ಸದಸದ್ದೇವಿ ಯತ್ಕಿಂಚಿನ್ಮೋಕ್ಷದಾಯ್ಯರ್ಥವತ್ಪದಮ್ || ೧ ||
ತತ್ಸರ್ವಂ ತ್ವಯಿ ಸಂಯೋಗಿ ಯೋಗಿವದ್ದೇವಿ ಸಂಸ್ಥಿತಮ್ |
ಅಕ್ಷರಂ ಪರಮಂ ದೇವಿ ಯತ್ರ ಸರ್ವಂ ಪ್ರತಿಷ್ಠಿತಮ್ |
ಅಕ್ಷರಂ ಪರಮಂ ಬ್ರಹ್ಮ ವಿಶ್ವಂ ಚೈತತ್ ಕ್ಷರಾತ್ಮಕಮ್ || ೨ ||
ದಾರುಣ್ಯವಸ್ಥಿತೋ ವಹ್ನಿರ್ಭೂಮೌ ಗಂಧೋ ಯಥಾ ಧ್ರುವಮ್ |
ತಥಾ ತ್ವಯಿ ಸ್ಥಿತಂ ಬ್ರಹ್ಮ ಜಗಚ್ಚೇದಮಶೇಷತಃ || ೮ ||
ಓಂಕಾರಾಕ್ಷರಸಂಸ್ಥಾನಂ ಯತ್ತದ್ದೇವಿ ಸ್ಥಿರಾಸ್ಥಿರಮ್ |
ತತ್ರ ಮಾತ್ರಾತ್ರಯಂ ಸರ್ವಮಸ್ತಿ ಯದ್ದೇವಿ ನಾಸ್ತಿ ಚ || ೪ ||
ತ್ರಯೋ ಲೋಕಾಸ್ತ್ರಯೋ ವೇದಾಸ್ತ್ರೈವಿದ್ಯಂ ಪಾವಕತ್ರಯಮ್ |
ತ್ರೀಣಿ ಜ್ಯೋತೀಂಷಿ ವರ್ಗಾಶ್ಚ ತ್ರಯೋ ಧರ್ಮಾದಯಸ್ತಥಾ || ೫ ||
ತ್ರಯೋ ಗುಣಾಸ್ತ್ರಯೋ ವರ್ಣಾಸ್ತ್ರಯೋ ದೇವಾಸ್ತಥಾ ಕ್ರಮಾತ್ |
ತ್ರೈಧಾತವಸ್ತಥಾವಸ್ಥಾಃ ಪಿತರಶ್ಚೈವಮಾದಯಃ || ೬ ||
ಏತನ್ಮಾತ್ರಾತ್ರಯಂ ದೇವಿ ತವ ರೂಪಂ ಸರಸ್ವತಿ |
ವಿಭಿನ್ನದರ್ಶನಾಮಾದ್ಯಾಂ ಬ್ರಹ್ಮಣೋ ಹಿ ಸನಾತನೀಮ್ || ೭ ||
ಸೋಮಸಂಸ್ಥಾ ಹವಿಃಸಂಸ್ಥಾ ಪಾಕಸಂಸ್ಥಾ ಸನಾತನೀ |
ತಾಸ್ತ್ವದುಚ್ಚಾರಣಾದ್ದೇವಿ ಕ್ರಿಯಂತೇ ಬ್ರಹ್ಮವಾದಿಭಿಃ || ೮ ||
ಅನಿರ್ದೇಶ್ಯಪದಂ ತ್ವೇತದರ್ಧಮಾತ್ರಾಶ್ರಿತಂ ಪರಮ್ |
ಅವಿಕಾರ್ಯಕ್ಷಯಂ ದಿವ್ಯಂ ಪರಿಣಾಮವಿವರ್ಜಿತಮ್ || ೯ ||
ತವೈತತ್ ಪರಮಂ ರೂಪಂ ಯನ್ನ ಶಕ್ಯಂ ಮಯೋದಿತುಮ್ |
