-ವಿನಿದ್ರಪದ್ಮಾಸನಸನ್ನಿವಿಷ್ಟಾಮ್ |
ಚಂಚದ್ವಿಪಂಚೀಕಲನಾದಮುಗ್ಧಾಂ
ಶುದ್ಧಾಂ ದಧೇಽಂತರ್ವಿಸರತ್ಸುಗಂಧಾಮ್ || ೧ ||
ಶ್ರುತಿಃಸ್ಮೃತಿಸ್ತತ್ಪದಪದ್ಮಗಂಧಿ-
-ಪ್ರಭಾಮಯಂ ವಾಙ್ಮಯಮಸ್ತಪಾರಮ್ |
ಯತ್ಕೋಣಕೋಣಾಭಿನಿವಿಷ್ಟಮಿಷ್ಟಂ
ತಾಮಂಬಿಕಾಂ ಸರ್ವಸಿತಾಂ ಶ್ರಿತಾಃ ಸ್ಮಃ || ೨ ||
ನ ಕಾಂದಿಶೀಕಂ ರವಿತೋಽತಿವೇಲಂ
ತಂ ಕೌಶಿಕಂ ಸಂಸ್ಪೃಹಯೇ ನಿಶಾತಮ್ |
ಸಾವಿತ್ರಸಾರಸ್ವತಧಾಮಪಶ್ಯಂ
ಶಸ್ಯಂ ತಪೋಬ್ರಾಹ್ಮಣಮಾದ್ರಿಯೇ ತಮ್ || ೩ ||
ಶ್ರೀಶಾರದಾಂ ಪ್ರಾರ್ಥಿತಸಿದ್ಧವಿದ್ಯಾಂ
ಶ್ರೀಶಾರದಾಂಭೋಜಸಗೋತ್ರನೇತ್ರಾಮ್ |
ಶ್ರೀಶಾರದಾಂಭೋಜನಿವೀಜ್ಯಮಾನಾಂ
ಶ್ರೀಶಾರದಾಂಕಾನುಜನಿಂ ಭಜಾಮಿ || ೪ ||
ಚಕ್ರಾಂಗರಾಜಾಂಚಿತಪಾದಪದ್ಮಾಂ
ಪದ್ಮಾಲಯಾಽಭ್ಯರ್ಥಿತಸುಸ್ಮಿತಶ್ರೀಃ |
ಸ್ಮಿತಶ್ರಿಯಾ ವರ್ಷಿತಸರ್ವಕಾಮಾ
ವಾಮಾ ವಿಧೇಃ ಪೂರಯತಾಂ ಪ್ರಿಯಂ ನಃ || ೫ ||
ಬಾಹೋ ರಮಾಯಾಃ ಕಿಲ ಕೌಶಿಕೋಽಸೌ
ಹಂಸೋ ಭವತ್ಯಾಃ ಪ್ರಥಿತೋ ವಿವಿಕ್ತಃ |
ಜಗದ್ವಿಧಾತುರ್ಮಹಿಷಿ ತ್ವಮಸ್ಮಾನ್
ವಿಧೇಹಿ ಸಭ್ಯಾನ್ನಹಿ ಮಾತರಿಭ್ಯಾನ್ || ೬ ||
ಸ್ವಚ್ಛವ್ರತಃ ಸ್ವಚ್ಛಚರಿತ್ರಚುಂಚುಃ
ಸ್ವಚ್ಛಾಂತರಃ ಸ್ವಚ್ಛಸಮಸ್ತವೃತ್ತಿಃ |
ಸ್ವಚ್ಛಂ ಭವತ್ಯಾಃ ಪ್ರಪದಂ ಪ್ರಪನ್ನಃ
ಸ್ವಚ್ಛೇ ತ್ವಯಿ ಬ್ರಹ್ಮಣಿ ಜಾತು ಯಾತು || ೭ ||
ರವೀಂದುವಹ್ನಿದ್ಯುತಿಕಾರಿದೀಪ್ರಂ
ಸಿಂಹಾಸನಂ ಸಂತತವಾದ್ಯಗಾನಮ್ |
