నిరంతర నిష్టాగరిష్టుడై, మేధా విద్వత్తులు కలిగి, శాస్త్ర మధనం చేస్తూ ఉండేవారే నిజమైన గురువు. తన భగవదారాధనా బలంతో శిష్యులకు మంచిని బోధిస్తూ, వారిని జ్ఞానవంతులుగా తీర్చిదిద్దేందుకు తపిస్తూ ఉండాలి. శిష్యులను త్రికరణ శుద్ధిగా (తలచుట ద్వారా, మాటల ద్వారా, స్పర్శ ద్వారా) అనుగ్రహించగలగాలి.
ఒకవేళ అంతటి ఉన్నత శాస్త్ర పరిజ్ఞానం లేకపోయినప్పటికీ... కింది లక్షణాలు ఉన్నవారిని కూడా గురువుగా స్వీకరించవచ్చు.
నిజమైన భక్తి భగవంతుని యందు సంపూర్ణమైన నమ్మకము, స్వచ్ఛమైన భక్తి కలిగి ఉండటం.
ధర్మ నిరతి శాస్త్ర సంప్రదాయాలను గౌరవించే మానసిక ధర్మం కలిగి ఉండటం.
నియమ పాలన అయ్యప్ప దీక్షా నియమాలను ఖచ్చితంగా పాటిస్తూ, నిరంతరం భగవదారాధనలో, భగవత్సేవలో నిమగ్నమవ్వడం.
వాత్సల్యం తనను ఆశ్రయించిన శిష్యుల పట్ల కపటం లేని ప్రేమను, వాత్సల్యాన్ని చూపించడం.
అనుభవం ఆదర్శ భావాలు కలిగి ఉండి, అయ్యప్ప శబరిమల యాత్రలో తగినంత అనుభవం, సంస్కారం కలిగి ఉండటం.
⚠️ గమనిక ఎల్లప్పుడూ ఇతర గురువుల తప్పులను ఎంచే గురువులు సమాజంలో మంచిని, గౌరవాన్ని పొందలేరు.
గురువులలో రకాలు - సద్గురువు ప్రాముఖ్యత
సగటు గురువు కేవలం బోధించి ఊరుకుంటాడు.మంచి గురువు: విషయాన్ని సుబోధకంగా, అర్థమయ్యేలా వివరిస్తాడు.
సద్గురువు ధర్మాధర్మాలను సులభంగా బోధిస్తూ, శిష్యులను ఉత్తేజపరుస్తాడు. శిష్యులు మంచి కార్యం చేస్తే అభినందిస్తూ, చెడు ఆలోచనలను ఖండిస్తాడు. భక్తిలోని పరమార్థాన్ని ఆస్వాదించేలా చేస్తూ, జ్ఞానాన్ని అందించి, మోక్ష మార్గాన్ని చూపిస్తాడు.
"తాను దరి చేరినవాడే... ఇతరులకు సరైన దారిని చూపించగలడు."
కనుక, మనకు మంచి మార్గాన్ని చూపించే అటువంటి సద్గురువుని ఆశ్రయిద్దాం! వారి పవిత్ర హస్తాల మీదుగా మాలధారణ చేద్దాం. భగవంతుని మహిమలను దర్శిస్తూ, మహితాత్ములమవుదాం!
ఓం శ్రీ స్వామియే శరణం అయ్యప్ప! 🙏