ಅಸತ್ಸದಪ್ಯದಸ್ತ್ವಯಿ ಭ್ರಮಾದ್ವಿಭಾತಿ ಕೇವಲೇ || ೧ ||
ಕ್ಷರಾಕ್ಷರಾತ್ಪರಂ ಹಿ ಯತ್ತ್ವಮೇವ ತತ್ಪದಂ ಧ್ರುವಮ್ |
ಜಲೇ ಯಥೋರ್ಮಿಬುದ್ಬುದಾಸ್ತಥಾ ತ್ವಯೀಶಜೀವದೃಕ್ || ೨ ||
ತ್ರ್ಯಧೀಶ ಓಂಕೃತೇಽಖಿಲಂ ತ್ವಮೇವ ಚಾಸ್ಯ ಮಂಗಳಮ್ |
ಯದರ್ಧಮಾತ್ರಮೂರ್ಜಿತಂ ಕ್ರಿಯಾವಿಕಾರವರ್ಜಿತಮ್ || ೩ ||
ತ್ರಿಸಪ್ತಯಾಗಸಾಧಿಕೇ ಸುಭುಕ್ತಿಮುಕ್ತಿದಾಯಕೇ |
ಸ್ವರಾರ್ಣಕಾರಣೇ ಸ್ತವಃ ಸ್ವಯಂ ನು ಕೈಃ ಕೃತಸ್ತವ || ೪ ||
ಪ್ರಕಾಶಕಪ್ರಕಾಶಕೇ ಶ್ರುತಿಶ್ರುತಾದಿಧಾರಕೇ |
ತ್ವಮೇವ ಸರ್ವಕಾರಣಂ ತ್ವಮೇವ ಸರ್ವತಾರಣಮ್ || ೫ ||
ಸುಶಕ್ತಭಕ್ತಭಾವಿತಂ ಹಿ ತೇನ ಸರ್ವಥಾ ತತಮ್ |
ತದೇವ ಧಾಮ ತೇ ವರಂ ಯದೀಕ್ಷ್ಯತೇ ಬುಧೈಃ ಪರಮ್ || ೬ ||
ಸ್ಥಿರಾಶ್ಚರಾಶ್ಚ ಗೋಚರಾಃ ಪರತ್ರ ಚಾತ್ರ ವಾಽಂಬ ಯೇ |
ತ್ವದೇವ ತತ್ಸಮಾಗಮಃ ಪ್ರಮಾಣಮತ್ರ ಚಾಗಮಃ || ೭ ||
ನಮೋಽಸ್ತು ತೇ ಸರಸ್ವತಿ ಧ್ಯವಿತ್ರಿ ವಾಜಿನೀವತಿ |
ಪ್ರಸೀದ ಬುದ್ಧಿಚೇತನೇ ಸ್ವಭಕ್ತಹೃನ್ನಿಕೇತನೇ || ೮ ||
ಸ್ತುತೈವಂ ವಿಷ್ಣುಜಿಹ್ವಾ ಸಾ ಪ್ರಸನ್ನಾ ಸೂನೃತೇರಕಾ |
ಪ್ರಾಹಾವಿಷ್ಕೃತ್ಯ ಚಾತ್ಮಾನಂ ತುಷ್ಟಾಸ್ಮಿ ವರಯೇಪ್ಸಿತಮ್ || ೯ ||
ಸಕಂಬಲಸ್ಯ ಕುರು ಮೇ ಸಹಾಯಂ ಶಂಭುಗಾಯನೇ |
ಸುಸ್ವರತ್ವಾದಿ ಯಚ್ಛೇತಿ ಯಯಾಚೇಽಹಿಃ ಸರಸ್ವತೀಮ್ || ೧೦ ||
ವಾಗೀಶಾಹೋಭಯೋರಸ್ತು ದಿವ್ಯನಾದರಹಸ್ಯಮಿತ್ |
ಸ್ತೋತ್ರಂ ಚಾಸ್ತು ಸ್ಖಲದ್ಗೀಷ್ಟ್ವಧೀಜಾಡ್ಯಾದಿಹರಂ ತ್ವಿದಮ್ || ೧೧ ||
ಇತಿ ಶ್ರೀವಾಸುದೇವಾನಂದಸರಸ್ವತೀ ವಿರಚಿತಂ ಶ್ರೀ ಸರಸ್ವತೀ ಸ್ತವಮ್ ||