శ్రీశంకర ఉవాచ |
అథాతః సంప్రవక్ష్యామి లక్ష్మీస్తోత్రమనుత్తమమ్ |
పఠనాచ్ఛ్రవణాద్యస్య నరో మోక్షమవాప్నుయాత్ || ౧ ||
గుహ్యాద్గుహ్యతరం పుణ్యం సర్వదేవనమస్కృతమ్ |
సర్వమంత్రమయం సాక్షాచ్ఛృణు పర్వతనందిని || ౨ ||
అనంతరూపిణీ లక్ష్మీరపారగుణసాగరీ |
అణిమాదిసిద్ధిదాత్రీ శిరసా ప్రణమామ్యహమ్ || ౩ ||
ఆపదుద్ధారిణీ త్వం హి ఆద్యా శక్తిః శుభా పరా |
ఆద్యా ఆనందదాత్రీ చ శిరసా ప్రణమామ్యహమ్ || ౪ ||
ఇందుముఖీ ఇష్టదాత్రీ ఇష్టమంత్రస్వరూపిణీ |
ఇచ్ఛామయీ జగన్మాతః శిరసా ప్రణమామ్యహమ్ || ౫ ||
ఉమా ఉమాపతేస్త్వంతు హ్యుత్కంఠాకులనాశినీ |
ఉర్వీశ్వరీ జగన్మాతర్లక్ష్మి దేవి నమోఽస్తు తే || ౬ ||
ఐరావతపతిపూజ్యా ఐశ్వర్యాణాం ప్రదాయినీ |
ఔదార్యగుణసంపన్నా లక్ష్మి దేవి నమోఽస్తు తే || ౭ ||
కృష్ణవక్షఃస్థితా దేవి కలికల్మషనాశినీ |
కృష్ణచిత్తహరా కర్త్రీ శిరసా ప్రణమామ్యహమ్ || ౮ ||
కందర్పదమనా దేవి కల్యాణీ కమలాననా |
కరుణార్ణవసంపూర్ణా శిరసా ప్రణమామ్యహమ్ || ౯ ||
ఖంజనాక్షీ ఖగనాసా దేవి ఖేదవినాశినీ |
ఖంజరీటగతిశ్చైవ శిరసా ప్రణమామ్యహమ్ || ౧౦ ||
గోవిందవల్లభా దేవీ గంధర్వకులపావనీ |
గోలోకవాసినీ మాతః శిరసా ప్రణమామ్యహమ్ || ౧౧ ||
జ్ఞానదా గుణదా దేవి గుణాధ్యక్షా గుణాకరీ |
గంధపుష్పధరా మాతః శిరసా ప్రణమామ్యహమ్ || ౧౨ ||
ఘనశ్యామప్రియా దేవి ఘోరసంసారతారిణీ |
ఘోరపాపహరా చైవ శిరసా ప్రణమామ్యహమ్ || ౧౩ ||
చతుర్వేదమయీ చింత్యా చిత్తచైతన్యదాయినీ |
చతురాననపూజ్యా చ శిరసా ప్రణమామ్యహమ్ || ౧౪ ||
చైతన్యరూపిణీ దేవి చంద్రకోటిసమప్రభా |
చంద్రార్కనఖరజ్యోతిర్లక్ష్మి దేవి నమామ్యహమ్ || ౧౫ ||
చపలా చతురాధ్యక్షీ చరమే గతిదాయినీ |
చరాచరేశ్వరీ లక్ష్మి శిరసా ప్రణమామ్యహమ్ || ౧౬ ||
ఛత్రచామరయుక్తా చ ఛలచాతుర్యనాశినీ |
ఛిద్రౌఘహారిణీ మాతః శిరసా ప్రణమామ్యహమ్ || ౧౭ ||
జగన్మాతా జగత్కర్త్రీ జగదాధారరూపిణీ |
జయప్రదా జానకీ చ శిరసా ప్రణమామ్యహమ్ || ౧౮ ||
జానకీశప్రియా త్వం హి జనకోత్సవదాయినీ |
జీవాత్మనాం చ త్వం మాతః శిరసా ప్రణమామ్యహమ్ || ౧౯ ||
