾಲಾಯ ತತ್ಪದಮ್ |
ನಮಃ ಪಾತು ಮಹಾಮಂತ್ರಃ ಸರ್ವಶಾಸ್ತ್ರಾರ್ಥಪಾರಗಃ || ೧೧ ||
ಅಷ್ಟಾಕ್ಷರೋ ಮಹಾಮಂತ್ರಃ ಸರ್ವಾಶಾಪರಿಪೂರಕಃ |
ಸರ್ವಪಾಪಕ್ಷಯಂ ಯಾತಿ ಗ್ರಹಣೇ ಭಕ್ತವತ್ಸಲೇ || ೧೨ ||
ಕೂರ್ಚದ್ವಂದ್ವಂ ಮಹಾಕಾಲ ಪ್ರಸೀದೇತಿ ಪದದ್ವಯಮ್ |
ಲಜ್ಜಾಯುಗ್ಮಂ ವಹ್ನಿಜಾಯಾ ಸ ತು ರಾಜೇಶ್ವರೋ ಮಹಾನ್ || ೧೩ ||
ಮಂತ್ರಗ್ರಹಣಮಾತ್ರೇಣ ಭವೇತ್ ಸತ್ಯಂ ಮಹಾಕವಿಃ |
ಗದ್ಯಪದ್ಯಮಯೀ ವಾಣೀ ಗಂಗಾನಿರ್ಝರಿತಾ ತಥಾ || ೧೪ ||
ತಸ್ಯ ನಾಮ ತು ದೇವೇಶಿ ದೇವಾ ಗಾಯಂತಿ ಭಾವುಕಾಃ |
ಶಕ್ತಿಬೀಜದ್ವಯಂ ದತ್ವಾ ಕೂರ್ಚಂ ಸ್ಯಾತ್ ತದನಂತರಮ್ || ೧೫ ||
ಮಹಾಕಾಲಪದಂ ದತ್ವಾ ಮಾಯಾಬೀಜಯುಗಂ ತಥಾ |
ಕೂರ್ಚಮೇಕಂ ಸಮುದ್ಧೃತ್ಯ ಮಹಾಮಂತ್ರೋ ದಶಾಕ್ಷರಃ || ೧೬ ||
ರಾಜಸ್ಥಾನೇ ದುರ್ಗಮೇ ಚ ಪಾತು ಮಾಂ ಸರ್ವತೋ ಮುದಾ |
ವೇದಾದಿಬೀಜಮಾದಾಯ ಭಗಮಾನ್ ತದನಂತರಮ್ || ೧೭ ||
ಮಹಾಕಾಲಾಯ ಸಂಪ್ರೋಚ್ಯ ಕೂರ್ಚಂ ದತ್ವಾ ಚ ಠದ್ವಯಮ್ |
ಹ್ರೀಂಕಾರಪೂರ್ವಮುದ್ಧೃತ್ಯ ವೇದಾದಿಸ್ತದನಂತರಮ್ || ೧೮ ||
ಮಹಾಕಾಲಸ್ಯಾಂತಭಾಗೇ ಸ್ವಾಹಾಂತಮನುಮುತ್ತಮಮ್ |
ಧನಂ ಪುತ್ರಂ ಸದಾ ಪಾತು ಬಂಧುದಾರಾನಿಕೇತನಮ್ || ೧೯ ||
ಪಿಂಗಳಾಕ್ಷೋ ಮಂಜುಯುದ್ಧೇ ಯುದ್ಧೇ ನಿತ್ಯಂ ಜಯಪ್ರದಃ |
ಸಂಭಾವ್ಯಃ ಸರ್ವದುಷ್ಟಘ್ನಃ ಪಾತು ಸ್ವಸ್ಥಾನವಲ್ಲಭಃ || ೨೦ ||
ಇತಿ ತೇ ಕಥಿತಂ ತುಭ್ಯಂ ದೇವಾನಾಮಪಿ ದುರ್ಲಭಮ್ |
ಅನೇನ ಪಠನಾದ್ದೇವಿ ವಿಘ್ನನಾಶೋ ಯಥಾ ಭವೇತ್ || ೨೧ ||
ಸಂಪೂಜಕಃ ಶುಚಿಸ್ನಾತಃ ಭಕ್ತಿಯುಕ್ತಃ ಸಮಾಹಿತಃ |