ನ ಚಾಸ್ಯೇನ ನ ವಾ ಜಿಹ್ವಾತಾಲ್ವೋಷ್ಠಾದಿಭಿರುಚ್ಯತೇ || ೧೦ ||
ಸ ವಿಷ್ಣುಃ ಸ ವೃಷೋ ಬ್ರಹ್ಮಾ ಚಂದ್ರಾರ್ಕಜ್ಯೋತಿರೇವ ಚ |
ವಿಶ್ವಾವಾಸಂ ವಿಶ್ವರೂಪಂ ವಿಶ್ವಾತ್ಮಾನಮನೀಶ್ವರಮ್ || ೧೧ ||
ಸಾಂಖ್ಯಸಿದ್ಧಾಂತವೇದೋಕ್ತಂ ಬಹುಶಾಖಾಸ್ಥಿರೀಕೃತಮ್ |
ಅನಾದಿಮಧ್ಯನಿಧನಂ ಸದಸಚ್ಚ ಸದೇವ ತು || ೧೨ ||
ಏಕಂ ತ್ವನೇಕಧಾಪ್ಯೇಕಭಾವವೇದಸಮಾಶ್ರಿತಮ್ |
ಅನಾಖ್ಯಂ ಷಡ್ಗುಣಾಖ್ಯಂ ಚ ಬಹ್ವಾಖ್ಯಂ ತ್ರಿಗುಣಾಶ್ರಯಮ್ || ೧೩ ||
ನಾನಾಶಕ್ತಿವಿಭಾವಜ್ಞಂ ನಾನಾಶಕ್ತಿವಿಭಾವಕಮ್ |
ಸುಖಾತ್ ಸುಖಂ ಮಹತ್ಸೌಖ್ಯಂ ರೂಪಂ ತತ್ತ್ವಗುಣಾತ್ಮಕಮ್ || ೧೪ ||
ಏವಂ ದೇವಿ ತ್ವಯಾ ವ್ಯಾಪ್ತಂ ಸಕಲಂ ನಿಷ್ಕಲಂ ಚ ಯತ್ |
ಅದ್ವೈತಾವಸ್ಥಿತಂ ಬ್ರಹ್ಮ ಯಚ್ಚ ದ್ವೈತೇ ವ್ಯವಸ್ಥಿತಮ್ || ೧೫ ||
ಯೇಽರ್ಥಾ ನಿತ್ಯಾ ಯೇ ವಿನಶ್ಯಂತಿ ಚಾನ್ಯೇ
ಯೇಽರ್ಥಾಃ ಸ್ಥೂಲಾ ಯೇ ತಥಾ ಸಂತಿ ಸೂಕ್ಷ್ಮಾಃ |
ಯೇ ವಾ ಭೂಮೌ ಯೇಽಂತರಿಕ್ಷೇಽನ್ಯತೋ ವಾ
ತೇಷಾಂ ದೇವಿ ತ್ವತ್ತ ಏವೋಪಲಬ್ಧಿಃ || ೧೬ ||
ಯದ್ವಾ ಮೂರ್ತಂ ಯದಮೂರ್ತಂ ಸಮಸ್ತಂ
ಯದ್ವಾ ಭೂತೇಷ್ವೇಕಮೇಕಂ ಚ ಕಿಂಚಿತ್ |
ಯಚ್ಚ ದ್ವೈತೇ ವ್ಯಸ್ತಭೂತಂ ಚ ಲಕ್ಷ್ಯಂ
ತತ್ಸಂಬದ್ಧಂ ತ್ವತ್ಸ್ವರೈರ್ವ್ಯಂಜನೈಶ್ಚ || ೧೭ ||
ಇತಿ ಶ್ರೀವಾಮನಪುರಾಣೇ ದ್ವಾತ್ರಿಂಶೋಽಧ್ಯಾಯೇ ಮಾರ್ಕಂಡೇಯ ಪ್ರೋಕ್ತಂ ಶ್ರೀ ಸರಸ್ವತೀ ಸ್ತೋತ್ರಮ್ ||