ఝింజీరవస్వనా దేవి ఝంఝావాతనివారిణీ |
ఝర్ఝరప్రియవాద్యా చ శిరసా ప్రణమామ్యహమ్ || ౨౦ ||
టంకకదాయినీ త్వం హి త్వం చ ఠక్కారరూపిణీ | [అర్థప్రదాయినీం]
ఢక్కాదివాద్యప్రణయా డంఫవాద్యవినోదినీ |
డమరుప్రణయా మాతః శిరసా ప్రణమామ్యహమ్ || ౨౧ ||
తప్తకాంచనవర్ణాభా త్రైలోక్యలోకతారిణీ |
త్రిలోకజననీ లక్ష్మి శిరసా ప్రణమామ్యహమ్ || ౨౨ ||
త్రైలోక్యసుందరీ త్వం హి తాపత్రయనివారిణీ |
త్రిగుణధారిణీ మాతః శిరసా ప్రణమామ్యహమ్ || ౨౩ ||
త్రైలోక్యమంగళా త్వం హి తీర్థమూలపదద్వయా |
త్రికాలజ్ఞా త్రాణకర్త్రీ శిరసా ప్రణమామ్యహమ్ || ౨౪ ||
దుర్గతినాశినీ త్వం హి దారిద్ర్యాపద్వినాశినీ |
ద్వారకావాసినీ మాతః శిరసా ప్రణమామ్యహమ్ || ౨౫ ||
దేవతానాం దురారాధ్యా దుఃఖశోకవినాశినీ |
దివ్యాభరణభూషాంగీ శిరసా ప్రణమామ్యహమ్ || ౨౬ ||
దామోదరప్రియా త్వం హి దివ్యయోగప్రదర్శినీ |
దయామయీ దయాధ్యక్షీ శిరసా ప్రణమామ్యహమ్ || ౨౭ ||
ధ్యానాతీతా ధరాధ్యక్షా ధనధాన్యప్రదాయినీ |
ధర్మదా ధైర్యదా మాతః శిరసా ప్రణమామ్యహమ్ || ౨౮ ||
నవగోరోచనా గౌరీ నందనందనగేహినీ |
నవయౌవనచార్వంగీ శిరసా ప్రణమామ్యహమ్ || ౨౯ ||
నానారత్నాదిభూషాఢ్యా నానారత్నప్రదాయినీ |
నితంబినీ నలినాక్షీ లక్ష్మి దేవి నమోఽస్తు తే || ౩౦ ||
నిధువనప్రేమానందా నిరాశ్రయగతిప్రదా |
నిర్వికారా నిత్యరూపా లక్ష్మి దేవి నమోఽస్తు తే || ౩౧ ||
పూర్ణానందమయీ త్వం హి పూర్ణబ్రహ్మసనాతనీ |
పరాశక్తిః పరాభక్తిర్లక్ష్మి దేవి నమోఽస్తు తే || ౩౨ ||
పూర్ణచంద్రముఖీ త్వం హి పరానందప్రదాయినీ |
పరమార్థప్రదా లక్ష్మి శిరసా ప్రణమామ్యహమ్ || ౩౩ ||
పుండరీకాక్షిణీ త్వం హి పుండరీకాక్షగేహినీ |
పద్మరాగధరా త్వం హి శిరసా ప్రణమామ్యహమ్ || ౩౪ ||
పద్మా పద్మాసనా త్వం హి పద్మమాలావిధారిణీ |
ప్రణవరూపిణీ మాతః శిరసా ప్రణమామ్యహమ్ || ౩౫ ||
ఫుల్లేందువదనా త్వం హి ఫణివేణి విమోహినీ |
ఫణిశాయిప్రియా మాతః శిరసా ప్రణమామ్యహమ్ || ౩౬ ||
విశ్వకర్త్రీ విశ్వభర్త్రీ విశ్వత్రాత్రీ విశ్వేశ్వరీ |
విశ్వారాధ్యా విశ్వబాహ్యా లక్ష్మి దేవి నమోఽస్తు తే || ౩౭ ||
