ಸರಸ್ವತಿ ನಮಸ್ಯಾಮಿ ಚೇತನಾಂ ಹೃದಿ ಸಂಸ್ಥಿತಾಮ್ |
ಕಂಠಸ್ಥಾಂ ಪದ್ಮಯೋನಿಂ ತ್ವಾಂ ಹ್ರೀಂಕಾರಾಂ ಸುಪ್ರಿಯಾಂ ಸದಾ || ೧ ||
ಮತಿದಾಂ ವರದಾಂ ಚೈವ ಸರ್ವಕಾಮಫಲಪ್ರದಾಮ್ |
ಕೇಶವಸ್ಯ ಪ್ರಿಯಾಂ ದೇವೀಂ ವೀಣಾಹಸ್ತಾಂ ವರಪ್ರದಾಮ್ || ೨ ||
ಮಂತ್ರಪ್ರಿಯಾಂ ಸದಾ ಹೃದ್ಯಾಂ ಕುಮತಿಧ್ವಂಸಕಾರಿಣೀಮ್ |
ಸ್ವಪ್ರಕಾಶಾಂ ನಿರಾಲಂಬಾಮಜ್ಞಾನತಿಮಿರಾಪಹಾಮ್ || ೩ ||
ಮೋಕ್ಷಪ್ರಿಯಾಂ ಶುಭಾಂ ನಿತ್ಯಾಂ ಸುಭಗಾಂ ಶೋಭನಪ್ರಿಯಾಮ್ |
ಪದ್ಮೋಪವಿಷ್ಟಾಂ ಕುಂಡಲಿನೀಂ ಶುಕ್ಲವಸ್ತ್ರಾಂ ಮನೋಹರಾಮ್ || ೪ ||
ಆದಿತ್ಯಮಂಡಲೇ ಲೀನಾಂ ಪ್ರಣಮಾಮಿ ಜನಪ್ರಿಯಾಮ್ |
ಜ್ಞಾನಾಕಾರಾಂ ಜಗದ್ದ್ವೀಪಾಂ ಭಕ್ತವಿಘ್ನವಿನಾಶಿನೀಮ್ || ೫ ||
ಇತಿ ಸತ್ಯಂ ಸ್ತುತಾ ದೇವೀ ವಾಗೀಶೇನ ಮಹಾತ್ಮನಾ |
ಆತ್ಮಾನಂ ದರ್ಶಯಾಮಾಸ ಶರದಿಂದುಸಮಪ್ರಭಾಮ್ || ೬ ||
ಶ್ರೀಸರಸ್ವತ್ಯುವಾಚ |
ವರಂ ವೃಣೀಷ್ವ ಭದ್ರಂ ತ್ವಂ ಯತ್ತೇ ಮನಸಿ ವರ್ತತೇ |
ಬೃಹಸ್ಪತಿರುವಾಚ |
ಪ್ರಸನ್ನಾ ಯದಿ ಮೇ ದೇವಿ ಪರಂ ಜ್ಞಾನಂ ಪ್ರಯಚ್ಛ ಮೇ || ೭ ||
ಶ್ರೀಸರಸ್ವತ್ಯುವಾಚ |
ದತ್ತಂ ತೇ ನಿರ್ಮಲಂ ಜ್ಞಾನಂ ಕುಮತಿಧ್ವಂಸಕಾರಕಮ್ |
ಸ್ತೋತ್ರೇಣಾನೇನ ಮಾಂ ಭಕ್ತ್ಯಾ ಯೇ ಸ್ತುವಂತಿ ಸದಾ ನರಾಃ || ೮ ||
ಲಭಂತೇ ಪರಮಂ ಜ್ಞಾನಂ ಮಮ ತುಲ್ಯಪರಾಕ್ರಮಾಃ |
ಕವಿತ್ವಂ ಮತ್ಪ್ರಸಾದೇನ ಪ್ರಾಪ್ನುವಂತಿ ಮನೋಗತಮ್ || ೯ ||
ತ್ರಿಸಂಧ್ಯಂ ಪ್ರಯತೋ ಭೂತ್ವಾ ಯಸ್ತ್ವಿಮಂ ಪಠತೇ ನರಃ |
ತಸ್ಯ ಕಂಠೇ ಸದಾ ವಾಸಂ ಕರಿಷ್ಯಾಮಿ ನ ಸಂಶಯಃ || ೧೦ ||
ಇತಿ ಶ್ರೀರುದ್ರಯಾಮಲೇ ಶ್ರೀಬೃಹಸ್ಪತಿಕೃತ ಶ್ರೀ ಸರಸ್ವತೀ ಸ್ತೋತ್ರಮ್ ||