ಸರ್ವವ್ಯಾಧಿವಿನಿರ್ಮುಕ್ತಃ ವೈರಿಮಧ್ಯೇ ವಿಶೇಷತಃ || ೨೨ ||
ಮಹಾಭೀಮಃ ಸದಾ ಪಾತು ಸರ್ವಸ್ಥಾನೇಷು ವಲ್ಲಭಮ್ |
ಕಾಳೀಪಾರ್ಶ್ವಸ್ಥಿತೋ ದೇವಃ ಸರ್ವದಾ ಪಾತು ಮೇ ಮುಖೇ || ೨೩ ||
ಫಲಶ್ರುತಿ –
ಪಠನಾತ್ ಕಾಳಿಕಾದೇವೀ ಪಠೇತ್ ಕವಚಮುತ್ತಮಮ್ |
ಶ್ರುಣುಯಾದ್ವಾ ಪ್ರಯತ್ನೇನ ಸದಾಽಽನಂದಮಯೋ ಭವೇತ್ || ೧ ||
ಶ್ರದ್ಧಯಾಽಶ್ರದ್ಧಯಾ ವಾಪಿ ಪಠನಾತ್ ಕವಚಸ್ಯ ಯತ್ |
ಸರ್ವಸಿದ್ಧಿಮವಾಪ್ನೋತಿ ಯದ್ಯನ್ಮನಸಿ ವರ್ತತೇ || ೨ ||
ಬಿಲ್ವಮೂಲೇ ಪಠೇದ್ಯಸ್ತು ಪಠನಾತ್ಕವಚಸ್ಯ ಯತ್ |
ತ್ರಿಸಂಧ್ಯಂ ಪಠನಾದ್ದೇವಿ ಭವೇನ್ನಿತ್ಯಂ ಮಹಾಕವಿಃ || ೩ ||
ಕುಮಾರೀಂ ಪೂಜಯಿತ್ವಾ ತು ಯಃ ಪಠೇದ್ಭಾವತತ್ಪರಃ |
ನ ಕಿಂಚಿದ್ದುರ್ಲಭಂ ತಸ್ಯ ದಿವಿ ವಾ ಭುವಿ ಮೋದತೇ || ೪ ||
ದುರ್ಭಿಕ್ಷೇ ರಾಜಪೀಡಾಯಾಂ ಗ್ರಾಮೇ ವಾ ವೈರಿಮಧ್ಯಕೇ |
ಯತ್ರ ಯತ್ರ ಭಯಂ ಪ್ರಾಪ್ತಃ ಸರ್ವತ್ರ ಪ್ರಪಠೇನ್ನರಃ || ೫ ||
ತತ್ರ ತತ್ರಾಭಯಂ ತಸ್ಯ ಭವತ್ಯೇವ ನ ಸಂಶಯಃ |
ವಾಮಪಾರ್ಶ್ವೇ ಸಮಾನೀಯ ಶೋಭಿತಾಂ ವರಕಾಮಿನೀಮ್ || ೬ ||
ಶ್ರದ್ಧಯಾಽಶ್ರದ್ಧಯಾ ವಾಪಿ ಪಠನಾತ್ ಕವಚಸ್ಯ ತು |
ಪ್ರಯತ್ನತಃ ಪಠೇದ್ಯಸ್ತು ತಸ್ಯ ಸಿದ್ಧಿಃ ಕರೇ ಸ್ಥಿತಾ || ೭ ||
ಇದಂ ಕವಚಮಜ್ಞಾತ್ವಾ ಕಾಲಂ ಯೋ ಭಜತೇ ನರಃ |
ನೈವ ಸಿದ್ಧಿರ್ಭವೇತ್ತಸ್ಯ ವಿಘ್ನಸ್ತಸ್ಯ ಪದೇ ಪದೇ |
ಆದೌ ವರ್ಮ ಪಠಿತ್ವಾ ತು ತಸ್ಯ ಸಿದ್ಧಿರ್ಭವಿಷ್ಯತಿ || ೮ ||
ಇತಿ ರುದ್ರಯಾಮಲೇ ಮಹಾತಂತ್ರೇ ಶ್ರೀ ಮಹಾಕಾಲಭೈರವ ಕವಚಮ್ ||