విష్ణుప్రియా విష్ణుశక్తిర్బీజమంత్రస్వరూపిణీ |
వరదా వాక్యసిద్ధా చ శిరసా ప్రణమామ్యహమ్ || ౩౮ ||
వేణువాద్యప్రియా త్వం హి వంశీవాద్యవినోదినీ |
విద్యుద్గౌరీ మహాదేవి లక్ష్మి దేవి నమోఽస్తు తే || ౩౯ ||
భుక్తిముక్తిప్రదా త్వం హి భక్తానుగ్రహకారిణీ |
భవార్ణవత్రాణకర్త్రీ లక్ష్మి దేవి నమోఽస్తు తే || ౪౦ ||
భక్తప్రియా భాగీరథీ భక్తమంగళదాయినీ |
భయదాఽభయదాత్రీ చ లక్ష్మి దేవి నమోఽస్తు తే || ౪౧ ||
మనోఽభీష్టప్రదా త్వం హి మహామోహవినాశినీ |
మోక్షదా మానదాత్రీ చ లక్ష్మి దేవి నమోఽస్తు తే || ౪౨ ||
మహాధన్యా మహామాన్యా మాధవమనమోహినీ |
ముఖరాప్రాణహంత్రీ చ లక్ష్మి దేవి నమోఽస్తు తే || ౪౩ ||
యౌవనపూర్ణసౌందర్యా యోగమాయా యోగేశ్వరీ |
యుగ్మశ్రీఫలవృక్షా చ లక్ష్మి దేవి నమోఽస్తు తే || ౪౪ ||
యుగ్మాంగదవిభూషాఢ్యా యువతీనాం శిరోమణిః |
యశోదాసుతపత్నీ చ లక్ష్మి దేవి నమోఽస్తు తే || ౪౫ ||
రూపయౌవనసంపన్నా రత్నాలంకారధారిణీ |
రాకేందుకోటిసౌందర్యా లక్ష్మి దేవి నమోఽస్తు తే || ౪౬ ||
రమా రామా రామపత్నీ రాజరాజేశ్వరీ తథా |
రాజ్యదా రాజ్యహంత్రీ చ లక్ష్మి దేవి నమోఽస్తు తే || ౪౭ ||
లీలాలావణ్యసంపన్నా లోకానుగ్రహకారిణీ |
లలనా ప్రీతిదాత్రీ చ లక్ష్మి దేవి నమోఽస్తు తే || ౪౮ ||
విద్యాధరీ తథా విద్యా వసుదా త్వం హి వందితా |
వింధ్యాచలవాసినీ చ లక్ష్మి దేవి నమోఽస్తు తే || ౪౯ ||
శుభ్రకాంచనగౌరాంగీ శంఖకంకణధారిణీ |
శుభదా శీలసంపన్నా లక్ష్మి దేవి నమోఽస్తు తే || ౫౦ ||
షట్చక్రభేదినీ త్వం హి షడైశ్వర్యప్రదాయినీ |
షోడశీ వయసా త్వం హి లక్ష్మి దేవి నమోఽస్తు తే || ౫౧ ||
సదానందమయీ త్వం హి సర్వసంపత్తిదాయినీ |
సంసారతారిణీ దేవి శిరసా ప్రణమామ్యహమ్ || ౫౨ ||
సుకేశీ సుఖదా దేవి సుందరీ సుమనోరమా |
సురేశ్వరీ సిద్ధిదాత్రీ శిరసా ప్రణమామ్యహమ్ || ౫౩ ||
సర్వసంకటహంత్రీ త్వం సత్యసత్త్వగుణాన్వితా |
సీతాపతిప్రియా దేవి శిరసా ప్రణమామ్యహమ్ || ౫౪ ||
హేమాంగినీ హాస్యముఖీ హరిచిత్తవిమోహినీ |
హరిపాదప్రియా దేవి శిరసా ప్రణమామ్యహమ్ || ౫౫ ||
