ಮಾಲಾಪುಸ್ತಕಪದ್ಮಭೃಚ್ಚ ವರದಾ ಯಾ ಸರ್ವಭಾಷಾಸ್ಪದಾ |
ಯಾ ಶಂಖಸ್ಫಟಿಕರ್ಕ್ಷನಾಥವಿಶದಾ ಯಾ ಶಾರದಾ ಸರ್ವದಾ
ಪ್ರೀತಾ ತಿಷ್ಠತು ಮನ್ಮುಖೇ ಸುವರದಾ ವಾಗ್ಜಾಡ್ಯದಾ ಸರ್ವದಾ || ೧ ||
ಯಸ್ಯಾಸ್ತ್ರೀಣಿ ಗುಹಾಗತಾನಿ ಹಿ ಪದಾನ್ಯೇಕಂ ತ್ವನೇಕೇಡಿತಂ
ಸ್ತೋತುಂ ತಾಂ ನಿಗಮೇಡಿತಾಂ ಬುಧಕುಲಂ ಜಾತಂ ತ್ವಲಂ ವ್ರೀಡಿತಮ್ |
ಬ್ರಹ್ಮಾದ್ಯಾ ಅಪಿ ದೇವತಾ ನಹಿ ವಿದುರ್ಯಸ್ಯಾಃ ಪರಂ ಕ್ರೀಡಿತಂ
ಪ್ರಾರಬ್ಧಾತ್ರ ನುತಿರ್ಮಯೇವ ರುರುಣಾ ಶಾರ್ದೂಲವಿಕ್ರೀಡಿತಮ್ || ೨ ||
ಅಯಿ ಸರ್ವಗುಹಾಸ್ಥಿತೇಽಜಿತೇ
ಮಯಿ ತೇಽಪಾಂಗದೃಗಸ್ತು ಪೂಜಿತೇ |
ತ್ವದೃತೇ ನಹಿ ವಾಗಧೀಶ್ವರಿ
ವ್ಯವಹಾರೋಽಪಿ ಪರಾವರೇಶ್ವರಿ || ೩ ||
ಸಮಯೋಚಿತವಾಕ್ಪ್ರದೇ ಮುದೇ
ವಿದುಷಾಂ ಸಂಸದಿ ವಾದಿವಾದದೇ |
ಮಯಿ ಮಾತರಶೇಷಧಾರಣಾ
ದಯಿತೇಽಜಸ್ಯ ಸದಾಸ್ತು ತಾರಣಾ || ೪ ||
ಯದ್ಧಸ್ತೇ ಕಮಲಂ ಚ ತತ್ರ ಕಮಲಾ ಲೀಲಾವಿಹಾರೀ ಹರಿ-
-ಸ್ತಸ್ಯಾಃ ಸನ್ನಿಕಟೇಽಸ್ಯ ನಾಭಿಕಮಲೇ ಸ್ಯಾಲ್ಲೋಕಮೂಲೇ ವಿಧಿಃ |
ವೇದಾ ಭೇದಭಿದೋ ಮುಖೇಷು ಚ ವಿಧೇರ್ಯೇ ಸ್ವಪ್ರಮಾಣಾ ನೃಣಾಂ
ತೇಭ್ಯೋ ಯಜ್ಞವಿಧಿಸ್ತತೋಽಮರಗಣಾ ಜೀವಂತಿ ಸಾ ಪಾತು ವಾಕ್ || ೫ ||
ನಮೋ ನಮಸ್ತೇಽಸ್ತು ಮಹಾಸರಸ್ವತಿ
ಪ್ರಸೀದ ಮಾತರ್ಜಗತೋ ಮಹಸ್ವತಿ |
ಪರೇಶಿ ವಾಗ್ವಾದಿನಿ ದೇವಿ ಭಾಸ್ವತಿ
ಪ್ರಕಾಶಕೇ ತೇಽಸ್ತು ನಭೋ ಯಶಸ್ವತಿ || ೬ ||
ತ್ರಿಷಷ್ಟಿವರ್ಣಾಽಽಶುಗಯುಕ್ಪರಾ ಯಾ
ಭೂತ್ವಾಥ ಪಶ್ಯಂತ್ಯಭಿಧಾಥ ಮಧ್ಯಾ |
ಸ್ಥಾನಪ್ರಯತ್ನಾದಿವಶಾನ್ಮುಖೇ ಚ
ಯಾ ವೈಖರೀತಿ ಪ್ರಣಮಾಮಿ ತಾಂ ಗಾಮ್ || ೭ ||
ತ್ವಂ ಬ್ರಹ್ಮಯೋನಿರಪರಾ ಸರಸ್ವತಿ ಪರಾವರಾ |
ಸಾಕ್ಷಾತ್ ಸ್ವಭಕ್ತಹೃತ್ಸಂಸ್ಥೇ ಪ್ರಸೀದ ಮತಿಚೇತನೇ || ೮ ||
ಸರಸ್ವತೀಸ್ತುತಿಮಿಮಾಂ ವಾಸುದೇವಸರಸ್ವತೀ |
ಚಕ್ರೇ ಯಮನುಜಪ್ರಾಹ ನರಸಿಂಹಸರಸ್ವತೀ || ೯ ||
ಇತಿ ಶ್ರೀವಾಸುದೇವಾನಂದಸರಸ್ವತೀ ವಿರಚಿತಂ ಶ್ರೀ ಸರಸ್ವತೀ ಸ್ತುತಿಃ ||