ಮಾತುಃ ಸಚರಾಚರಸ್ಯ ಜಗತೋಽಸ್ಯ |
ಕಿಂ ಮಾಂ ದೂರೀಕುರುಷೇ
ದೇವಿ ಗಿರಾಂ ಬ್ರೂಹಿ ಕಾರಣಂ ತತ್ರ || ೧ ||
ಕಿಂ ಚಾಹುರಾಚಾರ್ಯಪಾದಾ-
-ಸ್ತ್ವದ್ಭಕ್ತಾ ಮದ್ಗುರೂತ್ತಮಾಃ ಪೂರ್ವಮ್ |
ಔರಸತನಯಂ ಮಾಂ ತವ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೨ ||
ಆನೀಯ ದೂರತೋ ಮಾಂ
ಮಾತಸ್ತ್ವತ್ಪಾದಸವಿಧಮತಿಕೃಪಯಾ |
ಪರಿಪಾಲ್ಯ ಚ ಸುಚಿರಂ ಮಾಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೩ ||
ಅತಿಪರಿಚಯಾದವಜ್ಞಾ
ಪ್ರಭವೇತ್ಪುತ್ರೇಷು ಕಿಂ ಸವಿತ್ರೀಣಾಮ್ |
ನ ಹಿ ಸಾ ಕ್ವಚಿದಪಿ ದೃಷ್ಟಾ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೪ ||
ಕಾದಾಚಿತ್ಕನಮಸ್ಕೃತಿ-
-ಕರ್ತೄಣಾಮಪ್ಯಭೀಷ್ಟದೇ ತರಸಾ |
ನಾಹಂ ಸಕೃದಪಿ ನಂತಾ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೫ ||
ಗುರುರೂಪೇಣಾಬಾಲ್ಯಾ-
-ತ್ಸೋಢ್ವಾ ಮಂತೂಂಶ್ಚ ಮತ್ಕೃತಾನ್ವಿವಿಧಾನ್ |
ಪರಿರಕ್ಷ್ಯ ಕರುಣಯಾ ಮಾಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೬ ||
ಜಗತಾಂ ಪಾಲನಮನಿಶಂ
ಕುರ್ವಂತ್ಯಾಸ್ತೇ ಭವೇತ್ಕಿಯಾನ್ಭಾರಃ |
ಅಹಮಂಬ ದೀನವರ್ಯಃ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೭ ||
ಪಾಪಾನ್ನಿವಾರ್ಯ ಸರಣೌ
ವಿಮಲಾಯಾಂ ಮೇ ಪ್ರವರ್ತನೇ ತರಸಾ |
ಕರ್ತವ್ಯೇ ಸತಿ ಕೃಪಯಾ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೮ ||
ಯದ್ಯಪ್ಯನ್ಯಾನನ್ಯಾನ್
ದೇವಾನಾರಾಧಯಾಮಿ ನ ತ್ವಂ ತೇ |
ಸರ್ವಾತ್ಮಿಕೇತಿ ಚಪಲಃ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೯ ||
ಯಾತ್ರಾಶಕ್ತಮಿಮಂ ಮಾಂ
ಗಲಿತಶರೀರಮ್ರುಜಾ ಸಮಾಕ್ರಾಂತಮ್ |
ಪಾತ್ರಮಹೇತುದಯಾಯಾಃ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೦ ||
ತವ ಸದ್ಮನಿ ಗುರುಸದನೇ
ವಿದ್ಯಾತೀರ್ಥಾಲಯೇ ಚ ಬಹುಸುಖತಃ |
ಖೇಲಾಂ ಕುರ್ವಂತಂ ಮಾಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೧ ||
ತ್ವತ್ಕ್ಷೇತ್ರನಿಕಟರಾಜ-
-ನ್ನರಸಿಂಹಾಖ್ಯಾಚಲಶೃಂಗಾಗ್ರೇ |
ಸ್ವೈರವಿಹಾರಕೃತಂ ಮಾಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೨ ||
ತ್ವತ್ಪಾದಪೂತತುಂಗಾ-
-ತೀರೇ ವಿಜನೇ ವನೇ ಚರಂತಂ ಮಾಮ್ |
ಅನುಘಸ್ರಂ ಮೋದಭರಾತ್
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೩ ||
ತುಂಗಾತೀರೇ ದಿನಕರ-
-ನಿವೇಶನಿಕಟಸ್ಥಲೇ ವಿಪುಲೇ |
ಧ್ಯಾಯಂತಂ ಪರತತ್ತ್ವಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೪ ||
ತುಂಗಾತೀರೇ ರಘುವರ-
-ಮಂದಿರಪುರತಃ ಸುದೀರ್ಘಪಾಷಾಣೇ |
ಕುತುಕಾದ್ವಿಹರಂತಂ ಮಾಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೫ ||
ಜಾತು ಚ ನರಸಿಂಹಪುರೇ
ತುಂಗಾತೀರೇ ಸುಸೈಕತೇ ಮೋದಾತ್ |
ವಿಹೃತಿಂ ಕುರ್ವಾಣಂ ಮಾಂ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೬ ||
ಯತಿವರಕೃತಾತ್ಮವಿದ್ಯಾ-
-ವಿಲಾಸಮನಿಶಂ ಪಠಂತಮತಿಮೋದಾತ್ |
ಕುಹಚಿತ್ತುಂಗಾತೀರೇ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೭ ||
ಶಂಕರಭಗವತ್ಪಾದ-
-ಪ್ರಣೀತಚೂಡಾಮಣಿಂ ವಿವೇಕಾದಿಮ್ |
ಶೃಣ್ವಂತಂ ನೃಹರಿವನೇ
ಕಸ್ಮಾದ್ದೂರೀಕರೋಷಿ ವದ ವಾಣಿ || ೧೮ ||
ಇತಿ ಶ್ರೀಸಚ್ಚಿದಾನಂದಶಿವಾಭಿನವನೃಸಿಂಹಭಾರತೀಸ್ವಾಮಿಭಿಃ ವಿರಚಿತ ಶ್ರೀ ವಾಣೀ ಪ್ರಶ್ನಮಾಲಾ ಸ್ತುತಿಃ ||