క్షేమంకరీ క్షమాదాత్రీ క్షౌమవాసవిధారిణీ |
క్షీణమధ్యా చ క్షేత్రాంగీ లక్ష్మి దేవి నమోఽస్తు తే || ౫౬ ||
శ్రీశంకర ఉవాచ |
అకారాది క్షకారాంతం లక్ష్మీదేవ్యాః స్తవం శుభమ్ |
పఠితవ్యం ప్రయత్నేన త్రిసంధ్యం చ దినే దినే || ౫౭ ||
పూజనీయా ప్రయత్నేన కమలా కరుణామయీ |
వాంఛాకల్పలతా సాక్షాద్భుక్తిముక్తిప్రదాయినీ || ౫౮ ||
ఇదం స్తోత్రం పఠేద్యస్తు శృణుయాచ్ఛ్రావయేదపి |
ఇష్టసిద్ధిర్భవేత్తస్య సత్యం సత్యం హి పార్వతి || ౫౯ ||
ఇదం స్తోత్రం మహాపుణ్యం యః పఠేద్భక్తిసంయుతః |
తం చ దృష్ట్వా భవేన్మూకో వాదీ సత్యం న సంశయః || ౬౦ ||
శృణుయాచ్ఛ్రావయేద్యస్తు పఠేద్వా పాఠయేదపి |
రాజానో వశమాయాంతి తం దృష్ట్వా గిరినందిని || ౬౧ ||
తం దృష్ట్వా దుష్టసంఘాశ్చ పలాయంతే దిశో దశ |
భూతప్రేతగ్రహా యక్షా రాక్షసాః పన్నగాదయః |
విద్రవంతి భయార్తా వై స్తోత్రస్యాపి చ కీర్తనాత్ || ౬౨ ||
సురాశ్చ అసురాశ్చైవ గంధర్వాః కిన్నరాదయః |
ప్రణమంతి సదా భక్త్యా తం దృష్ట్వా పాఠకం ముదా || ౬౩ ||
ధనార్థీ లభతే చార్థం పుత్రార్థీ చ సుతం లభేత్ |
రాజ్యార్థీ లభతే రాజ్యం స్తవరాజస్య కీర్తనాత్ || ౬౪ ||
బ్రహ్మహత్యా సురాపానం స్తేయం గుర్వంగనాగమః |
మహాపాపోపపాపం చ తరంతి స్తవకీర్తనాత్ || ౬౫ ||
గద్యపద్యమయీ వాణీ ముఖాత్తస్య ప్రజాయతే |
అష్టసిద్ధిమవాప్నోతి లక్ష్మీస్తోత్రస్య కీర్తనాత్ || ౬౬ ||
వంధ్యా చాపి లభేత్ పుత్రం గర్భిణీ ప్రసవేత్సుతమ్ |
పఠనాత్ స్మరణాత్ సత్యం వచ్మి తే గిరినందిని || ౬౭ ||
భూర్జపత్రే సమాలిఖ్య రోచనాకుంకుమేన తు |
భక్త్యా సంపూజయేద్యస్తు గంధపుష్పాక్షతైస్తథా || ౬౮ ||
ధారయేద్దక్షిణే బాహౌ పురుషః సిద్ధికాంక్షయా |
యోషిద్వామభుజే ధృత్వా సర్వసౌఖ్యమయీ భవేత్ || ౬౯ ||
విషం నిర్విషతాం యాతి అగ్నిర్యాతి చ శీతతామ్ |
శత్రవో మిత్రతాం యాంతి స్తవస్యాస్య ప్రసాదతః || ౭౦ ||
బహునా కిమిహోక్తేన స్తవస్యాస్య ప్రసాదతః |
వైకుంఠే చ వసేన్నిత్యం సత్యం వచ్మి సురేశ్వరి || ౭౧ ||
ఇతి రుద్రయామలే శివగౌరీసంవాదే అకారాదిక్షకారాంతవర్ణగ్రథితం శ్రీ కమలా స్తవః |