ವಿದೀಪಯನ್ಮಾತೃಕಧಾಮ ಯಾಮಃ
ಕಾರುಣ್ಯಪೂರ್ಣಾಮೃತವಾರಿವಾಹಮ್ || ೮ ||
ಶುಭ್ರಾಂ ಶುಭ್ರಸರೋಜಮುಗ್ಧವದನಾಂ ಶುಭ್ರಾಂಬರಾಲಂಕೃತಾಂ
ಶುಭ್ರಾಂಗೀಂ ಶುಭಶುಭ್ರಹಾಸ್ಯವಿಶದಾಂ ಶುಭ್ರಸ್ರಗಾಶೋಭಿನೀಮ್ |
ಶುಭ್ರೋದ್ದಾಮಲಲಾಮಧಾಮಮಹಿಮಾಂ ಶುಭ್ರಾಂತರಂಗಾಗತಾಂ
ಶುಭ್ರಾಭಾಂ ಭಯಹಾರಿಭಾವಭರಿತಾಂ ಶ್ರೀಭಾರತೀಂ ಭಾವಯೇ || ೯ ||
ಮುಕ್ತಾಲಂಕೃತಕುಂತಲಾಂತಸರಣಿಂ ರತ್ನಾಲಿಹಾರಾವಳಿಂ
ಕಾಂಚೀಕಾಂತೀವಲಗ್ನಲಗ್ನವಲಯಾಂ ವಜ್ರಾಂಗುಳೀಯಾಂಗುಳಿಮ್ |
ಲೀಲಾಚಂಚಲಲೋಚನಾಂಚಲಚಲಲ್ಲೋಕೇಶಲೋಲಾಲಕಾಂ
ಕಲ್ಯಾಮಾಕಲಯೇಽತಿವೇಲಮತುಲಾಂ ವಿತ್ಕಲ್ಪವಲ್ಲೀಕಲಾಮ್ || ೧೦ ||
ಪ್ರಯತೋ ಧಾರಯೇದ್ಯಸ್ತು ಸಾರಸ್ವತಮಿಯಂ ಸ್ತವಮ್ |
ಸಾರಸ್ವತಂ ತಸ್ಯ ಮಹಃ ಪ್ರತ್ಯಕ್ಷಮಚಿರಾದ್ಭವೇತ್ || ೧೧ ||
ವಾಗ್ಬೀಜಸಂಪುಟಂ ಸ್ತೋತ್ರಂ ಜಗನ್ಮಾತುಃ ಪ್ರಸಾದಜಮ್ |
ಶಿವಾಲಯೇ ಜಪನ್ ಮರ್ತ್ಯಃ ಪ್ರಾಪ್ನುಯಾದ್ಬುದ್ಧಿವೈಭವಮ್ || ೧೨ ||
ಸೂರ್ಯಗ್ರಹೇ ಪ್ರಜಪಿತಃ ಸ್ತವಃ ಸಿದ್ಧಿಕರಃ ಪರಃ |
ವಾರಾಣಸ್ಯಾಂ ಪುಣ್ಯತೀರ್ಥೇ ಸದ್ಯೋ ವಾಂಛಿತದಾಯಕಃ || ೧೩ ||
ಪಾದಾಂಭೋಜೇ ಸರಸ್ವತ್ಯಾಃ ಶಂಕರಾಚಾರ್ಯಭಿಕ್ಷುಣಾ |
ಕಾಶೀಪೀಠಾಧಿಪತಿನಾ ಗುಂಫಿತಾ ಸ್ರಕ್ ಸಮರ್ಪಿತಾ || ೧೪ ||
ಇತಿ ಕಾಶೀಪೀಠಾಧೀಶ್ವರಜಗದ್ಗುರು ಶಂಕರಾಚಾರ್ಯ ಸ್ವಾಮಿ ಶ್ರೀಮಹೇಶ್ವರಾನಂದ ಸರಸ್ವತೀ ವಿರಚಿತಂ ಶ್ರೀ ಸಿದ್ಧಸರಸ್ವತೀ ಸ್ತೋತ್ರಮ್ ||